Jɛrɛmiya

44 Ɔtɛkɛta wakaye le Jɛrɛmiya lo dikambo di’ase Juda tshɛ wakadjasɛka lo wodja w’Edjibito,+ wanɛ wakadjasɛka la Mingidɔlɛ,+ Tapanɛhɛsɛ,+ Nofu*+ ndo lo wodja wa Patɛrɔsɛ+ ɔnɛ: 2 “Jehowa kanga lolembelembe, Nzambi k’Isariyɛlɛ kata ate: ‘Nyu nyakɛnyi mpokoso tshɛ kakamela la Jɛrusalɛma+ ndo lo esomba tshɛ wa Juda, ndo ɛlɔ vɔ wambolanyema aha la onto ladjasɛ lɔkɔ.+ 3 L’ɔtɛ w’awui wa kɔlɔ wakawasale dia mbotshami nkɛlɛ lo ntshɔ tolambola elambo+ ndo lo kambɛ tozambizambi tokina takiwɔ kombeya, oyadi nyu kana watshɛnyu.+ 4 Dimi lakatetemalaka nyotomɛ ekambi ami tshɛ amvutshi, lakaatomaka mbala la mbala* dia ndjonyotɛ ɔnɛ: “Lam’alanganyu, tanyosalake dikambo dia wɔnɔnyi nɛ diahetshami.”+ 5 Koko vɔ kompokamɛ kana mpokɛ atoyi awɔ dia nkalola oma lo kɔlɔ kawɔ dia ntshika nambola tozambizambi tokina elambo.+ 6 Ko odudu ami ndo nkɛlɛ kami kakatshulɔ, kakahɛtɛ lo esomba wa Juda ndo lo toshinga ta la Jɛrusalɛma, ko vɔ wakayala elanyelo ndo tɔngɔ to oko wewɔ ɛlɔ.’+

7 “Kakianɛ, Jehowa Nzambi kanga lolembelembe, Nzambi k’Isariyɛlɛ kata ate: ‘Lande na kayayangɛnyu nyuamɛ* mpokoso ka woke, dia pami ndo womoto tshɛ, ɔna ndo ɔna ashashi ndjolanyema la Juda aha la nyotshikɛ kaanga atshikadi? 8 Lande na kahombanyu mbotshami nkɛlɛ la elimu w’anya anyu lo nambolaka tozambizambi tokina elambo lo wodja w’Edjibito lɛnɛ akanyatshu todjasɛ? Nyu nyayolanyema ndo nyayonga ɛngɔ ka mananu la ka lɔtɛngɔ l’atei wa wedja tshɛ wa la nkɛtɛ.+ 9 Onde nyu nyambohɛ etsha wa kɔlɔ wa watshɛnyu, etsha wa kɔlɔ wa nkumi ya dikanga ya Juda,+ etsha wa kɔlɔ wa wadiɛwɔ,+ kaamɛ ndo etsha anyu hita wa kɔlɔ la etsha wa kɔlɔ wa wadiɛnyu+ wakasalema lo wodja wa Juda ndo lo toshinga ta la Jɛrusalɛma? 10 Polo ndo ɛlɔ, vɔ watayakitshakitsha,* vɔ watoke ndooko wɔma+ ndo vɔ watakɛndakɛnda lo ɛlɛmbɛ ami la wadjango ami wakamakitsha la ntondo kanyu ndo ka watshɛnyu.’+

11 “Ɔnkɔnɛ, Jehowa kanga lolembelembe, Nzambi k’Isariyɛlɛ kata ate: ‘Dimi lamboyashikikɛ dia nyela mpokoso, dia ndanya Juda y’otondo. 12 Ndo dimi layɔsa atshikadi wa Juda wanɛ wakayashikikɛ dia ntshɔ lo wodja w’Edjibito dia todjasɛ lɛkɔ, ko vɔ tshɛ wayolanyema lo wodja w’Edjibito.+ Vɔ wayodiakema la lokuwa la ta ndo wayovɔ la ndjala ka kasha; ntatɛ oma le ɔnɛ loleki tshitshɛ polo le ɔnɛ loleki woke, vɔ wayovɔ la lokuwa la ta ndo la ndjala ka kasha. Ndo vɔ wayoyala ɛngɔ kadjama etshii, ɛngɔ ka diambo, mananu ndo lɔtɛngɔ.+ 13 Dimi layosha wanɛ wadjasɛ lo wodja w’Edjibito dilanya oko wakamasha Jɛrusalɛma dilanya la lokuwa la ta, la ndjala ka kasha ndo la elando.*+ 14 Ndo atshikadi wa Juda wanɛ wakatshu todjasɛ lo wodja w’Edjibito hawotohandɔ kana ntshikala la lɔsɛnɔ dia nkalola lo wodja wa Juda. Vɔ wayokombola* nkalola todjasɛ lɛkɔ, koko vɔ hawotokalola, onyake ase dawo yema tshitshɛ tsho.’”

