ETATELO

1 Lo etatelo, Nzambi akatonge olongo la nkɛtɛ.+

2 L’etena kɛsɔ, nkɛtɛ yaki yatalɔngɔswama, komonga ndooko la ɛngɔ* ndo wodjima waki laadiko di’ashi wa dingunda,*+ ndo wolo waki Nzambi wakamba olimu*+ waketetaka laadiko di’ashi.+

3 Ko Nzambi akate ate: “Osase wayale!” Ko osase wakayala.+

4 Nzambi akɛnyi dia osase wekɔ dimɛna ndo Nzambi akatatɛ nkakitola osase la wodjima. 5 Nzambi akɔlɛ osase ɔnɛ Yanyi ndo nde akɔlɛ wodjima ɔnɛ Otsho.+ Dikɔlɔ diakayala, pindju kakayala. Ɔsɔ aki lushi la ntondo.

6 Oma laasɔ, Nzambi akate ate: “Loowa+ layale lam’asa ashi dia nkakitola ashi la ashi.”+ 7 Ko Nzambi akatatɛ nsala loowa ndo akakakitola ashi wa l’ɛse ka loowa la ashi wa la diko dia loowa.+ Ko dui sɔ diakasalema. 8 Nzambi akɔlɛ loowa ɔnɛ Olongo. Dikɔlɔ diakayala, pindju kakayala. Ɔsɔ aki lushi la 2.

9 Oma laasɔ, Nzambi akate ate: “Ashi wa l’ɛse k’olongo watshumane dihole 1 kele ahole w’ofumbo wɛname!”+ Ko dui sɔ diakasalema. 10 Nzambi akɔlɛ nkɛtɛ y’ofumbo ɔnɛ Nkɛtɛ+ ndo nde akɔlɛ ashi wakatshumanyema ɔnɛ Ndjale.+ Ko Nzambi akɛnyi ɔnɛ ekɔ dimɛna.+ 11 Oma laasɔ, Nzambi akate ate: “Nkɛtɛ yatondja adiyo, tombatomba diele la ntɔngɔ ndo esongo watɔ elowa lo ndjela weho awɔ.” Ko dui sɔ diakasalema. 12 Nkɛtɛ yakatatɛ ntondja adiyo, tombatomba+ diele la ntɔngɔ ndo esongo watɔ elowa lo ndjela weho awɔ. Ko Nzambi akɛnyi ɔnɛ ekɔ dimɛna. 13 Dikɔlɔ diakayala, pindju kakayala. Ɔsɔ aki lushi la 3.

14 Oma laasɔ, Nzambi akate ate: “Diangɔ diangamula osase*+ diayale l’olongo* dia nkakitola yanyi la otsho+ ndo diɔ diayonga tolembetelo tɛnya deko, nshi ndo ɛnɔnyi.+ 15 Diɔ diayoyala diangɔ diangamula osase oma l’olongo* oya la nkɛtɛ.” Ko dui sɔ diakasalema. 16 Ko Nzambi akatatɛ nsala diangɔ 2 dia weke diangamula osase, ɛngɔ koleki woke dia ngamulaka osase woleki la yanyi+ ndo ɛngɔ ka shekaseka dia ngamulaka osase woleki l’otsho ndo nde akasale tɔɔtɔ.+ 17 Ko Nzambi akadikitsha l’olongo* dia diɔ ngamulɛka nkɛtɛ osase, 18 dia mbishaka osase woleki la yanyi ndo l’otsho, ndo dia nkakitola osase la wodjima.+ Ko Nzambi akɛnyi ɔnɛ ekɔ dimɛna. 19 Dikɔlɔ diakayala, pindju kakayala. Ɔsɔ aki lushi la 4.

20 Oma laasɔ, Nzambi akate ate: “Dikɛndakɛnda* diasɛna dialolane lo ashi ndo ditongami diafumbɔ diafumbɔke l’olongo!”*+ 21 Nzambi akatonge ditongami dia weke* lo ndjale ndo dikɛndakɛnda* tshɛ diasɛna dialolanɛ lo ashi lo ndjela weho adiɔ ndo ditongami tshɛ diele la nsala diafumbɔ lo ndjela weho adiɔ. Ko Nzambi akɛnyi ɔnɛ ekɔ dimɛna. 22 Nzambi akaditshɔkɔla, ata ate: “Nyootane, nyofulane ndo nyolodia ashi wa lo ndjale,+ ndo ditongami diafumbɔ diayale efula la nkɛtɛ.” 23 Dikɔlɔ diakayala, pindju kakayala. Ɔsɔ aki lushi la 5.

24 Oma laasɔ, Nzambi akate ate: “Ditongami diasɛna* diayale la nkɛtɛ lo ndjela weho adiɔ, dongalonga, nyama yayakotola* ndo nyama ya l’okonda ya la nkɛtɛ lo ndjela weho ayɔ.”+ Ko dui sɔ diakasalema. 25 Nzambi akatatɛ ntonga* nyama ya l’okonda lo ndjela weho ayɔ ndo dongalonga lo ndjela weho adiɔ ndo nyama tshɛ yayakotola ya la nkɛtɛ lo ndjela weho ayɔ. Ko Nzambi akɛnyi ɔnɛ ekɔ dimɛna.

26 Oma laasɔ, Nzambi akate ate: “Tosale+ onto lo efanelo+ kaso, lo ndjela woho weso ndo nde olee nse ya lo ndjale, ditongami diafumbɔ l’olongo, dongalonga ndo nkɛtɛ k’otondo ndo nyama tshɛ yayakotola yakɛndakɛnda la nkɛtɛ.”+ 27 Ko Nzambi akatatɛ ntonga onto lo efanelo kande. Lo efanelo ka Nzambi kakandootonge. Pami la womoto kakandaatonge.+ 28 Ndo nto, Nzambi akaatshɔkɔla ndo Nzambi akawatɛ ate: “Nyootane, nyofulane, nyolodia nkɛtɛ+ ndo nyoyiole.+ Nyoole+ nse ya lo ndjale, ditongami diafumbɔ l’olongo ndo ditongami tshɛ diele la lɔsɛnɔ diakɛndakɛnda la nkɛtɛ.”

29 Oma laasɔ, Nzambi akate ate: “Dimi lambonyosha tombatomba tshɛ dia lo nkɛtɛ k’otondo diele la ntɔngɔ ndo esongo tshɛ watɔ elowa. Diɔ diayale mbo ya ndɛ+ yanyu. 30 Ndo nyama tshɛ ya l’okonda ya la nkɛtɛ, ditongami diafumbɔ l’olongo ndo dikɛndakɛnda tshɛ diasɛna la nkɛtɛ, dimi lambodisha tombatomba tshɛ di’ashi wa djɛsɛ dia diɔ monga mbo ya ndɛ+ yadiɔ.” Ko dui sɔ diakasalema.

31 L’ɔkɔngɔ diko, Nzambi akende diangɔ tshɛ diakandasale, ko nde akɛnyi dia diɔ diekɔ amɛna efula.+ Dikɔlɔ diakayala, pindju kakayala. Ɔsɔ aki lushi la 6.

2 Ngasɔ mbakashile etongelo k’olongo la nkɛtɛ ndo ka diangɔ tshɛ diele lɔkɔ.*+ 2 Lo lushi la 7, ko Nzambi amboshidiya olimu wakandasalaka ndo nde akatatɛ momuya lushi la 7 oma l’olimu ande tshɛ wakandasalaka.+ 3 Ko Nzambi akatatɛ ntshɔkɔla lushi la 7 ndo lietɛ ekila, nɛ dia lushi lɔsɔ kakatatɛ Nzambi momuya oma l’olimu tshɛ w’etongelo ndo oma lo kɛnɛ tshɛ kakandakongɛ dia nsala.

4 Ɔnɛ kele ɔkɔndɔ w’olongo la nkɛtɛ lo etena kakawatongama, lo lushi lakatonge Jehowa* Nzambi olongo la nkɛtɛ.+

5 L’etena kɛsɔ ko adiyo ndo tombatomba diatatombe la nkɛtɛ, nɛ dia laasɔ ko Jehowa Nzambi atalɔsha mvula la nkɛtɛ ndo ndooko onto lakakambaka nkɛtɛ. 6 Koko loonge lakadɛka oma la nkɛtɛ ndo lakalɔyaka nkɛtɛ k’otondo.

7 Ko Jehowa Nzambi akatatɛ ntonga onto oma lo ditshu+ dia nkɛtɛ ndo akafufe lomu la lɔsɛnɔ+ lo wesho w’ɛhɛmbɛ ande, ko onto akayala onto* lasɛna.+ 8 Ndo nto, Jehowa Nzambi akalɔngɔsɔla ekambɔ lo Ɛdɛna,+ lo ɛstɛ, ko nde akakitsha onto lakandatonge+ lɔkɔ. 9 Ko Jehowa Nzambi akatondja oma lo nkɛtɛ esongo tshɛ wele amɛna menda ndo amɛna dia ndɛ. Ndo nto, osongo wa lɔsɛnɔ+ waki l’atei w’ekambɔ ndo osongo w’ewo ka kɛnɛ kele ɔlɔlɔ la kɛnɛ kele kɔlɔ.+

10 Ɔkɛdi ɔmɔtshi wakatombaka oma lo Ɛdɛna dia ndɔya ekambɔ ndo ɔkɛdi akɔ wakatana lo ɛkɛdi 4.* 11 Lokombo l’ɔkɛdi wa ntondo ele Pishɔna. Vɔ mbakɛla lo ɛtshi ka nkɛtɛ ka Havila k’otondo lɛnɛ ele paonyi. 12 Paonyi ya lo ɛtshi ka nkɛtɛ kɛsɔ yekɔ amɛna. Ndo bɛdɛliumɛ* la dive dia ɔniksɛ tanemaka nto lɛkɔ. 13 Lokombo l’ɔkɛdi wa 2 ele Ngihɔna. Vɔ mbakɛla l’ɛtshi ka nkɛtɛ ka Kusha* k’otondo. 14 Lokombo l’ɔkɛdi wa 3 ele Hidɛkɛlɛ.*+ Vɔ mbakɛla otsha lo ɛstɛ k’Asuriya.+ Lokombo l’ɔkɛdi wa 4 ele Efaratɛ.+

15 Jehowa Nzambi akakitsha pami lo ekambɔ k’Ɛdɛna dia nde kikambaka ndo kilamaka.+ 16 Ndo nto, Jehowa Nzambi akadjɛ pami didjango nɛ ate: “Wɛ mbeyaka ndɛ elowa w’oma l’esongo tshɛ wele lo ekambɔ woho walangayɛ.+ 17 Koko tɔlɛke elowa w’oma l’osongo w’ewo ka kɛnɛ kele ɔlɔlɔ la kɛnɛ kele kɔlɔ, nɛ dia lushi layoyɔlɛ, wɛ ayovɔ ndooko onyake.”+

18 Ko Jehowa Nzambi akate ate: “Keema dimɛna dia pami tshikalaka ndamɛ. Dimi layanga mbosalɛ okimanyedi wokoki la nde.”+ 19 Jehowa Nzambi akatonge nyama tshɛ ya l’okonda ndo ditongami tshɛ diafumbɔ l’olongo oma lo ditshu ko nde akadiela le pami dia menda woho wayondodiɔlɛ nkombo. Lokombo lakɔlɛka pami etongami kasɛna* tshɛ mbakongaka lokombo latɔ.+ 20 Ko pami akɔlɛ dongalonga tshɛ, ditongami diafumbɔ l’olongo ndo nyama tshɛ ya l’okonda nkombo, koko pami komonga la okimanyedi wokoki la nde. 21 Ɔnkɔnɛ, Jehowa Nzambi akalasha pami djɔ ya baku, ko etena kakinde lo djɔ, nde akɔshi weka ɔmɔtshi wa lohandju lande ndo akafɛ emunyi laawɔ. 22 Ko Jehowa Nzambi akatonge* womoto la weka wakandɔshi oma lo lohandju la pami, ko nde akɔɔtɔlɛ le pami.+

23 Ko pami akate ate:

24 Diakɔ diele, pami ayotshika she la nyango ndo ayomamatana* la wadɛnde, ko vɔ 2 wayoyala demba 1.+ 25 Pami nde la wadɛnde, vɔ akɔ 2 waki etakataka,+ koko vɔ kombokaka nsɔnyi.

3 Oloyi+ aki la yewo* ndeka nyama ya l’okonda tshɛ yakatonge Jehowa Nzambi. Ko vɔ wakambola womoto ɔnɛ: “Onde lo mɛtɛ mbakanyotɛ Nzambi ate tanyɔlɛke elowa w’oma l’esongo tshɛ wele lo ekambɔ?”+ 2 Ko womoto akakadimola oloyi ate: “Sho kokaka ndɛ elowa w’oma l’esongo wele lo ekambɔ.+ 3 Koko Nzambi akatotɛ lo kɛnɛ kendana la elowa w’oma l’osongo wele l’atei w’ekambɔ+ ate: ‘Tanyɔlɛke ndo tanyonandake, nyotokovɔ.’” 4 Ko oloyi akatɛ womoto ate: “Hanyotovɔ+ mɛ! 5 Nɛ dia Nzambi mbeyaka ɔnɛ lushi layonyɔlɛ elowa w’oma lɔkɔ, washo anyu wayodihɔ ko nyayoyala oko Nzambi, ndo nyayeya kɛnɛ kele ɔlɔlɔ la kɛnɛ kele kɔlɔ.”+

6 Ko womoto akɛnyi dia elowa wa l’osongo akɔ waki amɛna dia ndɛ ndo amɛna lo washo. Ɛɛ, osongo akɔ waki ɔlɔ menda. Ɔnkɔnɛ nde akatatɛ nkɔhɔla olowa w’oma lɔkɔ ko akatatɛ ndɛ.+ L’ɔkɔngɔ diko, nde akayosha ndo omɛnde etena kakandayonga kaamɛ la nde, ko omɛnde akatatɛ ndɛ.+ 7 Oma laasɔ, washo awɔ vɔ akɔ ahende wakadihɔ, ko vɔ wakashihodia dia waki etakataka. Ɔnkɔnɛ, vɔ wakatɛlɛ akatshi w’osongo wa fingo ko wakaakeleka+ lo nkende.

8 L’ɔkɔngɔ diko, vɔ wakoke dui dia Jehowa etena kakandatetetaka lo ekambɔ oya lo dikɔlɔ,* ko pami nde la wadɛnde wakayashɛ l’atei w’esongo waki lo ekambɔ diaha Jehowa Nzambi mbaɛna. 9 Ko Jehowa akelɛ pami mbala ko mbala, awotɛ ate: “Lende eeyɛ?” 10 Nde akayokadimola ate: “Lakoki dui diayɛ lo ekambɔ, ko lakoki wɔma nɛ dia laki otakataka, diakɔ diakamayashe.” 11 Nde akate ate: “Akakote ɔnɛ wɛ ekɔ otakataka?+ Onde wɛ akale olowa w’oma l’osongo wakamakodjangɛ diaha wɛ ndɛ?”+ 12 Pami akate ate: “Womoto lakayambisha dia monga kaamɛ la mi kakambisha olowa w’oma l’osongo akɔ mbakamale.” 13 Ko Jehowa Nzambi akambola womoto ate: “Kakɔna kamboyosala kɛnɛ?” Womoto akakadimola ate: “Oloyi akankeshi, diakɔ diakamale.”+

14 Oma laasɔ, Jehowa Nzambi akatɛ oloyi+ ate: “Lam’ele wɛ ambosala dikambo nɛ, wɛ ambodjama mananu l’atei wa dongalonga tshɛ ndo l’atei wa nyama tshɛ ya l’okonda. Wɛ ayoyakotolaka lo dikundju ndo wɛ ayɔlɛka ditshu nshi tshɛ ya lɔsɛnɔ layɛ. 15 Dimi layodja lohetsho*+ lam’asayɛ+ la womoto+ ndo lam’asa kanula*+ yayɛ la kanula*+ yande. Nde ayokominola* lo ɔtɛ+ ndo wɛ ayowolumata* lo etshindji.”+

16 Nde akatɛ womoto ate: “Dimi layofudia asui lo nshi yayɛ ya diemi lo yɛdikɔ y’efula. Wɛ ayotataka lɔɔnɔ dia mbota ana, wɛ ayongaka la ohomba w’efula w’omɛyɛ ndo nde ayonga owandji ayɛ.”

17 Nde akatɛ Adama* ate: “Lam’ele wɛ akahokame dui dia wadɛyɛ ndo akale olowa w’oma l’osongo wakamakodjangɛ+ nte: ‘Tɔlɛke,’ nkɛtɛ yambodjama mananu l’ɔtɛ ayɛ.+ Paka wɛ ambɛna paa mbayoyokondjaka mbo ya ndɛ oma lɔkɔ nshi tshɛ ya lɔsɛnɔ layɛ.+ 18 Nkɛtɛ yayotondjaka atɛndɛ ndo ahangola nkɔi lo dikambo diayɛ, ndo wɛ ayɔlɛka akatshikatshi. 19 Oma lo dungu dia l’elungi kayɛ mbayoyokondjaka mbo ya ndɛ edja ndo lam’ayoyokalola lo nkɛtɛ, nɛ dia oma lɔkɔ mbakayɔsama.+ Wɛ ekɔ ditshu ndo wɛ ayokalola lo ditshu.”+

20 Oma laasɔ, Adama akɔlɛ wadɛnde lokombo ɔnɛ Eva,* dikambo nde akahombe ndjonga nyango anto tshɛ wasɛna.+ 21 Jehowa Nzambi akasalɛ Adama la wadɛnde ahɔndɔ w’etale wa dikoho dia nyama dia mbalɔtsha.+ 22 Jehowa Nzambi akate ate: “Lam’ele onto aya oko ɔmɔtshi la l’atei aso lo mbeya kɛnɛ kele ɔlɔlɔ la kɛnɛ kele kɔlɔ,+ diaha nde nsembola lonya lande ko nkɔhɔla olowa oma l’osongo wa lɔsɛnɔ+ ndo mbɔlɛ ko nde nsɛna pondjo pondjo, . . .” 23 Ɔnkɔnɛ, Jehowa Nzambi akawotshanya oma l’ekambɔ k’Ɛdɛna+ dia nde nkamba nkɛtɛ y’oma lɛnɛ akandɔsama.+ 24 Nde akatshanya onto ko akakitsha akɛruba+ lo ɛstɛ k’ekambɔ k’Ɛdɛna ndo lokuwa lalombalomba la dja lakatshimbaka wonya tshɛ dia ndjiha mboka k’otsha l’osongo wa lɔsɛnɔ.

4 Adama akeyana la wadɛnde Eva ko nde akatshu diemi.+ Lam’akandote Kɛna,+ nde akate ate: “Lambota ɔna pami l’ekimanyielo ka Jehowa.” 2 Oma laasɔ, nde akayota Aabɛlɛ+ w’ɔnango.

Aabɛlɛ akayonga olami w’ɛkɔkɔ ndo Kɛna akayonga okambi wa dikambɔ. 3 L’ɔkɔngɔ w’etena kɛmɔtshi, Kɛna akalambola Jehowa elowa ɛmɔtshi w’oma lo ekambɔ. 4 Koko Aabɛlɛ akalambola ana wa ntondo amɔtshi w’ɛkɔkɔ ande,+ mbidja ndo wata awɔ. Jehowa aketawɔ Aabɛlɛ la olambo+ ande, 5 koko nde kombetawɔ Kɛna la olambo ande. Ɔnkɔnɛ, Kɛna akadunganɛ la nkɛlɛ ndo akakɔmɔ. 6 Ko Jehowa akambola Kɛna ate: “Lande na kadunganɛyɛ la nkɛlɛ ndo kamboyɔkɔmɔ nganɛ? 7 Naka wɛ ntatɛ nsala kɛnɛ kele ɔlɔlɔ, onde dimi hatoketawɔ?* Ko naka wɛ hasadi ngasɔ, kete pɛkato kamboholama la soko. Tɔ kombolaka kahemɛ, ko onde wɛ ayokiahemɛ?”

8 Oma laasɔ, Kɛna akatɛ Aabɛlɛ w’ɔnango ate: “Yete totshu l’okonda.” Ɔnkɔnɛ, etena kakiwɔ l’okonda, Kɛna akakɔmɔla Aabɛlɛ w’ɔnango ko akoodiake.+ 9 L’ɔkɔngɔ diko, Jehowa akambola Kɛna ate: “Lende ele Aabɛlɛ w’ɔnanyɔ?” Ko Kɛna akakadimola ate: “Handeye. Onde olami w’ɔnalengo mbemi?” 10 Ko Nzambi akawombola ate: “Amboyosala na? Delo dia dikila di’ɔnanyɔ diele lo nkɛtɛ+ diambokoma polo le mi. 11 Wɛ ambodjama mananu ndo ambotshanyema oma lo nkɛtɛ yambasola onyɔ dia nongola dikila di’ɔnanyɔ lodiakiyɛ.+ 12 Wɛ kokambaka nkɛtɛ, yɔ hayotɔngɔnya diangɔ. Wɛ ayonga yekekɔ ndo ose dawo la nkɛtɛ.” 13 Ko Kɛna akatɛ Jehowa ate: “Dilanya diamboyombisha l’ɔtɛ wa kɔlɔ kami diamboleka wolo, haakoke mbikikɛ. 14 Kakianɛ wɛ ambombitshanya oma lo ɛtshi ka nkɛtɛ* kɛnɛ ndo dimi hatɛnama nto la ntondo kayɛ. Layonga yekekɔ ndo ose dawo la nkɛtɛ. Laasɔ onto tshɛ layohomana la mi ayondjaka ndooko onyake.” 15 Ko Jehowa akawotɛ ate: “Diakɔ diele, onto tshɛ layokodiaka wɛ Kɛna, ayɔsɔmbɔyama mbala 7.”

Ko Jehowa akadje Kɛna djembetelo dia onto tshɛ layohomana la nde atoodiakake. 16 Oma laasɔ, Kɛna akamɔ oma la ntondo ka Jehowa, ko akatodjasɛ lo ɛtshi ka nkɛtɛ ka Dawo* lo ɛstɛ k’Ɛdɛna.+

17 Oma laasɔ Kɛna akeyana la wadɛnde,+ ko nde akatshu diemi ndo akote Ɛnɔkɛ. Ko Kɛna akatatɛ mbika osomba ndo akawɔlɛ lokombo l’ɔnande Ɛnɔkɛ. 18 L’ɔkɔngɔ diko, Ɛnɔkɛ akote Iradɛ. Iradɛ akote Mehudjaɛlɛ, Mehudjaɛlɛ akote Metushaɛlɛ ndo Metushaɛlɛ akote Lamɛka.

19 Lamɛka akatshuke wadi 2. Wadi l’otango lokombo lande Ada ndo wadi la 2 lokombo lande Zila. 20 Ada akote Jabala. Jabala mbaki lɔtshɛtshɛ la wanɛ wadjasɛ lo mvudu y’apɛma ndo anongi wa dongalonga. 21 Lokombo l’ɔnango laki Jubala. Jubala mbaki lɔtshɛtshɛ la wanɛ tshɛ wahoma nsɛsɛ ndo wada mpolo.* 22 Ndo nto, Zila akote Tubala-Kɛna laki otshudi wa weho tshɛ wa nkonga ndo wa mbolo. Tubala-Kɛna aki la kadiyɛnde, lokombo lande Naama. 23 Ko Lamɛka akatɛ wadiɛnde Ada la Zila ɛtɛkɛta ɛnɛ ate:

25 Adama akeyana la wadɛnde nto ko wadɛnde akote ɔna pami ndo akawɔlɛ Sɛta,*+ nɛ dia nde akate ate: “Nzambi ambombisha ɔna* okina lo dihole dia Aabɛlɛ, dikambo Kɛna akoodiake.”+ 26 Sɛta nde lawɔ akote ɔna pami ndo akawɔlɛ Ɛnɔshɛ.+ L’etena kɛsɔ, anto wakatatɛ mbelɛ* lokombo la Jehowa.

5 Ɔnɛ ele dibuku dia ɔkɔndɔ waki Adama. Lushi lakatonge Nzambi Adama, nde akootonge lo efanelo ka Nzambi.+ 2 Pami la womoto mbakandaatonge.+ Lushi lakawatongama,+ nde akaatshɔkɔla ndo akawaɔlɛ ɔnɛ Onto.*

3 Etena kakakotsha Adama ɛnɔnyi 130, nde akote ɔna pami lafɔna la nde, ko nde akawɔlɛ Sɛta.+ 4 L’ɔkɔngɔ wa nde mbota Sɛta, Adama akasɛnɛ ɛnɔnyi 800. Nde akote ana w’apami la ana wa wamato. 5 Ɔnkɔnɛ, nshi tshɛ ya lɔsɛnɔ laki Adama yaki ɛnɔnyi 930, ko nde akavu.+

6 Etena kakakotsha Sɛta ɛnɔnyi 105, nde akote Ɛnɔshɛ.+ 7 L’ɔkɔngɔ wa nde mbota Ɛnɔshɛ, Sɛta akasɛnɛ ɛnɔnyi 807. Nde akote ana w’apami la ana wa wamato. 8 Ɔnkɔnɛ, nshi tshɛ ya lɔsɛnɔ laki Sɛta yaki ɛnɔnyi 912, ko nde akavu.

9 Etena kakakotsha Ɛnɔshɛ ɛnɔnyi 90, nde akote Kenana. 10 L’ɔkɔngɔ wa nde mbota Kenana, Ɛnɔshɛ akasɛnɛ ɛnɔnyi 815. Nde akote ana w’apami la ana wa wamato. 11 Ɔnkɔnɛ, nshi tshɛ ya lɔsɛnɔ laki Ɛnɔshɛ yaki ɛnɔnyi 905, ko nde akavu.

12 Etena kakakotsha Kenana ɛnɔnyi 70, nde akote Mahalalɛlɛ.+ 13 L’ɔkɔngɔ wa nde mbota Mahalalɛlɛ, Kenana akasɛnɛ ɛnɔnyi 840. Nde akote ana w’apami la ana wa wamato. 14 Ɔnkɔnɛ, nshi tshɛ ya lɔsɛnɔ laki Kenana yaki ɛnɔnyi 910, ko nde akavu.

15 Etena kakakotsha Mahalalɛlɛ ɛnɔnyi 65, nde akote Jarɛdɛ.+ 16 L’ɔkɔngɔ wa nde mbota Jarɛdɛ, Mahalalɛlɛ akasɛnɛ ɛnɔnyi 830. Nde akote ana w’apami la ana wa wamato. 17 Ɔnkɔnɛ, nshi tshɛ ya lɔsɛnɔ laki Mahalalɛlɛ yaki ɛnɔnyi 895, ko nde akavu.

18 Etena kakakotsha Jarɛdɛ ɛnɔnyi 162, nde akote Ɛnɔkɛ.+ 19 L’ɔkɔngɔ wa nde mbota Ɛnɔkɛ, Jarɛdɛ akasɛnɛ ɛnɔnyi 800. Nde akote ana w’apami la ana wa wamato. 20 Ɔnkɔnɛ, nshi tshɛ ya lɔsɛnɔ laki Jarɛdɛ yaki ɛnɔnyi 962, ko nde akavu.

21 Etena kakakotsha Ɛnɔkɛ ɛnɔnyi 65, nde akote Metusɛla.+ 22 L’ɔkɔngɔ wa nde mbota Metusɛla, Ɛnɔkɛ akatetemala nkɛndakɛnda la Nzambi ka mɛtɛ* ɛnɔnyi 300. Nde akote ana w’apami la ana wa wamato. 23 Ɔnkɔnɛ, nshi tshɛ ya lɔsɛnɔ laki Ɛnɔkɛ yaki ɛnɔnyi 365. 24 Ɛnɔkɛ akatetemala nkɛndakɛnda la Nzambi ka mɛtɛ.+ Ko nde komonga nto, nɛ dia Nzambi akawɔshi.+

25 Etena kakakotsha Metusɛla ɛnɔnyi 187, nde akote Lamɛka.+ 26 L’ɔkɔngɔ wa nde mbota Lamɛka, Metusɛla akasɛnɛ ɛnɔnyi 782. Nde akote ana w’apami la ana wa wamato. 27 Ɔnkɔnɛ, nshi tshɛ ya lɔsɛnɔ laki Metusɛla yaki ɛnɔnyi 969, ko nde akavu.

28 Etena kakakotsha Lamɛka ɛnɔnyi 182, nde akote ɔna pami. 29 Nde akawɔlɛ Nɔa,*+ ata ate: “Ɔna ɔnɛ ayotosamba* l’olimu wa wolo ndo l’opipi wadiɛnɛso l’ɔtɛ wakadje Jehowa nkɛtɛ mananu.”+ 30 L’ɔkɔngɔ wa nde mbota Nɔa, Lamɛka akasɛnɛ ɛnɔnyi 595. Nde akote ana w’apami la ana wa wamato. 31 Ɔnkɔnɛ, nshi tshɛ ya lɔsɛnɔ laki Lamɛka yaki ɛnɔnyi 777, ko nde akavu.

32 Etena kakakotsha Nɔa ɛnɔnyi 500, nde akote Shɛmɛ,+ Hama+ la Jafɛtɛ.+

6 Etena kakatatɛ anto fulanɛ la nkɛtɛ ndo kakawote ana wa wamato, 2 ana wa Nzambi ka mɛtɛ*+ wakatatɛ mɛna dia ana wa wamato wakote anto waki elangala. Ɔnkɔnɛ, vɔ wakatatɛ ntshuka wanɛ tshɛ wakawasɔnɛ. 3 Ko Jehowa akate ate: “Nyuma kami hayotetemala monga la solo dia lotutsha otsha le onto,+ nɛ dia nde ekɔ paka emunyi.* Ɔnkɔnɛ, nshi yande yayonga* ɛnɔnyi 120.”+

4 Lo nshi shɔ ndo yema l’ɔkɔngɔ wa laasɔ, waa Nefilimɛ* wakayonga la nkɛtɛ. L’etena kɛsɔ, ana wa Nzambi ka mɛtɛ wakatetemala mbeyana la ana wa wamato wakote anto ndo wakote la wɔ ana w’apami. Ana asɔ waki akongote wa lo nshi y’edjedja ndo anto wa lokumu.

5 Ko Jehowa akɛnyi dia kɔlɔ k’anto kaki efula la nkɛtɛ, ndo tokanyi t’etema awɔ tshɛ mbɛlɛka otsha lo kɔlɔ keto nshi tshɛ.+ 6 Jehowa akanyange* l’ɔtɛ wakandatonge anto la nkɛtɛ ndo otema ande waki la lɔkɔnyɔ.+ 7 Ɔnkɔnɛ Jehowa akate ate: “Layanga nshila anto wakamatonge la nkɛtɛ oshiki, mbuta ate anto kaamɛ la dongalonga, nyama yayakotola la nkɛtɛ ndo ditongami diafumbɔ l’olongo, nɛ dia lambonyanga l’ɔtɛ wakamaditonge.” 8 Koko Nɔa akahomɔ lokolo l’ɔlɔ lo washo wa Jehowa.

9 Ɔkɔndɔ wa Nɔa vɔ ɔnɛ:

Nɔa aki onto ɔlɔlɔ.+ Nde komonga la onongo* l’atei w’anto wa lo lɔlɔnga lande. Nɔa akakɛndakɛndaka la Nzambi ka mɛtɛ.+ 10 L’ɔkɔngɔ diko, Nɔa akote ana w’apami 3: Shɛmɛ, Hama la Jafɛtɛ.+ 11 Koko nkɛtɛ yakalanyema lo washo wa Nzambi ka mɛtɛ ndo yɔ yakalole la akambo wa ngala. 12 Lam’akende Nzambi nkɛtɛ, nde akɛnyi dia yɔ yakalanyema+ nɛ dia anto tshɛ wakasalaka akambo wa kɔlɔ la nkɛtɛ.+

13 Oma laasɔ, Nzambi akatɛ Nɔa ate: “Lambɔsa yɛdikɔ ya nshila anto tshɛ oshiki, nɛ dia nkɛtɛ kambolola la akambo wa ngala l’ɔtɛ awɔ. Ɔnkɔnɛ, layanga mbalanya kaamɛ la nkɛtɛ.+ 14 Sala waato wa luudu* la abaya w’esongo wele la elembo.+ Kosale waato akɔ tenyi tenyi l’etei ndo kokite elongo+ lo waato w’otondo l’etei ndo l’andja. 15 Nganɛ mbayoyosala waato akɔ: Otale awɔ wayonga kubita* 300, wekeke kubita 50 ndo tanga kubita 30. 16 Kosale ndo didishi, kubita 1 oma la diko, dia osase mbɔtɔka lo waato. Kotshike soko dia waato l’omamu+ ndo kawonge la etenyi ka l’ɛse, etenyi ka 2 ndo etenyi ka 3.

17 “Dimi layanga ndɔsha Mvula k’elola+ la nkɛtɛ dia ndjaka ɛngɔ tshɛ kele la lomu la lɔsɛnɔ* kele l’ɛse k’olongo. Ɛngɔ tshɛ kele la nkɛtɛ kayovɔ.+ 18 Dimi lambodja la yɛ sheke. Ɔnkɔnɛ, kɔtɔ lo waato wa luudu wɛ l’anayɛ, la wadɛyɛ ndo la wadi w’anayɛ.+ 19 Kɔtshiya ditongami diasɛna+ tshɛ pende pende lo waato, wadi l’omi wadi l’omi+ dia dishimbɛ kaamɛ la yɛ. 20 Ditongami diafumbɔ lo ndjela weho adiɔ, dongalonga lo ndjela weho adiɔ ndo nyama tshɛ yayakotola la nkɛtɛ lo ndjela weho ayɔ. Koyiɔtshiya yɔ tshɛ hiende hiende dia ndjishimbɛ.+ 21 Kɔmɔtsha weho tshɛ wa mbo ya ndɛ ndo kɔtɔ la yɔ dia wɛ ndɛka+ ndo ndeshaka nyama.”

22 Ko Nɔa akasale kɛnɛ tshɛ kakawodjangɛ Nzambi. Nde akasale kɛnɛ kakandawotɛ tshɛ lo tshɛ.+

7 Oma laasɔ, Jehowa akatɛ Nɔa ate: “Ɔtɔ lo waato wɛ la ase luudu layɛ, nɛ dia wɛ oto kamomɛna onto ɔlɔlɔ l’atei w’anto wa lo lɔlɔnga lɔnɛ.+ 2 Kɔtshiya weho tshɛ wa nyama ya pudipudi, nyama esambele esambele,*+ wadi l’omi wadi l’omi ndo lo nyama tshɛ ya mindo paka nyama hiende hiende, wadi l’omi wadi l’omi. 3 Kɔtshiya ndo weho tshɛ wa ditongami diafumbɔ l’olongo esambele esambele* wadi l’omi wadi l’omi dia diɔ ntshikala la lɔsɛnɔ ndo ndjootanɛ lo nkɛtɛ k’otondo.+ 4 Dikambo l’ɔkɔngɔ wa nshi 7 tsho, dimi layɔlɔsha mvula+ la nkɛtɛ l’edja ka tanyi 40 la etsho 40+ ndo dimi layodiaka ɛngɔ tshɛ kasɛna kakamatonge+ la nkɛtɛ.” 5 Ko Nɔa akasale kɛnɛ tshɛ kakawodjangɛ Jehowa.

