Lubhang iginagalang ng maraming tao sa buong mundo ang Bibliya. Pero baka kakaunti lang, kung mayroon man, ang alam nila tungkol sa nilalaman nito. Totoo ito sa milyon-milyong nakatira sa Asia, ngunit totoo rin ito sa maraming tao sa mga bansang malawakang ipinamamahagi ang Bibliya.

Pero baka maitanong mo, ‘Bakit dapat akong maging interesado na maunawaan ang Bibliya?’ Kapag naunawaan mo ang sinasabi ng banal na aklat na ito, matutulungan ka nito na:

• Maging kontento at maligaya

• Maharap ang mga problema sa pamilya

• Mapagtagumpayan ang mga kabalisahan

• Mapaganda ang kaugnayan sa iba

• Maging matalino sa paggamit ng pera

Kuning halimbawa ang babaeng si Yoshiko, na taga-Japan. Nagtataka siya kung ano ang nilalaman ng Bibliya, kaya ipinasiya niyang basahin ito. Ang resulta? “Dahil sa Bibliya, may layunin na ang buhay ko at nagkaroon ako ng pag-asa sa hinaharap,” ang sabi niya. “May kabuluhan na ang buhay ko,” dagdag pa niya. Ang lalaking si Amit, na binanggit kanina, ay nagdesisyon ding suriin ang Bibliya. “Namangha ako,” ang sabi niya. “Ang Bibliya ay naglalaman ng praktikal na impormasyon para sa lahat.”

Ang Bibliya ay nakatulong nang malaki sa buhay ng milyon-milyon. Bakit hindi mo subukang suriin ito at tingnan kung ano ang maitutulong nito sa iyo?

Ang Bibliya ay isang napakatandang aklat. Gaano katanda? Sinimulang isulat ang Bibliya sa Gitnang Silangan mga 3,500 taon na ang nakalilipas. Bilang paghahambing, iyon din ang panahon noong namamahala ang makapangyarihang dinastiyang Shang ng China, ang pinakamatandang dinastiyang Tsino na nairekord sa kasaysayan, at mga 1,000 taon bago nagsimula ang Budismo sa India.—Tingnan ang kahong “Ilang Impormasyon Tungkol sa Bibliya.”

Para maging nakatutulong na giya ang isang aklat, dapat na nauunawaan ito ng mga tao at nakikita nila ang kahalagahan nito sa buhay nila. Ganiyan ang Bibliya. Nagbibigay ito ng kasiya-siyang sagot sa pinakamahahalagang tanong sa buhay.

Halimbawa, naitanong mo na ba, ‘Bakit tayo naririto?’ Libo-libong taon nang palaisipan iyan sa tao, kahit hanggang ngayon. Gayunman, ang sagot ay nasa unang dalawang kabanata ng Genesis, ang unang aklat ng Bibliya. Ibabalik ka ng ulat na ito sa “pasimula”—bilyon-bilyong taon na ang nakalipas—nang umiral ang ating uniberso, pati na ang mga galaksi, bituin, at ang lupa. (Genesis 1:1) Pagkatapos, inilalarawan nito nang sunod-sunod kung paano inayos ang lupa para matirhan, kung paano umiral ang iba’t ibang anyo ng buhay, at kung paano lumitaw ang tao sa eksena—pati na ang layunin ng lahat ng ito.

ISINULAT PARA MAUNAWAAN

Ang Bibliya ay naglalaan ng praktikal na payo para tulungan tayong lutasin ang mga problema sa araw-araw. Madali itong maunawaan, sa dalawang kadahilanan.

Una, ang mensahe ng Bibliya ay malinaw, tuwiran, at kaakit-akit. Sa halip na gumamit ng mga salitang mahirap unawain o mahiwaga, gumamit ang Bibliya ng mga salitang espesipiko o nagsasangkot sa ating mga pandamdam. Para sa mahihirap na ideya, gumamit ito ng mga salitang karaniwan nating naririnig sa araw-araw.

