Luka

1 Lam’ele anto efula wakafunde ɔkɔndɔ w’akambo wetawɔma* tshɛ lo tshɛ l’atei aso,+ 2 oko wakatotɛ wanɛ waki oma ko etatelo ɛmɛnyi+ w’akambo akɔ ndo ekambi wa losango,+ 3 shakasaka Teɔfilɛ+ le, dimi lawɔ lakɔshi yɛdikɔ ya kofundɛwɔ lo yoho yɔlɔngami dimɛna, nɛ dia dimi lakayangiayangia akambo akɔ tshɛ oma k’etatelo lo yoho ya mɛtɛ, 4 dia wɛ mbeya dimɛna l’eshikikelo tshɛ ɔnɛ akambo wakawaketsha+ wekɔ mɛtɛ.

5 Lo nshi yaki Hɛrɔdɛ*+ nkumekanga ka Judeya, mbaki ɔlɔmbɛdi ɔmɔtshi wakawelɛka Zɛkariya wa lo olui wa Abidja.+ Wadɛnde aki ɔna Arɔna, lokombo lande Elizabɛtɛ. 6 Vɔ akɔ 2 waki anto w’ɛlɔlɔ lo washo wa Nzambi, vɔ wakakɛndakɛndaka aha l’onongo lo ndjela ɛlɛmbɛ la wadjango tshɛ waki Jehowa.* 7 Koko, vɔ kombota ndooko ɔna nɛ dia Elizabɛtɛ aki ekomba ndo vɔ akɔ 2 waki waya esombe wa lokosombe.

8 Lam’ele nde akakambaka oko ɔlɔmbɛdi lo ɔkɛndɛ waki la olui+ ande la ntondo ka Nzambi, 9 lo ndjela woho wakasalemaka* olimu w’ɛlɔmbɛdi, mbala kaki Zɛkariya ka ntshumba tshɔ+ lo tɛmpɛlɔ k’ekila kaki Jehowa*+ kakakoke. 10 Nyemba y’anto tshɛ wakalɔmbaka l’andja wonya wakatshumbamaka tshɔ. 11 Ondjelo wa Jehowa* akɛnama le nde, emadi lo lonya l’omi la elambwelo ka tshɔ. 12 Koko lam’akandawɛnyi, Zɛkariya akatshimbe wɔɔngɔ ndo akoke wɔma efula. 13 Ko ondjelo akawotɛ ate: “Zɛkariya, tokake wɔma, nɛ dia ɛsɛngɔsɛngɔ ayɛ wambokɛma ndo wadɛyɛ Elizabɛtɛ ayokotɛ ɔna pami, kowɔlɛ Joani.+ 14 Wɛ ayonga l’ɔngɛnɔngɛnɔ ndo l’ɔlɔ w’efula ndo anto efula wayɔngɛnangɛna lo eotwelo+ kande, 15 nɛ dia nde ayonga woke lo washo wa Jehowa.*+ Koko nde hahombe nnɔ wanu kana wanu tshɛ+ wadjoya ndo nde ayolodiama la nyuma k’ekila kaanga la ntondo ka eotwelo+ kande,* 16 nde ayokimanyiya ana w’ase Isariyɛlɛ efula dia vɔ nkalola le Jehowa* Nzambi+ kawɔ. 17 Ndo nde ayɔkɛndakɛnda la ntondo kande la nyuma kaki Elidja ndo la wolo+ dia nkaloya etema w’ambutshi w’apami le anawɔ+ ndo akanga w’ohedia lo lomba l’oshika lele la anto w’ɛlɔlɔ, dia nɔngɔsɔlɛ Jehowa* anto.”+

18 Zɛkariya akatɛ ondjelo ate: “Ngande wakokami monga l’eshikikelo ka dikambo sɔ? Nɛ dia dimi la wadɛmi taya esombe wa lokosombe.” 19 Ondjelo akookadimola ate: “Lokombo lami Ngabriyɛlɛ.+ Dimi temalaka la ntondo ka Nzambi+ ndo lakatomami dia ndjosawola la yɛ ndo ndjokewoya lokumu l’ɔlɔlɔ lɔsɔ. 20 Hokamɛ, wɛ ayonga lomi ndo hatɔtɛkɛta polo lushi layokotshama akambo asɔ, nɛ dia wɛ hetawe ɛtɛkɛta ami, wele wayokotshama l’etena kakashikikɛma.” 21 L’etena kɛsɔ, anto wakatetemalaka nkonga Zɛkariya ndo vɔ wakaambe lo woho wakandaviya edja efula lo tɛmpɛlɔ k’ekila. 22 Lam’akandatombe, nde kokoka ntɛkɛta la wɔ, ko vɔ wakashihodia dia nde oma la mɛna ɛnɛlɔ lo tɛmpɛlɔ k’ekila. Nde akaalembetshiyaka akambo l’anya ndo akatshikala lomi. 23 Lam’akashile nshi yande y’olimu w’ekila,* nde akatshu lakande.

