1 Kɔrɛtɔ
4 Onto pombaka tɔsa oko ekambi wa* Kristo ndo oko alami wa toseke t’ekila+ taki Nzambi. 2 Lo dikambo sɔ, kɛnɛ kalongamɛwɔ oma le alami ele dia vɔ monga la kɔlamelo. 3 Koko le mi, ekɔ dui dia anyanya dia dimi nomboshama oma le nyu kana lo tominadi t’anto. Dimi hayalombosha dimɛ. 4 Nɛ dia dimi haleye dia lakasale dikambo dimɔtshi dia kɔlɔ. Koko lo mbuta ngasɔ, dimi halɛnya dia lekɔ onto ɔlɔlɔ, Jehowa*+ kansɛdingola. 5 Ɔnkɔnɛ, tanyolomboshake+ ndooko dui la ntondo k’etena kakashikikɛma, polo ndo lam’ayoya Nkumadiɔndjɔ. Nde ayotondja akambo woshɛmi wa wodjima lo osase ndo ayeyanya tokanyi tele l’etema, ndo l’etena kɛsɔ kayolongola onto l’onto lotombo lande oma le Nzambi.+
6 Oma lɔkɔ nyu analengo, dimi lakakambe la akambo asɔ le mi dimɛ ndo le Apolo+ dia ɔlɔlɔ anyu, dia lo tshimbo yaso nyu nkondja wetshelo ɔnɛ: “Tanyotambake kɛnɛ kofundami” diaha nyu monga la otako+ lo mbɔsa dia onto ɔmɔtshi ndeka onto okina. 7 Nɛ dia kakɔna kakotshikitanya la onto okina? Ɛɛ, kakɔna kele la yɛ kakiyɛ konongola?+ Ko naka mɛtɛ wɛ akakilongola, lande na kayatombolayɛ wate kana oko wɛ kokilongola?
8 Onde nyu nyamboshila ndota? Onde nyu nyamboshila monga ɛngɔnyi? Onde nyu nyambotatɛ mbolɛ oko nkumi ya dikanga+ aha la sho monga? Dimi mɛtɛ kombolaka dia nyu ntatɛ mbolɛ oko nkumi ya dikanga dia sho lawɔ mbolɛ kaamɛ la nyu oko nkumi ya dikanga.+ 9 Nɛ dia dimi mɛnaka dia Nzambi ambotokitsha sho apɔstɔlɔ oko anto w’ekomelo l’ɔnɔngɔ w’anto wakafundamɛ nyɔi+ dia anto tshɛ tɛɛna, nɛ dia anto wa l’andja w’otondo+ ndo andjelo wekɔ lo totanganɛ. 10 Sho tekɔ dinginya+ l’ɔtɛ wa Kristo, koko nyu nyekɔ akanga wa tɔkɛsɔ lo Kristo. Sho tekɔ wɔdu, koko nyu nyekɔ wolo. Nyu nyekɔ la kɛnɛmɔ, koko sho tamboshama nsɔnyi. 11 Polo ndo wonya ɔnɛ sho tekɔ lo ntetemala monga la ndjala,+ la mposa k’ashi+ ndo l’otaka,* tekɔ lo kɔmama*+ ndo sho keema la luudu 12 ndo tekɔ lo diɛnɛ lo nkamba l’anya aso.+ Etena katɔtɛngawɔ, sho mbatshɔkɔlaka.+ Etena katɔhɛnyahɛnyawɔ, sho mbikikɛka+ la solo dia lotutsha tshɛ. 13 Etena katomamatanyɛwɔ akambo, sho mbakadimolaka la memakana.*+ Polo ndo wonya ɔnɛ tekɔ oko afumbu wa andja ɔnɛ, tekɔ oko mindo ya diangɔ tshɛ yakashema lo dala.
14 Lambofunda akambo anɛ, aha dia nyosha nsɔnyi, koko dia nyolaka oko wenyu anami wa ngandji. 15 Nɛ dia kaanga mbakokanyu monga la alami* nunu dikumi (10 000) lo Kristo, lo mɛtɛ nyu bu la washɛnyu efula, dikambo le Kristo Yeso, dimi lakayala shɛnyu l’ekimanyielo ka lokumu l’ɔlɔlɔ.+ 16 Ɔnkɔnɛ, dimi lambonyɔsɛngasɛnga nte: Nyombokoya.+ 17 Diakɔ diamomonyotomɛ Timɔte, nɛ dia nde ekɔ ɔnami la ngandji ndo la kɔlamelo lo Nkumadiɔndjɔ. Nde ayonyohola toho tasalami akambo* lo kɛnɛ kendana la Kristo Yeso,+ oko wetshami ahole tshɛ lo etshumanelo tshɛ.
18 Anto amɔtshi waya la otako wate kana oko handjoya le nyu. 19 Koko keema edja layoya lengo le nyu, naka Jehowa* alanga, ndo layoyeya, aha ɛtɛkɛta wa wanɛ wele la otako, koko wolo awɔ. 20 Nɛ dia Diolelo dia Nzambi bu dikambo dia ɛtɛkɛta, koko dikambo dia wolo. 21 Alanganyu na? Onde ndje la ɔhɛhɛla,+ ko kana la ngandji ndo la yimba ya memakana?