Ɛzɛkiyɛlɛ
32 Lo ɔnɔnyi wa 12 ngɔndɔ ka 12 lushi 1, ɔtɛkɛta wa Jehowa wakaye nto le mi ɔnɛ: 2 “Ɔna onto, emba lembo l’otanda* lo dikambo dia Farawɔ nkumekanga ka Edjibito ndo tɛnde wate:
‘Wɛ aki oko ɔsɔngɔ wa ntambwɛ* wa wolo wa wedja,
Koko wɛ ambodihama onyɔ.
Wɛ aki oko shimamba,+ aketetaka lo ndjale yayɛ,
Akafundjaka ashi la ekolo ayɛ ndo akadjaka ɛkɛdi* mindo.
3 “Nkum’Olongo Nkumadiɔndjɔ Jehowa kata ate:
‘Lo tshimbo ya losanganya la wedja efula, dimi layokaamba ɔtɛyi ami,
Ndo vɔ wayokotopola lo ɔtɛyi ami.
4 Dimi layokokalɛ lo okongo;
Dimi layokokasha lo oswe wa bwe.
Dimi layosala dia tofudu tshɛ ta l’olongo kaahema,
Ndo dimi layolotsha nyama ya l’okonda ya la nkɛtɛ k’otondo la emunyi ayɛ.+
5 Dimi layokasha emunyi ayɛ lo akona
Ndo layolodia ekidi la tenyi diayɛ diayotshikala.+
6 Dimi layɔlɔya wodja la dikila diayɛ diasela polo lo akona,
Ndo diɔ diayolodia ɛkɛdi.’*
7 ‘Lam’ayoyodimala, dimi layokomba olongo ndo tɔɔtɔ tawɔ tayonga wodjima.
Dimi layokomba wonya la wange,
Ndo ngɔndɔ hatosha osase atɔ.+
8 Dimi layetɛ diangɔ tshɛ diasha osase l’olongo wodjima l’ɔtɛ ayɛ,
Ndo dimi layokomba wodja ayɛ la wodjima,’ mbata Nkum’Olongo Nkumadiɔndjɔ Jehowa.
9 ‘Dimi layosoya etema wa anto efula lam’ayomɔlɔmbɔla mfumbe yayɛ otsha lo wedja ekina,
Otsha lo wedja wakiyɛ kombeya.+
10 Dimi layosala dia anto efula mindama la wɔma,
Ndo nkumi ya dikanga yawɔ wayodidima la wɔma l’ɔtɛ ayɛ lam’ayomemɛ lokuwa lami la ta la ntondo kawɔ.
Vɔ wayotetemala nsaka lokomba, onto l’onto ooka wɔma dikambo dia lɔsɛnɔ lande,
Lo lushi la ɔkwɛlɔ ayɛ.’
11 Nɛ dia Nkum’Olongo Nkumadiɔndjɔ Jehowa kata ate:
‘Lokuwa la ta la nkumekanga ka Babilɔna layoya le yɛ.+
12 Dimi layosala dia nyemba y’anto ayɛ ndjakema la tokuwa ta ta t’andɔshi wa ta wa wolo,
Wodja woleki esehe l’atei wa wedja, vɔ tshɛ.+
Vɔ wayokitshakitsha lotamanya la Edjibito ndo nyemba yande tshɛ y’anto yayoshilama oshiki.+
13 Dimi layolanya dongalonga diande tshɛ suke la ashi ande w’efula,+
Ndo ndooko dikaka dia onto kana losabɔ la nyama layowafukutanya nto.’+
14 ‘L’etena kɛsɔ, dimi layɛdia ashi awɔ,
Ndo dimi layɔkɛdia ɛkɛdi awɔ oko esɔ,’ mbata Nkum’Olongo Nkumadiɔndjɔ Jehowa.
15 ‘Lam’ayometɛ Edjibito tɔngɔ to, wodja waya bu la kɛnɛ tshɛ kakalolaka lɔkɔ,+
Lam’ayomodiaka anto tshɛ wadjasɛ lɔkɔ,
Vɔ wayohomba mbeya dia dimi kele Jehowa.+
16 Ɔsɔ ekɔ lembo l’otanda ndo ndooko onyake anto wayoliemba;
Ana wa wamato wa wedja wayoliemba.
Vɔ wayoliemba l’ɔtɛ wa Edjibito ndo l’ɔtɛ wa nyemba yawɔ tshɛ y’anto,’ mbata Nkum’Olongo Nkumadiɔndjɔ Jehowa.”
17 Oma laasɔ, lo ɔnɔnyi wa 12 ngɔndɔ nshi 15, ɔtɛkɛta wa Jehowa wakaye le mi ɔnɛ: 18 “Ɔna onto, lela l’ɔtɛ wa nyemba y’ase Edjibito ndo holoyawɔ lo wodja wa l’ɛse nde la ana wa wamato wa lo wodja wa wolo la wanɛ wataholɔ lo difuku.*
19 “‘Akɔna olekiyɛ olangala? Holɔ, tetame la wanɛ waki kominya mpota!’
