Malapit nang alisin ni Jehova ang lahat ng problema gamit ang kaniyang Kaharian. Ang mabuting balitang ito ay kailangang malaman ng mga tao. At gusto ni Jesus na ipangaral ng mga tagasunod niya ang mensaheng ito. (Mateo 28:​19, 20) Paano nasusunod ng mga Saksi ni Jehova ang utos na ito ni Jesus?

1. Paano natutupad ngayon ang Mateo 24:14?

Inihula ni Jesus: “Ang mabuting balitang ito tungkol sa Kaharian ay ipangangaral sa buong lupa.” (Mateo 24:14) Masayang ginagawa ng mga Saksi ni Jehova ang mahalagang atas na ito. Ipinapangaral namin ang mabuting balita sa buong mundo sa mahigit 1,000 wika! Ang napakalaking gawaing ito ay kailangan ng pagsisikap at dapat na organisado. Hindi namin ito magagawa kung wala ang tulong ni Jehova.

2. Anong mga pagsisikap ang ginagawa namin para mapangaralan ang mga tao?

Nangangaral kami kung saan may tao. Gaya ng mga Kristiyano noong unang siglo, nangangaral kami “sa bahay-bahay.” (Gawa 5:42) Dahil sa organisadong paraang ito, napapangaralan namin ang milyon-milyong tao kada taon. Madalas na walang tao sa mga bahay kaya nangangaral din kami sa mga pampublikong lugar. Lagi kaming gumagawa ng paraan para masabi sa iba ang tungkol kay Jehova at sa layunin niya.

3. Sino ang may pananagutang mangaral ng mabuting balita?

Pananagutan ng lahat ng tunay na Kristiyano na ipangaral ang mabuting balita sa iba. Seryoso kami sa pananagutang ito. Nangangaral kami sa abot ng aming makakaya kasi alam namin na buhay ang nakataya. (Basahin ang 1 Timoteo 4:16.) Hindi kami sinusuwelduhan sa gawaing ito dahil sinasabi ng Bibliya: “Tinanggap ninyo nang walang bayad, ibigay ninyo nang walang bayad.” (Mateo 10:​7, 8) Hindi lahat ay tatanggap sa mensahe namin, pero patuloy pa rin kaming mangangaral kasi bahagi ito ng pagsamba namin at nagpapasaya ito kay Jehova.

PAG-ARALAN

4. Nagsisikap kaming pangaralan ang lahat ng tao

VIDEO: Pangangaral sa “Pinakamalayong Bahagi ng Lupa” (7:​38)

• Ano ang hinahangaan mo sa pangangaral ng mga Saksi ni Jehova?

Basahin ang Mateo 22:39 at Roma 10:​13-15. Pagkatapos, talakayin ang mga tanong na ito:

• Paano ipinapakita ng pangangaral na mahal namin ang aming kapuwa?

• Ano ang nararamdaman ni Jehova sa mga nangangaral ng mabuting balita?​—Tingnan ang talata 15.

5. Kamanggagawa kami ng Diyos

Maraming karanasan ang nagpapakitang pinapatnubayan ni Jehova ang gawain namin. Tingnan ang halimbawa ng isang brother sa New Zealand na si Paul. Isang hapon, nakausap niya ang isang babae habang nagbabahay-bahay. Nang umaga ring iyon, nanalangin ang babae sa Diyos at ginamit niya ang pangalan ni Jehova. Hiniling niya na sana may dumalaw sa kaniya. “Pagkaraan ng tatlong oras, dumating ako sa bahay niya,” ang sabi ni Paul.

Basahin ang 1 Corinto 3:9. Pagkatapos, talakayin ang tanong na ito:

• Paano ipinapakita ng mga karanasan, gaya ng sa New Zealand, na pinapatnubayan ni Jehova ang gawaing pangangaral?

Basahin ang Gawa 1:8. Pagkatapos, talakayin ang tanong na ito:

• Bakit kailangan natin ang tulong ni Jehova kapag nangangaral tayo?

Alam mo ba?

Linggo-linggo, sa pulong sa gitnang sanlinggo, sinasanay kaming mangaral. Kung nakadalo ka na sa pulong na ito, ano ang masasabi mo sa pagsasanay na ito?

