7. Mas nakakahigit ang mga batas ng Kaharian ng Diyos

Gumagawa ng batas ang mga gobyerno para makinabang at maprotektahan ang mga mamamayan nito. Mayroon ding mga batas ang Kaharian ng Diyos na dapat sundin ng mga mamamayan nito. Basahin ang 1 Corinto 6:​9-11. Pagkatapos, talakayin ang mga tanong na ito:

• Ano sa tingin mo ang mangyayari sa mundo kung susundin ng lahat ng tao ang mga utos at prinsipyo ng Diyos?a

• Sa tingin mo, dapat lang bang asahan ni Jehova na susundin ng mga mamamayan ng Kaharian ang mga utos niya? Bakit?

• Ano ang nagpapakita na puwedeng magbago ang mga dating hindi sumusunod sa mga utos na ito ng Diyos?​—Tingnan ang talata 11.

Naiilang ang maraming tao na pag-usapan ang tungkol sa sex. Pero kapag tinatalakay ng Bibliya ang sex, prangka ito at deretso sa punto, pero may dignidad. Ang totoo, makakatulong sa atin ang sinasabi ng Bibliya. At tama naman, kasi si Jehova ang lumalang sa atin kaya alam niya ang pinakamabuti para sa atin. Sinasabi niya ang mga dapat nating gawin para mapasaya siya at ang makakatulong sa atin para mabuhay magpakailanman.

1. Ano ang pananaw ni Jehova sa sex?

Ang sex ay regalo ni Jehova. Iniregalo niya ito para masiyahan ang mag-asawang lalaki at babae. Dahil sa regalong ito, puwede silang magkaanak at maipapadama nila na mahal nila ang isa’t isa. Nagbibigay rin ito ng kaligayahan sa kanila. Kaya sinasabi ng Salita ng Diyos: “Masiyahan ka nawa sa iyong asawa mula pa noong kabataan mo.” (Kawikaan 5:​18, 19) Inaasahan ni Jehova na magiging tapat sa isa’t isa ang mga Kristiyanong mag-asawa, at ayaw niya na mangalunya sila.​—Basahin ang Hebreo 13:4.

2. Ano ang seksuwal na imoralidad?

Sinasabi ng Bibliya na “hindi magmamana ng Kaharian ng Diyos . . . ang mga imoral.” (1 Corinto 6:​9, 10) Ginamit ng mga manunulat ng Bibliya ang salitang Griego na por·neiʹa para tumukoy sa seksuwal na imoralidad. Kasama rito ang (1) seksuwal na ugnayana ng hindi mag-asawa, (2) homoseksuwalidad, at (3) bestiyalidad. Mapapasaya natin si Jehova at makikinabang tayo kapag “umiwas [tayo] sa seksuwal na imoralidad.”​—1 Tesalonica 4:3.

PAG-ARALAN

3. Tumakas mula sa seksuwal na imoralidad

Sinikap ng tapat na lalaking si Jose na manatiling malinis sa moral. Basahin ang Genesis 39:​1-12. Pagkatapos, talakayin ang mga tanong na ito:

• Bakit tumakas mula sa imoralidad si Jose?​—Tingnan ang talata 9.

• Sa tingin mo, tama kaya ang ginawa ni Jose? Bakit?

VIDEO: Tumakas Mula sa Imoralidad (5:​06)

Gusto ni Jehova na tanggihan natin ang imoralidad. Basahin ang 1 Corinto 6:18. Pagkatapos, talakayin ang mga tanong na ito:

• Anong mga sitwasyon ang puwedeng mauwi sa seksuwal na imoralidad?

• Paano ka tatakas mula sa seksuwal na imoralidad?

4. Kaya mong labanan ang tukso

VIDEO: Magbasa ng Bibliya Para Malabanan ang Tukso (3:​02)

• Nang mapansin ng brother na ang iniisip at ginagawa niya ay puwedeng mauwi sa pagtataksil sa asawa niya, ano ang ginawa niya?

Kahit ang isang tapat na Kristiyano ay puwedeng mahirapan na magkaroon ng malinis na kaisipan. Paano mo maiiwasang patuloy na mag-isip ng imoral na mga bagay? Basahin ang Filipos 4:8. Pagkatapos, talakayin ang mga tanong na ito:

• Anong mga bagay ang dapat nating pag-isipan?

