Kaya naman, hinimok ni Pablo ang kaniyang mga kapuwa Kristiyano na “huwag . . . magpahubog ayon sa sistemang ito ng mga bagay.” (Roma 12:2) Ganito naman ang pagkakasabi ng isang tagapagsalin ng Bibliya sa mga salita ni Pablo: “Huwag pahintulutang hubugin ka ng sanlibutang nakapalibot sa iyo.” (Roma 12:2, Phillips) Gagamitin ni Satanas ang lahat ng bagay upang mahubog ka ayon sa gusto niya, gaya ng magpapalayok noon na puwersahang inilalagay ang luwad sa bukás na molde para maihulma ang mga marka at katangiang nais niyang mapalitaw rito. Inihanda ni Satanas ang pulitika, komersiyo, relihiyon, at libangan sa sanlibutan upang gawin iyan. Gaano ba kalawak ang kaniyang impluwensiya? Ito’y kasinlaganap noong kapanahunan ni apostol Juan. “Ang buong sanlibutan,” sabi ni Juan, “ay nasa kapangyarihan ng isa na balakyot.” (1 Juan 5:19; tingnan din ang 2 Corinto 4:4.) Kung nag-aalinlangan kayo hinggil sa kakayahan ni Satanas na hikayatin ang mga tao at pasamain ang kanilang kaisipan, tandaan kung gaano kabisa niyang nagawa ito sa mga mamamayan ng isang buong bansa, ang Israel, na nakaalay sa Diyos. (1 Corinto 10:6-12) Mangyari rin kaya iyan sa iyo? Maaari, kung hahayaan mong bukás ang iyong kaisipan sa mapanghikayat na impluwensiya ni Satanas.

Nasa iyo ang pagpili. Maaari mong piliing “magpahubog ayon sa sistemang ito ng mga bagay” kung hahayaan mong pangibabawan ng mga pilosopiya at simulain ng sanlibutan ang iyong kaisipan. (Roma 12:2) Subalit hindi nagmamalasakit sa iyong kapakanan ang sanlibutang ito. “Maging mapagbantay,” kung gayon, ang babala ni apostol Pablo, “baka may sinumang tumangay sa inyo bilang kaniyang nasila sa pamamagitan ng pilosopiya at walang-lamang panlilinlang alinsunod sa tradisyon ng mga tao.” (Colosas 2:8) Napakadali lamang na mahubog ni Satanas sa paraang ito, o ‘matangay bilang kaniyang nasila.’ Katulad ito ng paglanghap ng usok ng sigarilyo. Maaari kang maapektuhan sa pamamagitan lamang ng paglanghap ng maruming hangin.