Isaya
16 Nyotomee omboledi wa wodja ɔkɔkɔ w’omi,
Oma la Sela l’oswe wa shɛnga
Otsha lo dikona di’ɔna womoto la Siɔna.
2 Oko fudu kambowotshanya oma lo kefu katɔ,+
Ngasɔ mbayonga ana wa wamato wa Mɔaba lo ateho wa Aranɔna.+
3 “Nyosha dako, nyokotsha yɛdikɔ.
Sala dɛdi diayɛ la midi oko otsho.
Shɛ wanɛ wambohandjɔnɛ ndo tofungake wanɛ watalawɔ.
4 Mɔaba le, anto ami wambohandjɔnɛ wadjasɛ le yɛ.
Oyale dihole di’eshamelo le wɔ l’ɔtɛ w’ondanyishi.+
Osoyanyi ayokoma l’ekomelo kande,
Elanyelo kayokoma l’ekomelo,
Ndo wanɛ wahɔtshahɔtsha anto akina wayolanyema oma la nkɛtɛ.
5 Oma laasɔ, kiti ka lowandji kayoshikikɛma nge lo ngandji ka kɔlamelo.
Ɔnɛ ladjasɛ lɔkɔ lo luudu la dipɛma la Davidɛ ayonga la kɔlamelo;+
Nde ayolombosha la losembwe ndo ayela sambo k’ɔlɔlɔ+ esadi.”
6 Takoke dikambo dia otako wa Mɔaba, nde ekɔ la lotamanya efula,+
Lotamanya lande, otako ande ndo odudu ande;+
Koko ɛtɛkɛta ande w’anyanya hawotokotshama.
7 Ɔnkɔnɛ, Mɔaba ayolela Mɔaba,
Vɔ tshɛ wayolela.+
Wanɛ wakɔmama wayolela ekate w’elowa wa vinyɔ wa Kirɛ-Harɛsɛta.+
8 Nɛ dia ebondo washimba menga wa la Hɛshibɔna+ wambɔnda,
Ɛkɔdi wa vinyɔ wa Sibima,+
Emboledi wa wodja wambɔhɔtshahɔtsha ntahe yawɔ ya beela;
Yɔ yambokoma polo la Jazɛrɛ;+
Yɔ yambotshɔ polo l’oswe wa shɛnga.
Sɔngusɔngu yawɔ yambotomba ndo yambotshɔ polo lo ndjale.
9 Diakɔ diayomolela ɔkɔdi wa vinyɔ wa Sibima oko walelami Jazɛrɛ.
Hɛshibɔna la Elealɛ+ le, dimi layonyɔlɔya la asɔyi ami,
Nɛ dia ekoko wendana la elowa wa lo nshi y’ɔwɔ ndo dinela diayɛ diambokomɛ.*
10 Ɔngɛnɔngɛnɔ ndo ɔlɔ wambonyɛma oma lo ekambɔ k’elowa,
Ndo esambo w’ɔngɛnɔngɛnɔ kana ekoko waya bu lo dikambɔ dia vinyɔ.+
Ɔnɛ lahɔtshahɔtsha hayɔhɔtshahɔtsha vinyɔ lo diamula,
Nɛ dia dimi lakasale dia wodelo w’ekoko nkomɛ.+
11 Diakɔ diele l’etei kami, dimi lambodidima l’ɔtɛ wa Mɔaba,+
Oko eshinga wa lɔsɛsɛ,
Ndo tshondo yami ya l’etei lo dikambo dia Kirɛ-Harɛsɛta.+
12 Kaanga naka Mɔaba nɛmba lo dihole dia la diko ko ntshɔ dia tɔlɔmba lo tɛmpɛlɔ kande k’ekila, nde hatosala ndooko dui.+