• Paano makakatulong ang pagbabasa ng Bibliya at pagiging abala sa paglilingkod kay Jehova para maiwasan ang tuksong magkasala?

5. Matutulungan tayo ng mga pamantayan ni Jehova

VIDEO: Kapag Nagkulang sa Unawa (9:​32)

• Paano pumasok sa isang nakakatuksong sitwasyon ang isang kabataang lalaki?​—Tingnan ang Kawikaan 7:​8, 9.

• Ayon sa Kawikaan 7:​23, 26, ang seksuwal na imoralidad ay nagiging dahilan ng malalaking problema. Kung mananatili tayong malinis sa moral, anong mga problema ang maiiwasan natin?

• Paano tayo matutulungan ng pagiging malinis sa moral na mabuhay magpakailanman?

Iniisip ng ilang tao na ang sinasabi ng Bibliya tungkol sa homoseksuwalidad ay hindi pagpapakita ng pag-ibig. Pero si Jehova ay Diyos ng pag-ibig, at gusto niya na mabuhay tayong lahat magpakailanman. Para mangyari iyan, kailangan nating sundin ang mga pamantayan niya. Basahin ang 1 Corinto 6:​9-11. Pagkatapos, talakayin ang tanong na ito:

• Ang homoseksuwal na pagnanasa lang ba ang mali sa pananaw ng Diyos?

Para mapasaya ang Diyos, kailangan nating gumawa ng mga pagbabago. Sulit ba ito? Basahin ang Awit 19:​8, 11. Pagkatapos, talakayin ang mga tanong na ito:

• Sa tingin mo, makatuwiran ba ang mga pamantayan ni Jehova sa moral? Bakit?

SUMARYO

Ang sex ay regalo ni Jehova para maging masaya ang isang mag-asawa.

Ano ang Natutuhan Mo?

• Ano ang kasama sa seksuwal na imoralidad?

• Ano ang makakatulong sa atin na maiwasan ang seksuwal na imoralidad?

• Paano tayo makikinabang kung susunod tayo sa mga pamantayan ni Jehova sa moral?

TINGNAN DIN

Alamin kung bakit mahalaga kay Jehova na magpakasal ang isang lalaki at babae na gustong mag-asawa.

“Ano ang Sinasabi ng Bibliya Tungkol sa Pagli-live-in?” (Artikulo sa jw.org/tl)

Sinasabi ng Bibliya na mali ang homoseksuwalidad, pero hindi nito itinuturo na magalit tayo sa mga taong homoseksuwal. Alamin kung bakit.

“Mali Ba ang Homoseksuwalidad?” (Artikulo sa jw.org/tl)

Alamin kung paano tayo napoprotektahan ng mga utos ng Diyos tungkol sa lahat ng seksuwal na gawain.

“Maituturing Bang Sex ang Oral Sex?” (Artikulo sa jw.org/tl)

Sa kuwentong “Pinakitunguhan Nila Ako Nang May Dignidad,” alamin kung bakit nagbago ang isang dating homoseksuwal.

“Binago ng Bibliya ang Kanilang Buhay” (Ang Bantayan, Abril 1, 2011)

Sa buong mundo, iba-iba ang pananaw ng mga tao tungkol sa alak. May ilan na gustong uminom paminsan-minsan kasama ng mga kaibigan nila. May iba naman na hindi talaga umiinom ng alak. At may ilang tao pa nga na umiinom hanggang sa malasing. Ano ang sinasabi ng Bibliya tungkol sa pag-inom ng alak?

1. Mali bang uminom ng mga inuming de-alkohol?

Hindi ipinagbabawal ng Bibliya ang pag-inom ng alak. Ang totoo, ang “alak na nagpapasaya sa puso ng tao” ay kasama sa mga regalo ng Diyos sa atin. (Awit 104:​14, 15) May binabanggit pa nga sa Bibliya na tapat na mga lalaki at babae na uminom ng alak.​—1 Timoteo 5:23.