6 Nɔa aki la ɛnɔnyi 600 etena kakalɔ Mvula k’elola la nkɛtɛ.+ 7 Ko Nɔa akɔtɔ lo waato wa luudu nde l’anande, la wadɛnde ndo la wadi w’anande la ntondo ka Mvula k’elola+ ntatɛ ndɔ. 8 Weho tshɛ wa nyama ya pudipudi, weho tshɛ wa nyama ya mindo, weho tshɛ wa ditongami diafumbɔ ndo weho tshɛ wa dikɛndakɛnda diakɛndakɛnda la nkɛtɛ+ 9 diakɔtɔ lo waato wa luudu otsha le Nɔa pende pende, wadi l’omi wadi l’omi oko wakadjangɛ Nzambi Nɔa. 10 Nshi 7 l’ɔkɔngɔ, Mvula k’elola kakatatɛ ndɔ la nkɛtɛ.

11 Lo ɔnɔnyi wa 600 wa lɔsɛnɔ la Nɔa, lo ngɔndɔ ka 2 nshi 17, lushi lɔsɔ tɛkɔ tshɛ diaki la lokema l’ashi diakadihɔ ndo nkuke y’ashi waki l’olongo yakadihɔ.+ 12 Ko mvula kakalɔ la nkɛtɛ l’edja ka tanyi 40 la etsho 40. 13 Lushi lakɔ Nɔa akɔtɔ nde la wadɛnde lo waato wa luudu kaamɛ la anande Shɛmɛ, Hama ndo Jafɛtɛ+ la wadi w’anande 3.+ 14 Vɔ wakɔtɔ kaamɛ la nyama tshɛ ya l’okonda lo ndjela weho ayɔ, dongalonga tshɛ lo ndjela weho adiɔ, nyama tshɛ yayakotola lo ndjela weho ayɔ, ditongami tshɛ diafumbɔ lo ndjela weho adiɔ, tofudu tshɛ ndo ditongami tshɛ diele la ahafu. 15 Ditongami tshɛ diele la lomu la lɔsɛnɔ* diakɔtɔka lo waato wa luudu le Nɔa pende pende. 16 Ko weho tshɛ wa ditongami diakɔtɔ wadi l’omi wadi l’omi paka oko wakadjangɛ Nzambi Nɔa. Oma laasɔ, Jehowa akadihe lokuke la waato wa luudu.

17 Mvula k’elola kakalɔ la nkɛtɛ l’edja ka nshi 40, ko ashi wakatadɛka ndo wakatatɛ mɛmba waato, ko vɔ wakatatehaka laadiko di’ashi. 18 Ashi wakafɛ nkɛtɛ ndo wakatetemala mbidɛ lo yɛdikɔ y’efula, koko waato wakatatehaka laadiko di’ashi. 19 Ashi wakafɛ nkɛtɛ lo yɛdikɔ y’efula ko akona w’etale tshɛ wa l’ɛse olongo wakakombama+ l’ashi. 20 Ashi wakadɛ polo kubita* 15 la diko di’akona.

21 Ɔnkɔnɛ, ditongami tshɛ diasɛna diakakɛndakɛndaka la nkɛtɛ, mbuta ate ditongami diafumbɔ, dongalonga, nyama ya l’okonda, ditongami dia totshitshɛ diotanɛ la nkɛtɛ ndo anto tshɛ+ wakavu.+ 22 Ɛngɔ tshɛ kaki laadiko dia nkɛtɛ y’ofumbo kaki la lomu la lɔsɛnɔ* lo wesho w’ɛhɛmbɛ atɔ kakavu.+ 23 Ɔnkɔnɛ, Nde akadiake ɛngɔ tshɛ kasɛna kaki la nkɛtɛ, mbuta ate anto, nyama, nyama yayakotola ndo ditongami diafumbɔ l’olongo. Diɔ tshɛ diakadiakema,+ paka Nɔa la wanɛ waki kaamɛ la nde lo waato wa luudu mbakake.+ 24 Ko ashi wakakukumɛ nkɛtɛ l’edja ka nshi 150.+

8 Koko Nzambi akohɔ Nɔa la nyama ya l’okonda tshɛ ndo dongalonga tshɛ diaki la nde lo waato wa luudu.+ Ɔnkɔnɛ, Nzambi akafufe lɔpɛpɛ laadiko dia nkɛtɛ, ko ashi wakatatɛ nkitakita. 2 Lokema l’ashi waki la diko dia nkɛtɛ ndo nkuke y’ashi wa l’olongo yakadihama, ko mvula kakalɔka oma l’olongo kakahembɔ.+ 3 Ko ashi wakatakitakitaka yema yema la nkɛtɛ. L’ɔkɔngɔ wa nshi 150, ashi wakakɔkɛ. 4 Lo ngɔndɔ ka 7 nshi 17, waato wa luudu wakatemala lo akona w’Ararata. 5 Ashi wakatakitakitaka tsho edja ndo lo ngɔndɔ ka 10.* Lo ngɔndɔ ka 10 lushi 1, ɛtɛ w’akona wakɛnama.+

6 L’ɔkɔngɔ wa nshi 40, Nɔa akadihola didishi+ diakandasale lo waato wa luudu, 7 ko akatondja dingwangwa, ko diɔ diakatshɔka ndo diakakalolaka edja ndo etena kakome ashi la nkɛtɛ.

8 L’ɔkɔngɔ diko, nde akayotoma enga dia tenda kana ashi wambokitakita la nkɛtɛ. 9 Lam’ele enga kotana ndooko ɛngɔ ka mbahema,* tɔ kakakalola le nde lo waato wa luudu, nɛ dia laasɔ ko ashi weke laadiko dia nkɛtɛ k’otondo.+ Ɔnkɔnɛ, nde akatondja lonya l’andja, ko akakiɔtshiya lo waato. 10 Nde akakonge nshi 7 nkina, ko nde akayotoma enga nto l’andja wa waato wa luudu. 11 Etena kakakalola enga le nde oya lo dikɔlɔ, tɔ kaki la dikatshi di’oyoyo di’osongo w’ɔlivɛ lo ɔlɔmɔ atɔ, ko Nɔa akeye dia ashi wambokitakita la nkɛtɛ.+ 12 Nde akakonge nshi 7 nkina nto, ko akatome enga, koko tɔ kokalola le nde nto.

13 Lo ɔnɔnyi wa 601,+ lo ngɔndɔ ka ntondo* lushi 1, ko ashi wamboma la nkɛtɛ. Ɔnkɔnɛ, Nɔa akanya okombɔ wa l’ɔtɛ wa waato wa luudu, akalengɛ, ko nde akɛnyi dia ashi wamboma la nkɛtɛ. 14 Lo ngɔndɔ ka 2* nshi 27, ko nkɛtɛ kamboma to.

15 Ko Nzambi akatɛ Nɔa ate: 16 “Tomba oma lo waato wɛ la wadɛyɛ, la anayɛ ndo la wadi w’anayɛ.+ 17 Tondja ndo weho tshɛ wa ditongami diasɛna,+ weho tshɛ wa ditongami diafumbɔ, weho tshɛ wa nyama ndo weho tshɛ wa nyama yayakotola la nkɛtɛ, dia yɔ monga efula la nkɛtɛ, mbotanɛ ndo fulanɛ la nkɛtɛ.”+

18 Ko Nɔa akatombe nde la wadɛnde, la anande+ ndo la wadi w’anande. 19 Ditongami tshɛ diasɛna, nyama tshɛ yayakotola, ditongami tshɛ diafumbɔ ndo diangɔ tshɛ diakɛndakɛnda la nkɛtɛ diakatombe oma lo waato lo ndjela weho adiɔ.+ 20 Oma laasɔ, Nɔa akasalɛ Jehowa elambwelo,+ akɔshi nyama mɔtshi oma lo nyama tshɛ ya pudipudi ndo oma lo ditongami tshɛ dia pudipudi diafumbɔ,+ ko akalambola olambo wa lotshumba lo elambwelo.+ 21 Ko Jehowa akoke opumu wa dimɛna.* Ɔnkɔnɛ, Jehowa akate l’otema ande ate: “Hambidjaki nkɛtɛ mananu*+ nto pondjo l’ɔtɛ w’onto, nɛ dia otema w’onto mbɛlɛka otsha lo kɔlɔ oma ko dikɛnda diande.+ Ndo nto, handjakaki diangɔ diasɛna tshɛ nto pondjo oko wamomosala.+ 22 Oma ko kakianɛ, dionelo dia ntɔngɔ la dinela, tshitshi la dungu, eleko k’ɔwɔ la eleko k’avula ndo otsho la yanyi+ hawonyɛmaki pondjo oma la nkɛtɛ.”

9 Nzambi akatshɔkɔla Nɔa la anande ndo akawatɛ ate: “Nyootane, nyofulane ndo nyolodia nkɛtɛ.+ 2 Ditongami tshɛ diasɛna diele la nkɛtɛ, ditongami tshɛ diafumbɔ l’olongo, diangɔ tshɛ diakɛndakɛnda la nkɛtɛ ndo nse tshɛ ya lo ndjale yayonyokaka wɔma. Ditongami sɔ tshɛ diambokimɔma kakianɛ lo anya anyu.*+ 3 Nyu kokaka ndɛ+ nyama tshɛ yasɛna yakɛndakɛnda. Dimi lambonyoshayɔ tshɛ woho wakamanyosha akatshikatshi.+ 4 Koko tanyɔlɛke+ emunyi wele la lɔsɛnɔ* lawɔ, mbuta ate dikila+ diawɔ. 5 Laadiko dia laasɔ, dimi layokoya la nyu l’ɔtɛ wa dikila dia lɔsɛnɔ* lanyu. Dimi layokoya la etongami tshɛ kasɛna ndo dimi layokoya la onto tshɛ l’ɔtɛ wa lɔsɛnɔ la ɔnango.+ 6 Onto tshɛ layɔkɛdia dikila di’onto, dikila diande diayɔkɛdiama+ oma le onto okina, nɛ dia onto akatongama lo efanelo ka Nzambi.+ 7 Koko nyootane, nyofulane, nyohame lo yɛdikɔ y’efula la nkɛtɛ ndo nyoyale efula.”+

8 Ko Nzambi akatɛ Nɔa nde l’anande ate: 9 “Dimi lambodja sheke kaamɛ la nyu+ ndo la tokanula tanyu, 10 ndo la ditongami* tshɛ diasɛna diele kaamɛ la nyu, ndo la tofudu, la nyama ndo la ditongami tshɛ diasɛna diele kaamɛ la nyu la nkɛtɛ; kɛnɛ tshɛ kakatombe oma lo waato wa luudu, mbuta ate etongami tshɛ kasɛna kele la nkɛtɛ.+ 11 Eelo, dimi lambodja sheke kaamɛ la nyu nte: Ditongami diasɛna tshɛ hadiolanyemaki la elola k’ashi nto pondjo ndo Mvula k’elola halanyaki nkɛtɛ nto pondjo.”+

12 Ko Nzambi akakotsha ate: “Ɔnɛ ele djembetelo ya sheke yamomodja lam’asami la nyu ndo lam’asami la ditongami* tshɛ diasɛna diele kaamɛ la nyu lo nɔnga tshɛ yayoya. 13 Lambokitsha ngolo lo wange ndo tɔ kayonga oko djembetelo ya sheke lam’asami la nkɛtɛ. 14 Etena tshɛ kayomotomaka wange la diko dia nkɛtɛ, ngolo kayɛnamaka lo wange. 15 Ko dimi layohɔka sheke yakamadje la nyu ndo la weho tshɛ wa ditongami diasɛna. Ndo elola k’ashi hayalaki nto pondjo dia ndjaka ditongami tshɛ diasɛna.+ 16 Ngolo kayɛnamaka lo wange, ko dimi layokiɛnaka ndo layohɔka sheke ya pondjo yamomodja la weho tshɛ wa ditongami diasɛna diele la nkɛtɛ.”

17 Nzambi akatɛ Nɔa nto ate: “Ɔnɛ ele djembetelo ya sheke yamomodja lam’asami la ditongami tshɛ diasɛna diele la nkɛtɛ.”+

18 Ana wa Nɔa wakatombe oma lo waato wa luudu vɔ anɛ: Shɛmɛ, Hama la Jafɛtɛ.+ L’ɔkɔngɔ diko, Hama akote Kanana.+ 19 Vɔ 3 mbaki ana waki Nɔa, ndo oma le wɔ mbakayotɔka anto tshɛ wakayonga lo nkɛtɛ k’otondo.+

20 Nɔa akatatɛ nkamba nkɛtɛ, ko nde akakambe ekambɔ ka vinyɔ. 21 Lushi lɔmɔtshi, nde akanɔ wanu, akadjɔ ko akalale otakataka l’etei ka luudu lande la dipɛma. 22 Hama she Kanana akɛnyi otakataka wa she, ko nde akatotɛ anango 2 waki l’andja. 23 Ɔnkɔnɛ, Shɛmɛ nde la Jafɛtɛ wakɔshi dihɔndɔ ko wakadiahɛ lo ahɛka awɔ ndo wakatshu ɛkɔngɔkɔngɔ, ko wakatofɛka otakataka wa shɛwɔ. Vɔ wakɛdiya dungi diawɔ dihole dikina, ko vɔ kɔmɛna otakataka wa shɛwɔ.

24 Lam’akondɔ wanu wakanɔ Nɔa ndo lam’akandeye kɛnɛ kakoosalɛ ɔnande la kose, 25 nde akate ate:

“Mananu kayale le Kanana.+

Nde ayale mfumbe k’anyanya ka anango.”+

26 Nde akakotsha ate:

Kanana ayale mfumbe kande.”

28 Nɔa akasɛnɛ ɛnɔnyi 350 l’ɔkɔngɔ wa Mvula k’elola.+ 29 Ɔnkɔnɛ, nshi tshɛ ya lɔsɛnɔ laki Nɔa yaki ɛnɔnyi 950, ko nde akavu.

10 Ɔkɔndɔ wa Shɛmɛ,+ Hama ndo Jafɛtɛ ana w’apami wa Nɔa vɔ ɔnɛ:

Vɔ wakayota ana l’ɔkɔngɔ wa Mvula k’elola.+ 2 Ana w’apami wa Jafɛtɛ vɔ anɛ: Ngɔmɛrɛ,+ Mangɔngɔ,+ Madai, Javana, Tubala,+ Meshɛkɛ+ ndo Tirasi.+

3 Ana w’apami wa Ngɔmɛrɛ vɔ anɛ: Ashɛkɛnazɛ,+ Rifatɛ ndo Tongarama.+

4 Ana w’apami wa Javana vɔ anɛ: Elishaha,+ Tarashishi,+ Kitimɛ+ ndo Dɔdanima.

5 Vɔ mbaki lɔtshɛtshɛ la wanɛ wadjasɛ lo asɛnga ndo wakahandjɔnɛ lo nkɛtɛ yawɔ, lo ndjela ɛtɛkɛta awɔ, nkumbo yawɔ ndo wedja awɔ.

6 Ana w’apami wa Hama vɔ anɛ: Kusha, Mizrayima,+ Puta+ la Kanana.+

7 Ana w’apami wa Kusha vɔ anɛ: Sɛba,+ Havila, Sabita, Raama+ la Sabitɛka.

Ana w’apami wa Raama vɔ anɛ: Shɛba la Dedana.

8 Kusha akote Nimɛrɔdɛ. Nde kaki onto la ntondo la monga ose wolo la nkɛtɛ. 9 Nde akayonga mengenga ka mamba kakalɔshanaka la Jehowa. Diakɔ dioka anto wɛɛla ɔnɛ: “Oko Nimɛrɔdɛ laki mengenga ka mamba kakalɔshanaka la Jehowa.” 10 Esomba wa ntondo waki lo diolelo diande vɔ ɛnɛ: Babɛlɛ,+ Erɛkɛ,+ Akada la Kalinɛ lo ɛtshi ka nkɛtɛ ka Shinara.+ 11 Nde akonɔ oma l’ɛtshi ka nkɛtɛ kɛsɔ ko akatshu l’Asuriya+ ndo akatohika Niniva,+ Rɛhɔbɔta-Irɛ, Kala 12 ndo Rɛsɛnɛ lam’asa Niniva la Kala: Ɔsɔ kele osomba wa woke.*

13 Mizrayima akote Ludima,+ Anamima, Lɛhabima, Nafɛtuhima,+ 14 Patɛrusima,+ Kasluhima (nde kele lɔtshɛtshɛ l’ase Filistiya),+ ndo Kafitɔrima.+

15 Kanana akote Sidɔna+ ɔnande l’enondo ndo Hiti+ 16 ndo ase Jɛbusɛ,+ ase Amɔra,+ ase Ngiringashɛ, 17 ase Hivi,+ ase Araka, ase Sinɛ, 18 ase Aravada,+ ase Zemarɛ ndo ase Hamatɛ.+ Oma laasɔ, nkumbo y’ase Kanana yakadiangana. 19 Ɔnkɔnɛ, elelo w’ase Kanana wakatatɛka la Sidɔna ko wakatshɔka polo ndo la Ngɛrara,+ suke la Ngaza,+ polo ndo la Sɔdɔma la Ngɔmɔra,+ la Adɛma ndo la Zebɔyima,+ suke la Lasha. 20 Vɔ mbaki ana w’apami wa Hama lo ndjela nkumbo yawɔ, ɛtɛkɛta awɔ, nkɛtɛ yawɔ ndo wedja awɔ.

21 Shɛmɛ nde lawɔ akote ana, ko nde akayonga lɔtshɛtshɛ l’ana tshɛ wa Ebɛrɛ.+ Nde aki ɔnango Jafɛtɛ laki enondo.* 22 Ana w’apami wa Shɛmɛ vɔ anɛ: Elama,+ Asishura,+ Arapakɛshadɛ,+ Luda la Arama.+

23 Ana wa Arama vɔ anɛ: Uzɛ, Hula, Ngɛtɛrɛ la Mashɛ.

24 Arapakɛshadɛ akote Shɛla+ ndo Shɛla akote Ebɛrɛ.

25 Ebɛrɛ akote ana w’apami 2. Ɔmɔtshi lokombo lande Pɛlɛngɛ,*+ nɛ dia lo nshi yakinde la lɔsɛnɔ, nkɛtɛ* yakatɔna. Ɔnango lokombo lande Jokitana.+

26 Jokitana akote Alamɔdada, Shelɛfa, Hazaramavɛta, Jera,+ 27 Hadɔrama, Uzala, Dikɛla, 28 Obala, Abimaɛlɛ, Shɛba, 29 Ɔfira,+ Havila ndo Jɔbaba. Vɔ tshɛ waki ana w’apami wa Jokitana.

30 Dihole diakawadjasɛka diaki oma la Mesha polo ndo la Sefara, ɛtshi ka nkɛtɛ k’akona ka lo ɛstɛ.

31 Vɔ mbaki tokanula taki Shɛmɛ lo ndjela nkumbo yawɔ, ɛtɛkɛta awɔ, nkɛtɛ yawɔ ndo wedja awɔ.+

32 Ɔsɔ mbaki nkumbo y’ana waki Nɔa lo ndjela ɛlɔndji wa nkumbo yawɔ ndo wedja awɔ. Wedja wakayokokanɛ la nkɛtɛ l’ɔkɔngɔ wa Mvula k’elola+ wakatombe oma lo nkumbo yakɔ.

11 L’etena kɛsɔ, nkɛtɛ k’otondo kakatɛkɛtaka ɔtɛkɛta 1 ndo kaki la tɔtɛkɛta ta woho ɔtɔi. 2 Lam’akɛngɔla anto otsha lo ɛstɛ, vɔ wakashola okidi ɔmɔtshi w’ebamubamu l’ɛtshi ka nkɛtɛ ka Shinara,+ ko wakatodjasɛ lɛkɔ. 3 Ko vɔ wakatanɛ vate: “Nyoye tosale atafadi ndo towatshumbe lo dja.” Ɔnkɔnɛ, vɔ wakakambe la atafadi lo dihole dia ave ndo elongo lo dihole dia nkɛtɛ ya lɔsɔha. 4 Vɔ wakate vate: “Nyoye tohike osomba aso shoamɛ, tohike luudu lele la tshoto yakoma polo l’olongo ndo toyayange lokumu diaha sho pandjɔnɛ lo nkɛtɛ k’otondo.”+

5 Ko Jehowa akaholɔ dia tenda osomba la luudu lakahikaka ana w’anto. 6 Oma laasɔ Jehowa akate ate: “Anto anɛ wekɔ kaamɛ dikambo wekɔ lo ntɛkɛta ɔtɛkɛta ɔtɔi,+ diakɔ diambowotatɛ nsala nganɛ. Ndooko kɛnɛ kayowayɛ lo yimba dia nsala kahawatokoka nsala. 7 Totshu, toholɔ+ lɛkɔ kele totofukutanya ɔtɛkɛta awɔ diaha onto l’onto mboka ɔtɛkɛta watɛkɛta osekande.” 8 Ɔnkɔnɛ, Jehowa akaahandjola oma lɛkɔ lo nkɛtɛ k’otondo,+ ko vɔ wakatshike mbika osomba akɔ. 9 Diakɔ diakɔlamɛ osomba akɔ ɔnɛ Babɛlɛ,*+ nɛ dia lɛkɔ mbakafukutanya Jehowa ɔtɛkɛta wa lo nkɛtɛ k’otondo ndo mbakahandjola Jehowa anto lo nkɛtɛ k’otondo.

10 Ɔkɔndɔ wa Shɛmɛ+ vɔ ɔnɛ:

Etena kakakotsha Shɛmɛ ɛnɔnyi 100, nde akote Arapakɛshadɛ+ ɛnɔnyi 2 l’ɔkɔngɔ wa Mvula k’elola. 11 L’ɔkɔngɔ wa nde mbota Arapakɛshadɛ, Shɛmɛ akasɛnɛ ɛnɔnyi 500. Nde akote ana w’apami la ana wa wamato.+

12 Etena kakakotsha Arapakɛshadɛ ɛnɔnyi 35, nde akote Shɛla.+ 13 L’ɔkɔngɔ wa nde mbota Shɛla, Arapakɛshadɛ akasɛnɛ ɛnɔnyi 403. Nde akote ana w’apami la ana wa wamato.

14 Etena kakakotsha Shɛla ɛnɔnyi 30, nde akote Ebɛrɛ.+ 15 L’ɔkɔngɔ wa nde mbota Ebɛrɛ, Shɛla akasɛnɛ ɛnɔnyi 403. Nde akote ana w’apami la ana wa wamato.

16 Etena kakakotsha Ebɛrɛ ɛnɔnyi 34, nde akote Pɛlɛngɛ.+ 17 L’ɔkɔngɔ wa nde mbota Pɛlɛngɛ, Ebɛrɛ akasɛnɛ ɛnɔnyi 430. Nde akote ana w’apami la ana wa wamato.

18 Etena kakakotsha Pɛlɛngɛ ɛnɔnyi 30, nde akote Reu.+ 19 L’ɔkɔngɔ wa nde mbota Reu, Pɛlɛngɛ akasɛnɛ ɛnɔnyi 209. Nde akote ana w’apami la ana wa wamato.

20 Etena kakakotsha Reu ɛnɔnyi 32, nde akote Sɛrungɛ. 21 L’ɔkɔngɔ wa nde mbota Sɛrungɛ, Reu akasɛnɛ ɛnɔnyi 207. Nde akote ana w’apami la ana wa wamato.

22 Etena kakakotsha Sɛrungɛ ɛnɔnyi 30, nde akote Nahɔra. 23 L’ɔkɔngɔ wa nde mbota Nahɔra, Sɛrungɛ akasɛnɛ ɛnɔnyi 200. Nde akote ana w’apami la ana wa wamato.

24 Etena kakakotsha Nahɔra ɛnɔnyi 29, nde akote Tɛra.+ 25 L’ɔkɔngɔ wa nde mbota Tɛra, Nahɔra akasɛnɛ ɛnɔnyi 119. Nde akote ana w’apami la ana wa wamato.

26 Etena kakakotsha Tɛra ɛnɔnyi 70, nde akote Abrama,+ Nahɔra+ ndo Harana.

27 Ɔkɔndɔ wa Tɛra vɔ ɔnɛ:

Tɛra akote Abrama, Nahɔra ndo Harana. Harana akote Lɔta.+ 28 Lam’aki Tɛra ka she eke la lɔsɛnɔ, Harana akavu la Ura+ ka la Kaladiya,+ lo wodja awɔ wa lootɔ. 29 Abrama la Nahɔra wakatshuke wadi. Wadi aki Abrama lokombo lande Sarayi+ ndo wadi aki Nahɔra lokombo lande Milika,+ ɔna Harana. Harana mbakote Milika ndo Isika. 30 Koko Sarayi aki ekomba;+ nde komonga ndooko la ɔna.

31 L’ɔkɔngɔ wa laasɔ, Tɛra akɔshi ɔnande Abrama la okana ande Lɔta+ ɔna Harana, la Sarayi k’okilo ande, wadi aki ɔnande Abrama, ko wakonɛɛ kaamɛ la nde oma la Ura ka la Kaladiya ndo wakatshu otsha lo wodja wa Kanana.+ Vɔ wakatokomaka la Harana+ ndo wakatodjasɛ lɛkɔ. 32 Nshi tshɛ ya lɔsɛnɔ laki Tɛra yaki ɛnɔnyi 205, ko Tɛra akavu la Harana.

12 Oma laasɔ, Jehowa akatɛ Abrama ate: “Onɛɛ oma lo wodja anyu, oma lale ewotɔ ayɛ ndo oma lo luudu la shɔ, kele tshɔka lo wodja wayomokɛnya.+ 2 Dimi layoketɛ wodja wa woke, layokɔtshɔkɔla, layetɛ lokombo layɛ woke ndo wɛ ayonga tshondo y’ɔtshɔkɔ+ le anto akina. 3 Dimi layɔtshɔkɔla wanɛ wakɔtshɔkɔla, koko ɔnɛ lakodja mananu dimi layowodja mananu+ ndo nkumbo tshɛ ya la nkɛtɛ yayɔtshɔkwama* lo tshimbo yayɛ.”+

4 Ko Abrama akatshu oko wakawotɛ Jehowa ndo Lɔta akatshu la nde. Abrama aki la ɛnɔnyi 75 etena kakandonɛ oma la Harana.+ 5 Abrama akɔshi wadɛnde Sarayi+ la Lɔta la ɔna aki ɔnango+ la diangɔ tshɛ diakawakondja+ ndo la anto* wakawayokondja la Harana, ko wakatshu otsha lo wodja wa Kanana.+ Lam’akawakome lo wodja wa Kanana, 6 Abrama aketeta l’ɛtshi ka nkɛtɛ kakɔ k’otondo polo l’ɛtshi ka nkɛtɛ ka Shɛkɛmɛ,+ suke la esongo wa weke wa la Mɔrɛ.+ L’etena kɛsɔ, ase Kanana waki lo ɛtshi ka nkɛtɛ kakɔ. 7 Ko Jehowa akɛnama le Abrama ndo akawotɛ ate: “Dimi layosha tokanula* tayɛ+ ɛtshi ka nkɛtɛ kɛnɛ.”+ Oma laasɔ, nde akasalɛ Jehowa, Ɔnɛ lakɛnama le nde elambwelo lɛkɔ. 8 L’ɔkɔngɔ diko, nde akamɔ laawɔ ko akatshu lo lɛkɛ l’akona, lo ɛstɛ ka Bɛtɛlɛ+ ko nde akatoka luudu lande la dipɛma, Bɛtɛlɛ lo owɛstɛ ndo Ai+ lo ɛstɛ. Nde akasalɛ Jehowa+ elambwelo lɛkɔ ndo akatatɛ mbelɛ* lokombo la Jehowa.+ 9 Oma laasɔ, Abrama akonɛ ko akatetemala la lɔkɛndɔ lande otsha la Nɛngɛbɛ,+ atasɛkɔsɛkɔ oma lo mpango kɛnɛ otsha lo kekina.

10 L’etena kɛsɔ, ndjala ka kasha kakayala lo wodja wa Kanana, ko Abrama akaholɔ otsha l’Edjibito dia todjasɛ lɛkɔ lo tshanda mɔtshi,*+ nɛ dia ndjala kaki wolo lɛkɔ.+ 11 Lam’akinde suke la nkoma l’Edjibito, nde akatɛ wadɛnde Sarayi ate: “Ompokame yema lam’alangayɛ! Dimi mbeyaka dia wɛ ekɔ womoto l’olangala efula.+ 12 Lam’ayokɛna ase Edjibito, aha la taamu vɔ wayota vate: ‘Ɔnɛ wadɛnde,’ ko vɔ wayondjaka, koko wayokotshika la lɔsɛnɔ. 13 Ɔnkɔnɛ, lam’alangayɛ kote dia wɛ ekɔ kadiyɛmi, dia dimi mpomɔ lokolo l’ɔlɔ l’ɔtɛ ayɛ ndo ntshikala la lɔsɛnɔ.”*+

14 Kam’akakome Abrama l’Edjibito, ase Edjibito wakɛnyi dia Sarayi aki olangala efula. 15 Topita ta Farawɔ vɔ lawɔ wakɛnyi womoto akɔ ndo wakashimboya olangala ande la ntondo ka Farawɔ, ko wakɔɔtɔlɛ lo luudu la Farawɔ. 16 Nde akasalɛ Abrama ɔlɔlɔ l’ɔtɛ wa womoto akɔ ndo akawosha ɛkɔkɔ, ngɔmbɛ, mponda ya wadi la ya waomi, ekambi w’apami la wa wamato ndo kamɛlɔ.+ 17 Ko Jehowa akatomɛ Farawɔ la ase luudu lande asui wa wolo l’ɔtɛ wa Sarayi, wadi aki Abrama.+ 18 Ɔnkɔnɛ Farawɔ akelɛ Abrama ko akawotɛ ate: “Ngande wamboyonsalɛ nganɛ? Lande na kakiyɛ kombutɛmi dia nde ekɔ wadɛyɛ? 19 Lande na kakayate wate: ‘Kadiyɛmi mbende,’+ ko dimi laki suke la mbɔɔsa oko wadi? Wadɛyɛ nde ɔnɛ, ɔsande nyotshu!” 20 Ko Farawɔ akasha anto ande didjango lo dikambo dia Abrama, ko vɔ wakootshindɛ nde la wadɛnde la kɛnɛ tshɛ kaki la nde.+

13 Oma laasɔ, Abrama akamɔ oma l’Edjibito ko akatshu otsha la Nɛngɛbɛ+ nde la wadɛnde la kɛnɛ tshɛ kaki la nde kaamɛ ndo Lɔta. 2 Abrama aki la dongalonga efula, mfɛsa efula ndo paonyi+ efula. 3 Nde akatahangaka lo ahole la ahole etena kakandonɛɛ oma la Nɛngɛbɛ otsha la Bɛtɛlɛ polo lam’akandakome lo dihole diakandake luudu lande la dipɛma lam’asa Bɛtɛlɛ la Ai,+ 4 lɛnɛ akandasale elambwelo ntondo. Abrama akeelɛ* lokombo la Jehowa lɛkɔ.

5 L’etena kɛsɔ, Lɔta lakatetetaka la Abrama akayala nde lawɔ la ɛkɔkɔ, ngɔmbɛ ndo mvudu y’apɛma. 6 Ɔnkɔnɛ, ɛtshi ka nkɛtɛ kakɔ kokoka dia vɔ tshɛ ntshikala dihole ɔtɔi; diangɔ diawɔ diakayala efula ka mamba lo yɛdikɔ yele takawakoke mbidjasɛ kaamɛ nto. 7 Diakɔ diele owanu wakatombe lam’asa alami wa dongalonga diaki Abrama la alami wa dongalonga diaki Lɔta. (L’etena kɛsɔ, ase Kanana la ase Perizi wakadjasɛka lo ɛtshi ka nkɛtɛ kakadjasɛka Abrama nde la Lɔta.)+ 8 Ɔnkɔnɛ Abrama akatɛ Lɔta+ ate: “Lam’alangayɛ, owanu hawohombe monga lam’asami la yɛ ndo lam’asa alami wa dongalonga diami la alami wa dongalonga diayɛ, nɛ dia tekɔ onto l’ɔnango. 9 Shi ɛtshi ka nkɛtɛ k’otondo kekɔ la ntondo kayɛ? Lam’alangayɛ, tokakitɔne. Naka wɛ ntshɔ lo lonya la lɔmɔsɔ, dimi layotshɔ lo lonya l’omi; ko naka wɛ ntshɔ lo lonya l’omi, dimi layotshɔ lo lonya la lɔmɔsɔ.” 10 Ko Lɔta akedia washo ndo akɛnyi dia distrikɛ* dia Jɔrdana+ di’otondo polo ndo la Zɔara+ aki ɛtshi ka nkɛtɛ kakalɔyamaka dimɛna (la ntondo ka Jehowa ndanya Sɔdɔma la Ngɔmɔra), oko ekambɔ ka Jehowa,+ oko wodja w’Edjibito. 11 Lɔta akayasɔnɛ distrikɛ di’otondo dia Jɔrdana, ko nde akonɔ otsha lo ɛstɛ. Ɔnkɔnɛ vɔ wakakakitɔna. 12 Abrama akadjasɛ lo wodja wa Kanana, koko Lɔta akadjasɛ l’atei w’esomba wa lo distrikɛ+ diakɔ. L’ekomelo, nde akatoka luudu lande la dipɛma suke la Sɔdɔma. 13 Ase Sɔdɔma waki anto wa kɔlɔ ndo waki atshi wa pɛkato wa lokolokolo la ntondo ka Jehowa.+

14 Jehowa akatɛ Abrama l’ɔkɔngɔ wa Lɔta nkakitɔna la nde ate: “Lam’alangayɛ, edia washo ayɛ oma lam’eyɛ kele enda otsha lo nɔrdɛ la sidɛ ndo otsha lo ɛstɛ la owɛstɛ, 15 nɛ dia ɛtshi ka nkɛtɛ tshɛ kɛnayɛ kengo, dimi layokoshatɔ wɛ la tokanula* tayɛ pondjo pondjo.+ 16 Dimi layetɛ tokanula* tayɛ oko nsɛkɛ ya ditshu dia nkɛtɛ, woho wele naka onto ɔmɔtshi kokaka mbadia nsɛkɛ ya ditshu dia nkɛtɛ, kete nde ayokoka mbadia+ tokanula* tayɛ. 17 Emala, eteta lo ɛtshi ka nkɛtɛ k’otondo, nɛ dia dimi layokoshatɔ.” 18 Ɔnkɔnɛ, Abrama akatetemala mbidjasɛ lo mvudu y’apɛma. L’ɔkɔngɔ diko, nde akatshu, ko akatodjasɛ lo esongo wa weke wa la Mamarɛ+ wele la Hɛbɛrɔna+ ndo nde akatosalɛ Jehowa+ elambwelo lɛkɔ.

