Ilan ang kakilala mong Saksi ni Jehova? Ang ilan sa amin ay baka mga kapitbahay mo, katrabaho, o kaklase. O baka minsan ka na naming nakausap tungkol sa Bibliya. Sino ba talaga kami, at bakit namin ibinabahagi sa iba ang aming mga paniniwala?

Mga pangkaraniwang tao kami. Iba’t iba ang aming pinagmulan at katayuan sa buhay. Ang ilan sa amin ay may ibang relihiyon noon, at ang iba naman ay dating hindi naniniwala sa Diyos. Pero bago kami naging Saksi, maingat naming sinuri ang itinuturo ng Bibliya. (Gawa 17:11) Nakumbinsi kami sa aming mga natutuhan, at personal naming ipinasiya na sambahin ang Diyos na Jehova.

Nakikinabang kami sa pag-aaral ng Bibliya. Marami rin kaming mga problema at kahinaan. Pero dahil sa pagsisikap naming sundin ang mga simulain sa Bibliya, malaki ang naging pagbabago sa aming buhay. (Awit 128:1, 2) Iyan ang isang dahilan kung bakit namin ibinabahagi sa iba ang mabubuting bagay na natutuhan namin sa Bibliya.

Namumuhay kami ayon sa mga pamantayan ng Diyos. Ang mga pamantayang ito na makikita sa Bibliya ay tumutulong sa bawat isa na magkaroon ng makabuluhang buhay at maging magalang, tapat, at mabait. Tumutulong din ito para maging mahusay at responsable ang mga tao, magkaisa ang mga pamilya, at maitaguyod ang mataas na moralidad. Dahil alam naming “hindi nagtatangi ang Diyos,” para kaming isang napakalaking pamilya na walang bahid ng politika at diskriminasyon. Mga pangkaraniwang tao kami, pero bilang isang grupo, isa kaming natatanging bayan na pinagkakaisa ng aming mga paniniwala.—Gawa 4:13; 10:34, 35.

• Ano ang pagkakatulad ng mga Saksi ni Jehova sa ibang mga tao?

• Anong mga pamantayan ang natutuhan ng mga Saksi mula sa pag-aaral ng Bibliya?

Iniisip ng marami na ang mga Saksi ni Jehova ay pangalan ng isang bagong relihiyon. Pero mahigit 2,700 taon na ang nakalilipas, ang mga lingkod ng tanging tunay na Diyos ay inilarawan bilang kaniyang “mga saksi.” (Isaias 43:10-12) Bago 1931, kilalá kami bilang mga Estudyante ng Bibliya. Pero bakit namin pinili ang pangalang mga Saksi ni Jehova?

Ipinapakilala nito ang aming Diyos. Ayon sa sinaunang mga manuskrito, ang pangalan ng Diyos, Jehova, ay lumilitaw nang libo-libong ulit sa Bibliya. Pinalitan ito ng mga titulong Panginoon o Diyos sa maraming salin. Pero nagpakilala kay Moises ang tunay na Diyos gamit ang kaniyang pangalang Jehova, na sinasabi: “Ito ang pangalan ko magpakailanman.” (Exodo 3:15) Dahil dito, naipakita ni Jehova na iba siya sa huwad na mga diyos. Ipinagmamalaki naming taglayin ang banal na pangalan ng Diyos.

Inilalarawan nito ang aming atas. Sa loob ng maraming siglo, mula pa noong panahon ng matuwid na si Abel, marami na ang nagpatotoo tungkol sa kanilang pananampalataya kay Jehova. Nariyan sina Noe, Abraham, Sara, Moises, David, at iba pa na kabilang sa ‘malaking ulap ng mga saksi.’ (Hebreo 11:4–12:1) Gaya ng isa na handang tumayong saksi sa korte para sa isang taong inosente, determinado kaming ipaalám sa iba ang katotohanan tungkol sa aming Diyos.

Tinutularan namin si Jesus. Tinatawag siya ng Bibliya na “ang saksing tapat at totoo.” (Apocalipsis 3:14) Si Jesus mismo ang nagsabi na ‘ipinakilala niya ang pangalan ng Diyos’ at ‘nagpatotoo siya sa katotohanan’ tungkol sa Diyos. (Juan 17:26; 18:37) Kaya dapat taglayin at ihayag ng mga tunay na tagasunod ni Kristo ang pangalan ni Jehova. Iyan ang sinisikap na gawin ng mga Saksi ni Jehova.

• Bakit pinili ng mga Estudyante ng Bibliya na gamitin ang pangalang mga Saksi ni Jehova?

• Kailan pa nagkaroon si Jehova ng mga saksi sa lupa?

• Sino ang pinakadakilang Saksi ni Jehova?

Inihula sa Bibliya na pagkamatay ni Kristo, may mga Kristiyanong magiging huwad na mga guro at pipilipit sa katotohanan sa Bibliya. (Gawa 20:29, 30) Ganiyan nga ang nangyari. Pinaghalo nila ang mga turo ni Jesus at ang mga paganong relihiyosong ideya, kaya nabuo ang huwad na Kristiyanismo. (2 Timoteo 4:3, 4) Paano tayo nakakatiyak na nauunawaan natin kung ano talaga ang itinuturo ng Bibliya?

