• Tularan ang Awa ng Diyos Ngayon
    Ang Bantayan—1991 | Abril 15

    • 2. Anong payo ang ibinigay ni Jesus sa Mateo 18:15-17 tungkol sa pakikitungo sa malubhang pagkakasala?

      2 Ang Bibliya ay nagbibigay sa atin ng matalinong-unawa sa kaisipan ng Diyos, kahit na sa mga bagay na dapat nating gawin, kung ang sinuman ay nagkakasala laban sa atin. Sinabi ni Jesus sa kaniyang mga apostol, na sa bandang huli’y magiging mga tagapangasiwang Kristiyano: “Kung magkasala ang iyong kapatid, pumaroon ka at ipakilala ang kaniyang pagkakamali nang ikaw at siya lamang. Kung pakinggan ka, nahikayat mo ang iyong kapatid.” Ang kasalanan na nagawa rito ay hindi lamang isang basta personal na di-pagpansin sa kaninuman kundi isang seryosong pagkakasala, tulad baga ng pandaraya o paninirang-puri. Sinabi ni Jesus na kung ang hakbang na ito ay hindi lumulutas sa bagay na iyon at kung may mga testigong makukuha, ang mga ito’y dapat iharap ng taong pinagkasalahan upang patunayan na may nagawa ngang pagkakasala. Ito ba ang pinakahuling hakbangin na magagawa? Hindi. “Kung [ang nagkasala] ay hindi nakinig sa kanila, magsalita ka na sa kongregasyon. Kung hindi niya pakinggan kahit ang kongregasyon, ituring mo siyang basta isang tao ng mga bansa at isang maniningil ng buwis.”​—Mateo 18:15-17.

      3. Ano ang ibig sabihin ni Jesus sa pagsasabing ang isang di-nagsisising nagkasala ay kailangang ituring na “isang tao ng mga bansa at isang maniningil ng buwis”?

      3 Palibhasa’y mga Judio, maiintindihan ng mga apostol kung ano baga ang ibig sabihin ng pakikitungo sa isang nagkasala ng “basta isang tao ng mga bansa at isang maniningil ng buwis.” Ang mga Judio ay umiiwas ng pakikisama sa mga tao ng mga bansa, at kanilang hinahamak-hamak ang mga Judio na nagtatrabaho bilang mga maniningil ng buwis para sa mga Romano.a (Juan 4:9; Gawa 10:28) Samakatuwid, pinapayuhan ni Jesus ang mga alagad na kung ang isang makasalanan ay tinanggihan ng kongregasyon, sila’y hindi na makikisama sa kaniya. Gayunman, papaano naaayon iyan sa kung minsan ay pakikisalamuha ni Jesus sa mga maniningil ng buwis?

  • Tularan ang Awa ng Diyos Ngayon
    Ang Bantayan—1991 | Abril 15

    • a “Ang mga maniningil ng buwis ang lalung-lalo nang hinahamak ng mga mamamayang Judio ng Palestina sa mga ilang kadahilanan: (1) sila’y kumukulekta ng salapi para sa bansang banyaga na umuokupa sa lupain ng Israel, samakatuwid ay di-tuwirang nagbibigay ng suporta sa ganitong paglapastangan; (2) sila’y bantog sa pagiging magdaraya, na yumayaman sa ikapipinsala naman ng iba nilang mga kababayan; (3) ang kanilang gawain ay nagsangkot sa kanila sa palagiang pakikitungo sa mga Gentil, na anupa’t sila’y nagiging marumi sa rituwal. Ang paghamak sa mga maniningil ng buwis ay masusumpungan kapuwa sa B[agong] T[ipan] at sa literatura ng mga rabbi . . . Sang-ayon sa huling binanggit, ang pagkapoot ay dapat ipakita hanggang sa pamilya ng maniningil ng buwis.”​—The International Standard Bible Encyclopedia.