Halimbawa, gumamit si Jesus ng simpleng mga ilustrasyon na batay sa araw-araw na karanasan ng tao para ituro ang mga aral na aantig sa kanilang puso. Marami sa mga iyon ang mababasa sa tinatawag na Sermon sa Bundok, na nakaulat sa kabanata 5 hanggang 7 ng aklat ng Bibliya na Mateo. Ang layunin ng “praktikal na pahayag” na ito, gaya ng sinabi ng isang komentarista, ay “hindi para punuin ang ating isip ng mga ideya, kundi para patnubayan ang ating pagkilos.” Mababasa mo ito sa loob ng mga 15 hanggang 20 minuto, at mamamangha ka sa simple ngunit mapuwersang pananalita ni Jesus.

Ikalawa, madaling maunawaan ang Bibliya dahil sa nilalaman nito. Hindi ito aklat ng mitolohiya o pabula. Karamihan ng ulat sa Bibliya, gaya ng pagkakalarawan ng The World Book Encyclopedia, ay “tungkol sa dakila at sa ordinaryong mga tao” at sa kanilang “pakikipagpunyagi, pag-asa, kabiguan, at tagumpay.” Madali nating maunawaan ang mga ulat na ito tungkol sa mga tunay na tao at pangyayari at maintindihan ang mahahalagang leksiyon nito.—Roma 15:4.

MABABASA NG LAHAT

Para maunawaan ang isang aklat, dapat na mabasa mo ito sa wikang alam mo. Sa ngayon, malamang na mababasa mo ang Bibliya sa wikang naiintindihan mo, saan ka man nakatira o anuman ang lahi mo. Isaalang-alang kung ano ang kahanga-hangang ginawa para maging posible iyan.

Pagsasalin. Ang Bibliya ay unang isinulat sa wikang Hebreo, Aramaiko, at Griego. Dahil diyan, kaunti lang ang makababasa nito. Para mabasa ang Bibliya sa ibang wika, puspusang nagsikap ang taimtim na mga tagapagsalin. Dahil sa kanila, ang buong Bibliya o ang bahagi nito ay naisalin na ngayon sa mga 2,700 wika. Mababasa na ngayon ng mahigit 90 porsiyento ng mga tao sa buong mundo ang Bibliya, o ang ilang bahagi nito, sa kanilang sariling wika.

Paglalathala. Ang orihinal na kopya ng Bibliya ay isinulat sa nasisirang materyales, gaya ng balat at papiro. Para mabasa rin ito ng iba, maingat na kinopya ang mga iyon nang paulit-ulit sa pamamagitan ng sulat-kamay. Mahal ang gayong mga kopya, at iilan lang ang makabibili nito. Pero nang maimbento ni Gutenberg ang palimbagan mahigit 550 taon na ang nakararaan, bumilis ang pamamahagi ng Bibliya. Ayon sa isang pagtaya, nakapamahagi na ng mahigit limang bilyong kopya ng Bibliya, buo man o ang ilang bahagi nito.

Walang ibang aklat tungkol sa relihiyon ang maikukumpara sa Bibliya pagdating sa mga aspektong ito. Oo, ang Bibliya ay isang aklat na puwedeng maunawaan. Gayunman, maaaring maging hamon ang pag-aaral nito. Pero may makukuha kang tulong. Saan? At paano ka makikinabang? Alamin sa susunod na artikulo.

Isipin mong pupunta ka sa isang bansa na ngayon mo lang mararating. Marami kang makikilalang tao na ibang-iba ang kaugalian, pagkain, at ginagamit na pera. Natural lang na baka madismaya ka.

Malamang na ganiyan din ang madama mo kapag nagbasa ka ng Bibliya sa unang pagkakataon. Para kang bumabalik sa isang sinaunang daigdig na marahil ay kakaiba para sa iyo. Doon, makikilala mo ang mga Filisteo, makikita mo ang kakaibang kaugalian gaya ng ‘paghapak sa mga kasuutan,’ o malalaman mo ang pagkain na tinatawag na manna at ang baryang tinatawag na drakma. (Exodo 16:31; Josue 13:2; 2 Samuel 3:31; Lucas 15:9) Puwede kang malito. Gaya ng pagpunta sa ibang bansa, hindi ba’t matutuwa ka kung may magpapaliwanag sa iyo ng mga bagay na ito?