Dumating na ang panahon para isiwalat ni Jehova ang katotohanan. Inihula niya na ‘sa panahon ng wakas, sasagana ang tunay na kaalaman.’ (Daniel 12:4) Noong 1870, napansin ng isang maliit na grupo ng mga taong naghahanap ng katotohanan na maraming turo ang simbahan na wala sa Bibliya. Kaya sinaliksik nila ang orihinal na mga turo ng Bibliya, at tinulungan naman sila ni Jehova na maunawaan ang mga ito.

Maingat na pinag-aralan ng taimtim na mga lalaki ang Bibliya. Sinimulan ng masisigasig na Estudyante ng Bibliya, ang tawag noon sa mga Saksi ni Jehova, ang pamamaraan ng pag-aaral na ginagamit namin hanggang sa ngayon. Pinag-aaralan nila ang Bibliya batay sa isang paksa. Kapag may isang teksto na hindi nila maunawaan, tinitingnan nila ang ibang bahagi ng Bibliya na nagpapaliwanag dito. Kapag nakabuo na sila ng konklusyon na kaayon ng bawat bahagi ng Bibliya, isinusulat nila ito. Dahil hinahayaan nilang ang Bibliya ang magpaliwanag sa sarili nito, muli nilang nabigyang-liwanag ang katotohanan tungkol sa pangalan ng Diyos, sa kaniyang Kaharian, sa kaniyang layunin para sa mga tao at sa lupa, sa kalagayan ng mga patay, at sa pag-asang pagkabuhay-muli. Kaya napalaya sila mula sa maraming huwad na turo at kaugalian.—Juan 8:31, 32.

Noong 1879, naunawaan ng mga Estudyante ng Bibliya na dumating na ang panahon para ipaalám sa lahat ang katotohanan. Kaya nang taon ding iyon, sinimulan nilang ilabas ang magasing Ang Bantayan Naghahayag ng Kaharian ni Jehova, na patuloy pa rin naming inilalathala. Sa ngayon, ibinabahagi namin ang katotohanan sa 240 lupain at sa mahigit 900 wika. Talaga ngang lubhang sumasagana ang tunay na kaalaman!

• Ano ang nangyari sa katotohanan sa Bibliya pagkamatay ni Kristo?

• Paano muling lumiwanag ang katotohanan mula sa Salita ng Diyos?

Sa loob ng maraming dekada, ang mga Saksi ni Jehova ay gumamit, naglimbag, at namahagi ng iba’t ibang bersiyon ng Bibliya. Pero nakita namin ang pangangailangan na gumawa ng isang bago at tumpak na salin na mas makatutulong sa mga tao na matutuhan ang “tumpak na kaalaman sa katotohanan”—iyan ang gusto ng Diyos para sa lahat. (1 Timoteo 2:3, 4) Kaya noong 1950, sinimulan naming ilathala sa Ingles ang ilang bahagi ng aming makabagong-wikang Bibliya, ang Bagong Sanlibutang Salin. Ang Bibliyang ito ay tumpak na naisalin sa mahigit 170 wika.

Kailangan ang isang Bibliya na madaling maintindihan. Nagbabago ang wika, at maraming salin ang gumagamit ng mga salitang makaluma at mahirap maintindihan. Bukod diyan, may mga natuklasan ding mas sinauna at mas tumpak na mga manuskrito ng Bibliya, kaya mas nauunawaan na ang Hebreo, Aramaiko, at Griego na ginamit sa pagsulat ng Bibliya.

Kailangan ang isang salin na hindi lumilihis sa mensahe ng Diyos. Ang mga tagapagsalin ay hindi dapat gumawa ng mga pagbabago sa mensahe ng Diyos. Pero sa maraming salin ng Banal na Kasulatan, inalis ang banal na pangalang Jehova.

Kailangan ang isang Bibliya na nagbibigay-kapurihan sa Awtor nito. (2 Samuel 23:2) Ibinalik ng Bagong Sanlibutang Salin ang pangalan ni Jehova nang mga 7,000 ulit kung saan ito lumitaw sa pinakamatatandang manuskrito, gaya ng makikita sa larawan sa ibaba. (Awit 83:18) Bilang resulta ng maraming taon ng maingat na pag-aaral, ang Bibliyang ito ay masarap basahin at malinaw nitong naitatawid ang kaisipan ng Diyos. May kopya ka man ng Bagong Sanlibutang Salin o wala, pinasisigla ka naming sanayin ang iyong sarili na magbasa ng Salita ni Jehova araw-araw.—Josue 1:8; Awit 1:2, 3.

• Bakit namin napagpasiyahang gumawa ng isang bagong salin ng Bibliya?

• Kung nais mong malaman ang kalooban ng Diyos, ano ang magandang gawin araw-araw?