Jɔbɔ
20 Zɔfara+ ose Naamatɛ akakadimola ate:
2 “Diakɔ diele tokanyi tami hita tantshindja wɔɔngɔ tambontshutshuya dia nkadimola
L’ɔtɛ wa nkɛlɛ kokami.
3 Dimi lamboka lohango latɛngamami;
Ndo yimba* yami mbambontshutshuya dia nkadimola.
4 Lo mɛtɛ, wɛ okeyaka dikambo nɛ,
Nɛ dia okongaka ngasɔ ntatɛ lam’akakitshama pami* la nkɛtɛ,+
5 Dia ekoko w’ɔngɛnɔngɛnɔ wa kanga kɔlɔ hawonge edja
Ndo ɔngɛnɔngɛnɔ w’onto laheye Nzambi* mongaka wa tshanda mɔtshi tsho.+
6 Kaanga mbele woke woke ande mbidɛka polo l’olongo
Ndo ɔtɛ ande komaka lo wange,
7 Nde ayolanyema pondjo oko tumi tande;
Wanɛ wakawɛnaka wayota vate: ‘Lende eende?’
8 Nde ayofumbɔ oko dɔ, ko vɔ hawotowonda;
Nde ayotshanyema oko ɛnɛlɔ ka l’otsho.
9 Sso diakawɛnyi hadiotowɛna nto,
Ndo dihole diande hadiotowɛna nto.+
10 Anande wayoyanga dia mbokama kɛtshi oma le ose wola,
Ndo anya ande hita wayokaloya ɔngɔnyi ande.+
11 Weka ande wakalole tɔɔ la wolo wa lo nshi y’ɔlɔngɔlɔngɔ,
Koko vɔ* wayetama kaamɛ la nde lo ditshu di’anyanya.
12 Naka kɛnɛ kele kɔlɔ kekɔ mpɛ l’onyɔ ande,
Naka nde kishɛka l’ɛse ka lolemi lande,
13 Naka nde ayɔngɛnangɛna la tɔ ndo hakitshike
Koko tetemalaka kiomba lo onyɔ ande,
14 Mbo ya ndɛ yande yayokadimɔ okayi l’etei kande;
Yɔ yayoyala le nde oko lɔlɛngɔ* la oloyi wa kɔbra.
15 Nde akamɛnɛ ɔngɔnyi, koko nde ayowotowɔ;
Nzambi ayowotondja oma lo dikundju diande.
16 Nde ayohiha lɔlɛngɔ la oloyi wa kɔbra;
Kana waanga* w’oloyi wa lɔlɛngɔ wayowodiaka.
17 Nde hɛnaki ɛkɛdi w’ashi pondjo,
Ɛkɛdi wa osanga ndo matɛka.
18 Nde ayokaloya diangɔ diande aha la nkamba la diɔ;*
Nde hatɔngɛnangɛna la ɔngɔnyi w’oma l’okanda+ ande.
19 Nɛ dia nde akaminola ndo akasɛkɛ ose wola;
Nde akɔshi la wolo luudu lakinde kombika.
20 Koko ndamɛ hatoyaoka lo wɔladi;
Ɔngɔnyi ande hatowokimanyiya dia nde panda.
21 Ndooko ɛngɔ katshikala dia nde ndɛ;
Diakɔ diele ɔngɔnyi ande hawotoviya.
22 Lam’ayokoma ɔngɔnyi ande lo kondoko, ekiyanu wayowokumɛ;
Wolo tshɛ wa mpokoso wayɔlɔshana la nde.
23 Etena kayondolodia dikundju diande,
Nzambi* ayowotomɛ nkɛlɛ kande kadɔdɔ,
Kayowɔlwɛ oko mvula lo ɛsɔhi ande.
24 Lam’ayondolawɔ dihomɔ dia ta dia mbolo,
Mpito y’oma lo ota wa nkonga yayowotshieta.
25 Nde ayokola lohito oma l’ɔkɔngɔ ande,
Ehomɔ ka ta katondja esase oma lo djolo yande,
Ndo wɔma wambowonda.+
26 Wodjima wa tshududu wekɔ lo kongɛɛ diangɔ diande dia nɛmɔ;
Dja yele ndooko onto lakayihɛtsha yayowotshumba;
Mpokoso kekɔ lo kongɛɛ ehandɔ tshɛ wa lo luudu lande la dipɛma.
27 Olongo wayoshola munga kande;
Nkɛtɛ yayonɛɛ dia mbɔlɔsha.
28 Elola kayɛmba luudu lande;
Ɔsɔ ayonga elola ka mamba lo lushi la nkɛlɛ ka Nzambi.*
29 Kɛsɔ mbayolongola kanga kɔlɔ oma le Nzambi,
Etenyi k’okitɔ kakate Nzambi lo dikambo diande.”