14 Lo nshi shɔ, Amɛrafɛlɛ nkumekanga ka Shinara,+ Ariyɔkɛ nkumekanga k’Elasara, Kɛdɔrlaɔmɛra+ nkumekanga k’Elama+ ndo Tidala nkumekanga ka Ngɔyima, 2 wakalɔsha Bera nkumekanga ka Sɔdɔma,+ Birisha nkumekanga ka Ngɔmɔra,+ Shinabɛ nkumekanga k’Adɛma, Shemɛbɛrɛ nkumekanga ka Zebɔyima+ ndo nkumekanga ka Bɛla, mbuta ate Zɔara. 3 Vɔ tshɛ* wakasanganya asɔlayi awɔ l’Okidi wa Sidima,+ mbuta ate Ndjale ka Lɛɛhɔ.*+

4 Vɔ* wakakambɛ Kɛdɔrlaɔmɛra ɛnɔnyi 12, koko l’ɔnɔnyi wa 13 vɔ wakayɔtɔmbɔkɔ. 5 Ɔnkɔnɛ l’ɔnɔnyi wa 14, Kɛdɔrlaɔmɛra nde la nkumi ya dikanga yaki kaamɛ la nde wakalɛndja Rɛfayima lo Ashiterɔta-Karanayima, Zuzima lo Hama, Emimɛ+ lo Shave-Kiriyatayima, 6 ndo Hɔri+ lo dikona diawɔ dia Seirɛ,+ otsha lo Ɛlɛ-Parana kele l’oswe. 7 Ko vɔ wakakalola ndo wakayokoma la Ɛnɛ-Mishipata, mbuta ate Kadɛshɛ+ ndo wakalɛndja ɛtshi ka nkɛtɛ tshɛ k’ase Amalɛka+ kaamɛ l’ase Amɔra+ wakadjasɛka la Hazazɔna-Tamara.+

8 Ɔnkɔnɛ, nkumekanga ka Sɔdɔma akatshu nde la nkumekanga ka Ngɔmɔra, nkumekanga k’Adɛma, nkumekanga ka Zebɔyima ndo nkumekanga ka Bɛla, mbuta ate Zɔara, ko wakalɔngama dia mbalɔsha l’Okidi wa Sidima,* 9 dia ndɔsha Kɛdɔrlaɔmɛra nkumekanga k’Elama, Tidala nkumekanga ka Ngɔyima, Amɛrafɛlɛ nkumekanga ka Shinara ndo Ariyɔkɛ nkumekanga k’Elasara.+ Nkumi ya dikanga 4 yakalɔ la nkumi ya dikanga 5. 10 L’etena kɛsɔ, Okidi* wa Sidima wakalole tɔɔ l’afuku waki la olembo. Lam’akatatɛ nkumekanga ka Sɔdɔma ndo ka Ngɔmɔra ndawɔ, vɔ wakatambɛ l’afuku akɔ, ko wanɛ wakatshikala wakalawɔ otsha lo lɛkɛ l’akona. 11 Ɔnkɔnɛ, nkumi ya dikanga 4 yakalɛndja wakɔshi diangɔ tshɛ di’ase Sɔdɔma la Ngɔmɔra kaamɛ la mbo ya ndɛ yawɔ tshɛ, ko wakatshu.+ 12 Vɔ wakande ndo Lɔta lakadjasɛka la Sɔdɔma,+ ɔnɛ laki ɔna aki ɔnango Abrama kaamɛ la diangɔ diande, ko wakatetemala la lɔkɛndɔ.

13 L’ɔkɔngɔ diko, pami kɛmɔtshi kakalawɔ akatotɛ Abrama w’ose Hɛbɛru kɛnɛ kakatombe. L’etena kɛsɔ, Abrama akadjasɛka* l’atei w’esongo waki Mamarɛ k’ose Amɔra,+ ɔnango Eshikɔlɛ nde la Anɛrɛ.+ Vɔ mbaki lo wedi waki Abrama. 14 Ko Abrama akoke dia wambonda owotɔ*+ ande oko mfumbe. Ɔnkɔnɛ, nde akasanganya anto ande wakeyaka ndɔ ta, apami 318 w’oma l’atei w’ekambi ande wakotɔ lo luudu lande, ko akayele andɔshi polo la Danɛ.+ 15 L’otsho, nde akakakitola anto ande l’elui, ko nde l’anto ande wakaalɔsha ndo wakaalɛndja. Nde akayelana la wɔ polo la Hoba kele lo nɔrdɛ ka Damasɛkɛ. 16 Nde akatoya la diangɔ tshɛ, ndo Lɔta l’owotɔ ande, diangɔ diande, wamato ndo anto akina.

17 L’ɔkɔngɔ wa Abrama nkalola oma la tɔlɛndja Kɛdɔrlaɔmɛra la nkumi ya dikanga yaki kaamɛ la nde, nkumekanga ka Sɔdɔma akatshu dia tohomana l’Abrama l’Okidi* wa Shave, mbuta ate Okidi wa Nkumekanga.+ 18 Ko Mɛlɛkisɛdɛkɛ+ nkumekanga ka Salɛma+ akaye la mapa ndo la wanu. Nde aki ɔlɔmbɛdi wa Nzambi Kaheme-Tshɛ.+

19 Oma laasɔ, nde akɔɔtshɔkɔla ndo akate ate:

Ko Abrama akawosha etenyi ka dikumi ka ɛngɔ tshɛ.+

21 Oma laasɔ, nkumekanga ka Sɔdɔma akatɛ Abrama ate: “Ombisha paka anto,* tshikala la diangɔ tshɛ.” 22 Koko Abrama akatɛ nkumekanga ka Sɔdɔma ate: “Lambedia lonya lami dia ntshiba la ntondo ka Jehowa Nzambi Kaheme-Tshɛ, Otungi w’olongo la nkɛtɛ 23 dia hantɔsa ndooko ɛngɔ kayɛ, oyadi kaanga ɔkɔdi wa losabata, diaha wɛ ndjota wate: ‘Dimi kambɔngɔnya Abrama.’ 24 Dimi hantɔsa ndooko ɛngɔ, laadiko dia kɛnɛ kakashidi anto ami ndɛ. Koko apami wakatshwe la mi, mbuta ate Anɛrɛ, Eshikɔlɛ la Mamarɛ,+ vɔ wɔshi kɛnɛ kahombawɔ nongola.”

15 L’ɔkɔngɔ w’akambo asɔ, ɔtɛkɛta wa Jehowa wakaye le Abrama lo ɛnɛlɔ ate: “Abrama, tokake wɔma.+ Dimi lekɔ engawo le yɛ.+ Wɛ ayolongola difuto dia woke.”+ 2 Abrama akakadimola ate: “Nkum’Olongo Nkumadiɔndjɔ Jehowa, ayoyombisha lam’ele dimi latote ndooko ɔna ndo Eliɛzɛrɛ+ w’ose Damasɛkɛ mbayonga ɔhɛna lo luudu lami?” 3 Abrama akakotsha ate: “Lam’ele wɛ kombishami ndooko ɔna,*+ ose* luudu lami ɔmɔtshi mbayonkita oko ɔhɛna.” 4 Koko ɔtɛkɛta wa Jehowa wakookadimola ɔnɛ: “Pami kɛnɛ hatokɔhɛna, koko ɔnayɛ* mbayokɔhɛna.”+

5 Ɔnkɔnɛ, nde akootondja l’andja ndo akawotɛ ate: “Lam’alangayɛ, ohaalɛ yema l’olongo kele adia tɔɔtɔ, naka wɛ ayokoka.” Ko nde akawotɛ ate: “Ngango mbayonga tokanula* tayɛ.”+ 6 Abrama aki la mbetawɔ le Jehowa+ ko Nde akawɔshi oko onto ɔlɔlɔ.+ 7 Nde akakotsha ate: “Dimi kele Jehowa, Ɔnɛ lakakotondja oma la Ura ka la Kaladiya dia ndjokosha ɛtshi ka nkɛtɛ kɛnɛ dia tɔ monga kayɛ.”+ 8 Ko nde akate ate: “Nkum’Olongo Nkumadiɔndjɔ Jehowa le, ngande wayomeya dia wɛ ayombishatɔ?” 9 Nde akookadimola ate: “Ɔsa ɔsɔngɔ wa ngɔmbɛ wele la ɛnɔnyi 3, mbudi ka wadi kele la ɛnɔnyi 3, ɔkɔkɔ wele la ɛnɔnyi 3, fudu k’enga ndo kudumba y’ɔna.” 10 Ko nde akɔshi nyama shɔ tshɛ, akayiate lo 2 ndo nde akanɛ bɛtshi diakɔ nɛ wedi ɔnɛ, nɛ wedi okina, koko nde kombata tofudu. 11 Oma laasɔ, tofudu talɛ emunyi takatatɛ mpolɔ dia ndjɔlɛ edo wa nyama, koko Abrama akatitshanyaka.

12 Lam’akayange wonya mbidja, Abrama akalale djɔ ya baku, ko wodjima wa tshududu wokiya wɔma wakoohotamɛ. 13 Ko Nde akatɛ Abrama ate: “Eya mɛtɛ dia tokanula* tayɛ wayonga angɛndangɛnda lo wodja waha wawɔ, ndo dia anto wa lɛkɔ wayowaetɛ mfumbe ndo wayowasoya l’edja k’ɛnɔnyi 400.+ 14 Koko dimi layolombosha wodja wayowokambɛ,+ ko oma laasɔ vɔ wayotomba oma lɛkɔ la diangɔ efula.+ 15 Koko wɛ, wɛ ayoyela wa shɔ la ki. Wɛ ayokundɛma aya osombe wa lokosombe.+ 16 Koko vɔ wayokalola lanɛ+ lo lɔlɔnga la 4, nɛ dia munga k’ase Amɔra katakome lo yɛdikɔ yamboleka efula.”+

17 Lam’akadje wonya ndo lam’akayala wodjima efula, nkuka kakatondjaka edinga kakɛnama ndo loombe la dja lakete lam’asa bɛtshi diakɔ. 18 Lushi lɔsɔ Jehowa akadje sheke+ nde l’Abrama ate: “Dimi layosha tokanula* tayɛ ɛtshi ka nkɛtɛ kɛnɛ.+ Ntatɛ oma l’ɔkɛdi wa l’Edjibito polo l’ɔkɛdi wa woke, ɔkɛdi w’Efaratɛ:+ 19 Nkɛtɛ y’ase Kenɛ,+ y’ase Kenizi, y’ase Kadɛmɔna, 20 y’ase Hiti,+ y’ase Perizi,+ y’ase Rɛfayima,+ 21 y’ase Amɔra, y’ase Kanana, y’ase Ngiringashɛ ndo y’ase Jɛbusɛ.”+

16 Sarayi wadi aki Abrama kombota ndooko ɔna,+ koko nde aki la ose olimu w’ose Edjibito, lokombo lande Hangara.+ 2 Ko Sarayi akatɛ Abrama ate: “Lam’ele Jehowa kombetawɔ dia dimi mbota ana, lam’alangayɛ, eyana la ose olimu ami. Ondo dimi kokaka monga l’ana lo tshimbo yande.”+ Ɔnkɔnɛ Abrama aketawɔ kɛnɛ kakawotɛ Sarayi. 3 L’ɔkɔngɔ w’Abrama mbidjasɛ ɛnɔnyi 10 lo wodja wa Kanana, Sarayi wadi aki Abrama akɔshi Hangara, ose olimu ande wa womoto w’ose Edjibito, ko akawosha Abrama dia nde monga oko wadɛnde. 4 Nde akeyana la Hangara ko Hangara akatshu diemi. Lam’akeye Hangara dia nde aya la diemi, nde akatatɛ mɔnyɔla nkumɛnde.

5 Ko Sarayi akatɛ Abrama ate: “Lekɔ lo mɔnyɔma l’ɔtɛ ayɛ. Dimi mbakakosha ose olimu ami, ko kam’ambondeya dia nde aya la diemi, nde ambotatɛ mɔnyɔlami. Jehowa atosambole dimi la yɛ.” 6 Abrama akatɛ Sarayi ate: “Wɛ ekɔ la lowandji le ose olimu ayɛ. Salɛnde kɛnɛ tshɛ kafɔnyayɛ wate kekɔ dimɛna.” Ko Sarayi akawosha nsɔnyi. Ɔnkɔnɛ womoto akɔ akalawɔ.

7 L’ɔkɔngɔ diko, ondjelo wa Jehowa akatane womoto akɔ suke la ɛtɛkɔ kɛmɔtshi k’ashi l’oswe wa shɛnga, ɛtɛkɔ kele lo mboka k’otsha la Shura.+ 8 Nde akawombola ate: “Hangara ose olimu waki Sarayi, oma lende ayaye ndo otsha lende atayatshu?” Ko nde akakadimola ate: “Lekɔ lo talawɔ Sarayi ka nkumɛmi.” 9 Ondjelo wa Jehowa akawotɛ ate: “Kalola le nkumɛyɛ kele toyakitshakitsha la ntondo kande.” 10 Ko ondjelo wa Jehowa akate ate: “Dimi layofudia tokanula* tayɛ lo yɛdikɔ y’efula woho wele ndooko onto layokoka mbadia lofulo lawɔ.”+ 11 Ondjelo wa Jehowa akakotsha ate: “Wɛ ekɔ la diemi ndo wɛ ayota ɔna pami. Kowɔlɛ Ishimaɛlɛ,* nɛ dia Jehowa amboka delo dialelayɛ l’ɔtɛ w’asui ayɛ. 12 Nde ayonga onto lele oko mponda ka l’okonda.* Lonya lande layɔlɔsha anto tshɛ ndo anya w’anto tshɛ wayowɔlɔsha. Nde ayodjasɛ mbɛlanɛ l’anango tshɛ.”*

13 Ko nde akeelɛ* lokombo la Jehowa lakasawolaka la nde, ata ate: “Wɛ ekɔ Nzambi kɛna,”+ nɛ dia nde akate ate: “Onde dimi mɛtɛ lambenda ɔnɛ lamɛna?” 14 Diakɔ dielɛwɔ ɛtɛkɔ kakɔ ɔnɛ Bɛrɛ-Lahai-Rɔyi.* (Tɔ kekɔ lam’asa Kadɛshɛ la Bɛrɛdɛ.) 15 Ko Hangara akotɛ Abrama ɔna pami, ko Abrama akɔlɛ ɔnande lakote Hangara ɔnɛ Ishimaɛlɛ.+ 16 Abrama aki la ɛnɔnyi 86 etena kakawotɛ Hangara Ishimaɛlɛ.

17 Etena kaki Abrama la ɛnɔnyi 99, Jehowa akɛnama le nde ko akawotɛ ate: “Dimi kele Nzambi Kanga-Wolo-Tshɛ. Kɛndakɛnda lo yoho yosembwe la ntondo kami ndo ɛnya dia wɛ bu la onongo.* 2 Dimi layoshikikɛ sheke yami lam’asami la yɛ+ ndo layofudia tokanula tayɛ lo yɛdikɔ y’efula.”+

3 Ɔnkɔnɛ Abrama akayakɔsha ekukumadi, ko Nzambi akatetemala mbotɛ ate: 4 “Eenda, sheke yami yekekɔ le yɛ+ ndo lo mɛtɛ wɛ ayonga she wedja efula.+ 5 Lokombo layɛ laya bu nto Abrama,* koko laya Abrahama,* nɛ dia dimi layoketɛ she wedja efula. 6 Dimi layokofudia lo yɛdikɔ y’efula, layoketɛ wedja efula ndo nkumi ya dikanga efula yayotomba oma le yɛ.+

7 “Dimi layolama sheke yami yele lam’asami la yɛ+ ndo la tokanula* tayɛ lo nɔnga yawɔ tshɛ dikambo dia sheke ya pondjo, dia dimi monga Nzambi kayɛ ndo ka tokanula* tayɛ. 8 Dimi layokosha wɛ la tokanula* tayɛ nkɛtɛ yeyɛ ɔngɛndangɛnda,+ mbuta ate nkɛtɛ tshɛ ya Kanana dia yɔ monga yayɛ pondjo. Ko dimi layongaka Nzambi kawɔ.”+

9 Nzambi akatɛ Abrahama nto ate: “Wɛ pombaka ntetemala nama sheke yami wɛ la tokanula* tayɛ lo nɔnga yawɔ tshɛ. 10 Sheke yami nyɛ mbamomodja lam’asami la nyu, dia wɛ la tokanula* tayɛ ntetemala ndjilama: Pami tshɛ l’atei anyu pombaka minya mpota.+ 11 Nyu pombaka minya ɔpɔpɔ lo demba dia pami ndo dui sɔ diayonga oko djembetelo ya sheke yele lam’asami la nyu.+ 12 Lo nɔnga yanyu tshɛ, pami tshɛ l’atei anyu kambokotsha nshi 8 pombaka minya mpota,+ oyadi nde ekɔ ɔna ose ngelo kana ɔnɛ lele bu ɔnanyu* kana ɔnɛ lakanyasombe la falanga oma le ɔngɛndangɛnda. 13 Pami tshɛ kotɔ lo luudu layɛ ndo pami tshɛ kakayasombe la falanga pombaka minya mpota.+ Sheke yami yendana la demba dianyu pombaka ntshikala sheke ya pondjo. 14 Pami tshɛ kahatanya mpota kahatonya ɔpɔpɔ ande, onto* ɔsɔ pombaka minyɛma oma l’atei w’anto ande.* Nde ambɔnyɔla sheke yami.”

15 Ko Nzambi akatɛ Abrahama ate: “Telɛke wadɛyɛ Sarayi*+ nto wate Sarayi, nɛ dia lokombo lande laya Sara.* 16 Dimi layowɔtshɔkɔla, ndo layokosha ɔna pami lo tshimbo yande.+ Dimi layowɔtshɔkɔla, ko wedja efula wayotomba oma le nde ndo nkumi ya dikanga ya wedja yayotomba oma le nde.” 17 Ko Abrahama akayakɔsha ekukumadi ndo akatatɛ mbɔla, ata l’otema ande+ ate: “Onde pami kele la ɛnɔnyi 100 kokaka mbota ɔna? Onde Sara womoto lele la ɛnɔnyi 90 kokaka mbota ɔna?”+

18 Ko Abrahama akatɛ Nzambi ka mɛtɛ ate: “Ishimaɛlɛ ahomɔ lokolo l’ɔlɔ la ntondo kayɛ!”+ 19 Ko Nzambi akate ate: “Wadɛyɛ Sara ayokotɛ ɔna pami, kowɔlɛ Isaka.*+ Dimi layoshikikɛ sheke yami yele lam’asami la nde dia yɔ monga sheke ya pondjo le tokanula* tande.+ 20 Lo kɛnɛ kendana la Ishimaɛlɛ, dimi lambokooka. Layowɔtshɔkɔla, layowosha diwutshi ndo nde ayonga la tokanula efula ka mamba. Nde ayota ɛtɛ wa nkumbo 12 ndo dimi layowetɛ wodja wa woke.+ 21 Koko dimi layoshikikɛ sheke yami le Isaka,+ ɔna layokotɛ Sara ɔnɔnyi wayaye l’etena kɛnɛ.”+

22 Lam’akashidiya Nzambi nsawola la nde, nde akamɔ oma lale Abrahama. 23 Ko Abrahama akɔshi Ishimaɛlɛ w’ɔnande, apami tshɛ wakotɔ lo luudu lande ndo anto tshɛ wakandasombe la falanga, mbuta ate apami tshɛ waki lo luudu la Abrahama, ko nde akawanya ɛpɔpɔ ko lushi lakɔ, oko wakawotɛ Nzambi.+ 24 Abrahama aki la ɛnɔnyi 99 etena kakandanya ɔpɔpɔ.+ 25 Ɔnande Ishimaɛlɛ aki la ɛnɔnyi 13 etena kakandanya ɔpɔpɔ.+ 26 Lushi lakɔ laamɛ lakanya Abrahama mpota mbakanyɛma ndo Ishimaɛlɛ w’ɔnande mpota. 27 Apami tshɛ wa lo luudu lande, pami tshɛ kakotɔ lo luudu lande ndo pami tshɛ kakandasombe la falanga oma le ɔngɛndangɛnda akanyɛma mpota kaamɛ la nde.

18 L’ɔkɔngɔ diko, Jehowa*+ akɛnama le nde l’atei w’esongo wa weke wa la Mamarɛ+ lam’akandadjasɛ la soko dia luudu lande la dipɛma la yanyi ya tɛɛ. 2 Nde akende, ko akɛnyi apami 3 wemadi lo tshalola.+ Lam’akandawaɛnyi, nde akalawɔ dia tohomana la wɔ, ko nde akatokusama elungi polo la nkɛtɛ. 3 Ko nde akate ate: “Jehowa* le, lam’alangayɛ, naka lambohomɔ lokolo l’ɔlɔ la ntondo kayɛ, tolekanake okambi ayɛ. 4 Lam’alanganyu, nyokonge wanyela yema y’ashi kele wanyosole ekolo+ ko oma laasɔ, nyu ndjomuya yema l’ɛse k’osongo. 5 Lam’ele nyamboya laka okambi anyu, nyokonge nyela yangɔ ya ndɛ dia nyu nkondja wolo.* Oma laasɔ ko nyu ndjotetemala la lɔkɛndɔ lanyu.” Ko vɔ wakate vate: “Kawɔ, wɛ mbeyaka nsala oko watayɛ.”

6 Abrahama akasamanya otsha le Sara lo luudu la dipɛma ko akatowotɛ ate: “Sala yema esadi! Ɔsa tɛdikɔ* 3 t’ofushi wa dimɛna, sɔha, kele sala mapa.” 7 Oma laasɔ, Abrahama akalawɔ otsha lɛnɛ aki dongalonga diande, ko akatɔsɔna ɔsɔngɔ wa ngɔmbɛ wa dimɛna, akasha okambi ande, ko okambi ande akakatɛ ngɔmbɛ kakɔ esadi esadi. 8 Oma laasɔ nde akɔshi matɛka, abɛlɛ la ɔsɔngɔ wa ngɔmbɛ wakandakatɛ, ko akakitsha mbo ya ndɛ la ntondo kawɔ. Nde akemala suke la wɔ l’ɛse k’osongo etena kakawalɛka.+

9 Vɔ wakawombola vate: “Lende ele wadɛyɛ Sara?”+ Nde akakadimola ate: “Nde ɔnɛ ele lo luudu la dipɛma.” 10 Ko ɔmɔtshi l’atei awɔ akate ate: “Dimi layokalola le yɛ ɔnɔnyi wayaye l’etena kɛnɛ ndo wadɛyɛ Sara ayonga la ɔna pami.”+ Sara akahokamɛka la soko dia luudu la dipɛma laki l’ɔkɔngɔ wa pami kakɔ. 11 Laasɔ ko Abrahama nde la Sara wambotshunda, waya esombe wa lokosombe+ ndo Sara ambolekanya ɛnɔnyi wa mbota.+ 12 Ɔnkɔnɛ, Sara akatatɛ mbɔla l’otema, ata ate: “Onde dimi mɛtɛ layonga la diɛsɛ sɔ lam’ele lambotshunda ndo nkumɛmi aya osombe?”+ 13 Ko Jehowa akatɛ Abrahama ate: “Lande na kakɔdi Sara ndo kakandatshi ate: ‘Onde dimi mɛtɛ layota lam’ele laya osombe?’ 14 Onde ekɔ dikambo dimɔtshi diele Jehowa+ hakoke nsala? Dimi layokalola le yɛ ɔnɔnyi wayaye l’etena kɛnɛ ndo Sara ayonga la ɔna pami.” 15 Koko Sara akanguna, ata ate: “Dimi hambɔdi!” nɛ dia nde akoke wɔma. Ko nde akate ate: “Keema, wɛ akɔdi.”

16 Lam’akonɛ apami akɔ ndo lam’akawɛlɛ otsha la Sɔdɔma,+ Abrahama akaatshindɛ yema. 17 Jehowa akate ate: “Onde dimi layotetemala mbishɛ Abrahama kɛnɛ kalangami nsala?+ 18 Abrahama ayonga mɛtɛ wodja wa woke ndo wa wolo, ndo wedja tshɛ wa la nkɛtɛ wayɔtshɔkwama* lo tshimbo yande.+ 19 Nɛ dia dimi lamboweya dia nde kokaka mbidjangɛ anande la ase luudu lande l’ɔkɔngɔ ande dia vɔ nama mboka ya Jehowa lo nsala kɛnɛ kele ɔlɔlɔ ndo kosembwe,+ dia Jehowa nkotsha kɛnɛ kakandalake lo dikambo dia Abrahama.”

20 Oma laasɔ, Jehowa akate ate: “Ekoko wadawɔ lo dikambo dia Sɔdɔma la Ngɔmɔra wamboleka wolo+ ndo pɛkato yawɔ yamboleka efula.+ 21 Dimi layanga mpolɔ dia tenda kana vɔ wekɔ lo nsala akambo wɔtɔnɛ l’ekoko wambokoma polo le mi ɛsɔ. Ko naka aha ngasɔ, kete dimi layeya.”+

22 Apami akɔ wakonɛ oma lɛkɔ, ko wakatshu otsha la Sɔdɔma. Koko Jehowa+ akatshikala nde la Abrahama. 23 Oma laasɔ, Abrahama akasukana, ko akate ate: “Onde mɛtɛ wɛ ayolanya anto w’ɛlɔlɔ kaamɛ l’anto wa kɔlɔ?+ 24 Tɔshi dia osomba akɔ wekɔ l’anto w’ɛlɔlɔ 50. Onde wɛ ayolanya osomba ndo hatodimanyiya anto wa l’osomba akɔ l’ɔtɛ w’anto w’ɛlɔlɔ 50 wele lɛkɔ? 25 Haafɔnya dia wɛ koka nsala ngasɔ lo ndjaka anto w’ɛlɔlɔ kaamɛ l’anto wa kɔlɔ, dia kɛnɛ kakomɛ anto wa kɔlɔ nkomɛ ndo anto w’ɛlɔlɔ!+ Wɛ hasalaki ngasɔ pondjo.+ Onde Shushi ya nkɛtɛ k’otondo hatosala akambo la losembwe?”+ 26 Ko Jehowa akate ate: “Naka dimi ntana anto w’ɛlɔlɔ 50 l’osomba wa Sɔdɔma, kete dimi layodimanyiya osomba w’otondo l’ɔtɛ awɔ.” 27 Abrahama akate nto ate: “Lam’alangayɛ, dimi nte mbute Jehowa dui kaanga mbemi ditshu ndo otoko. 28 Tɔshi dia anto w’ɛlɔlɔ 5 wambomɔ oma l’atei wa anto 50, onde wɛ ayolanya osomba w’otondo l’ɔtɛ w’anto 5 asɔ?” Nde akawotɛ ate: “Dimi hantowolanya naka dimi ntana anto w’ɛlɔlɔ 45.”+

29 Ko Abrahama akawotɛ nto ate: “Tɔshi dia anto w’ɛlɔlɔ 40 mbele lɛkɔ.” Nde akakadimola ate: “Dimi hantowolanya l’ɔtɛ w’anto asɔ 40.” 30 Nde akakotsha ate: “Jehowa le, lam’alangayɛ tomalake,+ etawɔ dimi nyomɔtɛkɛta. Tɔshi dia anto w’ɛlɔlɔ 30 ato mbele lɛkɔ.” Nde akakadimola ate: “Dimi hantowolanya naka dimi ntana anto w’ɛlɔlɔ 30.” 31 Nde akate nto ate: “Jehowa le, lam’alangayɛ, etawɔ dimi nyomɔtɛkɛta. Tɔshi dia anto w’ɛlɔlɔ 20 ato mbele lɛkɔ.” Nde akakadimola ate: “Dimi hantowolanya l’ɔtɛ w’anto w’ɛlɔlɔ 20.” 32 L’ekomelo, nde akate ate: “Jehowa le, lam’alangayɛ tomalake. Etawɔ dimi ntɛkɛta mbala k’ekomelo. Tɔshi dia anto w’ɛlɔlɔ 10 ato mbele lɛkɔ.” Nde akakadimola ate: “Dimi hantowolanya l’ɔtɛ w’anto w’ɛlɔlɔ 10.” 33 Lam’akashidiya Jehowa nsawola l’Abrahama, nde akatshu,+ ko Abrahama akakalola lakande.

19 Andjelo akɔ 2 wakakome la Sɔdɔma la dikɔlɔ etena kakadjasɛ Lɔta la soko dia Sɔdɔma. Lam’akawaɛnyi Lɔta, nde akatshu taalongola, ko akatokusama elungi polo la nkɛtɛ.+ 2 Nde akate ate: “Nkumadiɔndjɔ, lam’alanganyu, nyoyete lo luudu l’okambi anyu kele nyotolale ndo watonyosole ekolo. Oma laasɔ, kanyemɔ la yosose dia ntetemala la lɔkɛndɔ lanyu.” Ko vɔ wakate vate: “Keema. Tayolala lo shinga.” 3 Koko nde akaleke mbasɛngasɛnga, ko vɔ wakatshu la nde lo luudu lande. Nde akaasalɛ dambo ndo akaakatɛ mapa waha la wodoya, ko vɔ wakale.

4 La ntondo ka vɔ ndala, apami wa l’osomba wa Sɔdɔma wakatshumana, ntatɛ oma le akɛnda polo ndo le esombe, ko vɔ tshɛ wakadinge luudu la Lɔta. 5 Vɔ wakelɛka Lɔta, wawotɛ vate: “Lende ele apami wakaye le yɛ la dikɔlɔ nɛ? Ototondjewɔ kele teyane la wɔ.”+

6 Ko Lɔta akatombe le wɔ la soko, ko akadihe lokuke. 7 Nde akawatɛ ate: “Analengo, lam’alanganyu, tanyosalake kɛnɛ kele kɔlɔ. 8 Dimi lekɔ l’ana wa wamato 2 wahateyanaka la pami. Lam’alanganyu, nyokonge nyotondjewɔ, kele nyosale la wɔ kɛnɛ tshɛ kalanganyu. Koko tanyosalɛke apami anɛ ndooko dikambo, nɛ dia vɔ wakaye ndjoyanga ekokelo* lo luudu lami.”+ 9 Ko vɔ wakate vate: “Mɔ lango mɛ!” Vɔ wakakotsha vate: “Wɛmɛ ɔngɛndangɛnda mbakayaye ndjodjasɛ lanɛ, ko wɛ tosombɔ tolombosha? Tayanga kosalɛ kɔlɔ ntondo. Oma laasɔ ko sho ndjaasalɛ kɔlɔ.” Ko vɔ wakasukumɔ otsha le Lɔta ndo wakootshindjiya dia ndanya lokuke. 10 Apami* akɔ wakatondja anya, ko wakɔtshiya Lɔta lo luudu ndo wakadihe lokuke. 11 Oma laasɔ, vɔ waketɛ apami waki la soko dia luudu totshungu, ntatɛ oma le ɔnɛ lakaleke dikɛnda polo le ɔnɛ lakaleke opalanga, ko vɔ wakahekɔ nyanga soko dia luudu.

12 Ko apami* akɔ wakatɛ Lɔta vate: “Onde wɛ ekɔ l’anto akina lanɛ? Naka wɛ ekɔ la akilo, ana w’apami, ana wa wamato ndo anto ayɛ tshɛ wele l’osomba, tondjawɔ oma lo dihole nɛ! 13 Nɛ dia tayanga ndanya dihole nɛ, lam’ele ekoko wada anto wa l’osomba wamboleka mbokɛma wolo le Jehowa,+ diakɔ diakatotomi Jehowa dia sho ndjolanya osomba.” 14 Ko Lɔta akatombe ndo akatotɛ akilo ande waki suke la ntshuka anande wa wamato la kiɔkɔmɛ tshɛ ate: “Nyosale esadi! Nyotombe oma lo dihole nɛ, nɛ dia Jehowa ayanga ndanya osomba!” Koko waomi w’anande wakɔsaka oko shɛkɛsɛkɛ mbasalande.+

15 Lam’akayafuwɔka wonya, andjelo wakatshutshuya Lɔta dia nsala esadi, wawotɛ vate: “Sala esadi! Ɔsa wadɛyɛ la anayɛ 2 wele lanɛ kaamɛ la yɛ, diaha nyu ndjolanyema l’ɔtɛ wa kɔlɔ k’osomba!”+ 16 Lam’ele nde akatshimbatshimbaka, apami asɔ wakookimɛ lo lonya nde la wadɛnde la anande 2 l’ɔtɛ wa kɛtshi kakawoke Jehowa,+ ko wakaatondja l’andja w’osomba.+ 17 Kam’akawaatondja l’andja w’osomba, ɔmɔtshi l’atei awɔ akate ate: “Nyolawɔ dia nyu nshimbɛ nsɛnɔ* yanyu! Tanyɛwɔke l’ɔkɔngɔ+ ndo tanyemalake lo distrikɛ*+ nɛ di’otondo. Nyolawɔ lo lɛkɛ l’akona diaha nyu ndanyema!”

18 Ko Lɔta akawatɛ ate: “Jehowa le, lam’alangayɛ, aha lɛsɔ! 19 Lam’alangayɛ, lam’ele okambi ayɛ ambohomɔ lokolo l’ɔlɔ lo washo ayɛ ndo wɛ ekɔ la ɔlɔlɔ w’otema* efula le mi lo woho wamboyontshika* la lɔsɛnɔ,+ dimi halakoke ndawɔ otsha lo lɛkɛ l’akona, nɛ dia lekɔ lo mboka wɔma wa mpokoso tokomɛ lɛkɔ, ko dimi tovɔ.+ 20 Shombasomba mɔtshi yekɔ suke lanɛ ndo dimi kokaka ndawɔ lɛkɔ. Lam’alangayɛ, onde dimi kokaka toyashɛ lɛkɔ? Yɔ yekɔ tsho hiole ya tshitshɛ. Ko dimi layoshimbamɛ.”* 21 Ko nde akawotɛ ate: “Dimɛna efula. Dimi layokookɛ+ ndo hantolanya shombasomba yotshiyɛ.+ 22 Samanya otsha lɛkɔ, nɛ dia hantosala ndooko dikambo naka wɛ atakome lɛkɔ!”+ Ko nde akɔlɛ shombasomba yakɔ ɔnɛ Zɔara.*+

23 Etena kakakome Lɔta la Zɔara ko yanyi yambowalɛ l’ɛtshi kakɔ ka nkɛtɛ. 24 Ko Jehowa akalɔsha mvula ka mbɔkɔ yahɛta ndo dja la Sɔdɔma ndo la Ngɔmɔra. Yɔ yakaholɔka oma le Jehowa, oma l’olongo.+ 25 Nde akalanya esomba ɛsɔ, mbuta ate distrikɛ di’otondo, anto tshɛ wa l’esomba akɔ ndo esongo wa la nkɛtɛ.+ 26 Koko wadi aki Lɔta laki l’ɔkɔngɔ ande akɛwɔ l’ɔkɔngɔ, ko nde akahilɔ ekundji ka lɛɛhɔ.+

27 Ko Abrahama aketɔ la pindju ka pɛɛ ndo akatshu lo dihole diakandemala la ntondo ka Jehowa.+ 28 Lam’akandaholoya washo otsha lo lɛkɛ la Sɔdɔma, Ngɔmɔra ndo ɛtshi ka nkɛtɛ tshɛ ka distrikɛ diakɔ, nde akɛnyi kɛnɛ kakasalema. Edinga w’efula wakadɛka oma l’ɛtshi kakɔ ka nkɛtɛ oko edinga w’efula w’oma lo nkuka ka dja.+ 29 Ɔnkɔnɛ, lam’akalanya Nzambi esomba wa lo distrikɛ sɔ, nde akohɔ Abrahama lo woho wakandatondja Lɔta oma l’esomba wakandalanya, esomba wa lɛnɛ akadjasɛka Lɔta.+

30 L’ɔkɔngɔ diko, Lɔta akamɔ oma la Zɔara nde la anande 2 wa wamato, ko akatodjasɛ lo lɛkɛ l’akona,+ nɛ dia nde akoke wɔma mbidjasɛ la Zɔara.+ Diakɔ diakandatodjasɛ lo wooko wa dive nde la anande 2 wa wamato. 31 Ko ɔna l’enondo akatɛ kosɛnde ate: “Shɛso aya osombe ndo ndooko pami kakoka mbeyana la so lo ɛtshi ka nkɛtɛ kɛnɛ oko wasala anto wa lo nkɛtɛ k’otondo. 32 Yaka tɔnɔsha shɛso wanu kele teyane la nde dia sho nkokɛ dioho dia shɛso.”

