Ɛzɛkiyɛlɛ

16 Ɔtɛkɛta wa Jehowa wakaye le mi nto ɔnɛ: 2 “Ɔna onto, ewoya Jɛrusalɛma ditshelo diayɔ dia wɔnɔnyi.+ 3 Ta wate: ‘Nkum’Olongo Nkumadiɔndjɔ Jehowa katɛ Jɛrusalɛma ate: “Kiɔkɔ yayɛ ndo eotwelo kayɛ kaki lo wodja w’ase Kanana. Shɔ aki ose Amɔra,+ ndo nyɔ aki ose Hiti.+ 4 Lo kɛnɛ kendana la eotwelo kayɛ, lushi lakayotɔ, ototo ayɛ kopembɔ, wɛ kɔmbɔtshama la ashi dia mbɛla, wɛ kokitama lɛɛhɔ ndo wɛ kɔmɔmbama la ahɔndɔ. 5 Ndooko onto lakakooke kandji dia kosalɛ akambo asɔ. Ndooko onto lakakooke kɛtshi. Wɛ akakashema l’oswe, nɛ dia wɛ* akahetshama lushi lakayotɔ.

6 “‘“Lam’akamatetaka laawɔ, dimi lakakɛnyi angitɔ lo dikila diayɛ hita ndo lam’akayetama laawɔ lo dikila diayɛ, dimi lakate nte: ‘Tetemala nsɛna!’ Eelo, dimi lakakotɛ lam’akayetama laawɔ lo dikila diayɛ nte: ‘Tetemala nsɛna!’ 7 Dimi lakaketɛ leemba la woke efula oko tombatomba lo ekambɔ ndo wɛ akole, akahame ndo akalɔtɛ dɛngalɛnga dioleki amɛna. Awɛlɛ ayɛ wakakeketala ndo divo diayɛ diakole; koko wɛ aki paka otakataka ndo hwe.”’

8 “‘Lam’akamatetaka laawɔ ndo lam’akamakɛnyi, dimi lakakɛnyi dia wɛ amboola ndo ambokoka nangema. Ɔnkɔnɛ, dimi lakakofɛ dihɔndɔ diami,+ lakakombe otakataka ayɛ, lakatshibe ndo lakadje la yɛ sheke, ko wɛ akayala lakimi,’ mbata Nkum’Olongo Nkumadiɔndjɔ Jehowa. 9 ‘Ndo nto, dimi lakakɔɔtsha la ashi, lakakokitola dikila diayɛ ndo lakakoshinola esɔ.+ 10 Oma laasɔ, dimi lakakɔlɔtsha dihɔndɔ di’asango asango, lakakosha sabata y’amɛna ya lokoho la nyama,* lakakɔmbɛ la dihɔndɔ dia linɛnɛ la dimɛna ndo lakakɔlɔtsha ahɔndɔ w’oshinga wolo. 11 Dimi lakakɔlɛngɛ la dɛngalɛnga, lakakɔlɔtsha ɛkɔma lo anya ayɛ ndo shɛnɛtɛ lo nkingo kayɛ. 12 Ndo nto, dimi lakakɔlɔtsha singo lo ɔhɛmbɛ ayɛ, azama lo atoyi ayɛ ndo dɛmbɔ dia nkoso dia dimɛna efula lo ɔtɛ ayɛ. 13 Ko wɛ akatetemala ndjalɛnga la paonyi ndo la mfɛsa, ndo ahɔndɔ ayɛ waki wa linɛnɛ la dimɛna, diangɔ di’oshinga wolo ndo ahɔndɔ wa asango asango. Ofushi wa dimɛna, osanga ndo esɔ mbakayalɛka ko wɛ akole ndo akayala olangala+ efula ndo wɛ akasungana monga wadi aki nkumekanga.’”*

14 “‘Lokumu* layɛ lakatatɛ pandjɔ lo wedja+ l’ɔtɛ wa olangala ayɛ, nɛ dia vɔ waki kokele l’ɔtɛ wa lɔnɛnɛ lami lakamakosha,’+ mbata Nkum’Olongo Nkumadiɔndjɔ Jehowa.”