24 L’ɔkɔngɔ wa nshi mɔtshi, wadɛnde Elizabɛtɛ akatshu diemi. Nde akayashɛ ngɔndɔ 5, ata ate: 25 “Nganɛ kambosalɛ Jehowa* lo nshi nyɛ. Nde ambombidja yimba dia minyami lo nsɔnyi l’atei w’anto.”+

26 Lam’akinde la diemi ngɔndɔ 6, Nzambi akatome ondjelo Ngabriyɛlɛ+ nto l’osomba wa la Ngalileya welɛwɔ Nazarɛtɛ, 27 le womoto l’emuma+ laki omambedi wa pami kakawelɛka Yɔsɛfu, lo nkumbo ka Davidɛ, ndo lokombo la womoto akɔ l’emuma ko Mariya.+ 28 Lam’akakome Ngabriyɛlɛ le nde, nde akawotɛ ate: “He mɔyɔ, wɛ lamboleka mpomɔ lokolo l’ɔlɔ lo washo wa Nzambi! Jehowa* ekɔ la yɛ.” 29 Ko Mariya akahandjɔ wɔɔngɔ efula lo mboka ɛtɛkɛta ande ndo akayange dia nshihodia woho wa mɔyɔ ɔsɔ. 30 Ko ondjelo akawotɛ ate: “Tokake wɔma, Mariya. Wɛ ambohomɔ lokolo l’ɔlɔ lo washo wa Nzambi. 31 Eenda, wɛ ayotshɔ diemi,* ayota ɔna pami,+ kowɔlɛ ɔnɛ Yeso.+ 32 Nde ayoyala woke,+ wayowelɛ vate Ɔna aki Ɔnɛ-Laheme-Tshɛ+ ndo Jehowa* Nzambi ayowosha kiti ka lowandji ka Davidɛ she,+ 33 ko nde ayonga Nkumekanga lo luudu la Jakɔbɔ pondjo pondjo ndo Diolelo+ diande hadiotonga l’ekomelo.”

34 Ko Mariya akambola ondjelo ate: “Woho akɔna wayosalema dikambo sɔ, lam’ele dimi lateyanaka la pami?”+ 35 Ondjelo akookadimola ate: “Nyuma k’ekila kayoya le yɛ+ ndo wolo wa Ɔnɛ-Laheme-Tshɛ wayokokomba. Diakɔ diele ɔna layotɔ ayelamɛ ɔnɛ ekila,+ Ɔna Nzambi.+ 36 Ndo hokamɛ, owotɔ ayɛ Elizabɛtɛ lakawelɛka ekomba ambotshɔ diemi nde lawɔ l’osombe ande, aya ngɔndɔ 6; 37 nɛ dia le Nzambi, ndooko etelo* kahakoke salema.”+ 38 Ko Mariya akate ate: “Eenda, okambi waki Jehowa* wa womoto kemi! Diatshame le mi oko watayɛ.” Ko ondjelo akootshike.

39 Lo nshi shɔ, Mariya akatshu esadi lo lɛkɛ l’akona, l’osomba ɔmɔtshi wa la Juda, 40 ko nde akɔtɔ lo luudu laki Zɛkariya ndo akasha Elizabɛtɛ mɔyɔ. 41 Lam’akoke Elizabɛtɛ mɔyɔ waki Mariya, ɔna laki l’otema ande akakunyɔkunyɔ ndo Elizabɛtɛ akalodiama la nyuma k’ekila, 42 ko nde akate la dui dia wolo ate: “Wɛ ambɔtshɔkwama l’atei a wamato tshɛ ndo ɔna lele l’otema ayɛ atshɔkwame! 43 Ande diɛsɛ diele la mi dia nyango Nkumadiɔndjɔ ndja le mi lee! 44 Nɛ dia, kam’akamoki wondjo wa mɔyɔ ayɛ lo atoyi ami, ɔna lele l’otema ami akakunywekunywe l’ɔlɔ. 45 Ɔngɛnɔngɛnɔ ndo le womoto laketawɔ, nɛ dia akambo tshɛ w’oma le Jehowa* wakawawotɛ wayokotshama.”