33 Ɔnkɔnɛ vɔ wakanɔsha shɛwɔ wanu efula l’otsho ɔsɔ, ko ɔna l’enondo akɔtɔ ndo akeyana la she, koko she kombeya wonya wakandeyana la nde ndo wonya wakandetɔ. 34 La wedi a pindju, ɔna l’enondo akatɛ kosɛnde ate: “Dimi lakashidi mbeyana la papa l’otsho w’ɛlɔ. Yaka tɔɔnɔsha wanu nto la dikɔlɔ di’ɛlɔ kele wɛ kɔtɔ, keyane la nde dia sho nkokɛ dioho dia shɛso.” 35 Ɔnkɔnɛ, vɔ wakanyomɔnɔsha shɛwɔ wanu efula l’otsho ɔsɔ, ko ɔna la kose akɔtɔ ndo akeyana la nde, koko she kombeya wonya wakandeyana la nde ndo wonya wakandetɔ. 36 Ɔnkɔnɛ, ana akɔ 2 waki Lɔta wakatshu waemi vɔ la shɛwɔ. 37 Ɔna l’enondo akote ɔna pami, ko akawɔlɛ Mɔaba.*+ Nde kele lɔtshɛtshɛ l’ase Mɔaba wa nshi nyɛ.+ 38 Ɔna la kose nde lawɔ akote ɔna pami, ko akawɔlɛ Bɛnɛ-Ami.* Nde kele lɔtshɛtshɛ l’ase Amɔna+ wa nshi nyɛ.

20 Abrahama akonɔ+ otsha lo wodja wa Nɛngɛbɛ ndo akatodjasɛ lam’asa Kadɛshɛ+ la Shura.+ Etena kakandadjasɛka* la Ngɛrara,+ 2 Abrahama akate nto lo dikambo dia wadɛnde Sara ate: “Nde ekɔ kadiyɛmi.”+ Ko Abimɛlɛkɛ* nkumekanga ka Ngɛrara akatome dui dia vɔ towɔsɛ Sara.+ 3 Oma laasɔ, Nzambi akɛnama le Abimɛlɛkɛ lo dɔ l’otsho, ko akawotɛ ate: “Wɛ ekɔ oko onto lambovɔ l’ɔtɛ wa womoto lakawakela,+ dikambo nde ekɔ womoto lotshukami ndo wadi a kana.”+ 4 Koko, Abimɛlɛkɛ kombeyana la nde. Ko Abimɛlɛkɛ akate ate: “Jehowa le, wate ndjake wodja wele bu la onongo?* 5 Shi nde mbakambutɛ ate: ‘Nde ekɔ kadiyɛmi,’ ko Sara lawɔ ndjokotsha ate: ‘Nde ekɔ ɔnalengo’? Dimi lakasale dui sɔ la otema wosembwe ndo la anya waha la onongo.” 6 Ko Nzambi ka mɛtɛ akawotɛ lo dɔ ate: “Dimi mbeyaka dia wɛ akasale dui sɔ la nkum’otema ka pudipudi, diakɔ diakamakoshimbe mbeyana la nde, diaha wɛ salɛmi pɛkato. 7 Kakianɛ, kaloya wadi a kana, nɛ dia omɛnde ekɔ omvutshi,+ ko nde ayɔlɔmba lo dikambo diayɛ+ ndo wɛ ayotshikala la lɔsɛnɔ. Ko naka wɛ hawokaloyisha, eya dia ndooko onyake wɛ ayovɔ wɛ l’anto ayɛ tshɛ.”

8 Abimɛlɛkɛ aketɔ la pindju ka pɛɛ ko akasanganya ekambi ande tshɛ ndo akawatɛ akambo asɔ tshɛ, ko vɔ wakoke wɔma efula. 9 Ko Abimɛlɛkɛ akelɛ Abrahama ndo akawombola ate: “Lande na kamboyotosalɛ nganɛ? Pɛkato kakɔna kamomokosalɛ dia wɛ mbelami dimi la diolelo diami pɛkato ka woke nganɛ? Kɛnɛ kamboyosalɛ bu dimɛna.” 10 Abimɛlɛkɛ akambola Abrahama nto ate: “Kanyi yakɔna yaki la yɛ lam’akayasale dikambo nɛ?”+ 11 Ko Abrahama akate ate: “Dimi lakafɔnya nte: ‘Anto anɛ hawoke Nzambi wɔma ndo wayondjaka l’ɔtɛ wa wadɛmi.’+ 12 Laadiko dia laasɔ, nde ekɔ mɛtɛ kadiyɛmi. Dimi la nde shɛso ɔtɔi, koko sho ntshikitana anyangɛso ko dimi lakayootshuka.+ 13 Lam’akambutɛ Nzambi dia dimi mimɔ oma lo luudu la papa+ ko ntatɛ mbekekɔ, dimi lakatɛ Sara nte: ‘Naka wɛ ekɔ la ngandji ka kɔlamelo le mi, dihole tshɛ diayototatshɔka, kotataka lo dikambo diami wate: “Nde ekɔ ɔnalengo.”’”+

14 Oma laasɔ, Abimɛlɛkɛ akɔshi ɛkɔkɔ, ngɔmbɛ, ekambi w’apami la wa wamato, ko akasha Abrahama ndo akookaloya Sara ka wadɛnde. 15 Abimɛlɛkɛ akate nto ate: “Nkɛtɛ yami nyɛ tshɛ yekɔ yakiyɛ. Djasɛ dihole tshɛ dialangayɛ.” 16 Nde akatɛ Sara ate: “Dimi lambosha ɔnanyɔ+ ekenga kinunu (1 000) wa mfɛsa. Ɔsɔ ekɔ djembetelo yɛnya anto tshɛ wele la yɛ ndo anto akina tshɛ dia wɛ bu la onongo ndo lambonya nsɔnyi kakamakosha.” 17 Ko Abrahama akalɔmbɛ Nzambi ka mɛtɛ. Ɔnkɔnɛ, Nzambi akakɔnɔla Abimɛlɛkɛ nde la wadɛnde l’ekambi ande wa wamato, ko vɔ wakatatɛ mbota ana, 18 dikambo Jehowa aketɛ wamato tshɛ wa lo luudu laki Abimɛlɛkɛ dikomba* l’ɔtɛ wa Sara wadi aki Abrahama.+

21 Jehowa akohɔ Sara oko wakandate, ko Jehowa akasalɛ Sara kɛnɛ kakandoolake.+ 2 Ɔnkɔnɛ, Sara akatshu diemi+ ko akote la Abrahama ɔna pami lo nshi yande y’osombe l’etena kakoolake Nzambi.+ 3 Ko Abrahama akɔlɛ ɔna lakandote la Sara ɔnɛ Isaka.+ 4 Abrahama akanya Isaka w’ɔnande mpota lam’akandakotsha nshi 8, oko wakawodjangɛ Nzambi.+ 5 Abrahama aki l’ɛnɔnyi 100 etena kakotɔ ɔnande Isaka. 6 Ko Sara akate ate: “Nzambi ambombisha tɔɔla, nɛ dia onto tshɛ layokaka dikambo nɛ ayɔlaka kaamɛ la mi.”* 7 Nde akakotsha ate: “Onto akɔna akakoke mbutɛ Abrahama ate: ‘Sara ayɔlɔnya ɔna’? Koko dimi lambota la nde ɔna pami lo nshi yande y’osombe.”

8 Oma laasɔ, Isaka akole ndo wakookidia awɛlɛ, ko Abrahama akasale fɛtɛ ka woke lushi lakawakidia Isaka awɛlɛ. 9 Koko Sara akɛnaka dia ɔnaki Hangara+ ose Edjibito lakandote la Abrahama akasɔkaka Isaka.+ 10 Ko nde akatɛ Abrahama ate: “Tshanya ose olimu wa womoto ɔnɛ la ɔnande, nɛ dia ɔnande hatonga okitɔ kaamɛ la Isaka+ w’ɔnami!” 11 Koko kɛnɛ kakandate lo dikambo dia ɔnande kakanyangiya Abrahama+ efula. 12 Ko Nzambi akatɛ Abrahama ate: “Tonyangake l’ɔtɛ wa kɛnɛ kakotɛ Sara lo dikambo dia ɔna ndo di’okambi ayɛ wa womoto. Okɛnde,* nɛ dia ɔnɛ layelamɛ kanula* yayɛ ayotomba oma le Isaka.+ 13 Lo dikambo dia ɔnaki okambi ayɛ wa womoto,+ dimi layotondja nto wodja w’otondo oma le nde,+ nɛ dia nde ekɔ ɔnayɛ.”*

14 Abrahama aketɔ la pindju ka pɛɛ, akɔshi mapa ndo ɔlɔndɔ w’ashi w’ekoho, ko akasha Hangara. Nde akawahɛ diangɔ sɔ l’ahɛka, ko akɔɔkɛndja nde la ɔna.+ Ɔnkɔnɛ Hangara akatshu, ko akatekekɔka l’oswe wa la Bɛrɛ-Shɛba.+ 15 L’ekomelo, ashi waki l’ɔlɔndɔ w’ekoho wakashile, ko nde akakitsha ɔna l’ɛse ka dikombokombo. 16 Nde akatshu yema lo tshalola* ndo akatodjasɛ la nkɛtɛ, ata ate: “Haakoke mɛna woho wavɔ ɔnami.” Ɔnkɔnɛ, nde akadjasɛ lo tshalola ko akatatɛ mbida ekoko wa wolo ndo akalele.

17 Nzambi akoke delo dia ɔna,+ ko ondjelo wa Nzambi akelɛ Hangara oma l’olongo ndo akawotɛ ate:+ “Hangara, lande na kalelayɛ? Tokake wɔma, nɛ dia Nzambi amboka delo dia ɔna lɛnɛ eende. 18 Emala, etola ɔna ndo kimɛnde la lonya layɛ, nɛ dia dimi layowetɛ wodja wa woke.”+ 19 Oma laasɔ, Nzambi akadihola washo ande, ko nde akɛnyi ɛtɛkɔ k’ashi. Nde akatshu lɛkɔ, akatolodia ashi l’ɔlɔndɔ w’ekoho, ko nde akayɔnɔsha ɔna. 20 Nzambi aki kaamɛ la ɔnakɔ+ etena kakandatolaka. Nde akadjasɛka l’oswe ndo akayonga omboki w’ota. 21 Nde akatodjasɛ l’oswe wa Parana,+ ko nyango akootshukɛ wadi oma lo wodja w’Edjibito.

22 L’etena kɛsɔ, Abimɛlɛkɛ nde la Fikɔlɛ owandji w’asɔlayi ande wakatɛ Abrahama vate: “Tambɛna dia Nzambi ekɔ kaamɛ la yɛ lo akambo tshɛ wasalayɛ.+ 23 Ɔnkɔnɛ, tshiba lo lokombo la Nzambi dia wɛ hatonsalɛ dimi l’anami la tokanula tami kɔlɔ ndo dia wɛ ayotoka ngandji ka kɔlamelo dimi l’anto wa lo nkɛtɛ yadjasɛyɛ oko wakamakoke ngandji ka kɔlamelo.”+ 24 Ko Abrahama akate ate: “Lambotshiba.”

25 Koko Abrahama akɛnya Abimɛlɛkɛ lonyangu lande lo dikambo dia ɛtɛkɔ k’ashi kakɔɔhɔtɔla ekambi waki Abimɛlɛkɛ la wolo.+ 26 Ko Abimɛlɛkɛ akakadimola ate: “Dimi haleye onto lakasale dikambo sɔ. Wɛ kombutɛmi ndooko dui lo dikambo sɔ ndo ndooko onto lambɔnkɔndɔlɛdiɔ polo ndo ɛlɔ.” 27 Ɔnkɔnɛ Abrahama akɔshi ɛkɔkɔ la ngɔmbɛ, akasha Abimɛlɛkɛ, ko vɔ akɔ 2 wakadje sheke. 28 Lam’akanya Abrahama ɛkɔkɔ w’ana 7 wa wadi ko nde mbakitsha dihole dikina, 29 Abimɛlɛkɛ akambola Abrahama ate: “Lande na kamboyokitsha ɛkɔkɔ w’ana 7 wa wadi vɔamɛ lanɛ?” 30 Ko nde akate ate: “Etawɔ mbɔsa ɛkɔkɔ w’ana 7 wa wadi ɛnɛ wakoshami oko djembetelo yɛnya dia dimi mbakatshime ɛtɛkɔ kɛnɛ.” 31 Diakɔ diakandɔlɛ dihole sɔ ɔnɛ Bɛrɛ-Shɛba,*+ nɛ dia lɛkɔ mbakawatshibe vɔ akɔ 2. 32 Ɔnkɔnɛ, vɔ wakadje sheke+ la Bɛrɛ-Shɛba, ko Abimɛlɛkɛ nde la Fikɔlɛ owandji w’asɔlayi ande wakemala ndo wakakalola la Filistiya.+ 33 Oma laasɔ, nde akonɛ osongo wa tamarisɛ la Bɛrɛ-Shɛba, ko nde akatɛndɛka lokombo la Jehowa+ Nzambi ka pondjo+ laawɔ. 34 Abrahama akadjasɛ* edja efula* lo wodja wa Filistiya.+

22 L’ɔkɔngɔ w’akambo asɔ, Nzambi ka mɛtɛ akalange menda+ mbetawɔ kaki la Abrahama. Ɔnkɔnɛ nde akawelɛ ate: “Abrahama!” Ko Abrahama aketawɔ ate: “Dimi ɔnɛ!” 2 Nde akawotɛ ate: “Lam’alangayɛ, ɔsa ɔnayɛ, tshɔi y’ɔnayɛ yalangayɛ,+ mbuta ate Isaka,+ tshɔka la nde lo nkɛtɛ ya Mɔriya+ kele towolambole olambo wa lotshumba lo dikona dia lɛkɔ diayomokɛnya.”

3 Ko Abrahama aketɔ la pindju ka pɛɛ, akakitsha edee lo mponda kande ndo akɔshi ekambi ande 2 kaamɛ la Isaka w’ɔnande. Nde akaate nkunyi ya tolambola olambo wa lotshumba, ko nde akonɛɛ otsha lɛnɛ akawotɛ Nzambi ka mɛtɛ. 4 Lushi la 3, Abrahama akɛnyi dihole diakɔ lo tshalola, 5 ko nde akatɛ ekambi ande ate: “Nyonkonge la mponda lanɛ, dimi layanga mbidɛ la ɔna polo lengo dia tɔtɛmɔla, ko sho nkalola ndjonyokola.”

6 Ko Abrahama akɛndja ɔnande Isaka nkunyi ya tolambola olambo wa lotshumba. Oma laasɔ, nde akakimɛ dja la lokuwa* lo anya ande, ko vɔ 2 wakatshu. 7 Ko Isaka akelɛ Abrahama wa she ate: “Ipa!” Nde aketawɔ ate: “Ee, ɔnami!” Isaka akawotɛ ate: “Dja la nkunyi yɔ nyɛ. Ko lende ele ɔkɔkɔ wayangaso tolambola olambo wa lotshumba?” 8 Abrahama akate ate: “Nzambi ndamɛ ayotosha ɔkɔkɔ wa nambola,+ ɔnami.” Ko vɔ akɔ 2 wakatetemala la lɔkɛndɔ.

9 L’ekomelo, vɔ wakakome lo dihole diakawɛnya Nzambi ka mɛtɛ, ko Abrahama akasale elambwelo ndo akalɔngɛ nkunyi laawɔ. Nde akakeleka ɔnande Isaka ɛkɔdi l’anya ndo l’ekolo, ko akookitsha laadiko dia nkunyi lo elambwelo.+ 10 Oma laasɔ, Abrahama akasembola lonya lande, ko akɔshi lokuwa* dia ndjaka ɔnande.+ 11 Koko ondjelo wa Jehowa akawelɛ oma l’olongo ate: “Abrahama, Abrahama!” Ko nde aketawɔ ate: “Nkumadiɔndjɔ, dimi ɔnɛ!” 12 Nde akawotɛ ate: “Todiakake ɔna ndo toosalɛke kɔlɔ, nɛ dia lamboshila mɛna dia wɛ mbokaka Nzambi wɔma, dikambo wɛ hanyimi tshɔi yayɛ y’ɔna.”+ 13 Ko Abrahama akanyɔ, ɛnyinde ko ɔkɔkɔ wokakate nseke yawɔ lo dikombokombo yema suke la nde. Ko Abrahama akatowɔsa, akoolambola olambo wa lotshumba lo dihole di’ɔnande. 14 Abrahama akɔlɛ dihole sɔ ɔnɛ: Jehowa-Jire.* Diakɔ diatawɔ polo ndo nshi nyɛ ɔnɛ: “Jehowa ayokotsha kɛnɛ kahombama lo dikona diande.”+

15 Ko ondjelo wa Jehowa akelɛ Abrahama mbala ka 2 oma l’olongo, 16 ata ate: “Jehowa+ kata ate: ‘Lambotshiba lo lokombo lami dimɛ nte: Lam’ele wɛ ambosala dikambo nɛ ndo wɛ hanyimi tshɔi yayɛ y’ɔna,+ 17 dimi layokɔtshɔkɔla, layofudia tokanula* tayɛ oko tɔɔtɔ ta l’olongo ndo oko nsɛkɛ ya lɔkɔngɔ la l’omamu wa ndjale.+ Kanula* yayɛ ayɔhɔtɔla atunyi ande osomba.*+ 18 Ndo nto, wedja tshɛ wa la nkɛtɛ wayoyakondjɛ ɔtshɔkɔ lo tshimbo ya kanula*+ yayɛ, nɛ dia wɛ ambokitanyiya dui diami.’”+

19 Oma laasɔ, Abrahama akakalola otsha le ekambi ande, ko vɔ akɔ tshɛ wakakalola otsha la Bɛrɛ-Shɛba.+ Abrahama akatetemala mbidjasɛ la Bɛrɛ-Shɛba.

20 L’ɔkɔngɔ w’akambo asɔ, wakayotɛ Abrahama ɔnɛ: “Milika wadi aki Nahɔra ɔnanyɔ aya l’ana w’apami anɛ:+ 21 Uzɛ kele enondo, oma laasɔ ko Buza, Kɛmuɛlɛ she Arama, 22 Kɛsɛdɛ, Hazo, Pelidashɛ, Jidilafɛ ndo Bɛtuɛlɛ.”+ 23 Bɛtuɛlɛ akote Rɛbɛka.+ Milika wadi aki Nahɔra ɔnango Abrahama mbakote ana 8 asɔ. 24 Reuma oseka ande nde lawɔ akote ana w’apami anɛ: Teba, Ngahama, Tahasha ndo Maaka.

23 Sara akasɛnɛ ɛnɔnyi 127. Ɔsɔ kele ɛnɔnyi wa lɔsɛnɔ laki Sara.+ 2 Sara akavu la Kiriatɛ-Arba,+ mbuta ate la Hɛbɛrɔna,+ lo wodja wa Kanana,+ ko Abrahama akatatɛ monga lo otanda ndo ndela Sara. 3 Ɔnkɔnɛ, Abrahama akamɔ oma lale odo wa wadɛnde, ko akatotɛ ana wa Hiti+ ate: 4 “Ɔngɛndangɛnda mbodjashimi l’atei anyu.+ Lam’alanganyu, nyombisha yɛtshi ya nkɛtɛ ya dimi kundɛka anto l’atei anyu kele kundɛ wadɛmi.” 5 Ko ana wa Hiti wakakadimola Abrahama vate: 6 “Nkumɛmi le, otohokame. Ɔnɛnɛ wa Nzambi* keyɛ l’atei aso.+ Wɛ mbeyaka nkundɛ wadɛyɛ lo dihole dioleki dimɛna lo waombo aso. Ndooko onto l’atei aso layokoshimba dia wɛ nkundɛ wadɛyɛ.”

7 Ɔnkɔnɛ Abrahama akemala, akakusama la ntondo k’ase ngelo, mbuta ate ana wa Hiti,+ 8 ndo akawatɛ ate: “Naka nyu* mbetawɔka dia dimi nkundɛ wadɛmi, kete nyompokame ndo nyɔnɔmbɛɛ Efɛrɔna ɔna Zɔhara 9 dia nde sondjami wooko ande wa la Makɛpela wele lo koma y’ekambɔ kande. Nde ansondjawɔ lo washo anyu l’oshinga tshɛ wayondolanga+ dia dimi monga l’ɛtshi ka nkɛtɛ ka kundɛka anto.”+

10 L’etena kɛsɔ, Efɛrɔna akadjasɛka kaamɛ l’ana wa Hiti. Ko Efɛrɔna ose Hiti akakadimola Abrahama lo washo w’ana wa Hiti, mbuta ate wanɛ tshɛ wakɔtɔka la soko di’osomba+ ate: 11 “Aha ngasɔ nkumɛmi, ompokame yema! Dimi lambokosha ekambɔ kaamɛ la wooko wele lɔkɔ. Dimi lambokoshatɔ lo washo w’ase ngelo kami, kele kundɛ wadɛyɛ.” 12 Ko Abrahama akakusama la ntondo k’ase ngelo 13 ndo akatɛ Efɛrɔna la ntondo kawɔ ate: “Ompokame lam’alangayɛ! Dimi layokosha falanga tshɛ yendana l’ekambɔ. Etawɔ ndjilongola dia dimi nkundɛ wadɛmi lɔkɔ.”

14 Ɔnkɔnɛ Efɛrɔna akakadimola Abrahama ate: 15 “Ompokame yema, nkumɛmi! Oshinga w’ekambɔ kɛnɛ ele tɔshɛkɛlɛ* 400 ta mfɛsa. Koko falanga shɔ bu ohomba le mi. Kundɛ wadɛyɛ.” 16 Abrahama aketawɔ kɛnɛ kakate Efɛrɔna, ko nde akawɛdikɛ tɔshɛkɛlɛ* 400 ta mfɛsa, oshinga wakandate la ntondo k’ana wa Hiti lo ndjela yɛdikɔ yakakambaka l’amundji w’okanda.+ 17 Ko ekambɔ kaki Efɛrɔna ka la Makɛpela kakɛlanɛ la Mamarɛ, mbuta ate ekambɔ, wooko ndo esongo tshɛ waki lɔkɔ wakatatɛ mbeyama 18 le ana wa Hiti ndo le wanɛ tshɛ wakɔtɔka la soko di’osomba oko ekambɔ kaki Abrahama. 19 L’ɔkɔngɔ diko, Abrahama akakundɛ wadɛnde Sara lo wooko wa l’ekambɔ ka la Makɛpela kakɛlanɛ la Mamarɛ, mbuta ate ekambɔ ka la Hɛbɛrɔna, lo wodja wa Kanana. 20 Ko ana wa Hiti wakasha Abrahama ekambɔ kaamɛ la wooko waki lɔkɔ oko ɛtshi ka nkɛtɛ ka nde kundɛka anto.+

24 L’etena kɛsɔ ko Abrahama aya osombe wa lokosombe ndo Jehowa akatshɔkɔla Abrahama lo akambo tshɛ.+ 2 Ko Abrahama akatɛ okambi ande wakaleke opalanga lo luudu lande ndo wakalamaka kɛnɛ tshɛ kaki la nde ate:+ “Lam’alangayɛ, kitsha lonya layɛ l’ɛse k’ɛhɛlɔhɛlɔ kami, 3 kele kotshibia lo lokombo la Jehowa Nzambi k’olongo ndo Nzambi ka nkɛtɛ dia wɛ hatɔsɛ ɔnami wadi oma l’atei w’ana wa wamato w’ase Kanana wele lo nkɛtɛ yodjashimi.+ 4 Koko, wɛ pombaka ntshɔ lo wodja ami ndo le ewotɔ ami+ kele tɔsɛɛ ɔnami Isaka wadi.”

5 Ko okambi ande akawombola ate: “Ayomosala naka womoto akɔ halangi ndja la mi lendo? Onde dimi pombaka nkaloya ɔnayɛ lo wodja ayɛ?”+ 6 Ko Abrahama akookadimola ate: “Sala tshɛ diaha wɛ nkaloya ɔnami lɛkɔ.+ 7 Jehowa Nzambi ka l’olongo lakambɔshi oma lo luudu la papa ndo oma lo wodja w’ewotɔ ami,+ lakasawola la mi ndo lakantshibɛ ate:+ ‘Dimi layosha tokanula*+ tayɛ ɛtshi ka nkɛtɛ kɛnɛ,’+ ayotoma ondjelo ande la ntondo kayɛ,+ ndo ndooko onyake wɛ ayotɔsɛ ɔnami wadi oma lɛkɔ.+ 8 Ko naka womoto akɔ halangi ndja la yɛ, wɛ hatonga la onongo l’ɔtɛ wa etshibelo kɛnɛ. Dikambo ɔtɔi, tokaloyake ɔnami lɛkɔ.” 9 Ko okambi akɔ akakitsha lonya lande l’ɛse k’ɛhɛlɔhɛlɔ ka Abrahama nkumɛnde ndo akootshibɛ lo dikambo sɔ.+

10 Ɔnkɔnɛ, okambi akɔ akɔshi kamɛlɔ 10 ya nkumɛnde ko akatshu. Nde akatshu otsha lo wodja wa Mezɔpɔtamiya l’osomba wa Nahɔra kaamɛ la weho tshɛ wa diangɔ dia nɛmɔ diakawosha nkumɛnde. 11 Lam’akandakome suke la ɛtɛkɔ k’ashi kaki l’andja w’osomba, nde akemala dia kamɛlɔ momuya yema. Aki oya lo dikɔlɔ, wonya wakayaka wamato dia ndjotahola ashi. 12 Ko nde akate ate: “Jehowa Nzambi ka nkumɛmi Abrahama le, lam’alangayɛ, ɔntshɔkɔlɛ ɛlɔ ndo ɛnya nkumɛmi Abrahama ngandji kayɛ ka kɔlamelo. 13 Dimi ɔnɛ ambemala suke la ɛtɛkɔ k’ashi ndo ana wa wamato wa l’osomba ɔnɛ wayanga ndja ndjotahola ashi. 14 Dimi kombolaka dia osekaseka wayomotɛ nte: ‘Lam’alangayɛ, holoya mbaka kayɛ kele nnɔ yema y’ashi,’ ko nde nkadimola ate: ‘Ɔsa nɔka ndo layanga mbisha ndo kamɛlɔ yayɛ,’ onge ɔnɛ lamboyɔsɔnɛ okambi ayɛ Isaka ndo ɔsɔ ayonga djembetelo yayombetawoya dia wɛ ambɛnya nkumɛmi ngandji kayɛ ka kɔlamelo.”

15 La ntondo ka nde nshidiya ntɛkɛta, ɛnyinde ko Rɛbɛka ɔna Bɛtuɛlɛ+ ayɛmbɛ mbaka lo dihɛka dia ndjotahola ashi. Bɛtuɛlɛ aki ɔna Nahɔra+ ɔnango Abrahama lakandote la Milika.+ 16 Osekaseka akɔ aki olangala efula, eke emuma ndo ateyanaka la pami. Nde akaholɔ l’ashi, akatotahola ashi lo mbaka ko akakalola. 17 Ko okambi w’Abrahama akalawɔ dia tohomana la nde ndo akawotɛ ate: “Lam’alangayɛ, ombisha yema y’ashi wa nnɔ oma lo mbaka kayɛ.” 18 Nde akakadimola ate: “Kawɔ, nkumɛmi.” Aha la ntshimbatshimba, nde akaholoya mbaka ndo akawosha ashi wa nnɔ. 19 Lam’akandashidiya mbosha ashi wa nnɔ, nde akawotɛ ate: “Layanga totahola ndo ashi wa kamɛlɔ yayɛ nnɔ polo ndo yɔ yambondoya mposa.” 20 Ɔnkɔnɛ, aha la ntshimbatshimba nde akaangola ashi lo ɛngɔ katɔnɔka nyama ashi, ko nde akalawɔ mbala ko mbala lo ɛtɛkɔ dia totahola ashi ndo nde akatahola ashi wa kamɛlɔ yakɔ tshɛ nnɔ. 21 L’etena kɛsɔ tshɛ, okambi akɔ akatshikala ki, aamba ndo ayambola dia kana Jehowa ambɔtshɔkɔla lɔkɛndɔ lande kana bu.

22 Lam’akashidiya kamɛlɔ nnɔ ashi, okambi akɔ akawosha zama dia paonyi dialɔtawɔ l’ɔhɛmbɛ diaki la wotsho wa k’ahende ɔtɔi ka shɛkɛlɛ* ndo ɛkɔma 2 wa paonyi waki la wotsho wa tɔshɛkɛlɛ* 10, 23 ko akate ate: “Lam’alangayɛ, dimi nte kombole: Wɛ ɔna aki na? Onde sho kokaka ntana dihole dia ndala lo luudu la shɔ?” 24 Ko osekaseka akɔ akawotɛ ate: “Dimi ɔna aki Bɛtuɛlɛ+ ɔna Nahɔra+ lakandote la Milika.” 25 Nde akakotsha ate: “Tekɔ la dihole dia nyama ndala ndo adiyo efula wa yɔ ndɛ. Tekɔ ndo la dihole dia nyu ndala.” 26 Ko okambi akɔ akake adwe, akakusama la ntondo ka Jehowa 27 ndo akate ate: “Jehowa Nzambi ka nkumɛmi Abrahama atombɔme, nɛ dia nde ambotetemala mɛnya nkumɛmi ngandji kande ka kɔlamelo ndo kɔlamelo yande. Jehowa ambɔnɔmbɔla lo luudu la anango nkumɛmi.”

28 Ko osekaseka akɔ akalawɔ dia totɛ ase luudu laki nyango akambo asɔ. 29 Rɛbɛka aki la ɔnango ɔmɔtshi, lokombo lande Labana.+ Ko Labana akalawɔ otsha le pami kaki l’andja w’osomba suke la ɛtɛkɔ. 30 Lam’akandɛnyi zama dia l’ɔhɛmbɛ la ɛkɔma lo anya wa kadiyɛnde ndo lam’akandoke kadiyɛnde Rɛbɛka ata ate: “Ngasɔ mbakambute pami kakɔ,” nde akatshu dia tolongola pami kakɔ kakemala la kamɛlɔ yande suke la ɛtɛkɔ. 31 Ko nde akate ate: “Yete totshu! Jehowa ambokɔtshɔkɔla. Lande na kemalayɛ lanɛ l’andja? Dimi lakatalɔngɔsɔdi luudu ndo dihole dia kamɛlɔ ndala.” 32 Ɔnkɔnɛ, okambi w’Abrahama akatshu la ngelo, ko nde* akakelekola kamɛlɔ ɛkɔdi ndo akayisha adiyo dia yɔ ndɛ. Ndo nto, nde akasha okambi w’Abrahama kaamɛ l’anto wakatshu la nde ashi dia vɔ nsola ekolo. 33 Koko lam’akawawosha mbo ya ndɛ, nde akate ate: “Dimi hantɔlɛ naka talanyotɛ kɛnɛ kakawantome.” Ko Labana akawotɛ ate: “Ota ko!”

34 Oma laasɔ, nde akate ate: “Okambi w’Abrahama mbemi.+ 35 Jehowa ambɔtshɔkɔla nkumɛmi woho w’anyanya ndo nde ambɔɔngɔnya lo mbosha ɛkɔkɔ, ngɔmbɛ, mfɛsa, paonyi, ekambi w’apami la wa wamato ndo kamɛlɔ la mponda.+ 36 Ndo nto, lam’akatshunde Sara wadi aki nkumɛmi osombe,+ nde akote la nkumɛmi ɔna pami ndo nkumɛmi ayosha ɔnande ɔsɔ diangɔ tshɛ diele la nde.+ 37 Ɔnkɔnɛ, nkumɛmi akantshibia ate: ‘Tɔsɛke ɔnami wadi l’atei w’ana wa wamato w’ase Kanana wele lo wodja wodjashimi.+ 38 Koko, kotshu lo luudu la papa ndo lo nkumbo kami,+ ndo wɛ pombaka tɔsɛ ɔnami wadi.’+ 39 Ko lakatɛ nkumɛmi nte: ‘Ayomosala naka womoto akɔ halangi ndja la mi?’+ 40 Nde akambutɛ ate: ‘Jehowa ɔnɛ lakamakɛndakɛnda+ la ntondo kande ayotoma ondjelo+ ande la ntondo kayɛ ndo ayokohomuya lokolo l’ɔlɔ lo lɔkɛndɔ layɛ. Kotɔsɛ ɔnami wadi oma lo nkumbo kami ndo oma lo luudu la papa.+ 41 Wɛ hatonga la onongo l’ɔtɛ wa etshibelo kamboyontshibɛ naka wɛ ntshɔ lo nkumbo kami, ko vɔ ntona wɛ mbɔsɛ ɔnami wadi. Wɛ hatonga la onongo l’ɔtɛ wa etshibelo kamboyontshibɛ.’+

42 “Lam’akamakomi ɛlɔ suke la ɛtɛkɔ k’ashi, lakatshi nte: ‘Jehowa Nzambi ka nkumɛmi Abrahama le, naka wɛ ayɔtshɔkɔla lɔkɛndɔ lami, 43 dimi ɔnɛ ambemala suke la ɛtɛkɔ k’ashi. Osekaseka+ wayoya ndjotahola ashi ndo wayomotɛ nte: “Lam’alangayɛ, ombisha yema y’ashi wa nnɔ oma lo mbaka kayɛ,” 44 ko nde mbutɛmi ate: “Ɔsa nɔka ndo layanga ntaholɛ kamɛlɔ yayɛ,” onge ɔnɛ lambɔsɔnɛ Jehowa ɔna nkumɛmi.’+

45 “La ntondo ka dimi nshidiya ntɛkɛta l’otema, mɛnyi ko Rɛbɛka ayaye la mbaka lo dihɛka. Nde akaholwe l’ɛtɛkɔ ndo akatate ntahola ashi. Oma laasɔ dimi lakawote nte: ‘Lam’alangayɛ, ombisha yema y’ashi wa nnɔ.’+ 46 Mbala kakɔ ɔtɔi, nde akaholoyisha mbaka oma lo dihɛka ko akatshi ate: ‘Ɔsa nɔka.+ Layanga taholɛ ndo kamɛlɔ yayɛ.’ Ko dimi lakanwɛ ndo nde akanɔshisha ndo kamɛlɔ yami. 47 Oma laasɔ, dimi lakawombudi nte: ‘Wɛ ɔna aki na?’ Ko nde akakadimudi ate: ‘Dimi ɔna aki Bɛtuɛlɛ ɔna Nahɔra lakandote la Milika.’ Ko dimi lakɔɔlɔtshisha zama l’ɔhɛmbɛ ndo ɛkɔma lo anya.+ 48 Oma laasɔ dimi lakaki adwe, lakakusami la ntondo ka Jehowa ndo lakatombodi Jehowa Nzambi ka nkumɛmi Abrahama+ lakanɔmbɔla lo mboka dia ndjohomana la ɔna ɔnango nkumɛmi dia ndjowɔsa oko wadi aki ɔnande. 49 Kakianɛ nyombute kana nyu nangaka mɛnya nkumɛmi ngandji ka kɔlamelo ndo kɔlamelo yanyu. Naka bu, ko nyu mbutɛmi kele mbeye lɛnɛ a ntshɔ.”*+

50 Ko Labana nde la Bɛtuɛlɛ wakakadimola vate: “Dikambo nɛ ndja oma le Jehowa. Sho hatokoke kotɛ ɔnɛ eelo kana keema.* 51 Rɛbɛka nde ɔnɛ la ntondo kayɛ. Ɔsande kele nyotshu dia nde tonga wadi aki ɔna nkumɛyɛ, oko wakatshi Jehowa.” 52 Lam’akoke okambi w’Abrahama ɛtɛkɛta ɛsɔ, mbala kakɔ ɔtɔi, nde akakusama la nkɛtɛ la ntondo ka Jehowa. 53 Nde akatondja dɛngalɛnga dia mfɛsa la dia paonyi ndo ahɔndɔ, ko akasha Rɛbɛka. Nde akasha ndo ɔnango Rɛbɛka la nyango diangɔ dia nɛmɔ. 54 L’ɔkɔngɔ diko, nde l’apami waki kaamɛ la nde wakale, wakanɔ ndo wakalale laawɔ.

