Bahagi 7—Pagdaraos ng Progresibong mga Pag-aaral sa Bibliya

Pananalangin sa Pag-aaral

1. (a) Bakit angkop na simulan at tapusin ang pag-aaral sa Bibliya sa pamamagitan ng panalangin? (b) Paano natin ipaliliwanag at pasisimulan ang pananalangin sa isang pag-aaral sa Bibliya?

¹ Upang sumulong sa espirituwal ang mga estudyante sa Bibliya, kailangan ang pagpapala ni Jehova. (1 Cor. 3:6) Kaya nga angkop na simulan at tapusin ang pag-aaral sa pamamagitan ng panalangin. Kadalasan nang magagawa natin ito sa mismong kauna-unahang pakikipag-aral sa mga taong relihiyoso. Sa iba naman, baka kailangan nating gumamit ng unawa kung kailan angkop na ipaliliwanag at pasisimulan ang pananalangin sa pag-aaral. Maaari mong gamitin ang Awit 25:4, 5 at 1 Juan 5:14 upang tulungan ang estudyante na maunawaan kung bakit dapat manalangin at gamitin din ang Juan 15:16 upang ipaliwanag ang kahalagahan ng pananalangin kay Jehova sa pamamagitan ni Jesu-Kristo.

2. Kung bautisadong brother o lalaking di-bautisadong mamamahayag ang kasama ng isang sister sa pag-aaral sa Bibliya, sino ang mananalangin?

² Sino ang dapat manalangin sa isang pag-aaral sa Bibliya? Kapag bautisadong brother ang kasama ng isang sister sa pag-aaral, ang brother ang mananalangin, bagaman maaaring pangasiwaan ng sister ang pag-aaral samantalang nalalambungan ang kaniyang ulo. (1 Cor. 11:5, 10) Sa kabilang dako, kung lalaking di-bautisadong mamamahayag ng Kaharian naman ang kasama ng isang sister sa pag-aaral, ang sister ang mananalangin. Sa gayong kalagayan, dapat siyang maglambong sa ulo kapag nananalangin at nangangasiwa sa pag-aaral.

3. Anu-anong bagay ang angkop na ipanalangin sa isang pag-aaral sa Bibliya?

³ Kung Ano ang Ipananalangin: Hindi kailangang habaan ang mga panalangin sa pag-aaral sa Bibliya, subalit dapat na espesipiko ang mga ito. Bukod sa paghiling ng pagpapala ng Diyos sa pag-aaral at pagpapasalamat sa mga katotohanang natutuhan, angkop na papurihan si Jehova bilang ang Pinagmumulan ng tagubilin. (Isa. 54:13) Maaari rin nating ilakip ang mga kapahayagang nagpapakita ng ating taimtim na interes sa estudyante at ng ating pagpapahalaga sa organisasyong ginagamit ni Jehova. (1 Tes. 1:2, 3; 2:7, 8) Kapag hinihiling natin ang pagpapala ni Jehova sa mga pagsisikap ng estudyante na ikapit ang kaniyang natututuhan, matutulungan siyang makita ang kahalagahan ng pagiging ‘tagatupad ng salita.’—Sant. 1:22.

4. Anu-anong pakinabang ang matatamo kung sisimulan at tatapusin ang pag-aaral sa Bibliya sa pamamagitan ng panalangin?

⁴ Maraming pakinabang ang natatamo sa pananalangin. Nagdudulot ito ng pagpapala ng Diyos. (Luc. 11:13) Idiniriin nito ang kahalagahan ng pag-aaral sa Salita ng Diyos. Habang nakikinig ang estudyante sa ating mga panalangin, natututo siyang manalangin. (Luc. 6:40) Bukod diyan, ang mga panalangin na nagmumula sa pusong lipos ng pag-ibig sa Diyos at ng pasasalamat sa kaniyang walang-kapantay na mga katangian ay makatutulong sa estudyante na linangin ang personal na kaugnayan kay Jehova.

Kung Ano ang Sasabihin Tungkol sa mga Magasin

Ang Bantayan Abr. 15

“Sang-ayon ka ba na napakaraming impormasyon ang makukuha sa ngayon? [Hayaang sumagot.] Gayunman, wala nang mas mahalaga pa kaysa sa inilalarawan sa tekstong ito. [Basahin ang Juan 17:3.] Ipinaliliwanag ng magasing ito ang kahulugan ng salitang ‘buhay na walang hanggan’ at kung paano natin matatamo ang kaalaman na umaakay sa pag-asang ito.”

Gumising! Abr. 22

“Bagaman mas kilalá si Jesu-Kristo kaysa sa sinumang tao na nabuhay kailanman, maraming tao ang nag-iisip kung sino siya talaga. Alam mo ba na pinag-isipan din ito maging ng mga apostol ni Jesus? [Hayaang sumagot. Pagkatapos ay basahin ang Marcos 4:41.] Sinusuri ng magasing ito kung ano ang sinasabi ng Bibliya hinggil sa tunay na pagkakakilanlan ni Jesus.”

Ang Bantayan Mayo 1

“Kapag namatayan tayo ng isang minamahal, likas lamang na naisin nating makitang muli ang taong iyon. Sang-ayon ka ba? [Hayaang sumagot.] Marami ang nakasusumpong ng kaaliwan sa pangako ng Bibliya na pagkabuhay-muli. [Basahin ang Juan 5:28, 29.] Tinatalakay sa magasing ito kung kailan magaganap ang pagkabuhay-muli at kung sino ang talagang makikinabang dito.”

Gumising! Mayo 8

“Maraming magulang ang mapamili pagdating sa pinanonood ng kanilang mga anak. Nahihirapan ka bang humanap ng angkop na mga pelikula para sa iyong pamilya? [Hayaang sumagot. Pagkatapos ay basahin ang Efeso 4:17.] Tinatalakay sa magasing ito kung paano matutulungan ng mga magulang ang kanilang mga anak na pumili ng kapaki-pakinabang na libangan.”