Jɛrɛmiya
28 Lo ɔnɔnyi akɔ waamɛ, lo etatelo k’ɛlɔmbwɛlɔ ka Zɛdɛkiya+ nkumekanga ka Juda, lo ɔnɔnyi wa 4, lo ngɔndɔ ka 5, omvutshi Hananiya ɔna Azura oma la Ngibiyɔna+ akambutɛ lo luudu la Jehowa la ntondo k’ɛlɔmbɛdi ndo k’anto tshɛ ɔnɛ: 2 “Jehowa kanga lolembelembe, Nzambi k’Isariyɛlɛ kata ate: ‘Dimi layohembola osembe wa nkumekanga ka Babilɔna.+ 3 L’edja ka ɛnɔnyi 2,* dimi layanga nkaloya lo dihole nɛ diangɔ tshɛ dia lo luudu la Jehowa diakɔshi Nɛbukadinɛza nkumekanga ka Babilɔna oma lo dihole nɛ ko ntɔla la Babilɔna.’”+ 4 “‘Ndo dimi layokaloya lo dihole nɛ Jɛkɔniya+ ɔna Jɛhɔyakima,+ nkumekanga ka Juda, ndo ase Juda tshɛ wele mfumbe la Babilɔna,’ mbata Jehowa, ‘nɛ dia dimi layohembola osembe wa nkumekanga ka Babilɔna.’”+
5 Ko omvutshi Jɛrɛmiya akatɛ omvutshi Hananiya la ntondo k’ɛlɔmbɛdi ndo anto tshɛ wakemala lo luudu la Jehowa. 6 Omvutshi Jɛrɛmiya akate ate: “Aamɛɛ!* Jehowa asale dui sɔ! Jehowa akotsha ɛtɛkɛta wa prɔfɛsiya wakayate lo nkaloya diangɔ dia lo luudu la Jehowa oma la Babilɔna oya lo dihole nɛ ndo anto tshɛ wakawatɔlɛ mfumbe! 7 Koko hokamɛ lam’alangayɛ, losango lɔnɛ latami lo atoyi ayɛ ndo lo atoyi w’anto tshɛ. 8 Edja efula la ntondo, amvutshi waki la ntondo kami ndo la ntondo kayɛ wakataka prɔfɛsiya yendana la wedja efula ndo waolelo wa weke, dikambo dia ta, mpokoso ndo elando.* 9 Naka omvutshi ɔmɔtshi mbuta prɔfɛsiya kendana la wɔladi, ko ɔtɛkɛta w’omvutshi ɔsɔ kotshama, laasɔ mbayeyama dia Jehowa mɛtɛ mbakatome omvutshi akɔ.”
10 Ko omvutshi Hananiya akanya osembe oma lo nkingo ka omvutshi Jɛrɛmiya ndo akoohembola.+ 11 Oma laasɔ, Hananiya akate la ntondo k’anto tshɛ ate: “Jehowa kata ate: ‘Nganɛ mbayomohembola osembe wa Nɛbukadinɛza nkumekanga ka Babilɔna oma lo nkingo ya wedja tshɛ l’edja ka ɛnɔnyi 2.’”+ Ko omvutshi Jɛrɛmiya akatshu lo mboka kande.
12 L’ɔkɔngɔ w’omvutshi Hananiya mpembola osembe oma lo nkingo k’omvutshi Jɛrɛmiya, losango la Jehowa lɔnɛ lakaye le Jɛrɛmiya: 13 “Tshɔka kele tote Hananiya wate: ‘Jehowa kata ate: “Wɛ ambohembola esembe w’esongo,+ koko lo dihole diawɔ, wɛ ayosala esembe wa mbolo.” 14 Nɛ dia Jehowa kanga lolembelembe, Nzambi k’Isariyɛlɛ kata ate: “Dimi layokitsha osembe wa lowolo lo nkingo ya wedja ɛnɛ tshɛ, dia kambɛ Nɛbukadinɛza nkumekanga ka Babilɔna ndo vɔ pombaka mbokambɛ.+ Dimi layowosha kaanga nyama ya mpango ya l’okonda.”’”+
15 Ko omvutshi Jɛrɛmiya akatɛ omvutshi Hananiya+ ate: “Hananiya le, hokamɛ lam’alangayɛ! Jehowa hakotomi, koko wɛ ambokonya anto anɛ dia ndjaɛkɛ lo kashi.+ 16 Ɔnkɔnɛ, Jehowa kata ate: ‘Eenda, dimi layanga konya oma la nkɛtɛ. Ɔnɔnyi ɔnɛ, wɛ ayovɔ, nɛ dia wɛ ambokeketsha anto dia tɔmbɔkwɛ Jehowa.’”+
17 Ɔnkɔnɛ, omvutshi Hananiya akavu lo ɔnɔnyi akɔ, lo ngɔndɔ ka 7.