2. Ano ang payo ng Bibliya sa mga umiinom ng alak?

Hinahatulan ni Jehova ang sobrang pag-inom ng alak at paglalasing. (Galacia 5:21) Sinasabi ng Bibliya: “Huwag kang maging gaya ng malalakas uminom ng alak.” (Kawikaan 23:20) Kaya kung gusto nating uminom kahit wala tayong kasama, dapat na hindi ito sobra-sobra, at siguraduhing makakapag-isip, makakapagsalita, at makakakilos pa rin tayo nang maayos. Siguraduhin din na hindi ito makakasira sa kalusugan natin. Pero kung hindi natin makontrol ang pag-inom, mas makakabuting huwag na lang tayong uminom.

3. Paano natin igagalang ang desisyon ng iba tungkol sa pag-inom ng alak?

Personal na desisyon ang pag-inom ng alak. Hindi natin dapat husgahan ang mga umiinom nang katamtaman, at hindi natin pipiliting uminom ang mga ayaw uminom ng alak. (Roma 14:10) Hindi rin tayo iinom kung magiging problema ito ng iba. (Basahin ang Roma 14:21.) Gusto nating ‘unahin ang kapakanan ng ibang tao, hindi ang sarili natin.’​—Basahin ang 1 Corinto 10:​23, 24.

PAG-ARALAN

4. Mag-isip bago uminom

Ano ang pananaw ni Jesus tungkol sa pag-inom ng alak? Para malaman ang sagot, tingnan ang unang himala na ginawa niya. Basahin ang Juan 2:​1-11. Pagkatapos, talakayin ang mga tanong na ito:

• Sa himalang ito, ano ang matututuhan natin sa pananaw ni Jesus tungkol sa alak at sa mga umiinom nito?

• Dahil hindi hinahatulan ni Jesus ang pag-inom ng alak, ano ang dapat na maging pananaw ng mga Kristiyano sa mga umiinom nito?

Pero kahit puwedeng uminom ang isang Kristiyano, hindi ibig sabihin nito na ito ang laging tamang gawin. Basahin ang Kawikaan 22:3. Pagkatapos, talakayin kung paano puwedeng makaapekto sa desisyon mo ang mga sitwasyong ito:

• Magmamaneho ka o mag-o-operate ng makina.

• Buntis ka.

• Pinagbawalan ka ng doktor mo na uminom ng alak.

• Hindi mo makontrol ang pag-inom ng alak.

• Ipinagbabawal ng batas sa inyong lugar ang pag-inom ng alak.

• May kasama ka na ayaw uminom ng alak kasi dati siyang may problema sa pag-inom.

Dapat ka bang maglabas ng alak sa isang kasalan o ibang gathering? Para matulungan kang magdesisyon, panoorin ang VIDEO.

VIDEO: Maglalabas Ba Ako ng Alak? (2:​41)

Basahin ang Roma 13:13 at 1 Corinto 10:​31, 32. Sa bawat pagbasa ng teksto, talakayin ang tanong na ito:

• Paano makakatulong ang prinsipyong ito para makagawa ka ng desisyong magpapasaya kay Jehova?

5. Kung gaano karami ang iinumin mo

Kung iinom ka ng inuming de-alkohol, tandaan ito: Hindi sinasabi ni Jehova na mali ang pag-inom ng alak. Pero sinasabi niya na mali ang sobrang pag-inom. Bakit? Basahin ang Oseas 4:​11, 18. Pagkatapos, talakayin ang tanong na ito:

• Ano ang puwedeng mangyari sa isang tao kapag sobra siyang uminom ng alak?

Paano natin maiiwasang uminom nang sobra? Dapat na alam natin ang ating limitasyon. Basahin ang Kawikaan 11:2. Pagkatapos, talakayin ang tanong na ito:

• Bakit magandang magkaroon, o magtakda, ng limitasyon sa dami ng iinumin mo?

6. Ang puwedeng gawin para maihinto ang sobrang pag-inom ng alak

VIDEO: ‘Sawang-sawa Na Ako sa Buhay Ko’ (6:​32)

• Ano ang epekto ng paglalasing sa buhay ni Dmitry?

• Naihinto ba niya ito agad?

