“Tinutustusan ng mga Salita ng Pananampalataya”

¹ Kailangan ang puspusang pagsisikap upang maitaguyod ang isang buhay na may makadiyos na debosyon. (1 Tim. 4:7-10) Kung umaasa lamang tayo sa ating sariling lakas, di-magtatagal ay manlulupaypay at matitisod tayo habang sinisikap nating sundan ang gayong landasin. (Isa. 40:29-31) Ang isang paraan upang matamo natin ang lakas na mula kay Jehova ay sa pamamagitan ng pagiging ‘natustusan ng mga salita ng pananampalataya.’—1 Tim. 4:6.

² Saganang Espirituwal na Pagkain: Naglalaan si Jehova ng saganang espirituwal na pagkain sa pamamagitan ng kaniyang Salita at ng “tapat at maingat na alipin.” (Mat. 24:45) Ginagawa ba natin ang ating bahagi upang makinabang mula sa mga ito? Binabasa ba natin ang Bibliya araw-araw? Naglalaan ba tayo ng panahon para sa personal na pag-aaral at pagbubulay-bulay? (Awit 1:2, 3) Ang gayong nakapagpapalusog na espirituwal na pagkain ay nagpapasigla at nagsasanggalang sa atin mula sa nakapagpapahinang mga epekto ng sanlibutan ni Satanas. (1 Juan 5:19) Kung pupunuin natin ang ating isip ng kapaki-pakinabang na mga kaisipan at ikakapit ito sa ating buhay, sasaatin si Jehova.—Fil. 4:8, 9.

³ Pinalalakas din tayo ni Jehova sa pamamagitan ng mga pulong ng kongregasyon. (Heb. 10:24, 25) Ang espirituwal na mga tagubilin at kapaki-pakinabang na pakikipagsamahang nasusumpungan sa mga pagtitipong ito ay nagpapatibay sa atin na manindigan sa harap ng mga pagsubok. (1 Ped. 5:9, 10) Isang kabataang Kristiyano ang nagsabi ng ganito: “Nasa paaralan ako buong maghapon, kaya parang nauubos ang lakas ko. Pero ang mga pagpupulong ay gaya ng oasis sa disyerto, kung saan ako napagiginhawa upang muli kong maharap ang pagpasok sa klase kinabukasan.” Talagang pinagpapala tayo kapag sinisikap nating dumalo sa mga pagpupulong!

⁴ Paghahayag ng Katotohanan: Ang pangangaral sa iba ay gaya ng pagkain para kay Jesus. Nagpalakas ito sa kaniya. (Juan 4:32-34) Sa katulad na paraan, kapag nakikipag-usap tayo sa iba hinggil sa kamangha-manghang mga pangako ng Diyos, nakadarama tayo ng panibagong lakas. Ang pagiging abala sa ministeryo ay nakatutulong din upang maituon natin ang ating puso at isip sa Kaharian at sa mga pagpapalang malapit nang dumating. Talagang nagpapaginhawa ito sa atin.—Mat. 11:28-30.

⁵ Tunay ngang pinagpala tayo anupat nakikinabang sa saganang espirituwal na pagkaing inilalaan ni Jehova para sa kaniyang bayan sa ngayon! Patuloy nawa tayong humiyaw nang may kagalakan ukol sa kaniyang kapurihan.—Isa. 65:13, 14.

Bahagi 5—Pagdaraos ng Progresibong mga Pag-aaral sa Bibliya

Alamin Kung Gaano Karaming Materyal ang Sasaklawin

¹ Kapag nagtuturo, isinasaalang-alang ni Jesus ang mga limitasyon ng kaniyang mga alagad, anupat nagsasalita sa kanila “hanggang sa kaya nilang pakinggan.” (Mar. 4:33; Juan 16:12) Sa katulad na paraan, kailangang alamin ng mga guro ng Salita ng Diyos sa ngayon kung gaano karaming materyal ang praktikal nilang sasaklawin sa isang partikular na haba ng panahon kapag nagdaraos ng pag-aaral sa Bibliya. Ang dami ng matatalakay na materyal ay nakasalalay sa kakayahan at mga kalagayan kapuwa ng guro at ng estudyante.

² Linangin ang Matibay na Pananampalataya: Baka kailangang talakayin sa ilang estudyante sa loob ng dalawa o tatlong sesyon ang materyal na madali namang maunawaan ng ibang estudyante sa isang sesyon lamang. Mas mahalaga na tulungan natin ang estudyante na maunawaang mabuti ang materyal kaysa sa talakayin ang napakaraming materyal sa loob lamang ng maikling panahon. Bawat estudyante ay nangangailangan ng matibay na saligan para sa kaniyang bagong-tuklas na pananampalataya sa Salita ng Diyos.—Kaw. 4:7; Roma 12:2.

³ Kapag idinaraos mo ang pag-aaral linggu-linggo, gumugol ng kinakailangang panahon upang tulungan ang estudyante na maunawaan at tanggapin ang natututuhan niya mula sa Salita ng Diyos. Huwag magmadali anupat hindi na lubusang nakikinabang ang estudyante sa katotohanang itinuturo sa kaniya. Maglaan ng sapat na panahon upang mabigyang-pansin ang mga pangunahing punto at maisaalang-alang ang mga susing teksto na nagsisilbing saligan ng ating itinuturo.—2 Tim. 3:16, 17.

⁴ Huwag Lumayo sa Paksang Tinatalakay: Bagaman ayaw nating madaliin ang pag-aaral, nanaisin din nating iwasan na lumayo sa paksang tinatalakay. Kung ang estudyante ay mahilig maglahad ng mahahabang kuwento tungkol sa personal na mga bagay, baka kailangan nating isaayos na pag-usapan na lamang ang mga ito pagkatapos ng pag-aaral.—Ecles. 3:1.

⁵ Sa kabilang panig naman, baka dahil sa sarili nating sigasig sa katotohanan ay mahirapan tayong pigilin ang ating sarili na magkomento ng napakaraming bagay sa panahon ng pag-aaral. (Awit 145:6, 7) Ang paminsan-minsang pagtalakay sa isang karagdagang punto o karanasan kapag nag-aaral ay maaaring maging kapaki-pakinabang, subalit iiwasan natin na maging masyadong marami o mahaba ito anupat nahahadlangan na ang estudyante sa pagkuha ng tumpak na kaalaman sa saligang mga turo ng Bibliya.

⁶ Kung sasaklawin natin ang makatuwirang dami ng materyal sa bawat sesyon ng pag-aaral, matutulungan natin ang mga estudyante sa Bibliya na ‘lumakad sa liwanag ni Jehova.’—Isa. 2:5.