Ɛzɛkiyɛlɛ
12 Ɔtɛkɛta wa Jehowa wakaye le mi nto ɔnɛ: 2 “Ɔna onto, wɛ ekɔ lo mbidjasɛ lo luudu la atɔmbɔki. Vɔ wekɔ la washo dia mɛna koko hawɛnyi, ndo la atoyi dia mboka koko hawoke,+ nɛ dia vɔ wekɔ luudu+ la atɔmbɔki. 3 Koko wɛ ɔna onto, yalɔngɔsɔlɛ otshumu dia ntshɔ lo lɔhɔmbɔ. Oma laasɔ, la yanyi etena kendawɔ, wɛ pombaka ntshɔ lo lɔhɔmbɔ. Onɛɛ oma lakayɛ ndo tshɔka otsha lo dihole dikina etena kendawɔ. Ondo vɔ wayɛna dui sɔ kaanga mbewɔ luudu la atɔmbɔki. 4 Tondja otshumu ayɛ dia ntshɔ lo lɔhɔmbɔ la yanyi etena kendawɔ, oma laasɔ la dikɔlɔ etena kendawɔ, wɛ pombaka monɛɛ oko onto lambɔtɔlama lo lɔhɔmbɔ.+
5 “Etena kendawɔ, kotondole wosho lo ehele ka lokombo ndo kotondja diangɔ diayɛ lɔkɔ.+ 6 Etena kendawɔ, kahɛ diangɔ diayɛ lo dihɛka kele koditondja lo wodjima. Kokombe elungi kayɛ diaha wɛ mɛna nkɛtɛ, nɛ dia dimi lamboketɛ djembetelo le luudu la Isariyɛlɛ.”+
7 Koko lakasale oko wakawambidjangɛ. La yanyi, dimi lakatondja otshumu dia ntshɔ lo lɔhɔmbɔ ndo la dikɔlɔ, dimi lakatondola wosho lo ehele ka lokombo la anya. Ndo lam’akadje wonya, dimi lakatondja diangɔ diami, lakadiɛmbɛ lo ahɛka lo washo awɔ.
8 La pindju ɔtɛkɛta wa Jehowa wakaye le mi nto ɔnɛ: 9 “Ɔna onto, onde luudu la Isariyɛlɛ, luudu la atɔmbɔki kokombola ɔnɛ: ‘Kakɔna kasalayɛ kɛnɛ?’ 10 Tɛwɔ wate: ‘Nkum’Olongo Nkumadiɔndjɔ Jehowa kata ate: “Ɛtɛkɛta ɛnɛ mendanaka la owandji+ wele la Jɛrusalɛma ndo luudu l’otondo la Isariyɛlɛ lele lo osomba.”’
11 “Ta wate: ‘Dimi lekɔ djembetelo le nyu.+ Oko wamomosala, mbayowasalɛ. Vɔ wayotshɔ mfumbe lo lɔhɔmbɔ.+ 12 Owandji wele l’atei awɔ ayɛmba diangɔ diande lo ahɛka ndo ayotomba lo wodjima. Nde ayotondola wosho lo ehele ka lokombo ndo ayotondja diangɔ diande lɔkɔ.+ Nde ayokomba elungi kande diaha nde mɛna nkɛtɛ.’ 13 Dimi layowamba ɔtɛyi ami ko nde ayotala lo ɔtɛyi+ ami wa wenga. Ko dimi layowɔtɔla la Babilɔna, lo wodja w’ase Kaladiya, koko nde hatowɛna; ndo lɛkɔ kayondotovɔ.+ 14 Wanɛ tshɛ wele suke la nde, akimanyedi ande ndo elui ande w’asɔlayi, dimi layowahandjola lo bɛkɛ tshɛ;+ ndo dimi layɔsɔmɔla lokuwa la ta dia mbatshanya.+ 15 Ko vɔ wayohomba mbeya dia dimi kele Jehowa lam’ayomahandjola l’atei wa wedja ndo lam’ayomaadianganya l’atei wa wedja. 16 Koko dimi layoshimbɛ yema tshitshɛ l’atei awɔ oma lo lokuwa la ta, ndjala ka kasha ndo elando, dia vɔ ndjɔkɔndɔla ditshelo diawɔ tshɛ dia wɔnɔnyi l’atei wa wedja wayowotshɔ; ko vɔ wayohomba mbeya dia dimi kele Jehowa.”
17 Ɔtɛkɛta wa Jehowa wakaye le mi nto ɔnɛ: 18 “Ɔna onto, wɛ la dia ndɛ diangɔ diayɛ la lokomba ndo nnɔ ashi la okiyanu ndo la lonyangu.+ 19 Tɛ anto wa lo wodja wate: ‘Nkum’Olongo Nkumadiɔndjɔ Jehowa katɛ ase Jɛrusalɛma wele lo wodja wa Isariyɛlɛ ate: “Vɔ wayɔlɛ mbo ya ndɛ yawɔ la lonyangu ndo wayɔnɔ ashi awɔ la wɔma, nɛ dia wodja awɔ wayonga tɔngɔ+ to l’ɔtɛ wa awui wa ngala wa wanɛ tshɛ wodjashi lɔkɔ.+ 20 Esomba wodjashi anto wayohandjɔ vwa, ndo wodja wayonga tɔngɔ to;+ ko nyayohomba mbeya dia dimi kele Jehowa.”’”+
21 Ɔtɛkɛta wa Jehowa wakaye le mi nto ɔnɛ: 22 “Ɔna onto, yokedi yakɔna ndjo yele la nyu lo Isariyɛlɛ yata ɔnɛ: ‘Nshi mbetaka ndo ɛnɛlɔ tshɛ hakotshama’?+ 23 Ɔnkɔnɛ, tɛwɔ wate: ‘Nkum’Olongo Nkumadiɔndjɔ Jehowa kata ate: “Dimi layosala dia ɛtɛkɛta ɛsɔ nkomɛ ndo vɔ hawotokamba la wɔ nto oko yokedi lo Isariyɛlɛ.”’ Koko tɛwɔ wate: ‘Nshi yaya suke+ ndo waɛnɛlɔ tshɛ wayokotshama.’ 24 Nɛ dia ɛnɛlɔ ka kashi hatonga nto ndo diendja diangɛnyangɛnya anto* hatonga nto lo luudu la Isariyɛlɛ.+ 25 ‘“Nɛ dia dimi Jehowa layɔtɛkɛta. Ɔtɛkɛta tshɛ wayomota wayokotshama aha la ntshimbatshimba.+ Luudu la atɔmbɔki le, lo nshi+ yanyu dimi layota dui ko layodikotsha,” mbata Nkum’Olongo Nkumadiɔndjɔ Jehowa.’”
26 Ɔtɛkɛta wa Jehowa wakaye le mi nto ɔnɛ: 27 “Ɔna onto, ase* Isariyɛlɛ wekɔ lo mbuta vate: ‘Ɛnɛlɔ kɛnande kekɔ dikambo dia etena keke etale ndo nde ekɔ lo mbuta prɔfɛsiya kendana la nshi yayaye+ y’etale efula.’ 28 Ɔnkɔnɛ tɛwɔ wate: ‘Nkum’Olongo Nkumadiɔndjɔ Jehowa kata ate: “‘Ndooko ɔtɛkɛta ami wayotshimbatshimba; kɛnɛ tshɛ katami kayokotshama,’ mbata Nkum’Olongo Nkumadiɔndjɔ Jehowa.”’”