1 Samuɛlɛ

27 Koko Davidɛ akate l’otema ande ate: “Lushi lɔmɔtshi dimi mbeyaka ndjovɔ lo anya wa Saolo. Ndeka dimɛna dimi ndawɔ+ otsha l’ɛtshi ka nkɛtɛ k’ase Filistiya, ko Saolo ayotshika nyangami l’ɛtshi ka nkɛtɛ k’otondo k’Isariyɛlɛ+ ndo dimi layohanda oma lo anya ande.” 2 Ɔnkɔnɛ Davidɛ akonɛɛ nde l’apami+ 600 waki kaamɛ la nde, ko wakatshu otsha le Akishi+ ɔna Maɔka, nkumekanga ka Ngata. 3 Davidɛ akatodjasɛ kaamɛ la Akishi la Ngata nde l’apami waki kaamɛ la nde, onto l’onto l’ase luudu lande. Davidɛ aki kaamɛ la wadiɛnde 2, Ahinɔama+ ose Jezɛrɛlɛ la Abigayɛlɛ+ ose Karamɛlɛ laki wadi aki Nabala. 4 Lam’akawatotɛ Saolo ɔnɛ Davidɛ ambolawɔ otsha la Ngata, nde akatshike mboyanga.+

5 Oma laasɔ, Davidɛ akatɛ Akishi ate: “Naka lambohomɔ lokolo l’ɔlɔ lo washo ayɛ, ombisha yɛtshi ya nkɛtɛ lo shombasomba mɔtshi kele mbidjasɛ laawɔ. Lande na katodjasɛ okambi ayɛ l’osomba wa nkumekanga kaamɛ la yɛ?” 6 Ko lushi lɔsɔ, Akishi akawosha Zikilangɛ.+ Diakɔ diele nkumi ya dikanga ya la Juda mbakanga Zikilangɛ polo ndo ɛlɔ.

7 Davidɛ akadjasɛ lo shombasomba y’ase Filistiya shɔ l’edja* k’ɔnɔnyi la ngɔndɔ+ nyɛi. 8 Davidɛ akatshɔka nde l’anto ande dia tɔlɔsha aseka Ngeshurɛ,+ aseka Ngirizɛ ndo ase Amalɛka,+ nɛ dia vɔ wakadjasɛka l’ɛtshi ka nkɛtɛ kaki oma la Tɛlamɛ polo la Shura,+ polo ndo lo wodja w’Edjibito. 9 Lam’akalɔshaka Davidɛ dihole dimɔtshi, nde kotshikaka oyadi pami kana womoto la lɔsɛnɔ,+ koko nde akɔsaka ɛkɔkɔ, ngɔmbɛ, mponda, kamɛlɔ ndo ahɔndɔ, ko nde akakalolaka le Akishi. 10 Ko Akishi akawombolaka ate: “Lende akayatɔlɔsha ɛlɔ?” Davidɛ akakadimolaka ate: “Lakatɔlɔsha lo sidɛ* ka Juda”+ kana “lakatɔlɔsha lo sidɛ k’ɛtshi ka nkɛtɛ k’ase Jerahemɛlɛ”+ kana “lakatɔlɔsha lo sidɛ k’ɛtshi ka nkɛtɛ k’ase Kenɛ.”+ 11 Davidɛ kotshikaka oyadi pami kana womoto la lɔsɛnɔ dia mbeela la Ngata, ata ate: “Diaha vɔ ndjowatɛ akambo aso ndo ndjota ɔnɛ: ‘Davidɛ akasale nganɛ.’” (Ɔsɔ kaki mbekelo kande l’edja tshɛ kakandadjasɛ lo shombasomba y’ase Filistiya shɔ.) 12 Ɔnkɔnɛ Akishi aketawɔ kɛnɛ kakataka Davidɛ, ata l’otema ande ate: ‘Nde mɛtɛ aya oko nyama nsolo l’atei wa wodja awɔ w’Isariyɛlɛ; ɔnkɔnɛ nde ayongaka nshi tshɛ okambi ami.’