• Ano ang nakatulong sa kaniya na magbagong-buhay?

Basahin ang 1 Corinto 6:​10, 11. Pagkatapos, talakayin ang mga tanong na ito:

• Ano ang sinasabi ng Bibliya tungkol sa paglalasing?

• Ano ang nagpapakita na puwedeng magbago ang isang lasenggo?

Basahin ang Mateo 5:30. Pagkatapos, talakayin ang tanong na ito:

• Ang pagputol sa kamay ay nangangahulugan ng pagsasakripisyo para mapasaya si Jehova. Ano ang puwede mong gawin kung nahihirapan kang ihinto ang paglalasing?a

Basahin ang 1 Corinto 15:33. Pagkatapos, talakayin ang tanong na ito:

• Paano puwedeng makaimpluwensiya ang mga kaibigan mo sa pag-inom mo ng alak?

SUMARYO

Ibinigay ni Jehova ang alak para maging masaya tayo. Pero hinahatulan niya ang sobrang pag-inom at paglalasing.

Ano ang Natutuhan Mo?

• Ano ang pananaw ng Bibliya tungkol sa alak?

• Ano ang mga puwedeng mangyari sa mga sobrang uminom ng alak?

• Paano natin igagalang ang desisyon ng iba tungkol sa pag-inom ng alak?

TINGNAN DIN

Paano makakagawa ng tamang desisyon ang mga kabataan tungkol sa pag-inom ng alak?

Mag-isip Bago Uminom (2:​31)

Alamin ang mga puwede mong gawin para maihinto ang paglalasing.

“Tamang Pangmalas sa Alak” (Ang Bantayan, Enero 1, 2010)

Dapat bang gawin ng mga Kristiyano ang toasting?

“Mga Tanong Mula sa mga Mambabasa” (Ang Bantayan, Pebrero 15, 2007)

Sa kuwentong “Para Daw Akong Butás na Bariles,” tingnan kung paano nagbago ang isang dating manginginom.

“Binago ng Bibliya ang Kanilang Buhay” (Ang Bantayan, Mayo 1, 2012)

Kahit mahal na mahal mo si Jehova at nagsisikap kang hindi siya masaktan, nagkakamali ka pa rin kung minsan. Pero may ilang kasalanan na mas malubha kaysa sa iba. (1 Corinto 6:​9, 10) Kung makagawa ka ng malubhang kasalanan, tandaan na mahal ka pa rin ni Jehova. Handa ka niyang patawarin at tutulungan ka niya.

1. Ano ang kailangan nating gawin para mapatawad tayo ni Jehova?

Kapag nakagawa ng malubhang kasalanan ang mga taong nagmamahal kay Jehova, siguradong napakalungkot nila. Pero nakakapagpatibay ang pangako ni Jehova sa mga lingkod niya: “Kahit na ang mga kasalanan ninyo ay gaya ng iskarlata, mapapuputi ang mga ito na gaya ng niyebe.” (Isaias 1:18) Kung talagang nagsisisi tayo, siguradong papatawarin tayo ni Jehova. Paano natin maipapakita ang pagsisisi? Kung talagang nalulungkot tayo dahil sa ginawa natin, ihihinto natin ito at hihingi tayo ng kapatawaran kay Jehova. Magsisikap din tayong baguhin ang maling kaisipan o gawain na naging dahilan ng pagkakasala natin. At gagawin natin ang lahat para masunod ang malinis na pamantayan ni Jehova.​—Basahin ang Isaias 55:​6, 7.

2. Paano ginagamit ni Jehova ang mga elder para tulungan tayo kapag nagkasala tayo?

Kung makagawa tayo ng malubhang kasalanan, sinasabi ni Jehova na “tawagin [natin] ang matatandang lalaki sa kongregasyon.” (Basahin ang Santiago 5:​14, 15.) Mahal ng mga inatasang lalaking ito si Jehova at ang mga tupa niya. Matutulungan nila tayong maibalik ang magandang kaugnayan natin kay Jehova kasi tinuruan sila kung paano gagawin iyon.​—Galacia 6:1.

