Bahagi 4—Pagdaraos ng Progresibong mga Pag-aaral sa Bibliya

Pagsasanay sa mga Estudyante na Maghanda

¹ Ang isang estudyante ay karaniwan nang mabilis na susulong sa espirituwal kung patiuna siyang nagbabasa ng aralin, nagsasalungguhit ng mga sagot, at nag-iisip kung paano ito ipahahayag sa kaniyang sariling pananalita. Kaya, matapos maitatag ang regular na pag-aaral, magkasama ninyong ihanda ang isang aralin upang ipakita sa estudyante kung paano ito gagawin. Para sa karamihan ng mga estudyante, makabubuting magkasamang ihanda ang isang buong kabanata o aralin.

² Pagsasalungguhit at Pagnonota: Ipaliwanag kung paano makikita ang tuwirang mga sagot sa nakalimbag na mga tanong. Ipakita sa estudyante ang iyong kopya ng pinag-aaralang publikasyon na ang may salungguhit ay mga susing salita o parirala lamang. Habang isinasaalang-alang ninyo ang materyal, baka gusto niyang tularan ang halimbawa mo, anupat ang sinasalungguhitan lamang niya sa kaniyang kopya ay yaong mga salitang magpapaalaala sa kaniya ng sagot. (Luc. 6:40) Pagkatapos ay hilingan siyang sumagot sa kaniyang sariling pananalita. Tutulong ito para makita mo kung gaano kalinaw niyang nauunawaan ang materyal.

³ Ang maingat na pagsusuri sa di-siniping mga kasulatan ay mahalagang bahagi ng paghahanda ng isang estudyante para sa pag-aaral. (Gawa 17:11) Ipaunawa mo sa kaniya na ang bawat binanggit na teksto ay may sinusuhayang punto sa parapo. Ipakita sa kaniya kung paano gumawa ng maiikling nota sa gilid ng pinag-aaralang publikasyon. Idiin sa kaniya na ang Bibliya ang saligan ng kaniyang pinag-aaralan. Pasiglahin siya na palaging gamitin ang binanggit na mga teksto kapag nagkokomento sa panahon ng pag-aaral.

⁴ Maikling Sumaryo at Pagrerepaso: Bago simulan ng estudyante ang kaniyang masusing paghahanda sa pag-aaralang materyal, makabubuting makuha muna niya ang sumaryo ng paksa. Sabihin sa kaniya na makukuha niya ang sumaryo ng materyal kung titingnan niya sandali ang pamagat, mga subtitulo, at mga ilustrasyon sa kabanata. Ipaliwanag na bago niya tapusin ang kaniyang paghahanda, isang katalinuhang gumugol ng panahon upang repasuhin ang pangunahing mga punto na inihaharap sa aralin, na marahil ay ginagamit ang kahon sa pagrerepaso kung mayroon nito. Ang pag-uulit na iyon ay tutulong upang matandaan niya ang impormasyon.

⁵ Ang pagsasanay sa estudyante na maghandang mabuti sa kaniyang pag-aaral ay tutulong sa kaniya na makapagbigay ng makabuluhang mga komento sa mga pulong ng kongregasyon. Tutulong din ito sa kaniya na malinang ang mga kaugalian sa pag-aaral na pakikinabangan niya nang mahabang panahon kahit tapos na ang pakikipag-aral niya sa Bibliya.

Bagong Paglalaan Upang Tulungan Tayong Umiwas sa Dugo

Inaprobahan ng Lupong Tagapamahala ang isang bagong dokumento na pinamagatang Durable Power of Attorney for Health Care (DPA) na ipapalit sa dating Advance Medical Directive/Release card.

Kailangan mong punan ang DPA card, na mananatiling may bisa habang panahon at magsisilbing pormal na kapahayagan ng iyong mga kahilingan kahit na nasa labas ka ng bansa. Sa hinaharap, dapat mong punan ang isang panibagong DPA card kung (1) kailangan mong gumawa ng anumang pagbabago sa iyong DPA card, gaya ng pagbabago sa iyong mga kahilingan, mga kinatawan sa pagpapagamot, adres, at numero ng telepono, o (2) nawala o nasira ang DPA card mo.

Ang DPA card ay dapat na may-pananalanging pag-isipan at maingat na punan sa bahay. Gayunman, bago pirmahan ang card, tiyaking nakaharap ang dalawang saksing napili mo habang pinipirmahan mo ito. Sa pana-panahon, maaaring itanong ng mga tagapangasiwa ng pag-aaral sa aklat kung sino ang hindi pa nakapag-fill up sa bagong card upang malaman kung kailangan nila ng tulong.

Bago itupi ang DPA card, magseroks ng malinaw na kopya nito para sa iyong kinatawan sa pagpapagamot, kahaliling kinatawan sa pagpapagamot, at sa doktor, gayundin para sa iyong sariling mga rekord. Baka gusto mo ring gumawa ng kopya para sa iba pang kapamilya at sa kalihim ng kongregasyon. Ang mga kopya ay kailangang nasa isang panig lamang ng standard-size (8 1/2ʺ x 11ʺ) na papel anupat nakasentro sa pahina ang DPA card. Ang orihinal na DPA card, hindi ang isineroks, ang dapat na lagi mong dala-dala.

Ang Identity Card para sa di-bautisadong mga anak ng mga magulang na Saksi ay hindi nagbago. Dapat tiyakin ng mga magulang na wastong napunan at napirmahan ang card ng bawat isa sa kanilang anak na menor-de-edad at na dala ito ng kanilang anak sa angkop na mga pagkakataon.

Maaaring gayahin ng di-bautisadong mga mamamahayag ang mga pananalita sa DPA card at sa Identity Card sa paggawa ng nasusulat na mga tagubilin sa pangangalaga sa kalusugan para sa kanilang sarili at sa kanilang mga anak. Ang lahat ng bagong bautisadong mamamahayag ay bibigyan ng kalihim ng DPA card.