Ibinaba ang Babilonya Tungo sa Alabok

3. Ilarawan ang kadakilaan ng Kapangyarihang Pandaigdig ng Babilonya.

³ Pakinggan itong nakapupukaw na pahayag ng Diyos: “Bumaba ka at umupo ka sa alabok, O anak na dalaga ng Babilonya. Umupo ka sa lupa kung saan walang trono, O anak na babae ng mga Caldeo. Sapagkat hindi mo na muling mararanasan na maselan at mayumi ang itatawag sa iyo ng mga tao.” (Isaias 47:1) Maraming taon nang nakaluklok sa trono ang Babilonya bilang nangingibabaw na kapangyarihang pandaigdig. Siya “ang kagayakan ng mga kaharian”​—isang maunlad na sentro ng relihiyon, komersiyo, at militar. (Isaias 13:19) Sa karurukan ng tagumpay ng Babilonya, ang kaniyang imperyo ay umabot sa gawing timog hanggang sa hangganan ng Ehipto. At nang matalo niya ang Jerusalem noong 607 B.C.E., para bang ang Diyos mismo ay nawalan ng kakayahan na pigilin ang panlulupig nito! Kaya naman, ang tingin niya sa kaniyang sarili ay isang “anak na dalaga,” isa na hindi kailanman daranas ng pagsalakay ng dayuhan.b

4. Ano ang daranasin ng Babilonya?

⁴ Subalit, ang palalong “dalaga[ng]” ito ay patatalsikin sa kaniyang trono bilang ang kinikilalang kapangyarihang pandaigdig at ‘pauupuin sa alabok’ sa kahihiyan. (Isaias 26:5) Hindi na siya ituturing na “maselan at mayumi,” na gaya ng isang pinamihasang reyna. Kaya naman nag-utos si Jehova: “Kumuha ka ng gilingang pangkamay at maggiling ka ng harina. Alisin mo ang iyong talukbong. Hubarin mo ang mahabang saya. Ilantad mo ang binti. Tawirin mo ang mga ilog.” (Isaias 47:2) Matapos alipinin ang buong bansang Juda, ang Babilonya mismo ay pakikitunguhan ngayon bilang alipin! Pipilitin siya ng mga Medo at Persiano, na nagpatalsik sa kaniya mula sa kaniyang makapangyarihang posisyon, na gumawa ng kahiya-hiyang pagtatrabaho para sa kanila.