15 “‘Koko wɛ akatatɛ ndjaɛkɛ lo olangala+ ayɛ ndo wɛ akayala numba l’ɔtɛ wa lokumu layɛ.+ Wɛ akafudia etsha ayɛ wa kinumba le onto tshɛ laketaka laawɔ,+ ko olangala ayɛ wakongaka wande. 16 Wɛ akɔshi ahɔndɔ ayɛ amɔtshi ko akasale ahole wa la diko w’asango asango lɛnɛ akayasalaka kinumba.+ Akambo asɔ hawokoke salema ndo hawohombaki ntomba pondjo. 17 Ndo nto, wɛ akɔshi dɛngalɛnga diayɛ di’amɛna diakasalema la paonyi ndo la mfɛsa diakamakosha ko wɛ akayasalɛ dikishi ndo akasale kinumba la diɔ.+ 18 Ndo wɛ akɔshi ahɔndɔ ayɛ w’asango asango ko akadikombe* ndo akadilambola esɔ kami ndo tshɔ+ yami. 19 Ndo diangɔ dia ndɛ diakamakosha diakasalema la ofushi wa dimɛna, esɔ ndo osanga, diakamakosha dia wɛ ndɛ, wɛ akadilambola le diɔ oko opumu wa dimɛna.*+ Kɛsɔ mɛtɛ mbakasalema,’ mbata Nkum’Olongo Nkumadiɔndjɔ Jehowa.”

20 “‘Wɛ akɔshi anayɛ wa apami ndo anayɛ wa wamato wakayambotɛ,+ ko wɛ akaalambola le dikishi sɔ dia vɔ ndɛma.+ Shi etsha ayɛ wa kinumba wakatambe elelo? 21 Wɛ akadiake anami wa apami ndo wɛ akaalambola oko elambo lo mbatshumba lo dja.+ 22 Etena kakayasalaka ditshelo diayɛ tshɛ dia wɔnɔnyi ndo etsha ayɛ wa kinumba, wɛ kombohɔ nshi yayɛ ya dikɛnda etena kakiyɛ otakataka ndo hwe kakayangitɔka lo dikila diayɛ hita. 23 L’ɔkɔngɔ wa kɔlɔ yayɛ tshɛ, mananu, mananu le yɛ,’+ mbata Nkum’Olongo Nkumadiɔndjɔ Jehowa. 24 ‘Wɛ akayahikɛ okundjikundji ndo akayasalɛ dihole dia la diko lo asanga tshɛ. 25 Wɛ akahike ahole ayɛ wa la diko lo ahole woleki amɛna wa lo shinga tshɛ ndo wɛ akakadimola olangala ayɛ ɛngɔ ka wɔnɔnyi lo ndjakimɔ* le onto tshɛ laketaka laawɔ+ ndo wɛ akafudiaka etsha ayɛ wa kinumba.+ 26 Wɛ akasale kinumba la ana w’apami wa Edjibito,+ asukanyi ayɛ wele la nsaki k’efula ka dieyanelo* ndo wɛ akambokiya nkɛlɛ la efula k’etsha ayɛ wa kinumba. 27 Kakianɛ dimi layanga mbela lonya lami le yɛ ndo layanga nkitshakitsha mbo ya ndɛ+ yayɛ ndo layanga kokimɔ lo lolango* la wamato wakohetsha,+ ana wa wamato w’ase Filistiya, waki la nsɔnyi l’ɔtɛ wa lɔkɛwɔ layɛ la nsɔnyi.+

28 “‘Lam’ele wɛ kokoka ndota, oma laasɔ wɛ akasale kinumba la ana w’apami w’ase Asuriya,+ koko l’ɔkɔngɔ wa wɛ nsala kinumba la wɔ, wɛ kondota. 29 Ko wɛ akafudia kinumba kayɛ otsha le wodja w’amundji w’okanda* ndo otsha le ase Kaladiya,+ koko kaanga laasɔ, wɛ kondota. 30 Ande hemɔ* kaki l’otema ayɛ lee!’* mbata Nkum’Olongo Nkumadiɔndjɔ Jehowa, ‘etena kakayasale akambo asɔ tshɛ, asala akambo oko numba kahoke nsɔnyi!+ 31 Koko etena kakayahike okundjikundji ayɛ lo dihole dioleki dimɛna dia lo shinga tshɛ ndo kakayasale dihole dia la diko lo asanga tshɛ, wɛ komonga oko numba, nɛ dia wɛ akatone oseka difuto tshɛ. 32 Wɛ ekɔ wadi la loseka lɔsa angɛndangɛnda lo dihole dia omɛnde+ hita! 33 Anto mbishaka numba tshɛ woshasha,+ koko wɛ kele ɔnɛ lakashaka wanɛ tshɛ wakakolangaka weshasha+ ndo wɛ akaafutaka dia vɔ ndja le yɛ oma lo bɛkɛ tshɛ dia ndjosala kinumba.+ 34 Wɛ ntshikitana la wamato akina wa numba. Ndooko ɔnɛ lasala kinumba woho wasalayɛ! Wɛ katshinda anto akina, koko aha vɔ mbakotshinda. Yoho yayɛ ntshikitana.’

