Jɔbɔ
2 Onde wɛ koka mbidja ɔkɔdi lo wesho w’ɛhɛmbɛ alɔ
Kana ntondola manga yalɔ la yɔdi?*
3 Onde lɔ layokɔsɛngasɛnga mbala efula,
Kana onde lɔ layɔtɛkɛta la yɛ la ngandji tshɛ?
4 Onde lɔ layodja sheke kaamɛ la yɛ,
Dia wɛ lietɛ mfumbe kayɛ lɔsɛnɔ l’otondo?
5 Onde wɛ ayɔkɛnya lalɔ oko fudu
Kana ayolikeleka mɔlɔla dikambo dia tana tayɛ ta wamato?
6 Onde ase okanda wayolisomba?
Onde wayolikahanya lam’asa amundji w’okanda?
7 Onde wɛ ayolodia lokoho lalɔ la tɔkɔhɔ+
Kana ɔtɛ alɔ la woona w’amundji wa nse?
8 Oholiahɛ lonya layɛ;
Wɛ ayohɔ ta ndo wɛ hasalaki ngasɔ nto pondjo!
9 Elongamelo tshɛ ka liahemɛ kekɔ anyanya.
Ɛnamelo kalɔ keto kayokokonya ewo.*
10 Ndooko lasombɔ liomadia.
Ko akɔna akoka nsɛmanɛ la mi?+
11 Akɔna akambisha ɛngɔ kɛmɔtshi ntondo dia dimi mbokaloya?+
Kɛnɛ tshɛ kele l’ɛse olongo kami ketɔ.+
12 Dimi hantɔlama l’ɔtɛ w’anya l’ekolo alɔ,
L’ɔtɛ wa wolo alɔ ndo wa demba dialɔ diakasalema dimɛna.
13 Akɔna akanya okombɔ alɔ wa laadiko?
Akɔna ayɔtɔ lo manga yalɔ yaswe?
14 Akɔna akoka ndjihola nkuke y’onyɔ* alɔ la wolo?
Wanyu alɔ wodingami djwɛ mbokiyaka wɔma.
15 Ɔkɔngɔ alɔ wekɔ la ɛnɔngɔ w’akamba akamba*
Wokakatanyemi lam’asawɔ.
16 Dikamba tshɛ nkakatana la dikina
Woho wele lɔpɛpɛ hakoke mbeta lam’asawɔ.
17 Vɔ nkakatana lam’asawɔ;
Vɔ mamatana ndo hawokoke nkakitɔna.
18 Lokashi lalɔ tondjaka esase,
Ndo washo alɔ wekɔ oko esase wa la yosose.
19 Esase wa dingadimu tombaka oma l’onyɔ alɔ;
Tosase ta dja tombaka.
20 Edinga tombaka oma l’ɛhɛmbɛ alɔ,
Oko nkuka kalombalomba la ɛlɛngɛ.
21 Lomu lalɔ mɔngɔyaka dja lo akalanga,
Ndo loombe tombaka oma l’onyɔ alɔ.
22 Nkudu k’efula kekɔ lo nkingo kalɔ,
Wɔma ndawɔka la ntondo kalɔ.
23 Atɛhɛ w’emunyi alɔ nkakatana wolo kaamɛ;
Vɔ nkakatana wolo wate kana sɔngama la lowolo la lɔlɛlɔla ndo hasukasuka.
24 Otema alɔ wekɔ wolo oko dive,
Ɛɛ, wolo oko dive di’ɔhɛlɔ dia l’ɛse.
25 Etena konɛɛlɔ, kaanga akanga wa wolo mbatɛka asolo;
Ɔkɔmamelo w’oma le lɔ mbidjaka l’okandokando.
26 Ndooko lokuwa la ta layolikama ko ntɔ;
Oyadi kaanga dikɔnga, ɔsɔngɔ kana shɔdi ya lohito.+
27 Le lɔ, lowolo lekɔ oko lɔlɛngɛsɛ,
Nkonga oko osongo wambɔhɔnda.
28 Lohito halolitshanya;
Le lɔ, mbɔkɔ ya tooka ave yekɔ oko adiyo.
29 Le lɔ, okalemba wekɔ oko diyo,
Ndo lɔ mbɔlaka lohelo la dikɔnga.
30 L’ɛse kalɔ ekɔ akamba akamba oko bɛtshi dia diwomba;
Lɔ ndjasandjolaka lo lɔtɛkɛ oko ehomɔ k’esuswelo.+
31 Lɔ tɔkutshaka dingunda oko mpoke;
Lɔ sutshasutshaka ndjale oko mpoke ka malashi.
32 Lɔ tshikaka ditshi lo mboka kalɔ.
Onto koka mfɔnya ɔnɛ dingunda diekɔ la divo dia ndjwe.
33 Ndooko ɛngɔ kele oko lɔ la nkɛtɛ,
Etongami kakasalema diaha mboka wɔma.
34 Lɔ mendaka la nkɛlɛ ɛngɔ tshɛ kayadiya.
Lɔ kele nkumekanga ka nyama ya l’okonda tshɛ ya diambo.”