Jɛrɛmiya
34 Ɔtɛkɛta w’oma le Jehowa wakaye le Jɛrɛmiya etena kaki Nɛbukadinɛza* nkumekanga ka Babilɔna la asɔlayi ande tshɛ, waolelo tshɛ wa la nkɛtɛ waki lo ɛlɔmbwɛlɔ kande ndo anto tshɛ waki lo ndɔsha Jɛrusalɛma la esomba ayɔ tshɛ ɔnɛ:+
2 “Jehowa Nzambi ka Isariyɛlɛ kata ate: ‘Tshɔka tosawole la Zɛdɛkiya+ nkumekanga ka Juda kele towote wate: “Jehowa kata ate: ‘Dimi layanga nkimɔ osomba ɔnɛ lo anya wa nkumekanga ka Babilɔna ko nde ayowotshumba la dja.+ 3 Ndo wɛ hatohandɔ oma lo anya ande, nɛ dia ndooko onyake wɛ ayondama ndo ayokimɔma le nde.+ Wɛ ayɛna nkumekanga ka Babilɔna sso lo sso ko nde ayosawola la yɛ okoko lo okoko ndo wɛ ayotshɔ la Babilɔna.’+ 4 Koko hokamɛ ɔtɛkɛta wa Jehowa, wɛ Zɛdɛkiya nkumekanga ka Juda: ‘Jehowa kata lo dikambo diayɛ ate: “Wɛ hatovɔ la lokuwa la ta. 5 Wɛ ayovɔ lo wɔladi+ ndo vɔ wayosala sɛlɛmɔnyi k’otshumbelo dikambo diayɛ oko wakawasalɛ washɔ, nkumi ya dikanga y’edjedja yaki la ntondo kayɛ ndo vɔ wayokolela ɔnɛ: ‘Hayii nkumɛso!’ nɛ dia ‘dimi kambota dui sɔ,’ mbata Jehowa.”’”’”
6 Ko omvutshi Jɛrɛmiya akatɛ Zɛdɛkiya nkumekanga ka Juda ɛtɛkɛta ɛsɔ tshɛ la Jɛrusalɛma, 7 etena kakalɔshaka asɔlayi wa nkumekanga ka Babilɔna Jɛrusalɛma ndo esomba tshɛ wa Juda wakatshikala,+ Lakishi+ ndo Azeka;+ nɛ dia paka vɔ eto mbaki esomba wakadingama la mpele wakatshikala lo esomba wa Juda.
8 Ɔtɛkɛta wa Jehowa wakaye le Jɛrɛmiya l’ɔkɔngɔ wa nkumekanga Zɛdɛkiya mbidja sheke la anto tshɛ wa la Jɛrusalɛma dia mbaewoya etshungwelo,+ 9 ɔnɛ onto tshɛ pombaka ntshungola mfumbe yande y’ase Hɛbɛru, oyadi ya apami kana ya wamato, diaha kaanga onto nama osekande ose Juda oko mfumbe kande. 10 Ɔnkɔnɛ, ewandji tshɛ ndo anto tshɛ wakakitanyiya. Vɔ wakɔtɔ sheke dia onto tshɛ pombaka nkimɔ mfumbe yande, oyadi ya apami kana ya wamato, ndo aha ntetemala mbalama oko mfumbe nto. Vɔ wakakitanyiya ndo wakaatshike dia vɔ ntshɔ. 11 Koko l’ɔkɔngɔ diko, vɔ wakatokaloya mfumbe y’apami ndo ya wamato yakawakimɔ, ko vɔ wakayowaetɛ nto mfumbe la wolo. 12 Ko ɔtɛkɛta wa Jehowa wakaye le Jɛrɛmiya oma le Jehowa ɔnɛ:
13 “Jehowa Nzambi k’Isariyɛlɛ kata ate: ‘Dimi lakadje sheke la watshɛnyu+ lushi lakamaatondja oma lo wodja w’Edjibito oma lo luudu la lɔhɔmbɔ+ nte: 14 “Lo ekomelo ka ɛnɔnyi 7, onto l’onto l’atei anyu pombaka nkimɔ ɔnango l’ose Hɛbɛru lakawoosondja ndo lambookambɛ ɛnɔnyi 6; wɛ pombaka mbokimɔ.”+ Koko watshɛnyu kompokamɛ kana mpokɛ atoyi awɔ le mi. 15 Ndo atete edja,* nyu nyuamɛ nyakakadimɔ, ko nyakasale kɛnɛ kaki ɔlɔlɔ lo washo ami lo mbewoya etshungwelo le asekanyu ndo nyu nyakadje sheke la ntondo kami lo luudu lele la lokombo lami. 16 Koko oma laasɔ, nyu nyakakadimɔ, ko nyakɔnyɔla lokombo lami+ lo nkaloya mfumbe yanyu y’apami ndo ya wamato yakanyakimɔ lo ndjela nsaki* yawɔ ndo nyakaakaloya la wolo lo lɔhɔmbɔ.’
17 “Ɔnkɔnɛ, Jehowa kata ate: ‘Nyu kokitanyiyami lo mbewoya etshungwelo, onto l’onto le ɔnango ndo le osekande.+ Ɔnkɔnɛ, dimi layanga mbewoya etshungwelo dikambo dianyu,’ mbata Jehowa, ‘otsha lo lokuwa la ta, lo elando,* lo ndjala ka kasha,+ ndo dimi layonyetɛ ɛngɔ ka wɔnɔnyi le waolelo tshɛ wa la nkɛtɛ.+ 18 Ndo kɛnɛ mbayokomɛ anto wɔnyɔla sheke yami lo woho wakiwɔ kokitanyiya ɛtɛkɛta wa lo sheke yakawadje la ntondo kami etena kakawahembola ɔsɔngɔ wa ngɔmbɛ lo 2 ndo kakawete l’atei wa tenyi diakɔ,+ 19 mbuta ate, ewandji wa Juda, ewandji wa Jɛrusalɛma, ɛnɛnɛ wa laka nkumekanga, ɛlɔmbɛdi ndo anto tshɛ wa lo wodja wakete l’atei wa tenyi dia ngɔmbɛ kakɔ: 20 Dimi layowakimɔ le atunyi awɔ ndo le wanɛ wayanga dia mbɔsa nsɛnɔ yawɔ,* ko edo awɔ wayonga mbo ya ndɛ ya tofudu ta l’olongo ndo ya nyama ya la nkɛtɛ.+ 21 Ndo dimi layokimɔ Zɛdɛkiya nkumekanga ka Juda la ewandji ande lo anya w’atunyi awɔ, lo anya wa wanɛ wayanga dia mbɔsa nsɛnɔ yawɔ,* ndo lo anya w’asɔlayi wa nkumekanga ka Babilɔna,+ wanɛ watamɔ oma le nyu.’+
22 “‘Dimi layodja didjango,’ mbata Jehowa, ‘ndo dimi layowakaloya oya lo osomba ɔnɛ, ko vɔ wayowɔlɔsha, wayowɔsa ndo wayowotshumba la dja;+ ndo dimi layetɛ esomba wa Juda nkɛtɛ ya shɛnga, aha la onto ladjasɛ lɔkɔ.’”+