Isaya
58 “Welɛ la wolo ayɛ tshɛ; tokitshakitshake dui!
Diya dui diayɛ oko dimama.
Ewoya anto ami ɔtɔmbɔkwɛlɔ awɔ,+
Luudu la Jakɔbɔ pɛkato yawɔ.
2 Vɔ nyangakami lushi la lushi,
Ndo vɔ mɛnyaka ɔngɛnɔngɛnɔ awɔ dia mbeya mboka yami,
Wate kana oko wodja wakasale akambo la losembwe
Ndo waki kotshika losembwe la Nzambi kawɔ.+
Vɔ nɔmbakami dombwelo dia losembwe,
Wangɛnangɛna dia ndjasukanya la Nzambi vate:+
3 ‘Lande na kahayɛnyi etena kakilaso mbo ya ndɛ?+
Ndo lande na kahayɛnyi etena kayasoyaso?’*+
4 Okilelo anyu wa mbo ya ndɛ komɛka la ewanu ndo la ata,
Ndo nyu kɔmɔlaka la dikɔfi dia kɔlɔ.
Hanyokoke nkila mbo ya ndɛ oko wamonyosala ɛlɔ ndo wambokɛma awui anyu l’olongo.
5 Onde okilelo wa mbo ya ndɛ wamomɔsɔna pombaka monga oko wɔsɔ,
Oko lushi la onto ndjasoya,*
Dia onto nkɔlɛ ɔtɛ ande oko kolɔ,
Dia nsala mbeto kande lo dikoto ndo lo otoko?
Onde ɔsɔ kelɛyɛ nkila mbo ya ndɛ ndo lushi langɛnyangɛnya Jehowa?
6 Keema, okilelo wa mbo ya ndɛ wamomɔsɔna vɔ ɔnɛ:
Dia minya mɔlɔla wa awui wa kɔlɔ,+
Dia nkelekola ɛkɔdi wa osembe wa lɔhɔmbɔ,+
Ndo dia mpembola osembe tshɛ wa lɔhɔmbɔ l’ahende;
7 Dia nkahana mbo ya ndɛ yayɛ la ɔnɛ lele la ndjala,+
Dia mbidja ase wola ndo wanɛ wele bu la luudu lo luudu layɛ,
Dia ndɔtsha onto lele la otaka etena kawɛnayɛ,+
Ndo diaha mboka emunyi ayɛ hita ɔkɔngɔ.
8 Ko osase ayɛ wayɔhɛta oko la pindju,+
Ndo ɛkɔnwɛlɔ kayɛ kayosalema esadi esadi.
Losembwe layɛ layotatshɔka la ntondo kayɛ,
Ndo lotombo la Jehowa layonga olami ayɛ w’oma l’ɔkɔngɔ.+
9 Oma laasɔ wɛ ayelɛ, ko Jehowa ayokadimola;
Wɛ ayolela dia nyanga ekimanyielo, ko nde ayota ate: ‘Dimi ɔnɛ!’
Naka wɛ minya osembe wa lɔhɔmbɔ oma l’atei ayɛ
Ndo ntshika ntshuma lohita layɛ ndo ntɛkɛta yoho ya kɔlɔ,+
10 Naka wɛ mbisha ɔnɛ lele la ndjala kɛnɛ kakombolayɛ wɛmɛ*+
Ndo ndotsha amɛnyi mfɔnu,*
Kete osase ayɛ wayɔhɛta kaanga lo wodjima,
Ndo wodjima ayɛ wa tshududu wayonga oko yanyi ya midi.+
11 Jehowa ayokɔlɔmbɔlaka tena tshɛ
Ndo ayokolotsha* kaanga lo nkɛtɛ ya womu;+
Nde ayokeketsha weka ayɛ,
Ndo wɛ ayonga oko ekambɔ katɛwɔ ashi dimɛna,+
Oko ɛtɛkɔ kele ashi atɔ hawomaka.
12 Vɔ wayohika nto ahole w’edjedja wakalana lo dikambo diayɛ,+
Ndo wɛ ayokaloya atshina wa nɔnga yakete.+
13 Naka l’ɔtɛ wa Sabato wɛ ntshika* mbesa wahɔ* ayɛ hita lushi lami l’ekila+
Ndo wɛ ambelɛ Sabato ɔnɛ ɔngɛnɔngɛnɔ w’efula, lushi l’ekila le Jehowa, lushi la tombɔma,+
Ko wɛ litombola lo dihole dia mbesa wahɔ ayɛ hita ndo ntɛkɛta ɛtɛkɛta w’anyanya,
14 Kete wɛ ayokondja ɔngɛnɔngɛnɔ ayɛ w’efula le Jehowa,
Ndo dimi layokɔtɔla lo ahole wa la diko wa la nkɛtɛ.+