6. Sinusunod namin ang utos ng Diyos na mangaral

Noong unang siglo, may mga nagpapahinto sa mga tagasunod ni Jesus na mangaral. Ipinagtanggol ng mga Kristiyano noon ang karapatan nila na mangaral sa pamamagitan ng “legal na pagtatatag ng mabuting balita.” (Filipos 1:7) Ganiyan din ang ginagawa ng mga Saksi ni Jehova ngayon.a

VIDEO: Legal na Pagtatanggol sa Mabuting Balita (2:​28)

Basahin ang Gawa 5:​27-42. Pagkatapos, talakayin ang tanong na ito:

• Bakit hindi tayo hihinto sa pangangaral?​—Tingnan ang talata 29, 38, at 39.

SUMARYO

Inutusan ni Jesus ang mga tagasunod niya na ipangaral ang mabuting balita sa lahat ng bansa. Tinutulungan ni Jehova ang mga lingkod niya sa gawaing ito.

Ano ang Natutuhan Mo?

• Paano ipinapangaral ang mabuting balita sa buong mundo?

• Paano ipinapakita ng pangangaral na mahal namin ang aming kapuwa?

• Sa tingin mo, magiging masaya ba tayo kapag nangangaral tayo? Bakit?

TINGNAN DIN

Tingnan kung paano nangangaral ang mga Saksi ni Jehova sa malalaking lunsod.

Special Metropolitan Public Witnessing sa Paris (5:​11)

Ano ang ginawa ng mga Saksi ni Jehova para tulungan ang mga refugee?

Sinasapatan ang Espirituwal na Pagkauhaw ng mga Refugee (5:​59)

Pakinggan ang kuwento ng isang babae na ginamit ang buong buhay niya sa pangangaral at tingnan kung bakit siya naging masaya.

Masaya Ako sa Napili Kong Karera (6:​29)

Alamin ang ilang kaso sa korte na naipanalo ng mga Saksi at tingnan kung ano ang epekto nito sa pangangaral.

“Dumudulog sa Korte ang mga Mángangarál ng Kaharian” (Namamahala Na ang Kaharian ng Diyos!, kabanata 13)

Itinuro ni Jesus na dapat mabautismuhan ang mga Kristiyano. (Basahin ang Mateo 28:​19, 20.) Ano ang bautismo? At ano ang kailangang gawin ng isang tao para mabautismuhan siya?

1. Ano ang bautismo?

Ang salitang “bautismo” ay mula sa Griegong salita na nangangahulugang “ilublob,” o “ilubog,” sa tubig. Nang bautismuhan si Jesus, inilubog siya sa Ilog Jordan at ‘umahon siya sa tubig.’ (Marcos 1:​9, 10) Kaya kapag binautismuhan ang isang tunay na Kristiyano, dapat nakalubog ang buong katawan niya sa tubig.

2. Ano ang ipinapakita ng pagpapabautismo ng isang tao?

Kapag nagpabautismo ang isang tao, ipinapakita nito na inialay na niya ang buhay niya sa Diyos na Jehova. Paano ginagawa ang pag-aalay? Bago magpabautismo, sinasabi ng isang tao sa panalangin na gusto na niyang paglingkuran si Jehova habambuhay. Nangangako siya na si Jehova lang ang sasambahin niya at na uunahin niya sa buhay niya ang paggawa ng kalooban ng Diyos. “Dapat [na] niyang itakwil ang kaniyang sarili” at patuloy na sundin ang mga turo at halimbawa ni Jesus. (Mateo 16:24) Dahil sa pag-aalay at bautismo niya, nagkakaroon na siya ng mas malapít na kaugnayan kay Jehova at sa kaniyang mga kapuwa mananamba.