20 “‘Vɔ wayɔkɔ l’atei wa wanɛ wayodiakema la lokuwa la ta.+ Nde akakimɔma le lokuwa la ta; kotolande kaamɛ la nyemba yande tshɛ y’anto.
21 “‘Oma lo ɛhɔngɔ wa Diombo,* andɔshi wa ta woleki wolo wayɔtɛkɛta lande ndo la wanɛ wookimanyiya. Vɔ mɛtɛ wayoholɔ ndo wanɛ wayodiakema la lokuwa la ta wayetama oko wanɛ waki kominya mpota. 22 Asuriya ekɔ lɛkɔ kaamɛ la leemba lande tshɛ. Waombo awɔ mbodinga, vɔ tshɛ wakadiakema la lokuwa la ta.+ 23 Waombo ande wekɔ lo ɛhɔngɔ wa difuku* ndo leemba lande dinga diombo diande, vɔ tshɛ wakadiakema la lokuwa la ta, nɛ dia vɔ wakokiya anto wɔma lo wodja wa wanɛ wasɛna.
24 “‘Elama+ ekɔ lɛkɔ kaamɛ la nyemba yande tshɛ y’anto dinga diombo diande, vɔ tshɛ wakadiakema la lokuwa la ta. Vɔ wakaholɔ aha la minya mpota otsha lo wodja wa l’ɛse, wanɛ wakokiyaka anto wɔma lo wodja wa wanɛ wasɛna. Wonya ɔnɛ, vɔ wayɛmba nsɔnyi kawɔ kaamɛ la wanɛ wataholɔ lo difuku.* 25 Vɔ wakosalɛ mbeto l’atei wa edo, kaamɛ la nyemba yande tshɛ y’anto dinga waombo ande. Vɔ tshɛ kominya mpota, wakadiakema la lokuwa la ta, nɛ dia vɔ wakokiyaka anto wɔma lo wodja wa wanɛ wasɛna; ndo vɔ wayɛmba nsɔnyi kawɔ kaamɛ la wanɛ wataholɔ lo difuku.* Nde ambokitshama l’atei wa edo.
26 “‘Lɛkɔ mbele Meshɛkɛ la Tubala+ la nyemba yawɔ* tshɛ y’anto. Waombo ande mbodinga. Vɔ tshɛ kominya mpota, wakakama lokuwa la ta, nɛ dia vɔ wakokiyaka anto wɔma lo wodja wa wanɛ wasɛna. 27 Onde vɔ hawotetama kaamɛ la andɔshi wa ta wa wolo waki kominya mpota wakavu, wakaholɔ lo Diombo* kaamɛ la dihomɔ diawɔ dia ta? Ndo vɔ wayokitsha tokuwa tawɔ ta ta l’ɛse ka ɛtɛ* awɔ ndo pɛkato yawɔ lo weka awɔ, nɛ dia andɔshi wa ta wa wolo asɔ wakokiyaka anto wɔma lo wodja wa wanɛ wasɛna. 28 Koko wɛ, wɛ ayominɔma l’atei wa wanɛ waki kominya mpota ndo wɛ ayetama kaamɛ la wanɛ wakadiakema la lokuwa la ta.
29 “‘Ɛdɔmɛ+ ekɔ lɛkɔ, nkumi ya dikanga yande ndo ewandji ande tshɛ wele kaanga mbakiwɔ la wolo, wakakitshama l’atei wa wanɛ wakadiakema la lokuwa la ta; vɔ lawɔ wayetama kaamɛ la wanɛ waki kominya mpota+ ndo kaamɛ la wanɛ wataholɔ lo difuku.*
30 “‘Lɛkɔ mbele ewandji* tshɛ wa lo nɔrdɛ kaamɛ la ase Sidɔna+ tshɛ wakaholɔ la nsɔnyi kaamɛ la edo, kaanga mbakawokiyaka anto wɔma l’ɔtɛ wa wolo awɔ. Vɔ wayetama aha la minya mpota kaamɛ la wanɛ wakadiakema la lokuwa la ta ndo wayɛmba nsɔnyi kawɔ kaamɛ la wanɛ wataholɔ lo difuku.*
31 “‘Farawɔ ayɛna awui asɔ tshɛ, ko nde ayosambema l’ɔtɛ wa kɛnɛ tshɛ kakakomɛ nyemba yande y’anto;+ Farawɔ la asɔlayi ande wayodiakema la lokuwa la ta,’ mbata Nkum’Olongo Nkumadiɔndjɔ Jehowa.
32 “‘Lam’ele nde akokiyaka anto wɔma lo wodja wa wanɛ wasɛna, Farawɔ la nyemba yande tshɛ y’anto wayetama dia momuya kaamɛ la wanɛ waki kominya mpota, kaamɛ la wanɛ wakadiakema la lokuwa la ta,’ mbata Nkum’Olongo Nkumadiɔndjɔ Jehowa.”