46 Ko Mariya akate ate: “Anima* ami watombole Jehowa,*+ 47 ndo otema ami wayololaka nshi tshɛ l’ɔngɛnɔngɛnɔ lo dikambo dia Nzambi, Oshimbedi+ ami, 48 nɛ dia nde akɛnyi dia okambi ande wa womoto+ bu onto la lokumu. Ntatɛ oma ko kakianɛ, anto wa lo nɔnga tshɛ wayotaka dia lekɔ kanga ɔngɛnɔngɛnɔ,+ 49 nɛ dia Kanga nkudu ambonsalɛ akambo wa weke ndo lokombo+ lande lekɔ ekila. 50 Ndo nde ayokaka wanɛ wawoka+ wɔma lo nɔnga la nɔnga kɛtshi. 51 Nde ambosala akambo wa wolo la lonya lande; nde ambodianganya wanɛ wele la lotamanya l’etema+ awɔ. 52 Nde amboholoya akanga wa wolo oma lo kiti yawɔ ya lowandji+ ndo ambodiya akanga w’okitshakitsha;+ 53 nde ambolotsha wanɛ wele la ndjala la diangɔ+ di’amɛna ndo ambokaloya akanga w’ɛngɔnyi anya hwe. 54 Nde ambokimanyiya okambi ande Isariyɛlɛ dia mbohɔ kɛtshi+ kande, 55 le Abrahama ndo le kanula*+ yande pondjo pondjo, oko wakandatɛ watshɛso.” 56 Mariya akatshikala kaamɛ la Elizabɛtɛ ngɔndɔ oko 3, ko akakalola lakande.

57 Etena ka Elizabɛtɛ mbota kakakoke, ko nde akote ɔna pami. 58 Asukanyi ande kaamɛ la ewotɔ ande wakoke dia Jehowa* ambowoka kɛtshi ko vɔ wakangɛnangɛna kaamɛ la nde.+ 59 Lushi la 8, vɔ wakatshu dia tonya ɔna+ mpota ndo vɔ wakalange mbɔlɛ ɔna lokombo la Zɛkariya, she. 60 Koko nyango akate ate: “Keema, nyowɔlɛ Joani.” 61 Ko vɔ wakawotɛ vate: “Ndooko ose nkumbo kanyu ɔtɔi lele la lokombo lɔsɔ.” 62 Ko vɔ wakambola she lo mbɛnya tolembetelo l’anya dia nde mbuta lokombo lalangande mbɔɔlɛ. 63 Ko nde akalɔmbɛ dibaya ndo akafunde ate: “Lokombo lande Joani.”+ Ko vɔ tshɛ wakaambe. 64 Mbala kakɔ ɔtɔi, onyɔ ande wakadihɔ ndo lolemi lande lakakelekɔ ko nde akatatɛ ntɛkɛta,+ atombola Nzambi. 65 Asukanyi ande tshɛ wakandama la wɔma ndo wakatɛkɛtaka dia akambo asɔ tshɛ lo lɛkɛ l’akona la la Judeya. 66 Ndo anto tshɛ wakoke dikambo sɔ wakadilame l’etema awɔ, wata vate: “Ngande wayoyala ɔna ɔsɔ?” Nɛ dia lonya la Jehowa* laki kaamɛ la nde.

67 Ko Zɛkariya she akalodiama la nyuma k’ekila ndo akate prɔfɛsiya ate: 68 “Jehowa* Nzambi k’Isariyɛlɛ atombɔme,+ nɛ dia nde ambodja anto ande yimba ndo ambowatshungola.+ 69 Ndo nde ambototondjɛ loseke la panda*+ lo luudu l’okambi+ ande Davidɛ, 70 oko wakandate l’enyɔ w’amvutshi ande w’ekila wa lo nshi y’edjedja,+ 71 dia toshimbɛ oma le atunyi aso ndo oma l’anya wa wanɛ tshɛ watohetsha;+ 72 dia mboka watshɛso kɛtshi ndo dia mbohɔ sheke+ yande y’ekila, 73 etshibelo kakandatshibɛ Abrahama tshɛso,+ 74 dia l’ɔkɔngɔ wa sho ntshungɔ oma l’anya w’atunyi aso, nde tosha diɛsɛ dia sho mbokambɛ olimu w’ekila aha la mboka wɔma, 75 la kɔlamelo ndo la losembwe la ntondo kande nshi tshɛ ya lɔsɛnɔ laso. 76 Koko wɛ ɔna, wayokelɛ ɔnɛ omvutshi wa Ɔnɛ-Laheme-Tshɛ, nɛ dia wɛ ayeta la ntondo ka Jehowa* dia nɔngɔsɔla mboka+ yande, 77 dia mbisha anto ande ewo ka panda oma lo edimanyielo ka pɛkato+ yawɔ, 78 l’ɔtɛ wa kɛtshi k’efula kaki Nzambi. Kɛtshi k’oma l’olongo kɛsɔ kayonga oko osase wa wonya wahɛta la pindju, 79 dia ngamulɛ wanɛ wodjashi lo wodjima ndo wele lo dɛdi+ dia nyɔi osase, dia nɔmbɔla ekolo aso lo mboka ka wɔladi.”

80 Ɔna akatoolaka ndo akatatshundaka lo yimba ndo nde akatshikala l’oswe polo lushi lakandayaɛnya lo sɛkɛ le Isariyɛlɛ.