15 Apami tshɛ wakeye dia wadiɛwɔ wakalambolaka tozambizambi tokina elambo ndo wadi akɔ tshɛ wakemala laawɔ, wanɛ wakakenge olui wa woke, ndo wanɛ tshɛ wakadjasɛka lo wodja w’Edjibito,+ la Patɛrɔsɛ+ wakakadimola Jɛrɛmiya vate: 16 “Sho hatotohokamɛ ɔtɛkɛta wakayatotɛ lo lokombo la Jehowa. 17 Koko lo mɛtɛ, sho tayokotsha ɛtɛkɛta tshɛ wakatɛkɛta enyɔ aso, dia nambola Nkumekanga ka womoto ka l’Olongo* elambo ndo mbotshulwɛ elambo wa lotɛ,+ paka oko wakatasale sho, watshɛso, nkumi ya dikanga yaso la ewandji aso lo esomba wa Juda ndo lo toshinga ta la Jɛrusalɛma etena kakiso la mbo ya ndɛ tshavutshavu ndo kakatɔɔkaka lo diɛngɔ, etena kakiso kɔmɛnaka kaanga mpokoso ɔtɔi. 18 Oma ko etena kakatatshike nambola Nkumekanga ka womoto ka l’Olongo* elambo ndo mbotshulwɛ elambo wa lotɛ, takahombe ɛngɔ tshɛ, ko takalanyema la lokuwa la ta ndo la ndjala ka kasha.”

19 Wamato wakakotsha ɔnɛ: “Etena kakatalambolaka Nkumekanga ka womoto ka l’Olongo* elambo ndo kakatootshulwɛka elambo wa lotɛ, shi la lolango laki waomɛso mbakatalambolaka elambo w’ekate wafɔna la osato ande ndo kakatotshulwɛka elambo wa lotɛ?”

20 Ko Jɛrɛmiya akatɛ anto tshɛ, apami la wadiɛwɔ ndo anto tshɛ wakatɛkɛtaka la nde ate: 21 “Elambo wakanyalambolaka, nyu, watshɛnyu, nkumi ya dikanga yanyu, ewandji anyu, ndo anto wa lo wodja lo esomba wa Juda ndo lo toshinga ta la Jɛrusalɛma,+ Jehowa akawaohɔ ndo vɔ wakonge l’otema ande! 22 L’ekomelo, Jehowa kokoka nto mbikikɛ ditshelo dianyu dia kɔlɔ la akambo wa wɔnɔnyi wakanyasale, ndo wodja anyu wakayala dihole diakalanyema, ɛngɔ ka diambo ndo ka mananu, aha la onto ladjasɛ lɔkɔ, oko wediɔ ɛlɔ.+ 23 Nɛ dia nyu nyakalambola elambo ɛsɔ ndo l’ɔtɛ wakanyasalɛ Jehowa pɛkato lo ntona nkitanyiya dui dia Jehowa, dia ndjela ɛlɛmbɛ ande, wadjango ande ndo waohwelo ande mbambonyokomɛ mpokoso kɛnɛ, oko wediɔ ɛlɔ.”+

24 Jɛrɛmiya akatetemala mbutɛ anto tshɛ ndo wamato tshɛ ate: “Nyohokame ɔtɛkɛta wa Jehowa, nyu ase Juda tshɛ wele lo wodja w’Edjibito. 25 Jehowa kanga lolembelembe, Nzambi k’Isariyɛlɛ kata ate: ‘Kɛnɛ kakanyate nyu la wadiɛnyu oma l’enyɔ anyu, nyakakikotsha la anya anyu, nɛ dia nyu nyakate nyate: “Lo mɛtɛ, sho tayokotsha alɔkɔlɔkɔ aso dia nambola Nkumekanga ka womoto ka l’Olongo* elambo ndo mbotshulwɛ elambo wa lotɛ.”+ Nyu wamato nyayokotsha mɛtɛ alɔkɔlɔkɔ anyu ndo nyayoshidiya alɔkɔlɔkɔ anyu.’

26 “Ɔnkɔnɛ, nyu ase Juda tshɛ wadjasɛ lo wodja w’Edjibito, nyohokame ɔtɛkɛta wa Jehowa ɔnɛ: ‘“Dimi lambotshiba lo lokombo lami hita la woke,” mbata Jehowa, “nte, lokombo lami halotodimɔma nto lo etshibelo oma le ose Juda+ tshɛ lele lo wodja w’Edjibito w’otondo layota ate: ‘Lo mɛtɛ, oko wele Nkum’Olongo Nkumadiɔndjɔ Jehowa la lɔsɛnɔ!’+ 27 Kakianɛ, dimi lekɔ lo mbaenda dia mbela mpokoso koko aha dui di’ɔlɔlɔ;+ ase Juda tshɛ wele lo wodja w’Edjibito wayodiakema la lokuwa la ta ndo la ndjala ka kasha polo ndo wamboshila.+ 28 Paka anto yema tshitshɛ tsho mbayohandɔ oma lo lokuwa la ta ndo nkalola oma lo wodja w’Edjibito otsha lo wodja wa Juda.+ Ko atshikadi tshɛ wa Juda, wanɛ wakaye lo wodja w’Edjibito dia ndjodjasɛ lɛkɔ wayeya ɛtɛkɛta waki na wambokotshama, wami kana wawɔ!”’”

29 “‘Ndo ɔnɛ ele djembetelo le nyu,’ mbata Jehowa, ‘yɛnya dia dimi layonyosha dilanya lo dihole nɛ, ko nyu nyayeya dia ɛtɛkɛta ami wakamalake mpokoso dikambo dianyu wayokotshama mɛtɛ. 30 Jehowa kata ate: “Dimi layanga nkimɔ Farawɔ Hɔfara, nkumekanga k’Edjibito lo anya wa atunyi ande ndo wa wanɛ wayanga dia mbɔsa lɔsɛnɔ lande,* paka oko wakamakimɔ Zɛdɛkiya nkumekanga ka Juda lo anya wa Nɛbukadinɛza* nkumekanga ka Babilɔna, ɔnɛ laki otunyi ande ndo lakayangaka dia mbɔsa lɔsɛnɔ lande.”’”*+