19, 20. (a) Paanong si Eliakim ay magiging isang pagpapala sa kaniyang bayan? (b) Ano ang mangyayari sa mga patuloy na umaasa kay Sebna?

¹⁹ Sa wakas, si Jehova ay gumamit ng makasagisag na pananalita upang ilarawan ang paglilipat ng kapangyarihan mula kay Sebna tungo kay Eliakim. Kaniyang sinabi: “‘Ibabaon ko siyang [si Eliakim] gaya ng tulos sa isang dakong namamalagi, at siya ay magiging gaya ng trono ng kaluwalhatian sa sambahayan ng kaniyang ama. At isasabit nila sa kaniya ang buong kaluwalhatian ng sambahayan ng kaniyang ama, ang mga inapo at ang mga supling, ang lahat ng maliliit na uri ng sisidlan, ang mga sisidlan na hugis-mangkok at gayundin ang lahat ng mga sisidlan na malalaking banga. Sa araw na iyon,’ ang sabi ni Jehova ng mga hukbo, ‘ang tulos [si Sebna] na nakabaon sa isang dakong namamalagi ay aalisin, at ito ay tutungkabin at malalaglag, at ang pasan na nakabitin dito ay mahihiwalay, sapagkat si Jehova mismo ang nagsalita nito.’”​—Isaias 22:23-25.

²⁰ Sa mga talatang ito ang unang tulos ay si Eliakim. Siya’y magiging isang “trono ng kaluwalhatian” sa sambahayan ng kaniyang ama, si Hilkias. Di-tulad ni Sebna, hindi niya dudulutan ng kasiraang-puri ang sambahayan o reputasyon ng kaniyang ama. Si Eliakim ay magiging isang namamalaging suhay sa mga sisidlan sa sambahayan, alalaong baga, sa iba pa na nasa paglilingkuran sa hari. (2 Timoteo 2:20, 21) Kabaligtaran nito, ang ikalawang tulos ay tumutukoy kay Sebna. Bagaman siya’y waring tiwasay, siya’y aalisin. Ang sinumang umaasa pa sa kaniya ay babagsak.

[Larawan sa pahina 239]

Si Eliakim ay ginawa ni Hezekias na isang “tulos sa isang dakong namamalagi”