Paano tayo matutulungan ng mga elder kapag nakagawa tayo ng malubhang kasalanan? Gagamitin ng dalawa o tatlong elder ang Bibliya para maituwid tayo. Papayuhan nila tayo at sasabihin ang mga puwede nating gawin para hindi na natin maulit ang kasalanan natin. Kapag hindi nagsisi ang isang taong nakagawa ng malubhang kasalanan, aalisin siya ng mga elder sa kongregasyon para hindi siya makaimpluwensiya sa iba.

PAG-ARALAN

3. Makakatulong kung ipagtatapat natin ang ating kasalanan

Nasasaktan si Jehova kapag nakakagawa tayo ng kasalanan. Kaya tama lang na ipagtapat natin ito sa kaniya. Basahin ang Awit 32:​1-5. Pagkatapos, talakayin ang tanong na ito:

• Bakit makakabuting ipagtapat kay Jehova ang mga kasalanan natin imbes na itago ito?

VIDEO: “Dinidisiplina ni Jehova ang mga Mahal Niya” (3:​01)

• Paano tinulungan ng mga elder si Canon na manumbalik kay Jehova?

Kailangan nating ipagtapat sa mga elder ang lahat ng nagawa natin. Nandiyan sila para tulungan tayo. Basahin ang Santiago 5:​16. Pagkatapos, talakayin ang tanong na ito:

• Bakit magiging madali para sa mga elder na tulungan ka kung ipagtatapat mo sa kanila ang lahat?

4. Nagpapakita si Jehova ng awa sa mga nagkasala

Kung ayaw pa ring sumunod sa pamantayan ni Jehova ang isang taong nakagawa ng malubhang kasalanan, aalisin siya sa kongregasyon, at hindi na tayo makikisama sa kaniya. Basahin ang 1 Corinto 5:​6, 11. Pagkatapos, talakayin ang tanong na ito:

• Gaya ng lebadura na nagpapaalsa sa tinapay, paano puwedeng impluwensiyahan ng isang di-nagsisisi ang kongregasyon?

Sa pakikitungo ni Jehova sa mga nagkasala, paano natin nakita na makatuwiran, maawain, at maibigin siya?

5. Pinapatawad ni Jehova ang mga nagsisisi

Gumamit si Jesus ng isang ilustrasyon para maunawaan natin ang nararamdaman ni Jehova sa isang taong nagsisisi. Basahin ang Lucas 15:1-7. Pagkatapos, talakayin ang tanong na ito:

• Ano ang itinuturo ng tekstong ito tungkol kay Jehova?

Basahin ang Ezekiel 33:11. Pagkatapos, talakayin ang tanong na ito:

• Ano ang kailangan mong gawin para patunayang nagsisisi ka?

SUMARYO

Kung makagawa tayo ng malubhang kasalanan, papatawarin tayo ni Jehova kung magsisisi tayo at magsisikap na hindi ito ulitin.

Ano ang Natutuhan Mo?

• Bakit magandang ipagtapat kay Jehova ang mga kasalanan natin?

• Ano ang kailangan nating gawin para mapatawad ang mga kasalanan natin?

• Kung makagawa tayo ng malubhang kasalanan, bakit mahalagang humingi ng tulong sa mga elder?

TINGNAN DIN

Tingnan kung paano naramdaman ng isang lalaki ang awa ni Jehova gaya ng paglalarawan sa Isaias 1:18.

Huwag Mag-alinlangan sa Awa ni Jehova (5:​02)

Paano sinisikap ng mga elder na tulungan ang mga nakagawa ng malubhang kasalanan?.

“Pag-ibig at Awa sa mga Nagkasala” (Ang Bantayan, Agosto 2024)

Tingnan kung paano pinagpapakitaan ng pag-ibig at awa ang mga di-nagsisising nagkasala.

“Tulong Para sa mga Inalis sa Kongregasyon” (Ang Bantayan, Agosto 2024)

Sa kuwentong “Dapat Akong Manumbalik kay Jehova,” alamin kung bakit naramdaman ng isang lalaki na tinulungan siya ni Jehova na makabalik sa kongregasyon.

“Binago ng Bibliya ang Kanilang Buhay” (Ang Bantayan, Abril 1, 2012)