Lam’akandemɔ la pindju, nde akate ate: “Nyɔnkɛndja kele dimi nkalole le nkumɛmi.” 55 Ko ɔnango nde la nyango wakate vate: “Ɔna womoto atokotshikala la so kaanga nshi 10. Oma laasɔ mbakokande ndjotshɔ.” 56 Koko, nde akawatɛ ate: “Tanyontshindjatshindjake nto lam’ele Jehowa amboshila pomuyami lokolo l’ɔlɔ lo lɔkɛndɔ lami. Nyɔnkɛndja dia dimi nkalola otsha le nkumɛmi.” 57 Ɔnkɔnɛ, vɔ wakate vate: “Ndeka dimɛna sho mbelɛ Rɛbɛka kele towombole ndamɛ.” 58 Vɔ wakelɛ Rɛbɛka ko wakawombola vate: “Onde wɛ mbetawɔka ntshɔ la pami kɛnɛ?” Nde akakadimola ate: “Dimi mbetawɔka ntshɔ.”

59  Ko vɔ wakakɛndja Rɛbɛka+ wa kadiyɛwɔ nde la womoto lakɔɔlɔnya*+ kaamɛ l’okambi w’Abrahama nde l’apami wakatshu la nde. 60 Vɔ wakatshɔkɔla Rɛbɛka, wawotɛ vate: “Kadiyɛso le, koote ana nunu dikumi (10 000) mbala nunu ndo tokanula* tayɛ kawɔhɔtɔlɛ wanɛ wayowahetsha+ osomba.”* 61 Oma laasɔ, Rɛbɛka nde la ekambi ande wa wamato wakonɛɛ, wakahema laadiko dia kamɛlɔ ko wakayele okambi w’Abrahama. Ɔnkɔnɛ, okambi akɔ akɔshi Rɛbɛka ko wakatshu.

62 Isaka akaye oma lo lɛkɛ la Bɛrɛ-Lahai-Rɔyi,+ nɛ dia nde akadjasɛka lo nkɛtɛ ya Nɛngɛbɛ.+ 63 Isaka akatasembolaka ekolo l’oswe la tosho ta shimba dia nkana yimba.+ Lam’akandende la ntondo, ɛnyinde ko kamɛlɔ yayaye! 64 Rɛbɛka nde lawɔ akende la ntondo, akɛnyi Isaka ko nde akaholɔ esadi esadi oma lo kamɛlɔ. 65 Ko nde akambola okambi w’Abrahama ate: “Pami kakɔna kayaye dia ndjohomana la so kengo?” Ko okambi akɔ akate ate: “Ongo nkumɛmi.” Ɔnkɔnɛ nde akɔshi dihɔndɔ ndo akayakombe. 66 Okambi w’Abrahama akatɛ Isaka akambo tshɛ wakandasale. 67 L’ɔkɔngɔ wa laasɔ, Isaka akɔtshiya Rɛbɛka lo luudu la dipɛma laki Sara ka nyango,+ ko nde akawɔshi wadi. Isaka akoolange efula+ ndo nde akasambema l’ɔkɔngɔ wa nyɔi ka nyango.+

25 L’ɔkɔngɔ w’akambo asɔ, Abrahama akatshuke wadi okina, lokombo lande Ketura. 2 L’ɔkɔngɔ diko, Abrahama akote la nde Zimirana, Jokishana, Medana, Midiyana,+ Ishibakɛ ndo Shua.+

3 Jokishana akote Shɛba nde la Dedana.

Ana wa Dedana vɔ anɛ: Ashurima, Letushima ndo Leumima.

4 Ana w’apami wa Midiyana vɔ anɛ: Efa, Efɛrɛ, Hanɔka, Abida ndo Ɛlɛda.

Vɔ akɔ tshɛ waki ana w’apami wa Ketura.

5 L’ɔkɔngɔ diko, Abrahama akayosha Isaka+ diangɔ tshɛ diaki la nde. 6 Koko Abrahama akasha ana wakandote la wadiɛnde w’eseka weshasha. Oma laasɔ, nde akaatome otsha lo ɛstɛ etena kakinde eke la lɔsɛnɔ dia vɔ mangana la ɔnande+ Isaka. 7 Abrahama akasɛnɛ ɛnɔnyi 175. 8 Ko Abrahama akakitshiya lomu ndo akavu aya osombe wa lokosombe ndo ambondoya andja, ko nde akayele watshɛnde.* 9 Ɔnkɔnɛ anande, Isaka nde la Ishimaɛlɛ wakookundɛ lo wooko wa Makɛpela wele lo ekambɔ kaki Efɛrɔna ɔna Zɔhara ose Hiti kɛlane la Mamarɛ.+ 10 Ekambɔ kakasombe Abrahama oma le ana wa Hiti. Lɔkɔ mbakakundɛma Abrahama nde la wadɛnde Sara.+ 11 L’ɔkɔngɔ wa nyɔi k’Abrahama, Nzambi akatetemala ntshɔkɔla ɔnande Isaka+ ndo Isaka akadjasɛka suke la Bɛrɛ-Lahai-Rɔyi.+

12 Ɔnɛ mbele ɔkɔndɔ wa Ishimaɛlɛ+ ɔna Abrahama lakandote la Hangara+ ose Edjibito, okambi wa Sara.

13 Ɔnɛ mbele nkombo y’ana wa Ishimaɛlɛ lo ndjela nkombo yawɔ lo ɛlɔndji wa nkumbo yawɔ: Nebayɔta+ mbaki ɔna Ishimaɛlɛ l’enondo, ko Kɛdara,+ Adibɛlɛ, Mibishama,+ 14 Mishima, Duuma, Masa, 15 Hadada, Tema, Jɛturɛ, Nafishi ndo Kɛdɛma. 16 Vɔ mbele ana wa Ishimaɛlɛ ndo ongo mbele nkombo yawɔ lo ndjela ahole wakawadjasɛka ndo lo ndjela mpango* yawɔ: Ɛtɛ wa waoho 12 lo ndjela waoho awɔ.+ 17 Ishimaɛlɛ akasɛnɛ ɛnɔnyi 137. Oma laasɔ, nde akakitshiya lomu ndo akavu ko akayele watshɛnde.* 18 Ɛtshi ka nkɛtɛ kakawadjasɛka kakatshɔka oma la Havila,+ suke la Shura,+ lo wekeke wa wodja w’Edjibito polo ndo l’Asuriya. Vɔ wakadjasɛ suke l’anangɛwɔ tshɛ.*+

19 Ɔkɔndɔ wa Isaka ɔna Abrahama+ vɔ ɔnɛ:

Abrahama akote Isaka. 20 Isaka aki l’ɛnɔnyi 40 etena kakandatshuke Rɛbɛka ɔna Bɛtuɛlɛ+ ose Arama wa la Padana-Arama. Rɛbɛka aki kadiyɔ aki Labana ose Arama. 21 Isaka akasɛngasɛngaka Jehowa lo dikambo dia wadɛnde Rɛbɛka nɛ dia nde aki ekomba. Ɔnkɔnɛ, Jehowa akoke ɛsɛngɔsɛngɔ ande, ko wadɛnde Rɛbɛka akatshu diemi. 22 Ana waki l’otema ande wakatatɛ ndɔshana,+ ko nde akate ate: “Naka ngasɔ oto mbahombami nsowa, onde ekɔ ohomba dimi monga la lɔsɛnɔ nto?” Ko nde akambola Jehowa lo dikambo sɔ. 23 Jehowa akookadimola ate: “Wedja 2 wekɔ l’otema+ ayɛ ndo wedja 2 wayokakitɔna oma lo dikundju diayɛ.+ Wodja ɔmɔtshi wayoleka wodja okina+ wolo ndo enondo ayonga ose olimu wa kose.”+

24 Lam’akakoke wonya wa nde mbota, eenda, waasa mbaki l’otema ande. 25 Ɔna l’enondo akotɔ la wɛɔsa demba di’otondo wate kana onto lɔlɔtshi dihɔndɔ diakasalema la wɛɔsa.+ Ɔnkɔnɛ, vɔ wakawɔlɛ ɔnɛ Esao.*+ 26 Oma laasɔ, ɔnango akayotɔ okime etshindji k’Esao+ lo lonya lande. Ɔnkɔnɛ, Isaka akawɔlɛ Jakɔbɔ.*+ Isaka aki l’ɛnɔnyi 60 etena kakote wadɛnde Rɛbɛka waasa.

27 Etena kakole ana asɔ, Esao akayala mengenga ka mamba+ ndo ose okonda, koko Jakɔbɔ aki onto laha l’onongo ndo akadjasɛka lo mvudu y’apɛma.+ 28 Isaka akalekaka nanga Esao dikambo nde mbakawelaka onatshi wakandalɛka, koko Rɛbɛka akalekaka nanga Jakɔbɔ.+ 29 Mbala kɛmɔtshi, Jakɔbɔ akakatɛka yema y’osawo, ɛnyinde ko Esao ayakalola oma l’okonda ambɔlɛmba. 30 Ko Esao akatɛ Jakɔbɔ ate: “Lam’alangayɛ, ombisha yema y’osawo ayɛ wa beela yema esadi, nɛ dia lambɔlɛmba!”* Diakɔ diakawawelɛka nto ɔnɛ Ɛdɔmɛ.*+ 31 Ko Jakɔbɔ akate ate: “Tokonsondja lotshungɔ layɛ l’ɔna enondo!”+ 32 Ko Esao akate nto ate: “Dimi ɔnɛ ayanga mvɔ, naa ohomba wa lotshungɔ l’ɔna enondo le mi?” 33 Jakɔbɔ akawotɛ ate: “Tokontshibɛ ntondo!” Ko nde akootshibɛ ndo akasondja Jakɔbɔ lotshungɔ lande l’ɔna enondo.+ 34 Oma laasɔ, Jakɔbɔ akasha Esao mapa la osawo ko nde akale, akanɔ ndo akonɛɛ ko akatshu. Ngasɔ mbakɔnyɔla Esao lotshungɔ lande l’ɔna enondo.

26 L’etena kɛsɔ, ndjala ka kasha kakanyomoyala lo wodja laadiko dia ndjala ka kasha kaki lo nshi y’Abrahama.+ Diakɔ diakatshu Isaka otsha la Ngɛrara le Abimɛlɛkɛ, nkumekanga ka Filistiya. 2 Ko Jehowa akɛnama le nde ndo akawotɛ ate: “Totshɔke l’Edjibito. Djasɛ lo wodja wakɛnyami. 3 Djasɛ oko ɔngɛndangɛnda lo wodja ɔnɛ+ ko dimi layongaka kaamɛ la yɛ ndo layokɔtshɔkɔla, nɛ dia dimi layokosha wɛ la tokanula* tayɛ wodja ɔnɛ+ ndo layokotsha kɛnɛ kakamatshibɛ Abrahama+ wa shɔ nte: 4 ‘Dimi layofudia tokanula* tayɛ oko tɔɔtɔ ta l’olongo+ ndo dimi layosha tokanula* tayɛ nkɛtɛ nyɛ tshɛ.+ Ndo nto, wedja tshɛ wa la nkɛtɛ wayoyakondjɛ ɔtshɔkɔ lo tshimbo ya kanula* yayɛ,’+ 5 nɛ dia Abrahama akakitanyiya dui diami ndo akatetemala nɛmiya wadjango ami la ɛlɛmbɛ ami.”+ 6 Ko Isaka akatodjasɛ la Ngɛrara.+

7 Lam’akatetemalaka ase ngelo mbombola lo dikambo dia wadɛnde, nde akataka ate: “Nde ekɔ kadiyɛmi.”+ Nde akoke wɔma mbuta ate: “Nde ekɔ wadɛmi,” nɛ dia nde akafɔnyaka ate: “Ase ngelo mbeyaka ndjakami l’ɔtɛ wa Rɛbɛka,” dikambo Rɛbɛka aki olangala.+ 8 Lam’akete nshi mɔtshi, Abimɛlɛkɛ nkumekanga ka Filistiya akalengɛ lo didishi, ko nde akɛnyi Isaka ɛɛnya ngandji otsha le* wadɛnde Rɛbɛka.+ 9 Ko Abimɛlɛkɛ akelɛ Isaka ndo akawotɛ ate: “Aha la taamu, nde ekɔ wadɛyɛ! Lande na kakayate wate: ‘Nde ekɔ kadiyɛmi’?” Isaka akookadimola ate: “Lakate ngasɔ dikambo laki la wɔma wa mvɔ l’ɔtɛ ande.”+ 10 Koko Abimɛlɛkɛ akawombola nto ate: “Lande na kamboyotosalɛ nganɛ?+ Pami kɛmɔtshi l’atei aso otokoka mbeyana la wadɛyɛ, ko wɛ ototɛndja onongo!”+ 11 Ko Abimɛlɛkɛ akadjangɛ anto ande tshɛ ate: “Onto tshɛ layosalɛ pami kɛnɛ la wadɛnde dui dia kɔlɔ pombaka ndjakema!”

12 Isaka akatatɛ monɛ woho l’ɛtshi ka nkɛtɛ kɛsɔ, ko ɔnɔnyi ɔsɔ nde akane kɛnɛ kakandonɛ ndodia lo 100, dikambo Jehowa akɔɔtshɔkɔlaka.+ 13 Nde akangɔnɛ ndo diangɔ diande diakatetemala mfula, ko nde akayala ɔngɔnyi efula. 14 Nde akayala la nyemba y’ɛkɔkɔ, ya ngɔmbɛ ndo ekambi+ efula, ko ase Filistiya wakatatɛ mbooka kandjema.

15 Ɔnkɔnɛ, ase Filistiya wakatshumanya nkɛtɛ, ko wakatedia ɛtɛkɔ kakatshime ekambi w’Abrahama+ wa she etena kakinde eke la lɔsɛnɔ. 16 Ko Abimɛlɛkɛ akatɛ Isaka ate: “Mɔ suke la so, nɛ dia wɛ ambotoleka wolo.” 17 Ɔnkɔnɛ Isaka akonɔ oma lɛkɔ, akatohanga l’okidi wa Ngɛrara+ ndo lɛkɔ mbakandatodjasɛka. 18 Ko Isaka akatotshimola tɛkɔ diakawatshime lo nshi y’Abrahama wa she, tɛkɔ diakatedia ase Filistiya l’ɔkɔngɔ wa nyɔi k’Abrahama.+ Nde akadiɔlɛ nkombo yakadiɔlɛ she ntondo.+

19 Etena kakatshimaka ekambi waki Isaka l’okidi akɔ, vɔ wakashola ɛtɛkɔ k’ashi wa nnɔ. 20 Ko alami w’ɛkɔkɔ w’ase Ngɛrara wakatatɛ kisusana vɔ l’alami w’ɛkɔkɔ waki Isaka, wata vate: “Sho mbakanga ɛtɛkɔ kɛnɛ!” Ko Isaka akɔlɛ ɛtɛkɔ kakɔ ɔnɛ Esɛkɛ,* nɛ dia vɔ wakakisusana la nde. 21 Vɔ wakatshime ɛtɛkɔ kekina, ko ase Filistiya wakatatɛ kisusana la wɔ nto. Ɔnkɔnɛ nde akakiɔlɛ ɔnɛ Sitina.* 22 L’ɔkɔngɔ diko, nde akonɔ oma laawɔ, ko akatotshima ɛtɛkɔ kekina, koko vɔ kokisusana la nde. Diakɔ diakandakiɔlɛ ɔnɛ Rɛhɔbɔta,* ata ate: “Dikambo Jehowa ambotosha dihole dia woke dia mbidjasɛ ndo ambotosha ana efula lo nkɛtɛ nyɛ.”+

23 Ɔnkɔnɛ, nde akonɔ oma laawɔ ko akatshu la Bɛrɛ-Shɛba.+ 24 L’otsho ɔsɔ, Jehowa akɛnama le nde ko akawotɛ ate: “Dimi kele Nzambi ka Abrahama wa shɔ.+ Tokake wɔma,+ nɛ dia dimi lekɔ kaamɛ la yɛ. Dimi layokɔtshɔkɔla ndo layofudia tokanula* tayɛ lo dikambo dia okambi ami Abrahama.”+ 25 Ko nde akasale elambwelo laawɔ ndo akelɛka* lokombo la Jehowa.+ Isaka akake luudu lande la dipɛma laawɔ+ ndo ekambi ande wakatshime ɛtɛkɔ laawɔ.

26 Oma laasɔ, Abimɛlɛkɛ akaye oma la Ngɛrara nde la Ahuzata ondaki ande la Fikɔlɛ owandji w’asɔlayi ande+ dia ndjowenda. 27 Ko Isaka akawambola ate: “Lande na kambonyoya ndjomenda lam’ele nyakampetsha ndo nyakambitshanya oma lo nkɛtɛ yanyu?” 28 Vɔ wakate vate: “Tambɛna mɛtɛ dia Jehowa ekɔ kaamɛ la yɛ.+ Diakɔ diakɔlɔmbaso shate: ‘Lam’alangayɛ, etawɔ dia sho nsala diokanelo dia wɔladi ndo mbidja sheke lam’asaso la yɛ,+ 29 dia wɛ hatotosalɛ ndooko dui dia kɔlɔ oko wakiso kokosalɛ kɔlɔ lam’ele takakosalɛ paka ɔlɔlɔ oto lo woho wakatakɔkɛndja lo wɔladi. Kakianɛ Jehowa ambokɔtshɔkɔla.’” 30 Ɔnkɔnɛ nde akaakatɛ dambo, ko wakale ndo wakanɔ. 31 Vɔ waketɔ la pindju ka pɛɛ, ko wakatshibanɛ.+ Oma laasɔ, Isaka akaakɛndja, ko vɔ wakatshu lo wɔladi.

32 Lushi lɔsɔ, ekambi wa Isaka wakaye, ko wakayowotɛ awui wendana la ɛtɛkɔ kakawatshime+ vate: “Tambokoma l’ashi!” 33 Nde akakiɔlɛ ɔnɛ Shiba.* Diakɔ dielɛwɔ osomba akɔ ɔnɛ Bɛrɛ-Shɛba*+ polo ndo ɛlɔ.

34 Lam’akakotsha Esao ɛnɔnyi 40, nde akatshuke Judita ɔna Beeri ose Hiti ndo Basɛmatɛ ɔna Elɔna ose Hiti.+ 35 Vɔ wakashaka Isaka nde la Rɛbɛka+ paa* l’asolo.

27 Etena kakonge Isaka osombe ndo washo ande hawoyɛna, nde akelɛ Esao+ ɔnande l’enondo ate: “Ɔnami!” Ko nde aketawɔ ate: “Dimi ɔnɛ, Ipa!” 2 Nde akawotɛ ate: “Dimi laya osombe ndo layanga mvɔ keema edja. 3 Ɔnkɔnɛ, lam’alangayɛ, ɔsa dihomɔ diayɛ dia wenga, mbuta ate mpata kayɛ ndo ota ayɛ, tshɔka l’okonda totsha wenga kele kombela nyama ka dimi ndjɔlɛ.+ 4 Oma laasɔ, koyonkate onatshi wa diɛndjɛ woho watomolangaka ndo kombelawɔ kele kande dia dimi* kɔtshɔkɔla la ntondo ka dimi mvɔ.”

5 Etena kakasawolaka Isaka nde la ɔnande Esao, Rɛbɛka akahokamɛka. Ko Esao akatshu l’okonda totsha wenga dia nde mbela Isaka nyama.+ 6 Ko Rɛbɛka akatɛ Jakɔbɔ y’ɔnande+ ate: “Lamboka shɔ atɛ ɔnanyɔ Esao ate: 7 ‘Tomunde nyama kele onkate onatshi wa diɛndjɛ dia dimi ndɛ kele kɔtshɔkɔlɛ lo washo wa Jehowa la ntondo ka dimi mvɔ.’+ 8 Kakianɛ, ompokame dimɛna ɔnami, ndo sala kɛnɛ kakotɛmi.+ 9 Lam’alangayɛ, tomunde ɛsɔngɔ wa mbudi 2 woleki amɛna lo leemba dia dimi ndjokatɛ shɔ onatshi wa diɛndjɛ woho watondolangaka. 10 Oma laasɔ, ko wɛ tɔlɛ shɔ dia nde ndɛ kele nde kakɔtshɔkɔlɛ la ntondo ka nde mvɔ.”

11 Ko Jakɔbɔ akatɛ Rɛbɛka wa nyango ate: “Ɔnalengo Esao ekɔ la wɛɔsa+ demba di’otondo, koko dimi keema la wɛɔsa. 12 Ayomosala naka papa ambomamamba?+ Nde ayɔsa oko lekɔ lo mbɔsɔka ndo dimi layoyayangɛ mananu lo dihole dia ɔtshɔkɔ.” 13 Ko nyango akawotɛ ate: “Mananu kɛsɔ kayale le mi, ɔnami. Tokosala paka kɛnɛ kakotɛmi. Tshɔka tomundeyɔ.”+ 14 Ɔnkɔnɛ nde akatshu, akatoyinda ndo akayiela le nyango, ko nyango akakatɛ onatshi wa diɛndjɛ woho watolangaka she. 15 Oma laasɔ, Rɛbɛka akɔshi ahɔndɔ woleki amɛna waki Esao ɔnande l’enondo waki lo luudu, ko nde akaalɔtsha Jakɔbɔ+ ɔnande la kose. 16 Nde akɔɔlɔtsha ndo dikoho di’ɛsɔngɔ wa mbudi l’anya ndo lo etenyi ka nkingo kele bu la wɛɔsa.+ 17 Ko nde akasha ɔnande Jakɔbɔ+ onatshi wa diɛndjɛ ndo mapa wakandakatɛ.

18 Nde akɔtɔ le she ko akete she ate: “Ipa!” Ko she aketawɔ ate: “Dimi ɔnɛ! Wɛ na, ɔnami?” 19 Jakɔbɔ akatɛ she ate: “Dimi Esao ɔnayɛ l’enondo.+ Lambosala oko wakayambute. Lam’alangayɛ, etɔ kele lɛka onatshi wamomokela dia wɛ* tshɔkɔlami.”+ 20 Ko Isaka akatɛ ɔnande ate: “Ande esadi wamboyotonda nyama lɛ!” Nde akakadimola ate: “Jehowa Nzambi kayɛ mbakakitomi oya le mi.” 21 Isaka akatɛ Jakɔbɔ ate: “Lam’alangayɛ ɔnami, sukana kele kamambe dia dimi nshikikɛ kana wɛ mɛtɛ ekɔ Esao kana keema.”+ 22 Ɔnkɔnɛ, Jakɔbɔ akasukana lale Isaka wa she, ko Isaka akawamamba. Oma laasɔ, nde akate ate: “Dui sɔ diekɔ diaki Jakɔbɔ, koko anya mbele w’Esao.”+ 23 Nde kombeeya dikambo anya ande waki la wɛɔsa oko anya w’Esao ɔnango. Ɔnkɔnɛ nde akɔɔtshɔkɔla.+

24 Oma laasɔ, nde akawombola ate: “Onde wɛ mɛtɛ ekɔ ɔnami Esao?” Ko nde akakadimola ate: “Eelo.” 25 Isaka akate ate: “Ɔnami, ombela yema y’onatshi wa nyama k’okonda kele nde, ko dimi* layokɔtshɔkɔla.” Ɔnkɔnɛ nde akawelawɔ, ko nde akale. Oma laasɔ, Jakɔbɔ akawela wanu, ko nde akanɔ. 26 Isaka wa she akawotɛ ate: “Lam’alangayɛ ɔnami, sukana kele ombisha bizɛ.”+ 27 Ɔnkɔnɛ, Jakɔbɔ akasukana la nde, ko Isaka akashana la nde bizɛ ndo akoke osolo w’ahɔndɔ ande.+ Oma laasɔ, nde akɔɔtshɔkɔla, ata ate:

“Osolo w’ɔnami wekɔ oko osolo w’okonda wambɔtshɔkwama oma le Jehowa. 28 Nzambi ka mɛtɛ akotomɛke lɔpɔpɔ oma l’olongo,+ ɛtɛtɔ lo nkɛtɛ+ ndo mbo ya ndɛ* woho w’anyanya la wanu w’eyoyo.+ 29 Anto kawokokambɛke ndo wedja kawokokusamɛke. Koyale owandji w’ananyɔ ndo ananyɔ kawokokusamɛke.+ Mananu le wanɛ tshɛ wayokodja mananu ndo ɔtshɔkɔ le wanɛ tshɛ wayokɔtshɔkɔla.”+

30 Kam’akashidiya Isaka ntshɔkɔla Jakɔbɔ ndo kam’akamɔ Jakɔbɔ oma lale Isaka wa she, Esao ɔnango akakalola oma lo wenga.+ 31 Nde lawɔ akakatɛ onatshi wa diɛndjɛ, ko akatɔlɛ she. Oma laasɔ, nde akatɛ she ate: “Ipa, etɔka kele lɛka yema ya nyama yamomokela dia wɛ* tshɔkɔlami.” 32 Ko Isaka wa she akawombola ate: “Wɛ na?” Nde akookadimola ate: “Dimi Esao+ ɔnayɛ l’enondo.” 33 Ko Isaka akadidima wolo la lokomba ndo akawotɛ ate: “Laasɔ akɔna akatotsha wenga ndo akambela nyama? Lakashidi kilɛ la ntondo ka wɛ ndja ndo lakɔɔtshɔkɔdi. Nde ayɔtshɔkwama ndooko onyake!”

34 Kam’akoke Esao ɛtɛkɛta wa she, nde akatatɛ nsekuma wolo la delo ndo la dui di’ɔkɛtshi, atɛ she ate: “Ɔntshɔkɔlɛ ndo dimi, Ipa!”+ 35 Koko nde akate ate: “Ɔnanyɔ akayonkesa dia dimi mbɔtshɔkɔla lo dihole diayɛ.” 36 Ko Esao akawotɛ ate: “Shi diakɔ diambondondeka mbala 2 y’etondo+ dikambo lokombo lande Jakɔbɔ?* Nde akashile mbɔsa+ lotshungɔ lami l’ɔna enondo, ko nde ambɔsa ndo ɔtshɔkɔ ami!”+ Ko nde akakotsha ate: “Onde wɛ hamombe ndooko ɔtshɔkɔ?” 37 Koko Isaka akakadimola Esao ate: “Dimi lambɔɔsɔna owandji ayɛ,+ lambowosha anango tshɛ oko ekambi ndo lambowosha mbo ya ndɛ la wanu w’eyoyo.+ Aakamakoke kosalɛ nto na, ɔnami?”

38 Esao akatɛ she ate: “Onde paka ɔtshɔkɔ 1 oto mbele la yɛ, Ipa? Ɔntshɔkɔlɛ ndo dimi Ipa!” Ko Esao akade ekoko ndo akatondɔ la delo.+ 39 Ɔnkɔnɛ, Isaka wa she akookadimola ate:

“Eenda, wɛ ayodjasɛ etale efula mangana la nkɛtɛ y’ɛtɛtɔ ndo mangana la lɔpɔpɔ l’oma l’olongo.+ 40 L’ekimanyielo ka lokuwa layɛ la ta mbayoyɔsɛnaka+ ndo wɛ ayokambɛ ɔnanyɔ.+ Koko etena kayoyoshisha momuya, wɛ ayoyatshungola oma lo lɔhɔmbɔ lande.”*+

41 Koko Esao akombɛ Jakɔbɔ kumbɛkumbɛ l’ɔtɛ wakɔɔtshɔkɔla she.+ Ɔnkɔnɛ, nde akataka l’otema ande ate: “Papa aya suke la mvɔ.*+ L’ɔkɔngɔ wa nyɔi kande, dimi layodiaka ɔnalengo Jakɔbɔ.” 42 Kam’akawatotɛ Rɛbɛka ɛtɛkɛta w’Esao ɔnande l’enondo, nde akatome dui dia vɔ telɛ Jakɔbɔ ɔnande la kose, ko akawotɛ ate: “Esao ɔnanyɔ ekɔ lo nanga nsɔmbɔya lo kodiaka.* 43 Laasɔ, sala kɛnɛ kakotɛmi ɔnami. Onɛɛ kele lawɔ otsha la Harana+ laka Labana ɔnalengo. 44 Kotodjasɛ lakande lo tshanda mɔtshi edja ndo lam’ayotuta odudu w’ɔnanyɔ, 45 edja ndo lam’ayokitakita nkɛlɛ kakoka ɔnanyɔ ndo lam’ayondohɛ kɛnɛ kamboyoosalɛ. Oma laasɔ, layotoma dui dia wɛ nkalola. Ngande watomonyoshisha nyu akɔ 2 lushi ɔtɔi?”

46 Oma laasɔ, Rɛbɛka akatɛka Isaka mbala ko mbala ate: “Ana wa wamato w’ase Hiti wambombisha lɔsɛnɔ eshi. Naka ndo Jakɔbɔ ntshuka wadi l’ose Hiti+ l’atei w’ana wa wamato wa lo nkɛtɛ nyɛ, onde ayonga ohomba dimi ntetemala nsɛna nto?”+

28 Ɔnkɔnɛ, Isaka akelɛ Jakɔbɔ ko akɔɔtshɔkɔla ndo akawodjangɛ ate: “Totshukake wadi oma l’atei w’ana wa wamato w’ase Kanana.+ 2 Tshɔka otsha la Padana-Arama lo luudu laki Bɛtuɛlɛ ka tshɛyɛ,* kele kototshuke wadi oma l’atei w’ana wa wamato waki Labana+ la nyɔ pami. 3 Nzambi Kanga-Wolo-Tshɛ ayokɔtshɔkɔla, ayokosha diwutshi, ayokofudia ndo wɛ ayoyala olui wa woke w’anto.+ 4 Ndo nde ayokosha wɛ la tokanula* tayɛ ɔtshɔkɔ wakandalake Abrahama+ dia nkɛtɛ yeyɛ ɔngɛndangɛnda yakasha Nzambi Abrahama+ monga yayɛ.”

5 Ɔnkɔnɛ Isaka akakɛndja Jakɔbɔ, ko nde akatshu otsha la Padana-Arama, le Labana ɔna Bɛtuɛlɛ ose Arama.+ Labana aki ɔnango Rɛbɛka+ wa nyango Jakɔbɔ la Esao.

6 Lam’akɛnyi Esao ɔnɛ Isaka ambɔtshɔkɔla Jakɔbɔ ndo ambootoma otsha la Padana-Arama dia nde totshuka wadi lɛkɔ, ndo ɔnɛ lam’akandɔɔtshɔkɔla, nde akawodjangɛ ate: “Totshukake wadi oma l’atei w’ana wa wamato w’ase Kanana,”+ 7 ndo ɔnɛ Jakɔbɔ akakitanyiya she la nyango, ko nde akatshu otsha la Padana-Arama,+ 8 Esao akɛnyi dia ana wa wamato w’ase Kanana kɔngɛnyangɛnyaka Isaka+ wa she. 9 Ɔnkɔnɛ Esao akatshu le Ishimaɛlɛ, ko akatotshuka Mahalata laadiko dia wadi akina waki la nde.+ Mahalata aki kadiyɔ aki Nebayɔta ndo ɔna aki Ishimaɛlɛ ɔna Abrahama.

10 Jakɔbɔ akonɛɛ oma la Bɛrɛ-Shɛba, ko akatetemala la lɔkɛndɔ otsha la Harana.+ 11 Nde akakome lo dihole dimɔtshi ndo akayalɔngɔsɔla dia ndala laawɔ, nɛ dia laasɔ ko wonya ambodja. Ɔnkɔnɛ nde akɔshi dive dimɔtshi diaki laawɔ, akadikitsha dia mbɛkɛ ɔtɛ lɔkɔ, ko akalale laawɔ.+ 12 Oma laasɔ, nde akɛnyi dɔ ndo lo dɔ diakɔ, nde akɛnyi kibandola k’otale kambokitshama la nkɛtɛ ndo shɔdi yatɔ yakakomaka polo l’olongo. Andjelo wa Nzambi wakaholɔka ndo wakadɛka lɔkɔ.+ 13 Jehowa aki la diko diatɔ ndo nde akate ate:

“Dimi kele Jehowa Nzambi ka Abrahama wa tshɛyɛ ndo Nzambi ka Isaka.+ Dimi layokosha wɛ la tokanula*+ tayɛ nkɛtɛ yoladiyɛ laawɔ nyɛ. 14 Tokanula* tayɛ tayonga efula oko nsɛkɛ ya ditshu dia nkɛtɛ+ ndo wɛ ayohandjɔnɛ lo owɛstɛ, lo ɛstɛ, lo nɔrdɛ ndo lo sidɛ. Ndo nto, nkumbo tshɛ ya la nkɛtɛ yayɔtshɔkwama*+ lo tshimbo yayɛ la lo tshimbo ya kanula* yayɛ. 15 Dimi lekɔ kaamɛ la yɛ. Layokokokɛ dihole tshɛ diayoyotshɔ ndo layokokaloya lo nkɛtɛ nyɛ.+ Dimi hantokotshika naka latakotsha kɛnɛ kamomokolaka.”+

16 Ko Jakɔbɔ akemɔ oma lo djɔ ndo akate ate: “Lo mɛtɛ Jehowa ekɔ lo dihole nɛ, koko dimi hambeyaki.” 17 Nde akandama la wɔma w’efula ndo akakotsha ate: “Dihole nɛ diekɔ dihole dia mamba! Ɔnɛ ekɔ la dia monga luudu la Nzambi+ ndo ɔnɛ kele soko di’olongo.”+ 18 Ɔnkɔnɛ Jakɔbɔ aketɔ la pindju ka pɛɛ ndo akɔshi dive diakandɛkɛ ɔtɛ, ko akadiemɛ oko ekundji ndo akatɛ esɔ laadiko diatɔ.+ 19 Ko nde akɔlɛ dihole diakɔ ɔnɛ Bɛtɛlɛ,* koko osomba waki suke la laawɔ wakelamɛka ntondo ɔnɛ Luza.+

20 Ko Jakɔbɔ akatshike dɔkɔlɔkɔ ate: “Naka Nzambi ayotetemala monga kaamɛ la mi, ayonkokɛ lo lɔkɛndɔ lami ndo ayombisha mbo ya ndɛ l’ahɔndɔ wa ndɔta, 21 ndo naka lambokalola ki lo luudu la papa, kete Jehowa ayɛnya mɛtɛ dia nde kele Nzambi kami. 22 Ko dive nɛ diamomemɛ oko ekundji diayonga luudu la Nzambi+ ndo ndooko onyake dimi layokosha etenyi ka dikumi k’ɛngɔ tshɛ kambishayɛ.”