3. Ano ang kailangang gawin ng isang tao para mabautismuhan siya?

Bago ka mabautismuhan, mahalagang matuto ka tungkol kay Jehova at magkaroon ng pananampalataya sa kaniya. (Basahin ang Hebreo 11:6.) Habang dumarami ang kaalaman mo at tumitibay ang pananampalataya mo, mas lalo mong mamahalin si Jehova. Siguradong gusto mo ring sabihin sa iba ang tungkol sa kaniya at sundin ang mga pamantayan niya. (2 Timoteo 4:2; 1 Juan 5:3) Kung ‘nakakapamuhay nang karapat-dapat sa harap ni Jehova’ ang isang tao at ‘lubusan na niyang napapalugdan’ ang Diyos, puwede na siyang magpasiya na ialay ang buhay niya sa Diyos at magpabautismo.​—Colosas 1:​9, 10.a

PAG-ARALAN

4. Matuto sa bautismo ni Jesus

Basahin ang Mateo 3:​13-17 para malaman ang mga detalye sa bautismo ni Jesus. Pagkatapos, talakayin ang mga tanong na ito:

• Sanggol pa lang ba si Jesus nang bautismuhan siya?

• Paano siya binautismuhan? Winisikan lang ba siya ng tubig?

Sinimulang gawin ni Jesus ang mahalaga niyang atas mula sa Diyos pagkatapos niyang mabautismuhan. Basahin ang Lucas 3:​21-23 at Juan 6:38. Pagkatapos, talakayin ang tanong na ito:

• Pagkatapos ng bautismo ni Jesus, anong gawain ang inuna niya sa buhay niya?

5. Kaya mo ring magpabautismo

Sa simula, baka nahihirapan kang isipin na kaya mong mag-alay at magpabautismo. Pero habang nag-aaral ka ng Bibliya, mas magkakaroon ka ng kumpiyansa na gawin ang mahalagang desisyong ito. Tingnan ang ilang halimbawa. Panoorin ang VIDEO.

VIDEO: Kung Paano Magiging Kaibigan ni Jehova (1:​11)

Basahin ang Juan 17:3 at Santiago 1:5. Pagkatapos, talakayin ang tanong na ito:

• Ano ang makakatulong sa isang tao para maging handa siya sa bautismo?

1. Sa pag-aalay, sinasabi natin kay Jehova na gusto natin siyang paglingkuran habambuhay

2. Sa bautismo, ipinapakita natin sa mga tao na inialay na natin ang ating sarili sa Diyos

6. Nagiging bahagi tayo ng pamilya ni Jehova kapag nagpabautismo tayo

Kapag nabautismuhan tayo, bahagi na tayo ng nagkakaisang pamilya ni Jehova sa buong mundo. Iisa lang ang paniniwala at pamantayang sinusunod natin, saanman tayo nakatira at anuman ang pinagmulan o kalagayan natin sa buhay. Basahin ang Awit 25:14 at 1 Pedro 2:17. Pagkatapos, talakayin ang tanong na ito:

• Ano ang epekto ng bautismo sa kaugnayan ng isang tao kay Jehova at sa ibang mananamba Niya?

SUMARYO

Itinuro ni Jesus na kailangang magpabautismo ang mga Kristiyano. Para magawa iyan, kailangan ng isang tao na magkaroon ng matibay na pananampalataya kay Jehova, sundin ang mga pamantayan niya, at ialay ang sarili kay Jehova.

Ano ang Natutuhan Mo?

• Ano ang bautismo, at bakit ito mahalaga?

• Ano ang kaugnayan ng pag-aalay sa bautismo?

• Ano ang mga kailangang gawin para maialay ng isang tao ang sarili niya at magpabautismo?

TINGNAN DIN

Alamin ang ibig sabihin ng bautismo at ang mga maling akala tungkol dito.

“Ano ang Bautismo?” (Artikulo sa jw.org/tl)

Alamin ang puwedeng gawin para maihanda ang sarili sa bautismo.

“Ang Pagmamahal at Pagpapahalaga kay Jehova ay Umaakay sa Bautismo” (Ang Bantayan, Marso 2020)

Alamin kung bakit nagpabautismo ang isang lalaki.

“Gusto Nilang Alamin Ko Mismo ang Katotohanan” (Ang Bantayan, Pebrero 1, 2013)

Alamin kung bakit napakagandang goal ang pagpapabautismo at ang puwede mong gawin para maihanda ang sarili mo.

“Dapat Na Ba Akong Magpabautismo?” (Ang mga Tanong ng mga Kabataan​—Mga Sagot na Lumulutas, Tomo 2, kabanata 37)