35 “Ɔnkɔnɛ numba+ le, hokamɛ ɔtɛkɛta wa Jehowa. 36 Nkum’Olongo Nkumadiɔndjɔ Jehowa kata ate: ‘Lam’ele nsɔngu kayɛ kambotomba ndo otakataka ayɛ wambɛnama lo sɛkɛ etena kasalayɛ kinumba la wanɛ wakolanga ndo la dikishi diayɛ tshɛ dia nsɔnyi ndo dia nyɛtɛɛtɛ,*+ diakayalambolaka kaanga dikila dia anayɛ,+ 37 ɔnkɔnɛ, dimi layanga nsanganya wanɛ tshɛ wakolanga wangɛnangɛnayɛ, wanɛ tshɛ wakayalange kaamɛ ndo wanɛ tshɛ wakayahetsha. Dimi layanga mbasanganya kaamɛ dia kɔlɔsha oma lo bɛkɛ tshɛ ndo ntondja otakataka ayɛ le wɔ ko vɔ wayokɛna otakataka wa takaa.+

38 “‘Dimi layokosha dilanya la dombwelo diakoka le wamato wa loseka+ ndo wamato wakɛdja dikila+ ndo dikila diayɛ diayɔkɛla la odudu ndo la kandjema.+ 39 Dimi layokokimɔ lo anya awɔ ndo vɔ wayotola ekundjikundji ayɛ ndo ahole ayɛ wa la diko wayonyukɔma;+ ndo vɔ wayokokolola ahɔndɔ+ ayɛ, wayɔsa dɛngalɛnga+ diayɛ di’amɛna ndo wayokotshika otakataka ndo hwe. 40 Vɔ wayela leemba la anto+ le yɛ, ko vɔ wayokooka ave+ ndo wayokodiaka la tokuwa tawɔ ta ta.+ 41 Vɔ wayotshumba mvudu yayɛ la dja+ ndo wayela kilombo le yɛ lo washo wa wamato efula; ndo dimi layokumiya kinumba+ kayɛ ndo wɛ ayotshika tshindana. 42 Nkɛlɛ kami kayokoma l’ekomelo katɔ,+ ko yɛnyi yakokami yayomɔ oma le yɛ;+ ko dimi layotshikala ki ndo hatokiyama nkɛlɛ nto.’

43 “‘Lam’ele wɛ kombohɔ nshi yayɛ ya dikɛnda+ ndo wɛ akambokiya nkɛlɛ lo nsala akambo asɔ tshɛ, wonya ɔnɛ dimi layanga mbela etombelo wa kɔlɔ w’oma lo mboka yayɛ lo ɔtɛ ayɛ hita,’ mbata Nkum’Olongo Nkumadiɔndjɔ Jehowa, ‘ko wɛ hatotetemala la lɔkɛwɔ layɛ la nsɔnyi ndo la ditshelo diayɛ tshɛ dia wɔnɔnyi.

44 “‘Eenda, onto tshɛ lakamba la tokedi ayokamba la yokedi nyɛ le yɛ: “Ɔna mbudi diwongo, kete nyango kɔshinde!”+ 45 Wɛ ekɔ ɔna womoto laki nyɔ lakatone omɛnde ndo anande. Ndo wɛ ekɔ kadiyɛki akadiyɛyɛ, wakatone waomɛwɔ ndo anawɔ. Nyangɛnyu aki ose Hiti ndo shɛnyu aki ose Amɔra.’”+

46 “‘Samariya+ kele enondo ayɛ la womoto ladjasɛ lo nɔrdɛ kayɛ* kaamɛ la anande wa wamato*+ ndo kosɛyɛ ka womoto kadjasɛ lo sidɛ kayɛ* ele Sɔdɔma+ kaamɛ la anande wa wamato.+ 47 Aha tsho wɛ akakɛndakɛnda lo mboka yawɔ ndo akayele ditshelo diawɔ dia wɔnɔnyi, koko lo tshanda ya tshitshɛ wɛ aki kɔlɔ efula lo lɔkɛwɔ layɛ tshɛ mbaleka.+ 48 Lo mɛtɛ oko wemi la lɔsɛnɔ,’ mbata Nkum’Olongo Nkumadiɔndjɔ Jehowa, ‘Sɔdɔma ka kadiyɛyɛ la anande wa wamato watasale kɛnɛ kamboyosala wɛ la anayɛ wa wamato. 49 Eenda, munga kakasale kadiyɛyɛ Sɔdɔma tɔ kɛnɛ: Nde la anande wa wamato+ waki la otako+ ndo waki la lokema la mbo ya ndɛ+ ndo la lotui tshitshi;+ koko vɔ kosukɛ ɔmɛnyi mfɔnu la ose wola.+ 50 Vɔ wakatetemala monga la lotamanya+ ndo wakatetemala nsala ditshelo dia wɔnɔnyi lo washo+ ami, ɔnkɔnɛ dimi lakɛnyi ohomba mbalanya.+