29 Oma laasɔ, Jakɔbɔ akatetemala la lɔkɛndɔ lande otsha lo nkɛtɛ y’ase ɛstɛ. 2 Ko nde akɛnyi ɛtɛkɔ k’ashi l’oswe ndo elui 3 w’ɛkɔkɔ waketama suke la laawɔ, nɛ dia waki la mbekelo ka nɔshaka ɛkɔkɔ awɔ ashi w’oma l’ɛtɛkɔ kakɔ. Dive dia woke diakafɛka onyɔ w’ɛtɛkɔ kakɔ. 3 Lam’akawatshumanyaka ɛkɔkɔ tshɛ laawɔ, alami wakangitolaka dive oma l’onyɔ w’ɛtɛkɔ, ko wakanɔshaka ɛkɔkɔ ashi ndo l’ɔkɔngɔ diko, vɔ wakakaloyaka dive lo dihole diadiɔ dia mbifɛ ɛtɛkɔ.

4 Jakɔbɔ akawambola ate: “Analengo, nyu ase na?” Ko vɔ wakookadimola vate: “Sho ase Harana.”+ 5 Nde akawatɛ ate: “Onde nyu mbeyaka Labana+ okana waki Nahɔra?”+ Ko vɔ wakate vate: “Sho mbeeyaka.” 6 Nde akawambola ate: “Onde nde ekɔ ki?” Ko vɔ wakookadimola vate: “Nde ekɔ ki. Rashɛlɛ+ ɔnande nde ongo ayaye la ɛkɔkɔ.” 7 Ko nde akate ate: “Teeke midi. Wonya wa ntɔla ɛkɔkɔ lo dihole dia ndala watakoke. Nyɔnɔsha ɛkɔkɔ ashi kele nyotaalesha.” 8 Vɔ wakate vate: “Sho bu la lotshungɔ la nsala dikambo sɔ, paka ɛkɔkɔ tshɛ wambotshumana ko dive ndjongitɔma oma l’onyɔ w’ɛtɛkɔ. Oma laasɔ ko sho ndjɔnɔsha ɛkɔkɔ ashi.”

9 Etena kakandasawolaka la wɔ, Rashɛlɛ akaye la ɛkɔkɔ wa she, nɛ dia nde aki olami w’ɛkɔkɔ. 10 Lam’akɛnyi Jakɔbɔ Rashɛlɛ ɔna aki Labana la nyango pami la ɛkɔkɔ waki Labana, mbala kakɔ ɔtɔi Jakɔbɔ akasukana, akangitola dive oma l’onyɔ w’ɛtɛkɔ ndo akanɔsha ɛkɔkɔ waki Labana la nyango pami ashi. 11 Oma laasɔ, Jakɔbɔ akasha Rashɛlɛ bizɛ ndo akatondɔ la delo. 12 Ko Jakɔbɔ akatɛ Rashɛlɛ dia nde mbotɔka* la she ndo ɔnɛ nde ekɔ ɔna aki Rɛbɛka. Ɔnkɔnɛ Rashɛlɛ akalawɔ dia totɛ she.

13 Kam’akoke Labana+ dia Jakɔbɔ ɔna kadiyɛnde ambokoma, nde akalawɔ dia toolongola. Ko nde akookumbatɛ, akawosha bizɛ ndo akaye la nde lo luudu lande. Jakɔbɔ akakɔndɔlɛ Labana akambo tshɛ. 14 Labana akawotɛ ate: “Wɛ ekɔ mɛtɛ weka ami ndo emunyi ami.”* Ko nde akadjasɛ la wɔ ngɔndɔ k’otondo.

15 Ko Labana akambola Jakɔbɔ ate: “Lam’ele wɛ ekɔ owotɔ* ami,+ onde wɛ ayonkambɛ okambɛkambɛ? Ombute kɛnɛ kalangayɛ dimi kofuta.”+ 16 Labana aki la ana 2 wa wamato. Ɔna l’enondo lokombo lande Lea ndo la kose lokombo lande Rashɛlɛ.+ 17 Lea aki washo ɛngɛlɛngɛlɛ, koko Rashɛlɛ aki kɔmba ndo olangala wa mamba. 18 Jakɔbɔ akalange Rashɛlɛ efula, ɔnkɔnɛ nde akate ate: “Dimi lekɔ suke dia kokambɛ ɛnɔnyi 7 l’ɔtɛ wa Rashɛlɛ,+ ɔnayɛ la kose.” 19 Ko Labana akate ate: “Le mi, ndeka dimɛna dimi koshande lo dihole dia dimi mbosha pami kekina. Tetemala mbidjasɛ kaamɛ la mi.” 20 Jakɔbɔ akookambɛ ɛnɔnyi 7 l’ɔtɛ wa Rashɛlɛ,+ koko le nde aki oko nshi ngana tsho, nɛ dia nde akoolangaka efula.

21 Oma laasɔ, Jakɔbɔ akatɛ Labana ate: “Ombishake wadɛmi kele mbidjasɛ* la nde, nɛ dia nshi yamomokokambɛ yambokoka.” 22 Ko Labana akatshumanya anto tshɛ wa lo dihole sɔ ndo akasale fɛtɛ ka diwala. 23 Koko la dikɔlɔ, Labana akatɔlɛ ɔnande Lea le Jakɔbɔ dia nde monga wadɛnde.* 24 Ndo nto, Labana akakimɔ Zilipa, okambi ande wa womoto dia nde monga ose olimu+ wa Lea ɔnande la womoto. 25 La pindju, Jakɔbɔ akɛnyi dia Lea mbaki la nde lo luudu. Ko nde akatɛ Labana ate: “Lande na kamboyonsalɛ nganɛ? Shi l’ɔtɛ wa Rashɛlɛ mbakamakokambɛ? Ko lande na kamboyonkesa?”+ 26 Ko Labana akate ate: “Sho bu la mbekelo ka ntshukanya ɔna kose la ntondo k’enondo. 27 Shidiya lomingu laki womoto ɔnɛ. Oma laasɔ, layoyokosha womoto okina ɔnɛ naka wɛ kambɛmi nto ɛnɔnyi ekina 7.”+ 28 Jakɔbɔ akasale ngasɔ ndo akashidiya lomingu nde la womoto akɔ ko l’ɔkɔngɔ diko, Labana akayowosha ɔnande Rashɛlɛ wadi. 29 Ndo nto, Labana akakimɔ Biliha,+ okambi ande wa womoto dia nde monga ose olimu+ wa Rashɛlɛ ɔnande.

30 Oma laasɔ, Jakɔbɔ akeyana ndo la Rashɛlɛ ndo akalange Rashɛlɛ efula oleki Lea, ko nde akakambɛ Labana olimu ɛnɔnyi 7 ekina nto.+ 31 Lam’akɛnyi Jehowa dia Jakɔbɔ konangaka* Lea, nde akawosha dikoka dia mbota,*+ koko Rashɛlɛ aki ekomba.+ 32 Ko Lea akatshu diemi, akote ɔna pami ndo akawɔlɛ Rubɛna,*+ nɛ dia nde akate ate: “Jehowa ambɛna sui diami,+ nɛ dia kakianɛ omɛmi ayotatɛ nangami.” 33 Nde akatshu diemi nto, ko akote ɔna pami ndo akate ate: “Lambota ɔna ɔnɛ dikambo Jehowa amboka. Lam’ele omɛmi hanange, Nzambi ambombisha ndo ɔna ɔnɛ.” Ko nde akawɔlɛ Simɛyɔna.*+ 34 Nde akanyomotshɔ diemi nto ndo akote ɔna pami, ko akate ate: “Mbala kɛnɛ omɛmi ayoyasukanya la mi, nɛ dia lambota la nde ana 3.” Ɔnkɔnɛ wakawɔlɛ Lɛwi.*+ 35 Nde akanyomotshɔ diemi mbala kekina nto, ko akote ɔna pami ndo akate ate: “Dimi layotombola Jehowa mbala kɛnɛ.” Ko nde akawɔlɛ Juda.*+ Oma laasɔ, nde akatokemɛ diwutshi.

30 Lam’akɛnyi Rashɛlɛ dia nde atote ndooko ɔna la Jakɔbɔ, nde akoke kadiyɛnde kandjema ndo akatɛ Jakɔbɔ ate: “Naka wɛ hambisha ana, kete dimi layovɔ.” 2 Ko Jakɔbɔ akomalɛ Rashɛlɛ efula ndo akawotɛ ate: “Onde dimi kele Nzambi lakakoshimbe mbota ana?”* 3 Rashɛlɛ akawotɛ ate: “Biliha,+ okambi ami wa womoto nde ɔnɛ. Eyana la nde dia nde mbotɛmi ana kele dimi lawɔ kamonge la ana lo tshimbo yande.” 4 Ɔnkɔnɛ nde akawosha Biliha, okambi ande wa womoto dia nde monga wadɛnde, ko Jakɔbɔ akeyana la nde.+ 5 Biliha akatshu diemi, ko akayota la Jakɔbɔ ɔna pami. 6 Ko Rashɛlɛ akate ate: “Nzambi ambonga shushi yami ndo amboka dui diami, diakɔ diamondombisha ɔna.” Ɔnkɔnɛ nde akawɔlɛ Danɛ.*+ 7 Biliha, okambi wa Rashɛlɛ akatshu diemi nto ndo akayota ɔna pami la 2 nde la Jakɔbɔ. 8 Ko Rashɛlɛ akate ate: “Lambodja welo efula dia ndɔshana la kadiyɛmi, ko lambowodja otshumba!” Ɔnkɔnɛ nde akawɔlɛ Nafɛtali.*+

9 Lam’akɛnyi Lea dia nde hayota, nde akasha Jakɔbɔ Zilipa, okambi ande dia nde monga wadɛnde.+ 10 Zilipa, okambi wa Lea akayota ɔna pami nde la Jakɔbɔ. 11 Ko Lea akate ate: “Ande dimi lokolo l’ɔlɔ lɛ!” Ɔnkɔnɛ nde akawɔlɛ Ngada.*+ 12 Oma laasɔ, Zilipa, okambi wa Lea akote la Jakɔbɔ ɔna pami la 2. 13 Ko Lea akate ate: “Ande ɔngɛnɔngɛnɔ wele la mi lee! Nɛ dia ana wa wamato wayombetaka kanga ɔngɛnɔngɛnɔ.”+ Ɔnkɔnɛ nde akawɔlɛ Ashɛrɛ.*+

14 Etena kakatɛngɔlaka Rubɛna+ lo nshi ya dinela di’eponga, nde akatɛna elowa wa mandrangɔrɛ* l’okonda, ko akela Lea la nyango. Ko Rashɛlɛ akatɛ Lea ate: “Lam’alangayɛ, ombisha mandrangɔrɛ mɔtshi lo mandrangɔrɛ yakakela ɔnayɛ.” 15 Ko Lea akawotɛ ate: “Onde wɛ fɔnyaka dia lekɔ l’ɔngɛnɔngɛnɔ lo woho wakayankɔsɔla omɛmi?+ Onde wɛ ate kɔkɔsɔlɛ ndo mandrangɔrɛ yombela ɔnami?” Rashɛlɛ akookadimola ate: “Kawɔ. Nde ayolala la yɛ l’otsho w’ɛlɔ naka wɛ mbishami mandrangɔrɛ yakakela ɔnayɛ.”

16 Lam’akayakalolaka Jakɔbɔ oma l’okonda la dikɔlɔ, Lea akatshu toolongola ndo akawotɛ ate: “Dimi kayeyana la yɛ ɛlɔ, dikambo lakakosombi losomba la mandrangɔrɛ yakambela ɔnami.” Ko nde akalale la nde l’otsho ɔsɔ. 17 Ko Nzambi akoke ndo akakadimola dɔmbɛlɔ dia Lea ko nde akatshu diemi ndo akayotɛ Jakɔbɔ ɔna pami la 5. 18 Ko Lea akate ate: “Nzambi ambomfuta,* nɛ dia lakasha omɛmi okambi ami.” Ɔnkɔnɛ nde akawɔlɛ Isakara.*+ 19 Lea akatshu diemi nto, ko akayota ɔna pami la 6 nde la Jakɔbɔ.+ 20 Oma laasɔ, Lea akate ate: “Nzambi mɛtɛ ambɔntshɔkɔla. Weho akɔ tshɛ omɛmi ayetawɔ mbidjasɛ la mi kaango,+ nɛ dia lambota la nde ana 6.”+ Ko nde akawɔlɛ Zebuluna.*+ 21 L’ɔkɔngɔ diko, nde akayota ɔna womoto ko akawɔlɛ Dina.*+

22 L’ekomelo, Nzambi akayohɔka Rashɛlɛ ndo akoke dɔmbɛlɔ diande lo mbosha akoka wa ntshɔ diemi.*+ 23 Nde akatshu diemi, akote ɔna pami, ko akate ate: “Nzambi ambominya lo nsɔnyi!”+ 24 Ɔnkɔnɛ nde akawɔlɛ Yɔsɛfu,*+ ata ate: “Jehowa ambombisha ɔna okina.”

25 Kam’akote Rashɛlɛ Yɔsɛfu, Jakɔbɔ akatɛ Labana ate: “Ɔnkɛndja kele nkalole lakaso ndo lo wodja ami.+ 26 Ombisha wadiɛmi la anami wakamakokambɛ dikambo diawɔ kele ntshu, nɛ dia wɛ mbeyaka dimɛna olimu wakamakokambɛ.”+ 27 Ko Labana akawotɛ ate: “Naka lambohomɔ lokolo l’ɔlɔ la ntondo kayɛ, tshikala lanɛ lam’alangayɛ, nɛ dia lamboshihodia l’ekimanyielo ka diendja* ɔnɛ Jehowa ekɔ lo tshɔkɔlami l’ɔtɛ ayɛ.” 28 Ko nde akakotsha ate: “Ta kɛnɛ kalangayɛ dimi kofuta kele kofutetɔ.”+ 29 Ko Jakɔbɔ akawotɛ ate: “Wɛ mbeyaka woho wamomokokambɛ ndo wambofulanɛ dongalonga diayɛ l’ekimanyielo kami.+ 30 Dongalonga diayɛ diaki yema tshitshɛ la ntondo ka dimi ndja, koko diɔ diambohama, diambofulanɛ ndo Jehowa ekɔ lo kɔtshɔkɔla oma ko lam’akamakome. Laasɔ etena kakɔna kayomoyokambɛ nkumbo kami?”+

31 Oma laasɔ, Labana akawombola ate: “Ahombami kofuta?” Ko Jakɔbɔ akookadimola ate: “Handɛnyi ohomba wa wɛ futami. Naka wɛ salɛmi paka dikambo nɛ, kete layoleshaka dongalonga diayɛ ndo layodilamaka.+ 32 Layanga mbeta l’atei wa dongalonga diayɛ ɛlɔ. Konya ɛkɔkɔ tshɛ wele awadi awadi kana eshidi eshidi, ɛkɔkɔ w’ana tshɛ w’edimadima ndo mbudi ya wadi tshɛ yele eshidi eshidi kana awadi awadi. Naka ɛkɔkɔ ndo mbudi ya ngasɔ yamboyotɔ oma laasɔ, kete ɔsɔ mbayonga difuto diami.+ 33 Ndo lam’ayoyoyaka ndjenda difuto diami, losembwe lami layɔnswɛlɛka. Mbudi tshɛ ya wadi yele bu awadi awadi kana eshidi eshidi ndo ɛkɔkɔ w’ana wele bu edimadima wayoyotana l’atei wa dongalonga diami wayɔsama oko wa lova.”

34 Ko Labana akate ate: “Kawɔ! Tosale kaanga woho wotshiyɛ.”+ 35 Lushi lɔsɔ, nde akanya weombe wa mbudi w’awadi awadi kana w’eshidi eshidi ndo mbudi tshɛ ya wadi y’awadi awadi kana y’eshidi eshidi, ndo ɛsɔngɔ w’ɛkɔkɔ wa waomi tshɛ waki l’awongo wa wɛma kana edimadima, ko nde akasha anande dia vɔ namaka. 36 Oma laasɔ, nde akaanganya dongalonga diande diakatshikala la diaki Jakɔbɔ etale ka lɔkɛndɔ la nshi 3 lam’asawɔ, ko Jakɔbɔ akatetemala nama ɛkɔkɔ waki Labana wakatshikala.

37 Ko Jakɔbɔ akakɔtɛ ntahe y’eyoyo y’osongo wa stiraksɛ, w’amandɛ ndo wa platanɛ, ko akahɛlɔla awadi wa wɛma dia wɛma waki l’etei ka ntahe yakɔ mɛnama. 38 Oma laasɔ, nde akakitsha ntahe yakandahɛlɔla suke la dongalonga lo diangɔ diadjɛwɔ dongalonga ashi lo ahole wakatshɔka dongalonga dia tɔnɔ ashi kele kadiongake la nsaki ya dieyanelo suke la ntahe yakɔ etena kayodioyaka ndjɔnɔ ashi.

39 Ɔnkɔnɛ, dongalonga diakongaka la nsaki ya dieyanelo suke la ntahe yakɔ, ko diɔ diakotaka ana w’awadi awadi, w’awongo awongo ndo w’eshidi eshidi. 40 Ko Jakɔbɔ akakakitola ana w’ɛkɔkɔ ndo nde akaasekesola dia vɔ mbɛlanɛ la ɛkɔkɔ ekina tshɛ wa Labana waki awadi awadi kana edimadima. Ko nde akakakitola ɛkɔkɔ ande la waki Labana diaha vɔ nsangana. 41 Mbala tshɛ kakongaka dongalonga diaki l’alemba wa wolo la nsaki ya dieyanelo, Jakɔbɔ akakitshaka ntahe y’esongo suke la diangɔ diakanɔka dongalonga ashi dia diɔ mbeyana suke la ntahe yakɔ. 42 Koko etena kakayaka dongalonga diaki komonga l’alemba wa wolo, nde kokitshaka ntahe y’esongo suke la laawɔ. Ɔnkɔnɛ, dongalonga diaki komonga l’alemba wa wolo diaketaka lo wedi wa Labana ndo nɛ diaki l’alemba wa wolo diaketaka lo wedi wa Jakɔbɔ.+

43 Jakɔbɔ akangɔnɛ efula ndo akayala la dongalonga efula, ekambi wa wamato la w’apami efula ndo kamɛlɔ la mponda+ efula.

31 L’ɔkɔngɔ diko, Jakɔbɔ akoke kɛnɛ kakataka ana waki Labana vate: “Jakɔbɔ ambɔsa diangɔ tshɛ diaki shɛso. Nde ambɔngɔna+ oma lo diangɔ dia shɛso.” 2 Etena kakende Jakɔbɔ elungi ka Labana, nde akɛnyi dia Labana aya bu la nde woho wakiwɔ ntondo.+ 3 Ko Jehowa akatɛ Jakɔbɔ ate: “Kalola otsha lo nkɛtɛ ya watshɛyɛ ndo ya ewotɔ ayɛ,+ ko dimi layotetemala kosukɛ.” 4 Oma laasɔ, Jakɔbɔ akatomɛ Rashɛlɛ nde la Lea dui dia vɔ ndja l’oswe lɛnɛ akandalamaka dongalonga, 5 ko akawatɛ ate:

“Lambɛna dia shɛnyu aya bu la mi woho wakiso ntondo,+ koko Nzambi ka papa ekɔ lo ntetemala sukɛmi.+ 6 Nyu mbeyaka dimɛna dia lakakambɛ shɛnyu la wolo ami tshɛ.+ 7 Kaanga mbele shɛnyu akankese ndo akatshikitanya difuto diami mbala 10, Nzambi kombetawɔ dia nde salɛmi kɔlɔ. 8 Mbala tshɛ kakandataka ate: ‘Layokofuta dongalonga di’awongo awongo,’ dongalonga tshɛ diakotaka ana w’awongo awongo. Ndo mbala tshɛ kakandataka ate: ‘Layokofuta dongalonga di’awadi awadi,’ dongalonga tshɛ diakotaka ana w’awadi awadi.+ 9 Ɔnkɔnɛ, Nzambi akahɔtɔlaka shɛnyu dongalonga diande, ko akambishakadiɔ. 10 Mbala kɛmɔtshi, lam’akakoke etena ka dongalonga monga la nsaki ya dieyanelo, lakedia washo ko lakɛnyi lo dɔ dia weombe wa mbudi wakeyanaka la mbudi ya wadi y’awongo awongo, y’awadi awadi ndo y’eshidi eshidi.+ 11 Ko ondjelo wa Nzambi ka mɛtɛ akambelɛ lo dɔ ate: ‘Jakɔbɔ!’ Ko lakate nte: ‘Dimi ɔnɛ.’ 12 Nde akate ate: ‘Lam’alangayɛ, edia washo ayɛ kele enda, nɛ dia weombe wa mbudi tshɛ weyana la mbudi ya wadi wekɔ awongo awongo, awadi awadi ndo eshidi eshidi, dikambo lambɛna kɛnɛ tshɛ kakosalɛ+ Labana. 13 Dimi kele Nzambi ka mɛtɛ kakɛnama le yɛ la Bɛtɛlɛ,+ lɛnɛ akayatɛ esɔ laadiko dia ekundji ndo lɛnɛ akayatshike dɔkɔlɔkɔ la ntondo kami.+ Onɛɛ, mɔ oma lo nkɛtɛ nyɛ, kele kalola lo nkɛtɛ yakayotɔ.’”+

14 Ko Rashɛlɛ la Lea wakawotɛ vate: “Onde teke la ɛngɔ kɛmɔtshi kakokaso nkita lo luudu la shɛso? 15 Shi oma ko lushi lakandatosondja ndo lakandale okundji aso+ nde ekɔ lo tɔsa oko angɛndangɛnda? 16 Diangɔ tshɛ diakahɔtɔla Nzambi shɛso diaso sho la anaso mbediɔ.+ Ɔnkɔnɛ, sala kɛnɛ tshɛ kakakotɛ Nzambi dia wɛ nsala.”+

17 Oma laasɔ, Jakɔbɔ akemala, akahɛ anande la wadiɛnde laadiko dia kamɛlɔ,+ 18 ko nde akonɛɛ la ngɔmbɛ yande tshɛ, kɛnɛ tshɛ kakandakondja+ ndo la dongalonga diakandakondja la Padana-Arama, dia nde ntshɔ le Isaka wa she lo wodja wa Kanana.+

19 Etena kakatshu Labana tohembola ɛkɔkɔ ande wɛɔsa, Rashɛlɛ akave mpingu ya terafimɛ*+ yaki she.+ 20 Ndo nto, Jakɔbɔ akakese Labana l’ose Arama, nɛ dia nde kombotɛ ɔnɛ nde otalawɔ. 21 Ko nde akalawɔ ndo akatehɔ Ɔkɛdi w’Efaratɛ+ nde la kɛnɛ tshɛ kaki la nde. Oma laasɔ, nde akɛlɛ otsha lo lɛkɛ l’akona wa Ngiliyadɛ.+ 22 Lushi la 3, wakayotɛ Labana vate Jakɔbɔ ambolawɔ. 23 Ɔnkɔnɛ, nde akɔshi anango* ndo wakooyele lɔkɛndɔ la nshi 7, ko wakatowonda lo lɛkɛ l’akona wa Ngiliyadɛ. 24 Ko Nzambi akɛnama l’otsho+ le Labana ose Arama+ lo dɔ ndo akawotɛ ate: “Kɔsɔnɛ ɛtɛkɛta wayoyotɛ Jakɔbɔ, oyadi w’ɛlɔlɔ kana wa kɔlɔ.”*+

25 Jakɔbɔ akake luudu lande la dipɛma lo dikona ndo Labana l’anto ande wakake mpango kawɔ lo lɛkɛ l’akona wa Ngiliyadɛ. Oma laasɔ, Labana akasukana la Jakɔbɔ. 26 Ko Labana akatɛ Jakɔbɔ ate: “Lande na kamboyonsalɛ nganɛ? Lande na kamboyonkesola ndo kamboyolawɔ l’anami wa wamato oko anto wambowonda mfumbe lo ta? 27 Lande na kakayɔngɔ lɔɔngɔ ndo kakayankesola? Otondonga wɛ akatandaki, tshike lotokɔkɛndja l’ɔngɛnɔngɛnɔ ndo l’esambo. Tshike lotokohomɛ ngɔmɔ ndo nsɛsɛ. 28 Koko wɛ kombishami etena ka dimi mbisha ekana* ami ndo anami wa wamato bizɛ. Wɛ ambosala akambo oko kanga enginya. 29 Dimi lekɔ la wolo wanyosalɛ kɔlɔ, koko Nzambi ka shɛnyu akambute l’otsho w’ɛlɔ ate: ‘Kɔsɔnɛ ɛtɛkɛta wayoyotɛ Jakɔbɔ, oyadi w’ɛlɔlɔ kana wa kɔlɔ.’+ 30 Wɛ akonɛɛ l’ɔtɛ wakayalomɔlomɔka dia nkalola lo luudu la shɔ, ko lande na kakayatavi nzambi yami?”+

31 Jakɔbɔ akakadimola Labana ate: “Lakaye aha la kolaka nɛ dia lakoke wɔma, dikambo lakate l’otema ami nte: ‘Wɛ mbeyaka ndjɔnkɔsɔla anayɛ wa wamato la wolo.’ 32 Onto tshɛ layoyotana la terafimɛ yayɛ hatotshikala la lɔsɛnɔ. Enda kɛnɛ kele la mi lo washo w’anto aso, kele ɔsa diangɔ diayɛ diayoyɛna.” Koko Jakɔbɔ kombeya dia Rashɛlɛ akave terafimɛ yakɔ. 33 Ko Labana akɔtɔ lo luudu la dipɛma laki Jakɔbɔ, laki Lea ndo la ekambi ande 2 wa wamato,+ koko nde kondjiɛna. Ɔnkɔnɛ, nde akatombe oma lo luudu la dipɛma laki Lea, ko akɔtɔ lo luudu la dipɛma laki Rashɛlɛ. 34 La ntondo ka Labana ndjɔtɔ lo luudu la dipɛma laki Rashɛlɛ, Rashɛlɛ akɔshi mpingu yakɔ ya terafimɛ, akayidje lo kisaka kaki lo kamɛlɔ lo dihole diakandadjasɛka, ko akadjasɛ laadiko diayɔ. Ɔnkɔnɛ Labana akasɛngɛ lo luudu la dipɛma l’otondo, koko nde kondjiɛna. 35 Ko nde akatɛ she ate: “Tomomalɛke Ipa, nɛ dia dimi keema l’akoka wa memala dikambo lekɔ lo nshi yɛnami dikila.”+ Ɔnkɔnɛ, Labana akayangiayangia mpingu ya terafimɛ+ ahole tshɛ, koko nde kondjiɛna.

36 Ko Jakɔbɔ akomala ndo akahangwɛ Labana, ata ate: “Kɔlɔ kakɔna kamomosala ndo pɛkato kakɔna kamomosala dia wɛ mbitshana la mi la pedu k’efula nganɛ? 37 Shi wɛ ambɔsɛnga diangɔ diami tshɛ? Onde wɛ akɛnyi diangɔ diayɛ? Tondjadiɔ la ntondo k’anto ami ndo k’anto ayɛ kele watosambole. 38 Lo ɛnɔnyi 20 wakimi kaamɛ la yɛ, ndooko ɔkɔkɔ kana mbudi kayɛ kakatombe diemi+ ndo ndooko lushi lakamale ɛkɔkɔ w’oma lo dongalonga diayɛ. 39 Ndooko lushi lakamakela nyama kakalɛma oma le nyama ya ngala+ dikambo dimɛ lakayifutaka. Mbala tshɛ kakavamaka nyama kɛmɔtshi la yanyi kana l’otsho, wɛ akanɔmbaka dia dimi nsɔmbɔla. 40 Lakakɔmamaka tanyi ta wolo, lakadiɛnɛka la tshitshi l’otsho ndo lakalalaka engondo.+ 41 Aya ɛnɔnyi 20 wemi lo luudu layɛ. Lakakokambɛ ɛnɔnyi 14 dikambo di’anayɛ 2 wa wamato ndo ɛnɔnyi 6 dikambo dia dongalonga diayɛ, koko wɛ akatshikitanya difuto diami mbala 10.+ 42 Otondongaka Nzambi ka papa,+ Nzambi k’Abrahama ndo Nzambi kele Isaka mbookaka wɔma*+ konsukɛmi, tshike wɛ otɔnkɛndja anya hwe. Nzambi akɛnyi asui ami ndo opipi w’anya ami, diakɔ diakandakohangwɛ l’otsho wa loyi.”+

43 Ko Labana akatɛ Jakɔbɔ ate: “Ana wa wamato anɛ anami mbewɔ, ana anɛ ekana ami mbewɔ, dongalonga nɛ diami mbediɔ ndo diangɔ nɛ tshɛ diɛnayɛ diami mbediɔ dimi la anami wa wamato. Onde dimi koka mbasalɛ vɔ la ana wambowota kɔlɔ? 44 Laasɔ yaka todje sheke dimi la yɛ, kele yɔ kayonge ɔmɛnyi lam’asaso.” 45 Ko Jakɔbɔ akɔshi dive dimɔtshi ndo akadiemɛ oko ekundji.+ 46 Oma laasɔ, Jakɔbɔ akatɛ anto waki la nde ate: “Nyɔtɔngɔnɛ ave!” Ko vɔ wakatɔngɔna ave ndo wakemɛ tota. Oma laasɔ, vɔ wakale mbo ya ndɛ laawɔ laadiko dia tota di’ave. 47 Labana akelɛ tota diakɔ di’ave ɔnɛ Jɛngara-Sahaduta.* Koko Jakɔbɔ akadielɛ ɔnɛ Ngalɛdɛ.*

48 Ko Labana akate ate: “Tota di’ave nɛ diekɔ ɔmɛnyi lam’asami la yɛ ɛlɔ.” Diakɔ diakandadiɔlɛ ɔnɛ Ngalɛdɛ+ 49 ndo Tshoto y’etangelo,* nɛ dia nde akate ate: “Jehowa atangɛke dia menda lam’asayɛ la mi naka hatoyɛnana. 50 Naka wɛ sɔkisha anami ndo naka wɛ ntshuka wadi akina laadiko di’anami wa wamato, eya dia Nzambi ayonga ɔmɛnyi lam’asayɛ la mi kaanga naka onto okina hɛnyi.” 51 Labana akatɛ Jakɔbɔ nto ate: “Tota di’ave ndo ekundji kamomemɛ oko djembetelo ya sheke yamomodja lam’asami la yɛ diɔ nɛ. 52 Tota di’ave nɛ diekɔ ɔmɛnyi ndo ekundji kɛnɛ kekɔ lo nshikikɛ+ dia handekanaki tota di’ave nɛ dia ndjokosalɛ kɔlɔ, ndo ɔnɛ wɛ halekanaki tota di’ave nɛ ndo ekundji kɛnɛ dia ndjonsalɛ kɔlɔ. 53 Nzambi ka Abrahama,+ Nzambi ka Nahɔra ndo Nzambi ka shɛwɔ kayale Osambodi aso.” Ko Jakɔbɔ akatshibe lo lokombo la Nzambi kele Isaka wa she mbookaka wɔma.*+

54 L’ɔkɔngɔ wa laasɔ, Jakɔbɔ akalambola olambo lo dikona diakɔ ndo akelɛ anto ande tshɛ dia vɔ ndɛ diangɔ laawɔ. Ko vɔ wakale ndo wakalale l’otsho ɔsɔ lo dikona diakɔ. 55 Ko Labana aketɔ la pindju ka pɛɛ, akasha ekana*+ ande bizɛ ndo akaatshɔkɔla.+ Oma laasɔ Labana akonɛɛ, ko akakalola lakande.+

32 Jakɔbɔ akatetemala la lɔkɛndɔ, ko andjelo wa Nzambi wakahomana la nde. 2 Kam’akandawaɛnyi, Jakɔbɔ akate ate: “Ɔnɛ mpango kaki Nzambi!” Ko nde akɔlɛ dihole diakɔ ɔnɛ Mahanayima.*

3 Oma laasɔ, Jakɔbɔ akatome akɛndji la ntondo kande le Esao ɔnango lo wodja wa Seirɛ,+ l’ɛtshi ka nkɛtɛ* ka Ɛdɔmɛ,+ 4 ndo nde akawadjangɛ ate: “Nyotote nkumɛmi Esao nyate: ‘Okambi ayɛ Jakɔbɔ ate: “Lambodjasɛ* la Labana edja efula.+ 5 Lambokondja ngɔmbɛ, mponda, ɛkɔkɔ, ekambi w’apami ndo ekambi wa wamato.+ Lambokotomɛ dikɛndji nɛ dia kɔlɔmba wɛ nkumɛmi, dia dimi mpomɔ lokolo l’ɔlɔ lo washo ayɛ.”’”

6 L’ɔkɔngɔ diko, akɛndji wakakalola le Jakɔbɔ, wata vate: “Takahomanyi la Esao ɔnanyɔ, nde ekɔ lo ndjaye la apami 400 dia ndjohomana la yɛ.”+ 7 Ko Jakɔbɔ akoke wɔma efula ndo akayala la lonyangu.+ Ɔnkɔnɛ nde akaatola anto waki kaamɛ la nde, mbidja ndo ɛkɔkɔ, mbudi, ngɔmbɛ ndo kamɛlɔ lo elui 2. 8 Ko nde akate ate: “Naka Esao ndɔsha olui ɔmɔtshi, kete olui okina wayotshikala.”

9 Oma laasɔ, Jakɔbɔ akate ate: “Jehowa Nzambi ka tshɛmi Abrahama ndo Nzambi ka Isaka wa papa le, wɛ lambutɛ wate: ‘Kalola lo wodja ayɛ ndo le ewotɔ ayɛ ko dimi layokosalɛ ɔlɔlɔ,’+ 10 eemi mɛtɛ kakokayɛ mbokami ngandji ka kɔlamelo ndo monga la kɔlamelo le mi woho ɔnɛ, dimi okambi ayɛ?+ Nɛ dia lakatehɔ Jɔrdana lele paka la danga to, koko kakianɛ dimi ɔnɛ aya la elui 2 w’anto.+ 11 Lambokɔlɔmba+ dia wɛ shimbɛmi oma l’anya wa Esao ɔnalengo, nɛ dia lekɔ lo mboka wɔma dia nde mbeyaka ndjɔndɔsha+ dimi la wamato anɛ la anawɔ. 12 Ndo wɛ akate wate: ‘Layokosalɛ ɔlɔlɔ ndo layetɛ tokanula* tayɛ efula oko nsɛkɛ ya lɔkɔngɔ la lo ndjale yaheyama mbadia.’”+

13 Nde akalale laawɔ. Oma laasɔ, nde akɔshi dongalonga diande dimɔtshi, ko akatomɛ Esao ɔnango+ woshasha ɔnɛ: 14 Mbudi 200 ya wadi ndo weombe wa mbudi 20, ɛkɔkɔ 200 wa wadi ndo ɛkɔkɔ 20 wa waomi, 15 kamɛlɔ 30 yakalɔnyaka anayɔ, ngɔmbɛ ya wadi 40 ndo ngɔmbɛ ya waomi 10, mponda ya wadi 20 ndo mponda+ ya waomi 10.

