3. Papaano tayo nakikinabang sa pagkaunawa sa mga ilustrasyon ni Jesus?

³ Pagkatapos ay ikinapit ni Jesus ang Isaias 6:9, 10, na tumutukoy ng isang bayan na bingi at bulag sa espirituwal. Gayunman, hindi tayo dapat maging ganiyan. Kung ating nauunawaan ang kaniyang mga ilustrasyon at tayo’y kumikilos, tayo ay maaaring maging maligayang-maligaya​—ngayon at sa walang-hanggang hinaharap. Ibinibigay ni Jesus sa atin ang masiglang katiyakang ito: “Maligaya ang inyong mga mata sapagkat nakakakita, at ang inyong mga tainga sapagkat nakakarinig.” (Mateo 13:16) Ang katiyakang iyan ay sumasaklaw sa lahat ng mga ilustrasyon ni Jesus, ngunit itutok natin ang ating pansin sa maikling talinghaga ng lambat, nasusulat sa Mateo 13:47-50.

Isang Ilustrasyon na May Malalim na Kahulugan

4. Ano ang inilahad ni Jesus bilang ilustrasyon, na nasusulat sa Mateo 13:47-50?

⁴ “Ang kaharian ng langit ay tulad sa isang lambat na inihulog sa dagat at nakahuli ng sari-saring isda. Nang mapuno iyon ay hinila nila sa katihan at, habang sila’y nakaupo, kanilang tinipon sa mga sisidlan ang mabubuti, ngunit ang mga di-karapat-dapat ay kanilang itinapon. Ganiyan ang mangyayari sa katapusan ng sistema ng mga bagay: ang mga anghel ay lalabas at ihihiwalay ang masasama sa matutuwid at ihahagis sila sa nag-aapoy na pugon. Diyan na nga ang pagtangis at ang pagngangalit ng kanilang mga ngipin.”

7. Ano ang ipinaghahalimbawa ni Jesus nang siya’y tumukoy ng tungkol sa mga isda?

⁷ Naaayon diyan, ang mga isda sa talinghagang ito ay kumakatawan sa mga tao. Sa gayon, nang sa Mat 13 talatang 49 ay banggitin ang pagbubukod ng mga balakyot sa mga matuwid, ito’y tumutukoy, hindi sa matuwid o masasamang bagay na nabubuhay sa dagat, kundi sa matuwid o masamang mga tao. Sa katulad na paraan, ang Mat 13 talatang 50 ay hindi dapat humila sa atin na isaisip ang tungkol sa mga hayop-dagat na tumatangis o nagngangalit ang mga ngipin. Hindi. Ang talinghagang ito ay tungkol sa pagtitipon sa mga tao at ang pagbubukud-bukod sa kanila pagkatapos, na totoong maselan, gaya ng ipinakikita ng resulta.

8. (a) Ano ang ating matututuhan tungkol sa resulta para sa di-karapat-dapat na mga isda? (b) Dahil sa sinabi tungkol sa di-karapat-dapat na mga isda, ano ang masasabi natin tungkol sa Kaharian?

⁸ Pansinin na ang di-karapat-dapat na mga isda, samakatuwid nga, ang masasama, ay ihahagis sa nag-aapoy na pugon, na kung saan sila’y tatangis at magngangalit ang mga ngipin. Sa ibang talata ang gayong pagtangis at pagngangalit ng ngipin ay iniugnay ni Jesus sa pagiging nasa labas ng Kaharian. (Mateo 8:12; 13:41, 42) Sa Mateo 5:22 at 18:9, binanggit pa niya ang “nag-aapoy na Gehenna,” tumutukoy sa walang-hanggang pagkapuksa. Hindi ba nagpapakita iyan kung gaano kahalaga na maunawaan ang kahulugan ng ilustrasyong ito at kumilos ayon sa gayong kahulugan? Lahat tayo ay nakaaalam na walang masasama ni magkakaroon man ng masasama sa Kaharian ng Diyos. Samakatuwid, nang sabihin ni Jesus na “ang kaharian ng langit ay tulad sa isang lambat,” ang ibig niyang sabihin ay kung tungkol sa Kaharian ng Diyos, may katangian ito na katulad ng sa lambat na inihuhulog upang matipon doon ang sari-saring uri ng mga isda.