TULONG NOON

Mula nang isulat ang sagradong mga akda noong ika-16 na siglo B.C.E., may tulong nang inilaan para maunawaan ang nilalaman nito. Halimbawa, ‘pinasimulang ipaliwanag’ ni Moises, unang lider ng bansang Israel, ang kahulugan nito.—Deuteronomio 1:5.

Makalipas ang mga 1,000 taon, may bihasang mga tagapagturo pa rin ng Kasulatan. Noong 455 B.C.E., nagtipon ang isang malaking grupo ng mga Judio, pati mga bata, sa isang liwasan sa lunsod ng Jerusalem. Naroon ang mga tagapagturo ng Bibliya na “patuloy [na] bumabasa nang malakas mula sa [sagradong] aklat” na iyon. Pero higit pa ang ginawa nila. “Patuloy silang nagbibigay ng unawa sa pagbasa.”—Nehemias 8:1-8.

Pagkaraan ng 500 taon, nagturo din si Jesu-Kristo tungkol sa Kasulatan. Sa katunayan, nakilala siya ng mga tao bilang isang guro. (Juan 13:13) Nagturo siya sa malalaking grupo, pati na rin sa mga indibiduwal. Minsan, nagbigay siya ng pahayag sa napakaraming tao, ang kilalang Sermon sa Bundok, at “lubhang namangha ang mga pulutong sa kaniyang paraan ng pagtuturo.” (Mateo 5:1, 2; 7:28) Noong tagsibol ng 33 C.E., kinausap ni Jesus ang dalawa niyang alagad habang naglalakad ang mga ito papunta sa isang nayon malapit sa Jerusalem, na “lubusan niyang binubuksan ang Kasulatan” sa kanila, o malinaw na ipinaliliwanag ito.—Lucas 24:13-15, 27, 32.

Ang mga alagad ni Jesus ay mga tagapagturo din ng Salita ng Diyos. Minsan, isang opisyal ng Etiopia ang nagbabasa ng isang bahagi ng Kasulatan nang lapitan ito at tanungin ng alagad na si Felipe: “Talaga bang nalalaman mo ang iyong binabasa?” Sumagot ang Etiope: “Ang totoo, paano ko nga iyon magagawa, malibang may pumatnubay sa akin?” Ipinaliwanag sa kaniya ni Felipe ang kahulugan ng bahaging iyon ng Kasulatan.—Gawa 8:27-35.

TULONG SA NGAYON

Gaya ng mga guro at tagapagturo ng Bibliya noon, ang mga Saksi ni Jehova ngayon ay nagtuturo din ng Bibliya sa 239 na lupain sa buong daigdig. (Mateo 28:19, 20) Linggo-linggo, tinutulungan nila ang mahigit siyam na milyong indibiduwal na maunawaan ang Bibliya. Marami sa mga nag-aaral ay di-Kristiyano. Libre ang pag-aaral at puwede itong gawin sa bahay nila o sa iba pang kumbinyenteng lugar. Ang ilan ay nag-aaral pa nga sa pamamagitan ng telepono o sa pamamagitan ng video gamit ang kanilang computer, tablet, o cellphone.

Pakisuyong makipag-ugnayan sa mga Saksi ni Jehova para malaman kung paano ka makikinabang sa kaayusang ito. Makikita mong ang Bibliya ay isang aklat na hindi mahirap maunawaan; sa halip, ito ay “kapaki-pakinabang sa pagtuturo, sa pagsaway, sa pagtutuwid ng mga bagay-bagay, sa pagdidisiplina sa katuwiran,” upang ikaw ay “maging lubos na may kakayahan, lubusang nasangkapan ukol sa bawat mabuting gawa.”—2 Timoteo 3:16, 17.