16 Nde akayisha ekambi ande olui la olui, ko nde akatɛ ekambi ande ate: “Nyotehɔ la ntondo kami ndo kanyokakitɔne lam’asa olui la olui.” 17 Ndo nto, nde akatɛ olui wa ntondo ate: “Naka nyambohomana la Esao ɔnalengo ko nde ambonyombola ate: ‘Anto waki na wenyu, otsha lende atanyatshu ndo akanga dongalonga diatatshu la nyu nɛ?’ 18 Kanyowote nyate: ‘Diaki okambi ayɛ Jakɔbɔ. Nde amboditomɛ nkumɛmi Esao+ oko woshasha ndo ndamɛ ekɔ lo ndjaye l’ɔkɔngɔ aso.’” 19 Nde akatɛ ndo olui wa 2, wa 3 ndo elui ekina tshɛ wakayele ate: “Ngasɔ mbayonyototɛ Esao lam’ayonyohomana la nde. 20 Kanyowote nto nyate: ‘Jakɔbɔ okambi ayɛ nde ongo ayaye l’ɔkɔngɔ aso.’” Nɛ dia nde akate l’otema ande ate: ‘Naka dimi mbɔlɛndja otema lo mbotomɛ weshasha la ntondo,+ kete lam’ayomoyɛnana la nde, nde mbeyaka nongolami dimɛna.’ 21 Ko ekambi ande wakete la ntondo kande la weshasha, koko ndamɛ akalale lo mpango l’otsho ɔsɔ.

22 L’otsho ɔsɔ, nde aketɔ, akɔshi wadiɛnde+ 2 la ekambi ande wa wamato+ 2 kaamɛ la anande 11, ko wakatehɔ Jabɔka+ lo dihole diatehɔwɔ l’ekolo. 23 Ko nde akawaɔshi, akaatehoya kiɔkɔ y’ashi ndo akatehoya diangɔ tshɛ diaki la nde.

24 Ɔnkɔnɛ Jakɔbɔ akatshikala ndamɛ. Oma laasɔ, pami kɛmɔtshi akatatɛ mbɔlɔsha polo la pindju.+ 25 Lam’akandɛnyi dia nde halɛndjisha Jakɔbɔ, nde akookimɛ l’oshisha w’ɛhɛlɔhɛlɔ, ko oshisha w’ɛhɛlɔhɛlɔ ka Jakɔbɔ wakamɔ oma lo dihole diawɔ etena kakandalɔka la nde.+ 26 Oma laasɔ, pami kakɔ akate ate: “Onkimɔ ntshu, nɛ dia wonya wambohotɔ.” Ko Jakɔbɔ akate ate: “Wɛ hatotshɔ paka wɛ ambɔntshɔkɔla.”+ 27 Nde akawombola ate: “Lokombo layɛ?” Ko nde akookadimola ate: “Jakɔbɔ.” 28 Oma laasɔ, nde akate ate: “Lokombo layɛ laya bu Jakɔbɔ, koko laya Isariyɛlɛ,*+ nɛ dia wɛ ambɔlɔ la Nzambi+ ndo l’anto, ko wɛ ambɔlɛndja.” 29 Ko Jakɔbɔ nde lawɔ akawombola ate: “Ko wɛ lokombo layɛ, lam’alangayɛ?” Koko nde akate ate: “Lande na kamimbolayɛ lokombo lami?”+ Oma laasɔ, nde akɔɔtshɔkɔla laawɔ. 30 Ɔnkɔnɛ, Jakɔbɔ akɔlɛ dihole diakɔ ɔnɛ Peniɛlɛ,*+ nɛ dia nde akate ate: “Dimi lambɛnana la Nzambi* elungi l’elungi, koko lambotshikala la lɔsɛnɔ.”*+

31 Ko wonya wakoohotwɛ kam’akandalekana Penuɛlɛ,* koko nde akatatɛngunaka l’ɔtɛ w’ɛhɛlɔhɛlɔ kande.+ 32 Diakɔ diele ana w’Isariyɛlɛ bu la mbekelo ka ndɛ eshisha w’ɛhɛlɔhɛlɔ wele lo sɔnga di’ɛhɛlɔhɛlɔ polo ndo lushi l’ɛlɔ, nɛ dia pami kakɔ akananda oshisha wa lo sɔnga di’ɛhɛlɔhɛlɔ ka Jakɔbɔ.

33 Jakɔbɔ akedia washo, ko akɛnyi Esao ayaye la apami 400 waki kaamɛ la nde.+ Ko nde akasha Lea anande, Rashɛlɛ ɔnande ndo ekambi ande 2 wa wamato+ anawɔ. 2 Nde aketsha ekambi wa wamato l’anawɔ la ntondo.+ Oma laasɔ ko Lea l’anande,+ ko Rashɛlɛ+ la Yɔsɛfu l’ɔkɔngɔ awɔ. 3 Nde ndamɛ akete la ntondo kawɔ, ndo lam’akandakome suke l’ɔnango, nde akakusama la nkɛtɛ mbala 7.

4 Esao akalawɔ dia ndjoolongola, akookumbatɛ, akashana la nde bizɛ, ko vɔ akɔ 2 wakatondɔ la delo. 5 Lam’akandanyola ɔtɛ ndo lam’akandɛnyi wamato l’anawɔ, nde akate ate: “Waa na wayaye la yɛ anɛ?” Nde akookadimola ate: “Ana wambosha Nzambi okambi ayɛ.”+ 6 Ko ekambi wa wamato wakete la ntondo vɔ l’anawɔ ndo wakakusama. 7 Lea nde lawɔ akete la ntondo nde l’anande, ko wakakusama. L’ɔkɔngɔ diko, Yɔsɛfu akete la ntondo nde la Rashɛlɛ, ko wakakusama.+

8 Esao akawombola ate: “Lande na kakayatomi anto wakahomanyi la mi+ kaamɛ la dongalonga?” Nde akookadimola ate: “Dia dimi mpomɔ lokolo l’ɔlɔ lo washo wa nkumɛmi.”+ 9 Esao akate ate: “Dimi lekɔ la diangɔ efula, ɔnalengo.+ Tshikala la diangɔ diayɛ.” 10 Koko Jakɔbɔ akate ate: “Keema. Lam’alangayɛ, naka lambohomɔ lokolo l’ɔlɔ lo washo ayɛ, kete ɔsa weshasha w’oma le mi, nɛ dia lakakelawɔ la oyango wa dimi mɛna elungi kayɛ. Dimi lambɛna elungi kayɛ oko onto lambɛna elungi ka Nzambi, dikambo wɛ ambonongola l’ɔngɛnɔngɛnɔ.+ 11 Lam’alangayɛ, ɔsa weshasha wakamakela+ dia kɔtshɔkɔla, nɛ dia Nzambi ambompomuya lokolo l’ɔlɔ ndo lekɔ la kɛnɛ tshɛ kele la mi ohomba.”+ Nde akatetemala mbɔsɛngasɛnga, ko nde akayolongola.

12 L’ɔkɔngɔ diko, Esao akate ate: “Nyɛsɔ totshu, ndo nyontshike dimi mbete la ntondo kanyu.” 13 Koko nde akawotɛ ate: “Nkumɛmi, wɛ mbeyaka dia anami weke akɛnda+ ndo lekɔ lo ndjaye l’ɛkɔkɔ kaamɛ la ngɔmbɛ yalɔnya ana. Naka sho ntshɔ la yɔ lowango lowango lushi 1, kete dongalonga tshɛ diayovɔ. 14 Nkumɛmi le, lambokɔsɛngasɛnga dia wɛ mbeta la ntondo k’okambi ayɛ, koko dimi layoyayaka ɔkɔkɛ ɔkɔkɛ lo lɔkɛndɔ la dongalonga ndo lo lɔkɛndɔ l’anami, polo lam’ayomokoma le nkumɛmi la Seirɛ.”+ 15 Ko Esao akate ate: “Lam’alangayɛ, etawɔ dimi kotshikɛ anto ami amɔtshi.” Nde akate ate: “Lam’alangayɛ, wɛ nkumɛmi, naka lambohomɔ lokolo l’ɔlɔ lo washo ayɛ, toyaɛnyake paa.” 16 Ɔnkɔnɛ lushi lɔsɔ, Esao akakalola otsha la Seirɛ.

17 Ko Jakɔbɔ akatshu otsha la Sukɔta,+ akatoka luudu lande ndo akatokɛ dongalonga diande lokoto. Diakɔ diakandɔlɛ dihole sɔ ɔnɛ Sukɔta.*

18 L’ɔkɔngɔ wa nde minda lɔkɛndɔ oma la Padana-Arama,+ Jakɔbɔ akakome demba ki l’osomba wa Shɛkɛmɛ+ lo wodja wa Kanana,+ ko nde akatohanga suke l’osomba akɔ. 19 Oma laasɔ, nde akasombe ɛtshi ka nkɛtɛ oma le ana wa Hamɔra, she Shɛkɛmɛ la falanga y’ekenga+ 100, ko nde akake luudu lande la dipɛma laawɔ. 20 Nde akasale elambwelo laawɔ ko akakiɔlɛ ɔnɛ Nzambi, Nzambi k’Isariyɛlɛ.+

34 L’etena kɛsɔ, Dina dia ɔna Lea+ lakandote la Jakɔbɔ aki la mbekelo ka tombaka dia tetshaka wenya kaamɛ* la esekaseka wa l’ɛtshi ka nkɛtɛ kɛsɔ.+ 2 Lushi lɔmɔtshi, lam’akawɛnyi Shɛkɛmɛ ɔna Hamɔra ose Hiti+ laki owandji w’ɛtshi ka nkɛtɛ kɛsɔ, nde akawonde ndo akeyana la nde la wolo. 3 Nde* akayasha efula le Dina ɔna Jakɔbɔ, akoolange woho w’anyanya ndo akawotɛka ɛtɛkɛta wa mpɛ.* 4 L’ɔkɔngɔ diko, Shɛkɛmɛ akayotɛ Hamɔra+ wa she ate: “Ontshukee osekaseka ongo.”

5 Etena kakoke Jakɔbɔ dia Shɛkɛmɛ ambolanya ɔnande Dina, anande w’apami komonga laawɔ. Vɔ wakalamaka dongalonga l’oswe. Ɔnkɔnɛ, Jakɔbɔ kɔɔtɛkɛta polo ndo lam’akawakalola. 6 L’ɔkɔngɔ diko, Hamɔra she Shɛkɛmɛ akayotshɔ tosawola la Jakɔbɔ. 7 Ana wa Jakɔbɔ wakoke lokumu lɔsɔ, ko wakakalola esadi oma lɛnɛ akawalamaka dongalonga. Vɔ wakanyange ndo wakadunganɛ la nkɛlɛ dikambo Shɛkɛmɛ akasha Isariyɛlɛ nsɔnyi lo mbetama la ɔnande la womoto.+ Le wɔ, dikambo sɔ kokoka salema kaanga yema tshitshɛ.+

8 Hamɔra akawatɛ ate: “Shɛkɛmɛ ɔnami nangaka ɔnanyu la womoto woho w’anyanya. Lam’alanganyu, nyowoshande wadi 9 kele todje sheke ya tshukanaka lam’asaso. Sho katotshukake ananyu wa wamato ndo nyu kanyotshukake+ anaso wa wamato. 10 Nyu mbeyaka mbidjasɛ kaamɛ la so, ndo nkɛtɛ yɔ nyɛ tayonyoshayɔ. Nyodjasɛ, nyonde okanda ndo nyoshikimale lanɛ.” 11 Ko Shɛkɛmɛ akatɛ she Dina la anango ate: “Nyetawɔ dia dimi mpomɔ lokolo l’ɔlɔ lo washo anyu, ko dimi layonyosha kɛnɛ tshɛ kayonyɔnɔmba. 12 Nyɔnɔmbɛ okundji w’efula ndo weshasha,+ nɛ dia dimi lekɔ suke dia nyosha kɛnɛ tshɛ kayonyɔnɔmba. Ohomba ko nyu mbishaminde wadi.”

13 Ko ana wa Jakɔbɔ wakakadimola Shɛkɛmɛ nde la Hamɔra wa she la lokeso, dikambo Shɛkɛmɛ akalanya Dina dia kadiyɛwɔ. 14 Vɔ wakawatɛ vate: “Hatokoke nsala dikambo sɔ ndo ntshukanya kadiyɛso la pami kahatanya mpota,*+ nɛ dia ɔsɔ ekɔ dikambo dia nsɔnyi le so. 15 Dia sho nyoshande, paka nyu mbongi oko sho lo minya apami anyu tshɛ mpota.+ 16 Naka nyu nsala ngasɔ, kete nyayotshukaka anaso wa wamato ndo sho tayotshukaka ananyu wa wamato. Tayodjasɛ kaamɛ la nyu, ko tayonga wodja 1. 17 Ko naka hanyolange tohokamɛ ndo hanyolange minya mpota, kete tayanga mbɔsa kosɛso, ko sho ntshɔ.”

18 Ɛtɛkɛta ɛsɔ wakangɛnyangɛnya Hamɔra+ nde la ɔnande Shɛkɛmɛ.+ 19 Shɛkɛmɛ akasale kɛnɛ kakawɔɔlɔmbɛ+ esadi esadi, dikambo nde akangɛnangɛnaka ɔna Jakɔbɔ la womoto. Shɛkɛmɛ mbakalekaka mbɔsama la nɛmɔ lo luudu la she.

20 Ɔnkɔnɛ, Hamɔra nde la ɔnande Shɛkɛmɛ wakatemala la soko di’osomba, ko wakatɛ apami wa l’osomba+ awɔ vate: 21 “Anto anɛ nangaka mbidjasɛ ki la so. Nyetawɔ dia vɔ mbidjasɛ kaamɛ la so ndo minda okanda, nɛ dia ahole wa vɔ mbidjasɛ wekɔ efula. Sho koka tshukaka anawɔ wa wamato ndo vɔ koka tshukaka anaso wa wamato.+ 22 Koko dia vɔ mbetawɔ mbidjasɛ kaamɛ la so, ko sho monga wodja 1, pami tshɛ l’atei aso pombaka minya mpota+ oko vɔ. 23 Shi naka sho nsala ngasɔ kete diangɔ diawɔ, ɔngɔnyi awɔ ndo dongalonga diawɔ diayonga diaso? Laasɔ, tosale kɛnɛ kakawatote dia vɔ mbidjasɛ kaamɛ la so.” 24 Wanɛ tshɛ wakatombaka oma lo soko di’osomba wakoke kɛnɛ kakawatɛ Hamɔra nde la ɔnande Shɛkɛmɛ. Ko apami tshɛ wakanya mpota, mbuta ate wanɛ tshɛ wakatombaka oma lo soko di’osomba.

25 Koko lushi la 3, lam’aki mpota yeke kandji, ana 2 wa Jakɔbɔ, Simɛyɔna la Lɛwi, anango Dina+ wakɔshi onto l’onto lokuwa la ta, wakɔtɔ lo osomba la shashimoya, ko wakadiake apami tshɛ.+ 26 Vɔ wakadiake Hamɔra la ɔnande Shɛkɛmɛ la lokuwa la ta, ko wakatondja Dina oma lo luudu la Shɛkɛmɛ ndo wakatshu la nde. 27 Ana akina waki Jakɔbɔ wakatshu l’osomba l’ɔkɔngɔ wa lɔnyɔi lɔsɔ, ko wakambe diangɔ dia l’osomba dikambo Shɛkɛmɛ akalanya kadiyɛwɔ.+ 28 Vɔ wakɔshi ɛkɔkɔ awɔ, ngɔmbɛ yawɔ, mponda yawɔ ndo kɛnɛ tshɛ kaki l’etei k’osomba ndo l’andja w’osomba. 29 Vɔ wakɔshi ndo diangɔ diawɔ tshɛ, wakande anawɔ w’akɛnda ndo wadiɛwɔ mfumbe ndo wakambe diangɔ tshɛ diaki lo mvudu yawɔ.

30 Ko Jakɔbɔ akatɛ Simɛyɔna la Lɛwi+ ate: “Nyambonyangɛ okakatanu wa mamba lo woho wambonyokonya ase nkɛtɛ nyɛ, mbuta ate ase Kanana ndo ase Perizi dia vɔ petshami. Lam’ele anto angana ato mbele la mi, ndooko onyake vɔ wayosangana, wayɔndɔsha, ko wayotoshila oshiki dimi l’anto wa lo luudu lami.” 31 Vɔ wakookadimola vate: “Onde laasɔ kadiyɛso ɔsame oko womoto la numba?”

35 Oma laasɔ, Nzambi akatɛ Jakɔbɔ ate: “Emala kele tshɔka la Bɛtɛlɛ+ todjasɛ lɛkɔ ndo tosale elambwelo lɛkɔ dikambo dia Nzambi ka mɛtɛ kakɛnama le yɛ etena kakayatalawɔka Esao ɔnanyɔ.”+

2 Ko Jakɔbɔ akatɛ ase luudu lande ndo anto tshɛ waki kaamɛ la nde ate: “Nyonya tozambizambi t’ase wedja tele l’atei anyu,+ nyoyaɛdia ndo nyengole ahɔndɔ anyu, 3 nyɛsɔ tonee kele totshu otsha la Bɛtɛlɛ. Lɛkɔ kahombami tosala elambwelo dikambo dia Nzambi ka mɛtɛ kakoke ɛsɛngɔsɛngɔ ami lushi lakimi l’ɔkɛyi ndo kaki kaamɛ la mi dihole tshɛ diakamatshu.”+ 4 Ko vɔ wakasha Jakɔbɔ tozambizambi t’ase wedja taki la wɔ ndo azama waki l’atoyi awɔ, ko Jakɔbɔ akakundɛ* l’ɛse k’osongo wa woke waki suke la Shɛkɛmɛ.

5 Lam’akawonɛɛ, esomba waki suke la wɔ wakandama la wɔma wa Nzambi. Ɔnkɔnɛ vɔ kondjelana l’ana waki Jakɔbɔ. 6 L’edjedja ka wonya, Jakɔbɔ akakome la Luza,+ mbuta ate Bɛtɛlɛ lo wodja wa Kanana nde l’anto tshɛ waki la nde. 7 Ko nde akasale elambwelo laawɔ ndo akakiɔlɛ ɔnɛ Ɛlɛ-Bɛtɛlɛ,* nɛ dia Nzambi ka mɛtɛ akayashola le nde laawɔ etena kakandatalawɔka ɔnango.+ 8 Oma laasɔ, Dɛbɔra+ lakalɔnya Rɛbɛka akavu, ko wakookundɛ suke la Bɛtɛlɛ l’ɛse k’osongo wa ɔakɛ. Ko nde akawɔlɛ ɔnɛ Alɔnɛ-Bakutɛ.*

9 Nzambi akɛnama le Jakɔbɔ nto etena kakandayayaka oma la Padana-Arama ndo akɔɔtshɔkɔla. 10 Ko Nzambi akawotɛ ate: “Lokombo layɛ Jakɔbɔ.+ Lokombo layɛ laya bu Jakɔbɔ, koko lokombo layɛ laya Isariyɛlɛ.” Ko nde akatatɛ mbeelɛ Isariyɛlɛ.+ 11 Nzambi akawotɛ nto ate: “Dimi kele Nzambi Kanga-Wolo-Tshɛ.+ Otanɛ ndo fulanɛ. Wɛ+ ayonga she wedja, ɛɛ she wedja efula ndo nkumi ya dikanga yayotomba oma le yɛ.+ 12 Dimi layokosha nkɛtɛ yakamasha Abrahama la Isaka ndo dimi layosha tokanula* tayɛ nkɛtɛ yakɔ.”+ 13 Oma laasɔ, Nzambi akamɔ oma lo dihole diakandatɛkɛtaka la nde, ko akootshike.

14 Ɔnkɔnɛ, Jakɔbɔ akasale ekundji ka dive lo dihole diakandatɛkɛta la nde, ko nde akatɛ olambo wa lotɛ laadiko diawɔ+ ndo akatɛ esɔ lɔkɔ. 15 Jakɔbɔ akelɛ nto dihole diakatɛkɛta Nzambi la nde ɔnɛ Bɛtɛlɛ.+

16 Ko vɔ wakonɛɛ oma la Bɛtɛlɛ. Lam’akiwɔ weke etale la ntondo ka vɔ nkoma la Efarata, Rashɛlɛ akatatɛ ntata lɔɔnɔ ndo lɔɔnɔ lakooheke wolo efula. 17 Koko lam’akandasalaka tshɛ dia mbota, ɔnɛ lakawotshaka akawotɛ ate: “Tokake wɔma, nɛ dia wɛ ayanga mbota ɔna pami okina.”+ 18 Lam’akinde suke la nkitshiya lomu, (dikambo nde aki otavu) nde akɔlɛ ɔnakɔ Bɛnɛ-Ɔni.* Koko she akawɔlɛ ɔnɛ Bɛnjamina.*+ 19 Ko Rashɛlɛ akavu ndo wakookundɛ lo mboka k’otsha l’Efarata, mbuta ate Bɛtɛlɛhɛma.+ 20 Jakɔbɔ akahike ekundji laadiko dia diombo. Tɔ kekɔ ekundji ka diombo dia Rashɛlɛ polo ndo ɛlɔ.

21 L’ɔkɔngɔ wa laasɔ, Isariyɛlɛ akatetemala la lɔkɛndɔ lande, ko akatoka luudu lande la dipɛma la wedi wa tshoto ya Edɛrɛ. 22 Mbala kɛmɔtshi, lam’aki Isariyɛlɛ eke lo ɛtshi ka nkɛtɛ kɛsɔ, Rubɛna akateyana la Biliha, oseka wa she, ko Isariyɛlɛ akeye dikambo diakɔ.+

Jakɔbɔ aki l’ana w’apami 12. 23 Ana w’apami wakote Jakɔbɔ la Lea vɔ anɛ: Rubɛna+ mbaki enondo, ko Simɛyɔna, Lɛwi, Juda, Isakara ndo Zebuluna. 24 Ana wakandote la Rashɛlɛ vɔ anɛ: Yɔsɛfu la Bɛnjamina. 25 Ana wakandote la Biliha, okambi wa womoto waki Rashɛlɛ vɔ anɛ: Danɛ la Nafɛtali. 26 Ana wakandote la Zilipa, okambi wa womoto waki Lea vɔ anɛ: Ngada la Ashɛrɛ. Wasɔ mbele ana w’apami waki Jakɔbɔ wakandote lam’akinde la Padana-Arama.

27 L’edjedja ka wonya, Jakɔbɔ akakome lɛnɛ aki Isaka wa she la Mamarɛ,+ la Kiriatɛ-Arba, mbuta ate la Hɛbɛrɔna, lɛnɛ akadjasɛ Abrahama nde la Isaka oko angɛndangɛnda.+ 28 Isaka akasɛnɛ ɛnɔnyi+ 180. 29 Oma laasɔ, Isaka akavu aya osombe, ambondoya andja, ndo akayele watshɛnde* ko anande, Esao la Jakɔbɔ wakookundɛ.+

36 Ɔkɔndɔ waki Esao, mbuta ate Ɛdɔmɛ+ vɔ ɔnɛ:

2 Esao akatshuke wadi anɛ l’atei w’ana wa wamato w’ase Kanana: Ada+ ɔna Elɔna ose Hiti,+ Oholibama+ ɔna Ana, okana waki Zibeɔna ose Hiti, 3 ndo Basɛmatɛ+ ɔna Ishimaɛlɛ, kadiyɔ aki Nebayɔta.+

4 Ada akote la Esao Elifazɛ, Basɛmatɛ akote Ruɛlɛ, 5 Oholibama akote Jeushɛ, Jalama ndo Kɔra.+

Wasɔ mbele ana w’apami wakote Esao lo wodja wa Kanana. 6 Oma laasɔ, Esao akɔshi wadiɛnde, anande w’apami la wa wamato, ase* luudu lande tshɛ, ngɔmbɛ yande ndo nyama yande nkina tshɛ, mbidja ndo ɛngɔnyi tshɛ wakandakondja+ lo wodja wa Kanana, ko nde akatshu otsha lo ɛtshi ka nkɛtɛ kekina mangana etale la Jakɔbɔ ɔnango,+ 7 nɛ dia diangɔ diawɔ diakayala efula ka mamba, diakɔ diele takawakoke mbidjasɛ kaamɛ ndo ɛtshi ka nkɛtɛ kakawadjasɛka kokoka dia vɔ tshɛ mbidjasɛ* la dongalonga diawɔ. 8 Ko Esao akatodjasɛ lo lɛkɛ l’akona wa Seirɛ.+ Esao mbelamɛka nto Ɛdɔmɛ.+

9 Ɔkɔndɔ wa Esao, lɔtshɛtshɛ l’ase Ɛdɔmɛ lo lɛkɛ l’akona wa Seirɛ+ vɔ ɔnɛ:

10 Nkombo y’ana w’apami wa Esao yɔ nyɛ: Elifazɛ ɔna Ada wa wadi aki Esao, Ruɛlɛ ɔna Basɛmatɛ wadi aki Esao.+

11 Ana w’apami wa Elifazɛ vɔ anɛ: Temana,+ Ɔmara, Zefo, Ngatama ndo Kenazɛ.+ 12 Timina akayala oseka wa Elifazɛ ɔna Esao. Nde akayota la Elifazɛ Amalɛka.+ Wasɔ mbele ekana wa Ada wadi aki Esao.

13 Ana w’apami wa Ruɛlɛ vɔ anɛ: Nahata, Zera, Shama ndo Miza. Wasɔ mbele ekana wa Basɛmatɛ+ wadi aki Esao.

14 Ana w’apami wa Oholibama wakandote la Esao vɔ anɛ: Jeushɛ, Jalama ndo Kɔra. Oholibama aki ɔnaki Ana ndo okana wa Zibeɔna.

15 Ewandji* w’ana wa Esao vɔ ɛnɛ: Ana w’apami wa Elifazɛ, ɔna l’enondo laki Esao:+ Owandji Temana, owandji Ɔmara, owandji Zefo, owandji Kenazɛ,+ 16 owandji Kɔra, owandji Ngatama ndo owandji Amalɛka. Wasɔ mbele ewandji wakote Elifazɛ+ lo nkɛtɛ ya Ɛdɔmɛ. Vɔ mbele ekana waki Ada.

17 Ana w’apami wa Ruɛlɛ ɔnaki Esao vɔ anɛ: Owandji Nahata, owandji Zera, owandji Shama ndo owandji Miza. Wasɔ mbele ewandji wakote Ruɛlɛ lo nkɛtɛ ya Ɛdɔmɛ.+ Vɔ mbele ekana waki Basɛmatɛ wadi aki Esao.

18 Ana w’apami wa Oholibama wa wadi aki Esao vɔ anɛ: Owandji Jeushɛ, owandji Jalama ndo owandji Kɔra. Wasɔ mbele ewandji wakote Oholibama ɔnaki Ana ndo wadi aki Esao.

19 Wasɔ mbele ana w’apami wa Esao, mbuta ate Ɛdɔmɛ+ ndo ewandji awɔ wa nkumbo.

20 Ana w’apami wa Seirɛ ose Hɔri, akanga wa nkɛtɛ+ vɔ anɛ: Lɔtana, Shobala, Zibeɔna, Ana,+ 21 Dishɔna, Ezɛrɛ ndo Dishana.+ Wasɔ mbele ewandji w’ase Hɔri, ana waki Seirɛ lo nkɛtɛ ya Ɛdɔmɛ.

22 Hɔri nde la Hemama mbaki ana wa Lɔtana. Timina+ mbaki kadiyɔ aki Lɔtana.

23 Ana w’apami wa Shobala vɔ anɛ: Alavanɛ, Manahata, Ebala, Shefo ndo Ɔnama.

24 Ana w’apami wa Zibeɔna+ vɔ anɛ: Aya nde la Ana. Ana ɔsɔ mbakatoshola tɛkɔ di’ashi wa dja l’oswe etena kakandatalamaka mponda yaki Zibeɔna ka she.

25 Ana waki Ana vɔ anɛ: Dishɔna nde la Oholibama ɔnande la womoto.

26 Ana w’apami wa Dishɔna vɔ anɛ: Hemidana, Eshibana, Itirana ndo Kɛrana.+

27 Ana w’apami wa Ezɛrɛ vɔ anɛ: Bilihana, Zavana ndo Akana.

28 Ana w’apami wa Dishana vɔ anɛ: Uzɛ nde la Arana.+

29 Ewandji w’ase Hɔri vɔ ɛnɛ: Owandji Lɔtana, owandji Shobala, owandji Zibeɔna, owandji Ana, 30 owandji Dishɔna, owandji Ezɛrɛ ndo owandji Dishana.+ Wasɔ mbele ewandji w’ase Hɔri wa lo nkɛtɛ ya Seirɛ.

31 Nkumi ya dikanga yakolɛ lo nkɛtɛ ya Ɛdɔmɛ+ la ntondo k’ase Isariyɛlɛ*+ monga la nkumekanga yɔ nyɛ: 32 Bɛla ɔna Beɔrɛ akolɛ l’Ɛdɔmɛ ndo osomba ande lokombo lawɔ Dinihaba. 33 Lam’akavu Bɛla, Jɔbaba ɔna Zera ose Bozɛra akatatɛ mbolɛ lo dihole diande. 34 Lam’akavu Jɔbaba, Hushama k’oma lo nkɛtɛ ya Temana akatatɛ mbolɛ lo dihole diande. 35 Lam’akavu Hushama, Hadada ɔna Bedada, ɔnɛ lakalɛndja Midiyana+ lo ɛtshi ka nkɛtɛ* ka Mɔaba akatatɛ mbolɛ lo dihole diande. Osomba ande lokombo lawɔ Aviti. 36 Lam’akavu Hadada, Samala ose Masɛrɛka akatatɛ mbolɛ lo dihole diande. 37 Lam’akavu Samala, Shaolo ose Rɛhɔbɔta suke la Ɔkɛdi akatatɛ mbolɛ lo dihole diande. 38 Lam’akavu Shaolo, Baala-Hanana ɔna Akɛbɔrɛ akatatɛ mbolɛ lo dihole diande. 39 Lam’akavu Baala-Hanana ɔna Akɛbɔrɛ, Hadara akatatɛ mbolɛ lo dihole diande. Osomba ande lokombo lawɔ Pau ndo wadɛnde lokombo lande Mɛhɛtabɛlɛ, ɔna Matɛrɛdɛ. Matɛrɛdɛ ɔna Mezahaba la womoto.

40 Ɔnkɔnɛ, nkombo y’ewandji wakote Esao lo ndjela nkumbo yawɔ ndo lo ndjela ahole awɔ yɔ nyɛ: Owandji Timina, owandji Alava, owandji Jɛtɛtɛ,+ 41 owandji Oholibama, owandji Ela, owandji Pinɔna, 42 owandji Kenazɛ, owandji Temana, owandji Mibizara, 43 owandji Mangadiyɛlɛ ndo owandji Irama. Wasɔ mbele ewandji w’ase Ɛdɔmɛ lo ndjela ahole wakawadjasɛka lo nkɛtɛ yawɔ.+ Vɔ mbele tokanula ta Esao, lɔtshɛtshɛ l’ase Ɛdɔmɛ.+

37 Jakɔbɔ akatetemala mbidjasɛ lo wodja wa Kanana, lɛnɛ akadjasɛka she oko ɔngɛndangɛnda.+

2 Ɔkɔndɔ wa Jakɔbɔ vɔ ɔnɛ:

Lam’aki Yɔsɛfu+ eke paka l’ɛnɔnyi 17, nde akatatɛ nama dongalonga+ kaamɛ l’ana wa Biliha+ ndo l’ana wa Zilipa,+ wadi wa she. Ko Yɔsɛfu akatɛ she awui wa kɔlɔ wakawasalaka. 3 Isariyɛlɛ akalangaka Yɔsɛfu oleki anande akina+ tshɛ, nɛ dia nde akayowota lo nshi yande y’osombe. Nde akɔɔtɛlɛ okutu wa laande.* 4 Lam’akɛnyi anango dia she mbolangaka mbaleka vɔ tshɛ, vɔ wakatatɛ mpetsha Yɔsɛfu ndo vɔ kokokaka nsawola la nde dimɛna.*

5 L’ɔkɔngɔ diko, Yɔsɛfu akayɛna dɔ, akadikɔndɔlɛ anango,+ ko vɔ wakayotana ɔkɔkɔ okina wa mbohetsha. 6 Nde akawatɛ ate: “Lam’alanganyu, nyohokame nyɔkɔndɔlɛ dɔ diakamɛnyi. 7 Sho takakelekaki dikanda dia nɛngɛsɛ l’oswe, mɛnyi ko ekanda kami kambemala ndo dikanda dianyu diambodinga ekanda kami ndo diambokikusamɛ.”+ 8 Ko anango wakawotɛ vate: “Laasɔ lo mɛtɛ kalangayɛ ndjaetɛ owandji aso+ ndo tahemɛ?” Ɔnkɔnɛ vɔ wakatane ɔkɔkɔ okina wa mbohetsha l’ɔtɛ wa dɔ diande ndo l’ɔtɛ wa kɛnɛ kakandawatɛ.

9 Oma laasɔ, nde akayɛna dɔ dikina, ko akadikɔndɔlɛ anango, ata ate: “Nyohokame dɔ dikina diakamɛnyi: Mbala kɛnɛ, wonya, ngɔndɔ la tɔɔtɔ 11 wakakusamaki la ntondo kami.”+ 10 Ko nde akatodikɔndɔlɛ she l’anango, ko she akoohangwɛ, ata ate: “Naa kitshimudi ya dɔ diayɛ sɔ? Onde dimi la nyɔ la ananyɔ tayokokusamɛ mɛtɛ?” 11 Anango wakawoke kandjema,+ koko she akalamaka awui asɔ lo yimba.

12 Anango wakatshu tolama dongalonga diaki shɛwɔ suke la Shɛkɛmɛ.+ 13 L’ɔkɔngɔ diko, Isariyɛlɛ akatɛ Yɔsɛfu ate: “Shi ananyɔ wekɔ lo nama dongalonga suke la Shɛkɛmɛ? Yaka kotome le wɔ.” Ko Yɔsɛfu akate ate: “Kawɔ!” 14 Ko nde akawotɛ ate: “Lam’alangayɛ, tshɔka tende kana ananyɔ wekɔ ki. Tende woho wele dongalonga kele koyombute.” Ko nde akonɛɛ oma l’okidi wa Hɛbɛrɔna+ ndo akatshu otsha la Shɛkɛmɛ. 15 L’ɔkɔngɔ diko, pami kɛmɔtshi akawɛnyi atekekɔ l’oswe. Ko pami kakɔ akawombola ate: “Ayangayɛ na?” 16 Ko nde akawotɛ ate: “Lekɔ lo tayange analengo. Lam’alangayɛ, onde wɛ mbeyaka lɛnɛ alamawɔ dongalonga?” 17 Pami kakɔ akawotɛ ate: “Vɔ wambomɔ lanɛ, dikambo lakawaoke wata vate: ‘Totshu otsha la Dɔtana.’” Ɔnkɔnɛ Yɔsɛfu akayele anango, ko akataatana la Dɔtana.

