Zɛkariya

Jehowa kele ɔnɛ lasala wange wa mvula,

Lawahongolɛ+ mvula,

Ndo lasha onto tshɛ tombatomba dia lo ekambɔ.

 2 Nɛ dia mpingu ya terafimɛ* kesaka;*

Ndo wanɛ wasala diendja mɛnaka ɛnɛlɔ ka kashi.

Vɔ mbutaka alɔ w’anyanya,

Ndo lo anyanya mbatowohembaka dia nsamba.

 3 Nkɛlɛ kami kekɔ lo nombalomba otsha le alami w’ɛkɔkɔ,

Ndo dimi layokoya la ɛnɔmbɔdi wasoyana;*

Nɛ dia Jehowa kanga lolembelembe ambodja ɛkɔkɔ+ ande yimba, luudu la Juda,

Ndo nde ambowaetɛ oko mfalasa kande ka ta ka diambo.

 4 Oma le nde kaya onto la woke,*

Oma le nde kaya omboledi wasukɛ,*

Oma le nde kaya ota wa ta;

Oma le nde katomba omendji* tshɛ, vɔ tshɛ kaamɛ.

 5 Ndo vɔ wayonga oko andɔshi wa ta,

Wahɔtshahɔtsha lɔtɛkɛ la lo toshinga lo ta.

Vɔ wayɔlɔ ta, nɛ dia Jehowa ekɔ kaamɛ la wɔ;+

Ndo ambahemi wa mfalasa wayoshama nsɔnyi.+

 6 Dimi layosala dia luudu la Juda ndeka,

Ndo dimi layoshimbɛ+ luudu la Yɔsɛfu.

Dimi layowakaloya,

Nɛ dia dimi layowaoka kɛtshi;+

Ndo vɔ wayonga oko dimi latawakalɛka+ ndooko lushi;

Nɛ dia dimi kele Jehowa Nzambi kawɔ, ndo dimi layowakadimola.

 7 Aseka Efrayimɛ wayonga oko ɔndɔshi wa ta wa wolo,

Ndo etema awɔ wayɔngɛnangɛna oko la wanu.+

Anawɔ wayɛna dikambo sɔ ko wayɔngɛnangɛna;

Etema awɔ wayonga la ɔlɔ le Jehowa.+

 8 ‘Dimi layowadɛ kioko ndo layowasanganya kaamɛ;

Nɛ dia dimi layowatshungola,+ ko vɔ wayonga efula,

Ndo wayotetemala monga efula.

 9 Oyadi dimi mbahandjola oko ntɔngɔ l’atei wa wedja,

Vɔ wayombohɔ lo ahole w’etale;

Vɔ la anawɔ wayɔsɛna nto ndo wayokalola.

10 Dimi layowakaloya oma lo wodja w’Edjibito

Ndo layowatshumanya oma l’Asuriya;+

Dimi layowatɔla lo wodja wa Ngiliyadɛ+ ndo wa Lɛbanɔna,

Ndo ndooko dihole diayotanema nto dikambo diawɔ.+

11 Nde ayeta lo ndjale la lɔkɔnyɔ;

Ndo nde ayɔkɔmɔla asuku+ wa ndjale;

Angunda tshɛ wa Nilɛ wayoma.

Otako w’Asuriya wayɔkɔ,

Ndo danga di’Edjibito diayomɔ.+

12 Dimi Jehowa+ layosala dia vɔ ndeka,

Ndo vɔ wayetetaka lo lokombo+ lande,’ mbata Jehowa.”