51 “‘Samariya+ kosala kaanga k’ahende ɔtɔi ka pɛkato yakayasale. Wɛ akatetemala mfudia ditshelo diayɛ dia wɔnɔnyi oleki diawɔ lo yɛdikɔ yele akadiyɛyɛ wakɛnama anto w’ɛlɔlɔ l’ɔtɛ wa ditshelo diayɛ tshɛ dia wɔnɔnyi.+ 52 Wonya ɔnɛ, wɛ pombaka mɛmba nsɔnyi kayɛ nɛ dia wɛ akayindja lɔkɛwɔ* la akadiyɛyɛ. Lo kɛnɛ kendana la pɛkato kayɛ ka nsala akambo wa wɔnɔnyi woleki wawɔ, vɔ koleka anto w’ɛlɔlɔ. Ɔnkɔnɛ, oka nsɔnyi ndo kikɛ nsɔnyi lo woho wamboyosala dia akadiyɛyɛ mɛnama anto w’ɛlɔlɔ.’

53 “‘Dimi layosanganya mfumbe yawɔ, mfumbe ya Sɔdɔma la anande wa wamato ndo mfumbe ya Samariya la anande wa wamato; ndo nto dimi layosanganya mfumbe yayɛ kaamɛ la wɔ,+ 54 dia wɛ mɛmba nsɔnyi kayɛ; ndo wɛ ayoka nsɔnyi l’ɔtɛ wa kɛnɛ kakayasale lo mbasamba. 55 Akadiyɛyɛ hita, Sɔdɔma la anande wa wamato, wayokalola woho wakiwɔ ntondo ndo Samariya la anande wa wamato wayokalola woho wakiwɔ ntondo ndo wɛ la anayɛ wa wamato nyayokalola woho wakinyu ntondo.+ 56 Kadiyɛyɛ Sɔdɔma kosungana nimɔma lo lushi l’otako ayɛ, 57 la ntondo ka kɔlɔ yayɛ ntomba sɛkɛ.+ Ɔnkɔnɛ, ana wa wamato wa Suriya la asukanyi ande wekɔ lo kohangwɛ ndo ana wa wamato w’ase Filistiya,+ wanɛ wokodingi wekɔ lo kɔnyɔla. 58 Wɛ ayɛmba etombelo wa kɔlɔ w’oma lo lɔkɛwɔ layɛ la nsɔnyi ndo ditshelo diayɛ dia wɔnɔnyi,’ mbata Jehowa.”

59 “Nɛ dia Nkum’Olongo Nkumadiɔndjɔ Jehowa kata ate: ‘Dimi layanga kosalɛ oko wakayasale,+ nɛ dia wɛ akɔnyɔla etshibelo lo mbitola sheke+ yami. 60 Koko dimi dimɛ layohɔ sheke yakamadje la yɛ lo nshi yayɛ ya dikɛnda ndo dimi layoshikikɛ la yɛ sheke ya pondjo.+ 61 Wɛ ayohɔ etsha ayɛ ko wɛ ayoka nsɔnyi+ etena kayoyolongola akadiyɛyɛ, nondo diayɛ ndo akosɛyɛ ndo dimi layokoshawɔ oko ana wa wamato, koko aha l’ɔtɛ wa sheke yayɛ.’

62 “‘Dimi dimɛ layoshikikɛ sheke yami kaamɛ la yɛ; ko wɛ ayohomba mbeya dia dimi kele Jehowa. 63 Ko wɛ ayohɔ ndo ayɔlɔwa la nsɔnyi dia mbifola onyɔ ayɛ l’ɔtɛ wa nsɔnyi+ kayɛ, etena kayomokomba pɛkato yayɛ l’ɔtɛ wa kɛnɛ tshɛ kamboyosala,’+ mbata Nkum’Olongo Nkumadiɔndjɔ Jehowa.”