Paano Natin Matutulungan ang mga Dadalo sa Memoryal?

1. Anong mapuwersang patotoo ang maririnig sa Marso 22, 2008?

¹ Sa Marso 22, 2008, milyun-milyong tao sa buong daigdig ang makaririnig ng isang mapuwersang patotoo. Mapapakinggan ng mga dadalo sa Memoryal ang hinggil sa dakilang pag-ibig ni Jehova sa paglalaan ng pantubos para sa sangkatauhan. (Juan 3:16) Malalaman nila ang tungkol sa Kaharian at kung paano ito gagamitin ni Jehova upang tuparin ang kaniyang kalooban sa buong lupa. (Mat. 6:9, 10) Masasaksihan nila mismo ang pag-ibig at pagkakaisa ng bayan ng Diyos at mararanasan nila ang ating mainit na pagtanggap.—Awit 133:1.

2. Paano natin matutulungan ang mga estudyante sa Bibliya na dadalo sa Memoryal?

² Estudyante sa Bibliya: Ang ilan sa mga dadalo ay kasisimula pa lamang makipag-aral ng Bibliya sa atin. Ipakilala sila sa mga kapatid. Ipaliwanag sa kanila ang lingguhang pagpupulong, at ilibot sila sandali sa Kingdom Hall. Sa panahon ng pahayag, pasisiglahin sila ng tagapagsalita na patuloy na sumulong sa espirituwal. Maaari mong gamitin ang mga komentong ito ng tagapagsalita bilang batayan para pasiglahin ang iyong mga estudyante.

3. Paano natin mapasisigla ang di-aktibong mga mamamahayag na nagsidalo sa Memoryal?

³ Di-aktibo: Ang ilan sa mga dadalo ay di-aktibong mga mamamahayag. Ikaw ang maunang lumapit at malugod silang tanggapin. Iwasang magtanong ng personal na mga bagay o magsalita ng anumang bagay na ikakapahiya nila. Pagkaraan ng Memoryal, dapat dalawin agad ng mga elder ang sinumang di-aktibo na dumalo, pasalamatan sila sa kanilang pagsisikap na makadalo, at malugod silang anyayahan sa susunod na pulong ng kongregasyon.

4. Paano matutulungan ng bawat isa sa atin ang mga bisita?

⁴ Bisita: Ang ilan sa mga dadalo ay maaaring mga kakilala natin o mga miyembro ng ating pamilya na tayo mismo ang nag-anyaya. Ang iba naman ay maaaring nakatanggap ng imbitasyon sa panahon ng espesyal na kampanya. Kung may makita kang mga hindi mo kilala, magkusa kang lapitan sila, ipakilala ang iyong sarili, at malugod silang tanggapin. Maaaring hindi pa nila nasubukang dumalo sa alinmang pagpupulong natin. Sa inyong pag-uusap, baka puwede mong alamin kung paano mo sila makokontak. Kung personal mo silang dadalawin o tatawagan sandali sa telepono ilang araw makalipas ang Memoryal, maaari mong malinang ang kanilang interes at makapag-alok ka ng pag-aaral sa Bibliya.

5. Ano ang maaari nating sabihin para makapagpasimula ng pag-aaral sa Bibliya?

⁵ Ang impormasyon sa pahayag sa Memoryal ay magagamit bilang saligan para ipakita ang aklat na Itinuturo ng Bibliya sa pagdalaw-muli. Halimbawa, babasahin ng tagapagsalita sa Memoryal ang Isaias 65:21-23. Sa pagdalaw-muli, maaari mong banggitin ang pahayag at sabihin, “Gusto kong ipakita sa iyo ang iba pang pagpapalang matatamo dahil sa pantubos.” Pagkatapos, talakayin ang pahina 4-5 ng aklat na Itinuturo ng Bibliya. O maaari mong sabihin, “Marami ang nag-iisip kung kailan natin mararanasan ang katuparan ng hula ni Isaias.” Pagkatapos, talakayin ang parapo 1-3 ng kabanata 9. Ang isa pang paraan ay basta banggitin ang mga sinabi ng tagapagsalita sa Memoryal. Pagkatapos, ipakita ang aklat na Itinuturo ng Bibliya, at itanghal kung paano ito pinag-aaralan.

6. Anong mga pagkakataon ang maaari nating samantalahin habang sinusunod natin ang utos ni Jesus na alalahanin ang kaniyang kamatayan?

⁶ Nawa’y samantalahin ng bawat isa sa atin ang mga pagkakataon upang tulungan ang mga estudyante sa Bibliya, di-aktibong mamamahayag, at mga bisita na dadalo sa Memoryal. (Luc. 22:19) Tiyak na pagpapalain ni Jehova ang anumang karagdagang ginagawa natin sa paglilingkod sa Kaharian.

Kung Ano ang Sasabihin Tungkol sa mga Magasin

Ang Bantayan Mar. 1

“Nababalitaan natin sa araw-araw ang hinggil sa pagdurusa, sakit, at kamatayan. Sa palagay mo, may makapagliligtas kaya sa atin mula sa lahat ng ito? [Hayaang sumagot.] Ang talatang ito sa Bibliya ay nagbigay ng pag-asa sa milyun-milyon. [Basahin ang Juan 3:16.] Ang paksa ng magasing ito ay ‘Kung Paano Ka Maililigtas ng Kamatayan ni Jesus.’”

Gumising! Mar.

“Sa palagay mo, wala kayang masamang epekto ang mga pamahiin, o mapanganib ito? [Hayaang sumagot.] Kapansin-pansin ang sinasabi ng Bibliya hinggil dito. [Basahin ang Isaias 65:11.] Tinatalakay ng artikulong ito kung ang pamahiin ay kaayon nga ba ng turo ng Bibliya.” Itampok ang artikulo na nasa pahina 10.

Ang Bantayan Abr. 1

“Gusto mo bang makita ang katuparan ng hulang ito? [Basahin ang Isaias 2:4, saka hayaang sumagot.] Pansinin na kikilos ang Diyos para ‘ituwid ang mga bagay-bagay’ may kinalaman sa mga gawain ng tao. Ipinakikita ng Bibliya na makikipaglaban ang Diyos sa digmaan na tinatawag na Armagedon na siyang tatapos sa lahat ng digmaan. Ipinaliliwanag ng magasing ito kung ano ang Armagedon at kung bakit dapat natin itong asamin.”

Gumising! Abr.

“Sa palagay mo, nabubuhay na kaya tayo sa panahong inilalarawan dito? [Basahin ang 2 Timoteo 3:1-4, saka hayaang sumagot.] Dapat tayong maging lubhang interesado sa mga huling araw dahil ang mga ito ay hudyat ng mabubuting bagay na mangyayari sa lupa. Ipinaliliwanag iyan ng magasing ito.”