18 Vɔ wakawɛnyi oma lo tshalola, ndo la ntondo ka nde nkoma le wɔ, vɔ wakatatɛ mbɔtɔ sheke dia mbodiaka. 19 Ko wakatanɛ lam’asawɔ vate: “Ɔmɛnyi w’alɔ+ nde ongo ayaye. 20 Nyɛsɔ toodiake, towodje lo difuku di’ashi, kele katotote shate nyama ka ngala akawondji. Kele katende woho wayokomɛ alɔ ande.” 21 Lam’akoke Rubɛna+ ngasɔ, nde akayange dia mbohandja oma l’anya awɔ. Ko nde akate ate: “Tatoodiakake.”+ 22 Ko Rubɛna akawatɛ ate: “Tatɔkɛdiake dikila.+ Towodje lo difuku di’ashi diele l’oswe ɔnɛ ndo tatoosalɛke kɔlɔ.”*+ Oyango ande aki dia mbohandja oma l’anya awɔ ndo mbokaloya otsha le she.

23 Kam’akakome Yɔsɛfu lale anango, vɔ wakookolola okutu wa dimɛna wakandalɔtɛ,+ 24 ko wakootambiya lo difuku di’ashi. Etena kɛsɔ, difuku diakɔ komonga l’ashi.

25 Ko vɔ wakadjasɛ dia ndɛ. Lam’akawedia washo, wakɛnyi olui w’ase Ishimaɛlɛ+ wayaye oma lo Ngiliyadɛ lo pusupusu. Kamɛlɔ yawɔ yakayɛmbaka olembo wa ladanumɛ, balasama ndo mambo y’esongo.+ Vɔ wakatatshɔka otsha l’Edjibito. 26 Ko Juda akatɛ anango ate: “Wahɔ akɔna wayotokondja naka sho ndjaka ɔnangɛso ndo mbishɛ dikila+ diande? 27 Nyɛsɔ toosondja+ le ase Ishimaɛlɛ ndo tatoosalɛke kɔlɔ, nɛ dia sho la nde tekɔ onto l’ɔnango, dikila ɔtɔi.” Ko vɔ wakoke kɛnɛ kakawatɛ ɔnangɛwɔ. 28 Lam’akatetaka amundji w’okanda w’ase Midiyana,+ vɔ wakatondja Yɔsɛfu oma lo difuku ko wakoosondja le ase Ishimaɛlɛ la falanga ya mfɛsa+ 20. Ko apami asɔ wakatshu la Yɔsɛfu otsha l’Edjibito.

29 L’ɔkɔngɔ diko, etena kakayokalolaka Rubɛna lo difuku di’ashi ndo kakandɛnyi dia Yɔsɛfu aya bu lɔkɔ, nde akaatshatsha ahɔndɔ ande. 30 Lam’akandakalola le anango, nde akate ate: “Ɔna ɔnɛ amboshishɔ! Dimi ayomosala?”

31 Ko vɔ wakadiake wombe wa mbudi, ko wakatambiya okutu waki Yɔsɛfu lo dikila diawɔ. 32 Oma laasɔ, vɔ wakatomɛ shɛwɔ okutu akɔ wa laande ndo wakatowotɛ vate: “Takatanyi paka okutu ɔnɛ. Ohenda okutu ɔnɛ kana waki ɔnayɛ ko kana bu.”+ 33 Ko nde akasɛdingola okutu akɔ ndo akate ate: “Ɔnɛ okutu w’ɔnami! Weho akɔ tshɛ nyama ka ngala akandji Yɔsɛfu ndo akawatshatshisha!” 34 Ko Jakɔbɔ akaatshatsha ahɔndɔ ande, akalɔtɛ dikoto lo lokende ndo akalele ɔnande nshi efula. 35 Anande w’apami tshɛ la wa wamato tshɛ wakoosambaka, koko nde kombetawɔ esambelo kawɔ ndo akataka ate: “Dimi layotetemala ndela ɔnami polo lam’ayomotshɔ lo Diombo!”*+ Ko she akatetemala mbolela.

36 Ase Midiyana wakatoosondja l’Edjibito le Pɔtifara laki ɔlɔhɛ ndo owandji w’alami+ wa laka Farawɔ.+

38 L’etena kɛsɔ, Juda akakakitɔna la anango ndo akatoka luudu lande la dipɛma suke la Hira, pami kɛmɔtshi k’ose Adulama. 2 Lɛkɔ, Juda akatɛna ɔna womoto laki ose Kanana+ ɔmɔtshi, lokombo lande Shua. Nde akootshuke ndo akeyana la nde, 3 ko nde akatshu diemi ndo l’ɔkɔngɔ nde akayota ɔna pami, ko Juda akawɔlɛ Ɛrɛ.+ 4 Nde akatshu diemi nto, ko akote ɔna pami ndo akawɔlɛ Ɔnana. 5 Nde akayota ɔna pami nto ko akawɔlɛ Shɛla. Juda aki la Akizibɛ+ etena kakote wadɛnde ɔna ɔsɔ.

6 L’edjedja ka wonya, Juda akayotshukɛka Ɛrɛ, ɔnande l’enondo wadi, lokombo la womoto akɔ ko Tamara.+ 7 Koko Ɛrɛ ɔna Juda l’enondo kɔngɛnyangɛnyaka Jehowa, ko Jehowa akoodiake. 8 L’ɔtɛ wa dikambo sɔ, Juda akatɛ Ɔnana ate: “Eyana la wadi aki ɔnanyɔ ndo kitana la nde dia mbolola lohanga la ɔnanyɔ.”+ 9 Koko Ɔnana akeyaka dia ana wayotɔ hawotonga anande.+ Ɔnkɔnɛ, etena kakandeyanaka la wadi aki ɔnango, nde akakɔshaka alɔmi la nkɛtɛ diaha mbotɛ ɔnango ɔna.+ 10 Jehowa kɔngɛnangɛna kɛnɛ kakandasale kɛsɔ, ko nde akoodiake+ nde lawɔ. 11 Juda akatɛ Tamara wadi aki ɔnande ate: “Tshɔka todjasɛ lo luudu la shɔ oko wadi aki odo polo lam’ayola Shɛla ɔnami,” nɛ dia nde akataka ate: ‘Nde lawɔ mbeyaka ndjovɔ oko anango.’+ Ko Tamara akatshu, akatodjasɛ lo luudu la she.

12 L’ɔkɔngɔ w’etena kɛmɔtshi, ɔnaki Shua,+ mbuta ate wadi aki Juda akavu. Lam’akashile nshi ya otanda, Juda akatshu nde la Hira, ɔngɛnyi ande w’ose Adulama+ otsha la Timina+ dia tenda wanɛ wakahembolaka ɛkɔkɔ ande wɛɔsa. 13 Ko wakatɛ Tamara ɔnɛ: “Okilo ayɛ ekɔ lo tete otsha la Timina dia tohembola ɛkɔkɔ ande wɛɔsa.” 14 Ko nde akakolola ahɔndɔ ande wa wadi aki odo, akalɔtɛ dihɔndɔ dikina l’ahɛka ndo akayakombe kitambala ka woke, ko akadjasɛ lo mbɔtwɛlɔ ka Enaima wele lo mboka k’otsha la Timina, nɛ dia nde akɛnyi dia Shɛla ambola, koko hawowoshande dia nde monga omɛnde.+

15 Lam’akawɛnyi Juda, nde akawɔshi oko womoto la numba, nɛ dia nde akakombe elungi kande. 16 Ko nde akatshu le womoto akɔ l’omamu wa mboka ko akawotɛ ate: “Lam’alangayɛ, etawɔ dia dimi mbeyana la yɛ,” nɛ dia Juda kombeya dia ɔsɔ aki okilo ande.+ Koko womoto akɔ akate ate: “Ayoyontshinda dia wɛ mbeyana la mi?” 17 Ko Juda akawotɛ ate: “Layokotomɛ ɔsɔngɔ wa mbudi oma lo dongalonga diami.” Ko womoto akɔ akawombola ate: “Onde wɛ ayontshikɛ ɛngɔ kɛmɔtshi ɔkɔlɛ polo ndo lam’ayoyontomɛwɔ?” 18 Juda akawombola nto ate: “Alangayɛ dimi kotshikɛ ɔkɔlɛ?” Ko womoto akɔ akawotɛ ate: “Mpɛtɛ kayɛ ka ohomɔ+ la ɔkɔdi atɔ ndo danga diele lo lonya layɛ.” Ko nde akawosha diangɔ sɔ ndo akeyana la nde, ko womoto akɔ akatshu la nde diemi. 19 Oma laasɔ, nde akonɛɛ, akatshu ndo akatokolola ahɔndɔ wakandalɔtɛ, ko akatɔlɔta ahɔndɔ ande wa wadi aki odo.

20 Ko Juda akatome ɔsɔngɔ wa mbudi le ɔngɛnyi ande w’ose Adulama+ dia nde towɔsɛ diangɔ diakandatshike ɔkɔlɛ le womoto akɔ, koko nde kombotana. 21 Pami kakɔ akambola anto wa lo dihole diakɔ ate: “Lende ele womoto la numba ka lo tɛmpɛlɔ latongaka l’omamu wa mboka lanɛ la Enaima?” Ko vɔ wakawotɛ vate: “Lanɛ sho ndooko la womoto la numba.” 22 Ko pami kakɔ akakalola le Juda ndo akatowotɛ ate: “Dimi hambotanyi. Ndo nto, anto wa lo dihole sɔ vate: ‘Vɔ ndooko la womoto la numba ka lo tɛmpɛlɔ lo ngelo kakɔ.’” 23 Ko Juda akate ate: “Atshikale la diɔ diaha sho ndjoshisha nɛmɔ lo tayanganaka la nde. Kɛnɛ kele mɛtɛ ele, dimi lakootome ɔsɔngɔ wa mbudi ɔnɛ, koko wɛ hawotanyi.”

24 Ngɔndɔ oko 3 l’ɔkɔngɔ, wakayotɛ Juda ɔnɛ: “Tamara okilo ayɛ aya numba ndo ambotɛmba diemi lo kinumba kande.” Ko Juda akate ate: “Nyootondja l’andja kele nyoodiake ndo nyootshumbe.”+ 25 Lam’akawayawotondjaka, nde akatomɛ okilo ande dui ate: “Kanga diangɔ nɛ mbotshwe la mi diemi.” Nde akakotsha nto ate: “Lam’alangayɛ, enda kana wɛ ayeya kanga diangɔ nɛ: Mpɛtɛ ka ohomɔ la ɔkɔdi atɔ ndo danga.”+ 26 Ko Juda akende diangɔ sɔ ndo akate ate: “Nde kambɔsɔ, nɛ dia dimi kombosha Shɛla y’ɔnami.”+ Oma laasɔ, nde kombeyana la nde nto.

27 Lam’akakoke etena ka nde mbota, akayɛnama dia waasa mbele l’otema ande. 28 Lam’akandotaka, ɔna ɔmɔtshi akatondja lonya, ko ɔnɛ lakawotshaka akɔshi mbala kakɔ ɔtɔi oshinga wa beela, akakeleka lo lonya l’ɔnakɔ ndo akate ate: “Ɔnɛ kele omba.” 29 Koko, kam’akakaloya ɔna ɔsɔ lonya, ɔnango akatombe, ko ɔnɛ lakawotshaka akate la diambo tshɛ ate: “Ande mboka kamboyoyatɛ lɛ!” Ko wakawɔlɛ Perɛzɛ.+ 30 L’ɔkɔngɔ diko, ɔnango lakawakeleka oshinga wa beela lo lonya akayotomba, ko wakawɔlɛ Zera.+

39 Yɔsɛfu akatɔlama l’Edjibito,+ ko Pɔtifara+ ose Edjibito ɔmɔtshi laki ɔlɔhɛ ndo owandji w’alami wa laka Farawɔ akoosombe oma le aseka Ishimaɛlɛ+ wanɛ wakɔɔtɔlɛ lɛkɔ. 2 Koko Jehowa aki kaamɛ la Yɔsɛfu.+ Ɔnkɔnɛ, nde akatondoyaka lo kɛnɛ tshɛ kakandasalaka ndo nkumɛnde k’ose Edjibito akawetɛ owandji wa lo luudu lande. 3 Nkumɛnde akashihodia dia Jehowa aki kaamɛ la nde ndo dia Jehowa akatshɔkɔlaka kɛnɛ tshɛ kakandasalaka.

4 Yɔsɛfu akatetemala mpomɔ lokolo l’ɔlɔ lo washo ande ndo akayala olami wa diangɔ diande. Ɔnkɔnɛ nde akɔɔsɔnɛ owandji wa lo luudu lande ndo akawosha ɔkɛndɛ wa namaka diangɔ diande tshɛ. 5 Ntatɛ lam’akandawodje owandji wa lo luudu lande ndo lam’akandawosha ɔkɛndɛ wa namaka diangɔ diande tshɛ, Jehowa akatshɔkɔlaka luudu l’ose Edjibito ɔsɔ l’ɔtɛ wa Yɔsɛfu ndo Jehowa akatshɔkɔlaka kɛnɛ tshɛ kaki lo luudu lande ndo lo dikambɔ+ diande. 6 L’edjedja ka wonya, Pɔtifara akayoshaka Yɔsɛfu ɔkɛndɛ wa namaka diangɔ diande tshɛ. Nde kombidjaka yimba kaanga lo dikambo 1 laadiko dia mbo ya ndɛ yakandalɛka. Koko Yɔsɛfu akahame lo diema ndo lo olangala.

7 L’ɔkɔngɔ w’akambo asɔ, wadi aki nkumɛnde akatatɛ nkɔmiya Yɔsɛfu ko akawotɛ ate: “Yaka teyane.” 8 Koko nde akatone ndo akatɛ wadi aki nkumɛnde ate: “Nkumɛmi heye lofulo la diangɔ diele lo luudu lande ndo nde akambisha ɔkɛndɛ wa namaka diangɔ diande tshɛ. 9 Ndooko onto londeki lowandji lo luudu lɔnɛ ndo nde hanshimbe ndooko ɛngɔ, onyake paka wɛ, nɛ dia wɛ ekɔ wadɛnde. Laasɔ ngande wakokami nsala kɔlɔ ka woke kɛsɔ ndo salɛ Nzambi pɛkato?”+

10 Ɔnkɔnɛ, lushi la lushi nde akembiyaka Yɔsɛfu, koko nde kombetawɔ dia mbeyana la nde kana monga vɔ 2 ato edja. 11 Koko lushi lɔmɔtshi laki ndooko okambi okina lo luudu, Yɔsɛfu akɔtɔ lo luudu dia tosala olimu ande. 12 Ko womoto akɔ akookimɛ lo dihɔndɔ ndo akate ate: “Yaka teyane!” Ko Yɔsɛfu akatshike dihɔndɔ diande l’anya wa womoto akɔ ko akalawɔ otsha l’andja. 13 Kam’akandɛnyi dia Yɔsɛfu ambootshikɛ dihɔndɔ diande l’anya ko ambolawɔ otsha l’andja, 14 nde akatatɛ mbida ekoko dia mbelɛ ekambi ekina wa lo luudu lande, awatɛ ate: “Pami k’ose Hɛbɛru kakaye l’omɛmi kɛnɛ ambolanga tosha nsɔnyi. Nde akaye dia ndjeyana la mi la wolo, ko lakatate mbida ekoko la wolo ami tshɛ. 15 Kam’akandoki lambodiya dui ndo mbida ekoko, nde akatshiki dihɔndɔ diande lalemi ko akalawe otsha l’andja.” 16 L’ɔkɔngɔ wa laasɔ, nde akakitsha dihɔndɔ diakɔ suke la nde polo lam’akakalola Pɔtifara la ngelo.

17 Ko nde akawotɛ woho akɔ wamɛ ate: “Okambi w’ose Hɛbɛru wakayatela akaye ndjombisha nsɔnyi. 18 Koko kam’akamatate mbidiya dui ndo mbida ekoko, nde akatshiki dihɔndɔ diande lalemi ko akalawe otsha l’andja.” 19 Kam’akoke nkumɛnde wadɛnde awotɛ ate: “Kɛsɔ mbakansale okambi ayɛ,” nde akadunganɛ la nkɛlɛ. 20 Ko owandji waki Yɔsɛfu akawɔshi ndo akawodje lo lokanu, lɛnɛ akawadjaka wanɛ wakasalɛka nkumekanga kɔlɔ, ko nde akatshikala lɛkɔ lo lokanu.+

21 Koko Jehowa akatetemala monga kaamɛ la Yɔsɛfu ndo akatetemala mbɛnya ngandji kande ka kɔlamelo ndo akasale dia nde mpomɔ lokolo l’ɔlɔ lo washo wa owandji wa lokanu.+ 22 Ko owandji wa lokanu akasha Yɔsɛfu ɔkɛndɛ wa mendaka ase lokanu tshɛ ndo nde kakendaka kɛnɛ tshɛ kakasalemaka lɛkɔ.+ 23 Owandji wa lokanu kondjakiyanyaka kaanga yema lo dikambo dia diangɔ diakandasha Yɔsɛfu ɔkɛndɛ, nɛ dia Jehowa aki kaamɛ la Yɔsɛfu ndo Jehowa akatshɔkɔlaka kɛnɛ tshɛ kakandasalaka.+

40 L’ɔkɔngɔ w’akambo asɔ, kapita kakadjɛka nkumekanga wanu lo dikɔhɔ+ nde la kapita k’okatshi* wa mapa wa nkumekanga wakasalɛ nkumɛwɔ, nkumekanga k’Edjibito kɔlɔ. 2 Ko Farawɔ akomalɛ ekambi ande 2 ɛsɔ, mbuta ate kapita kakawodjɛka wanu lo dikɔhɔ nde la kapita k’okatshi wa mapa,+ 3 ndo nde akaakimɔ le owandji w’alami+ wa lokanu dia nde towadja lo lokanu+ lɛnɛ aki Yɔsɛfu. 4 Ko owandji w’alami akasha Yɔsɛfu ɔkɛndɛ wa mongaka kaamɛ la wɔ ndo mbakimanyiyaka.+ Vɔ wakatshikala lo lokanu l’edja k’etena* kɛmɔtshi.

5 Ɔnɛ lakadjɛka nkumekanga k’Edjibito wanu lo dikɔhɔ ndo ɔnɛ lakookatɛka mapa, wanɛ wakadjama lo lokanu, vɔ akɔ 2 wakɛnyi alɔ otsho akɔ waamɛ, ndo dɔ la dɔ diaki la kitshimudi yadiɔ. 6 La wedi a pindju, lam’akaye Yɔsɛfu ndjowaenda, nde akawaɛnyi la dungi di’ɔkɛyi. 7 Ko nde akambola ekambi waki Farawɔ waki lo lokanu kaamɛ la nde laka nkumɛnde ate: “Lande na kenyu la dungi di’ɔkɛyi nganɛ ɛlɔ?” 8 Vɔ wakawotɛ vate: “Sho akɔ 2 takɛnyi alɔ, koko ndooko onto latolembetshiyawɔ.” Ko Yɔsɛfu akawatɛ ate: “Onde aha Nzambi+ katolembetshiyaka alɔ? Lam’alanganyu, nyɔnkɔndɔlɛwɔ.”

9 Ɔnkɔnɛ, kapita kakadjɛka nkumekanga wanu lo dikɔhɔ akakɔndɔlɛ Yɔsɛfu dɔ diande, ata ate: “Lo dɔ diami, lakɛnyi ɔkɔdi wa vinyɔ la ntondo kami. 10 Ɔkɔdi akɔ wa vinyɔ waki la ntahe 3 ndo ntahe yakɔ yakamɔngi, yaki la alɛmbɔlɛmbɔ ndo sandji di’elowa wa lɔkɔ wambɛla. 11 Dimi laki la dikɔhɔ dia Farawɔ lo lonya lami, ko lakɔshi elowa akɔ ndo lakamudi lo dikɔhɔ diaki Farawɔ. Oma laasɔ, lakasha Farawɔ dikɔhɔ diakɔ.” 12 Ko Yɔsɛfu akawotɛ ate: “Kitshimudi ya dɔ diayɛ yɔ nyɛ: Ntahe 3 nembetshiyaka nshi 3. 13 L’ɔkɔngɔ wa nshi 3, Farawɔ ayokotondja,* ayokokaloya l’olimu ayɛ+ ndo wɛ ayoshaka Farawɔ dikɔhɔ dia wanu+ oko wakayawoshaka ntondo. 14 Koko, kotombohɔ lam’ayɔlɔngɔsɔma akambo le yɛ. Lam’alangayɛ, kɔmɛnya ngandji kayɛ ka kɔlamelo lo tɛkɛtɛmi le Farawɔ dia nde tondjami oma lo dihole nɛ. 15 Wakaminde la wolo oma lo nkɛtɛ y’ase Hɛbɛru+ ndo dimi kosala ndooko dikambo lanɛ diahombawɔ mbidjami lo lokanu.”*+

16 Lam’akɛnyi kapita k’okatshi wa mapa ɔnɛ Yɔsɛfu ambolembetshiya dimɛna, nde akawotɛ ate: “Dimi lawɔ lakɛnyi dɔ, ndo lo dɔ diakɔ lakatɛmbaka asaka 3 wa mapa wa wɛma l’ɔtɛ, 17 ndo weho tshɛ wa mbo ya ndɛ yatɔlɛka Farawɔ yaki lo saka dia la diko, ko tofudu takalɛki diangɔ diaki lo saka diaki kadiko di’ɔtɛ ami.” 18 Ko Yɔsɛfu akawotɛ ate: “Kitshimudi ya dɔ diayɛ yɔ nyɛ: Asaka 3 nembetshiyaka nshi 3. 19 L’ɔkɔngɔ wa nshi 3, Farawɔ ayokohembola ɔtɛ ndo ayokohanɛ l’otamba, ko tofudu tayɔlɛ emunyi ayɛ.”+

20 Lushi la 3 oma laasɔ aki lushi lakotɔ Farawɔ,+ ko nde akasale fɛtɛ dikambo dia ekambi ande tshɛ ndo akatondja* kapita kakawodjɛka wanu lo dikɔhɔ ndo kapita k’okatshi wa mapa la ntondo k’ekambi ande. 21 Ko nde akakaloya kapita kakawodjɛka wanu lo dikɔhɔ l’olimu ande wa mbidjaka wanu lo dikɔhɔ, ko nde akatetemala mbidjɛ Farawɔ wanu lo dikɔhɔ. 22 Koko nde akahanɛ kapita k’okatshi wa mapa l’otamba, oko wakate Yɔsɛfu.+ 23 Koko kapita kakawodjɛka wanu lo dikɔhɔ kombohɔ Yɔsɛfu, nde akawohɛ.+

41 L’ɔkɔngɔ w’ɛnɔnyi 2, Farawɔ akɛnyi lo dɔ+ nde emadi l’omamu w’ɔkɛdi wa Nilɛ. 2 Ko nde akɛnyi ngɔmbɛ 7 y’alemba amɛna ndo ya weke yayatombe oma l’ashi ko yɔ yakalɛka adiyo wa l’omamu wa Nilɛ.+ 3 Ngɔmbɛ nkina 7 ya wɛɔndju ndo ya kɔnyangakɔnyanga yakatombe l’ɔkɔngɔ ayɔ oma lo Nilɛ, ko yakayemala suke la ngɔmbɛ nkina y’alemba amɛna l’omamu wa Nilɛ. 4 Oma laasɔ, ngɔmbɛ ya wɛɔndju ndo ya kɔnyangakɔnyanga yakale ngɔmbɛ 7 y’alemba amɛna ndo ya weke. Ko Farawɔ akakashimɔ.

5 Nde akalale nto ko akɛnyi dɔ dia 2. Lo dɔ sɔ nde akɛnyi washa 7 w’eponga wa weke ndo w’amɛna+ wayatombe oma lo lɔlɛngɛsɛ 1. 6 Ko nde akɛnyi nto washa 7 w’eponga wa totshitshɛ ndo wamboma la lɔpɛpɛ l’oma lo ɛstɛ wayatombe l’ɔkɔngɔ awɔ. 7 Oma laasɔ, washa wa totshitshɛ wakatatɛ mɛna washa 7 wa weke ndo w’amɛna. Ko Farawɔ akakashimɔ ndo akashihodia dia dɔ mbɛnyinde.

8 Koko la pindju nde akatatɛ nkiyana lo lomu. Ɔnkɔnɛ, nde akatome dui dia vɔ mbelɛ ɛlɔmbɛdi tshɛ wakasalaka awui wa maji ndo ase tomba tshɛ wa l’Edjibito. Ko Farawɔ akaakɔndɔlɛ alɔ akɔ, koko ndooko onto l’atei awɔ lakakoke mbolembetshiyawɔ.

9 Ko kapita kakadjɛka Farawɔ wanu lo dikɔhɔ akawotɛ ate: “Ɛlɔ lambohɔ pɛkato ndo munga yami. 10 Lam’akayomalɛ ekambi ayɛ, wɛ owandji Farawɔ, wɛ akaakimɔ le owandji w’alami wa lokanu, mbuta ate dimi la kapita k’okatshi wa mapa.+ 11 Oma laasɔ, dimi la nde takɛnyi alɔ otsho waamɛ ndo dɔ la dɔ diaki la kitshimudi yadiɔ.+ 12 Diɛsɛ ko taki la ɔlɔngɔ ɔmɔtshi w’ose Hɛbɛru waki okambi wa owandji w’alami.+ Lam’akatɔɔkɔndɔlɛwɔ,+ nde akatolembetshiya onto l’onto dɔ diande. 13 Akambo wakayosalema paka oko wakandatolembetshiya. Dimi lakakaloyama l’olimu ami, koko kapita k’okatshi wa mapa akahanema l’otamba.”+

14 Ko Farawɔ akatome dui dia vɔ totondja Yɔsɛfu+ esadi esadi oma lo lokanu.*+ Ko Yɔsɛfu akanya divo la ndɛdu ndo akengola ahɔndɔ ande ko akatshu le Farawɔ. 15 Farawɔ akatɛ Yɔsɛfu ate: “Dimi lakɛnyi dɔ koko ndooko onto lele l’akoka wa nembetshiyamidiɔ. Lakoki wata dia wɛ ekɔ l’akoka wa onto kotɛ dɔ diande ko wɛ mbolembetshiyadiɔ.”+ 16 Ko Yɔsɛfu akakadimola Farawɔ ate: “Aha dimi, koko Nzambi kayokewoya awui wendana la ɔlɔlɔ ayɛ, wɛ Farawɔ.”+

17 Farawɔ akatɛ Yɔsɛfu ate: “Dimi lakɛnyi lo dɔ lemadi l’omamu wa ɔkɛdi wa Nilɛ. 18 Mɛnyi ko ngɔmbɛ 7 y’alemba amɛna ndo ya weke, ko yɔ yakatatɛ ndɛ adiyo wa l’omamu wa Nilɛ.+ 19 Oma laasɔ mɛnyi ko ngɔmbɛ nkina 7 ya kɔlɔ, ya wɛɔndju ndo ya kɔnyangakɔnyanga yayatombe l’ɔkɔngɔ ayɔ. Latɛnaka ngɔmbɛ ya kɔlɔ ya ngasɔ lo wodja w’Edjibito w’otondo. 20 Ko ngɔmbɛ ya wɛɔndju yakale ngɔmbɛ ya weke 7 yakamɛnyi ntondo. 21 Koko lam’akawashidiya ndjilɛ, ndooko onto lakakoke mbeya dia yɔ yakale ngɔmbɛ ya weke shɔ, nɛ dia yɔ yaki paka wɛɔndju woho wakiyɔ ntondo. Ko dimi lakakashimɔ.

22 “Oma laasɔ, dimi lakɛnyi dɔ dikina. Mɛnyi ko washa w’eponga 7 w’amɛna+ ndo wa weke wayatombe oma lo lɔlɛngɛsɛ 1. 23 Mɛnyi nto ko washa w’eponga 7 wambɔlɛngɛ, wa totshitshɛ ndo wamboma la lɔpɛpɛ l’oma lo ɛstɛ wayatombe l’ɔkɔngɔ awɔ. 24 Ko washa wa totshitshɛ wakamɛnɛ washa 7 w’amɛna. Dimi lakatɛ ɛlɔmbɛdi wasala awui wa maji,+ koko ndooko onto lakakoke nembetshiyamidiɔ.”+

25 Ko Yɔsɛfu akatɛ Farawɔ ate: “Alɔ waki Farawɔ asɔ nembetshiyaka dikambo diakɔ 1. Nzambi ka mɛtɛ akatɛ Farawɔ kɛnɛ kayangande nsala.+ 26 Ngɔmbɛ 7 y’alemba amɛna nembetshiyaka ɛnɔnyi 7. Popo ndo washa w’eponga 7 w’amɛna nembetshiyaka ɛnɔnyi 7. Alɔ akɔ 2 nembetshiyaka dikambo diakɔ 1. 27 Ngɔmbɛ 7 ya wɛɔndju ndo ya kɔnyangakɔnyanga yakatombe l’ɔkɔngɔ ayɔ, nembetshiyaka ɛnɔnyi 7 ndo washa 7 w’afufulufu wamboma la lɔpɛpɛ l’oma lo ɛstɛ ayonga ɛnɔnyi 7 wa ndjala. 28 Oko wakamate Farawɔ, Nzambi ka mɛtɛ ambɛnya Farawɔ kɛnɛ kayangande nsala.

29 “Nkɛtɛ ya l’Edjibito w’otondo yayɔngɔnya diangɔ l’edja k’ɛnɔnyi 7. 30 Koko oma laasɔ, ɛnɔnyi 7 wa ndjala ka kasha wayoyala ndo anto wayohɛ lokema la diangɔ diakangɔnya wodja w’Edjibito, ko wodja w’otondo wayodiɛnɛ la ndjala ka kasha.+ 31 Ndo anto hawotohɔ efula ka diangɔ diakawangɔnya l’ɔtɛ wa ndjala kayoyala, nɛ dia tɔ kayoyala wolo efula. 32 Farawɔ akɛnyi dɔ sɔ mbala 2, nɛ dia Nzambi ka mɛtɛ amboshikikɛ dikambo sɔ ndo Nzambi ka mɛtɛ ayanga dikotsha keema edja.

33 “Ɔnkɔnɛ, Farawɔ ayange pami ka kɛsɔ ndo ka lomba kele awodje owandji lo wodja w’Edjibito. 34 Farawɔ ɔshi yɛdikɔ, asɔnɛ emendji lo wodja w’otondo ndo Farawɔ akɔngɔlake k’atanu ɔtɔi ka mbo ya ndɛ ya l’Edjibito l’edja k’ɛnɔnyi 7 wayɔngɔna diangɔ.+ 35 Vɔ kawɔkɔngɔlake mbo ya ndɛ lo ɛnɔnyi wayɔngɔna diangɔ, kawodidjake lo apɛngɛ waki Farawɔ wele lo esomba l’esomba ndo kawodilamake lɛkɔ.+ 36 Mbo ya ndɛ shɔ yayokimanyiya wodja lo ɛnɔnyi 7 wa ndjala ka kasha kayoya lo wodja w’Edjibito diaha anto nshila oshiki la ndjala.”+

37 Farawɔ ndo ekambi ande tshɛ wakangɛnangɛna kanyi shɔ. 38 Ɔnkɔnɛ, Farawɔ akatɛ ekambi ande ate: “Onde tayokoka ntana pami kekina kele oko kɛnɛ, ɔnɛ lele nyuma ka Nzambi kekɔ le nde?” 39 Oma laasɔ, Farawɔ akatɛ Yɔsɛfu ate: “Lam’ele Nzambi akasadi dia wɛ mbeya akambo asɔ tshɛ, ndooko onto lele la kɛsɔ ndo la lomba oko wɛ. 40 Wɛ kayonga owandji wa lo luudu lami, ndo anto ami tshɛ wayokokitanyiyaka tshɛ lo tshɛ.+ Paka lo woho wemi nkumekanga* oto mbayomokoleka.” 41 Farawɔ akakotsha lo mbutɛ Yɔsɛfu ate: “Eenda, dimi lamboketɛ owandji wa wodja w’Edjibito+ w’otondo.” 42 Ko Farawɔ akanya mpɛtɛ k’ematelo oma lo lonya lande ko akakidje lo lonya laki Yɔsɛfu ndo akɔɔlɔtsha ahɔndɔ wa linɛnɛ la dimɛna ndo akɔɔlɔtsha shɛnɛtɛ ya paonyi lo nkingo. 43 Ndo nto, nde akawahenya lo pusupusu kande ka 2 ka lowandji, ko anto wakatawelɛka la ntondo kande vate: “Avrɛkɛ!”* Lo nsala ngasɔ, nde akawetɛ owandji lo wodja w’Edjibito w’otondo.

44 Farawɔ akatɛ Yɔsɛfu nto ate: “Dimi kele Farawɔ, koko ndooko onto lakoka nsala kaanga dui 1* lo wodja w’Edjibito+ w’otondo naka aha la lotshungɔ layɛ.” 45 L’ɔkɔngɔ wa laasɔ, Farawɔ akɔlɛ Yɔsɛfu ɔnɛ Zafɛnatɛ-Panea* ndo akawosha Asɔnatɛ+ ɔna Pɔtifɛra, ɔlɔmbɛdi wa Ɔnɛ* wadi. Ko Yɔsɛfu akatatɛ nɔmbɔla* wodja w’Edjibito.+ 46 Yɔsɛfu aki la ɛnɔnyi+ 30 etena kakandemala la ntondo* ka Farawɔ, nkumekanga k’Edjibito.

Oma laasɔ, Yɔsɛfu akatombe oma lale Farawɔ ndo aketeta lo wodja w’Edjibito w’otondo. 47 Lo ɛnɔnyi 7 wakangɔnɛ diangɔ, wodja waki la mbo ya ndɛ tshavutshavu. 48 Ko nde akakɔngɔlaka mbo ya ndɛ lo edja k’ɛnɔnyi 7 lo wodja w’Edjibito ndo nde akombaka mbo ya ndɛ lo esomba l’esomba. Lo osomba tshɛ, nde akakɔngɔlaka mbo ya ndɛ oma lo dikambɔ diaki suke la osomba akɔ. 49 Yɔsɛfu akatetemala mɔtshanya mbo ya ndɛ efula ka mamba, oko nsɛkɛ ya lɔkɔngɔ ya lo ndjale polo ndo ndjokoma lo hawoyadia, nɛ dia yakaleke efula.

50 La ntondo ka ɛnɔnyi wa ndjala ntatɛ, Asɔnatɛ ɔna Pɔtifɛra, ɔlɔmbɛdi wa Ɔnɛ* akote la Yɔsɛfu+ ana 2 w’apami. 51 Yɔsɛfu akɔlɛ ɔna l’enondo Manase,*+ nɛ dia nde akate ate: “Nzambi ambombohiya paa yami tshɛ ndo luudu l’otondo la papa.” 52 Nde akɔlɛ ɔna la 2 Efrayimɛ,*+ nɛ dia nde akate ate: “Nzambi ambosala dia dimi monga la diwutshi lo wodja w’asui ami.”+

53 Ɛnɔnyi 7 wakangɔnɛ diangɔ lo wodja w’Edjibito wakakomɛ,+ 54 ko ɛnɔnyi 7 wa ndjala ka kasha wakatatɛ oko wakate+ Yɔsɛfu. Ndjala kakayala lo wedja tshɛ, koko lo wodja w’Edjibito w’otondo mbo ya ndɛ yakikɔ.+ 55 L’ɔkɔngɔ diko, wodja w’Edjibito w’otondo wakayodiɛnɛ la ndjala, ko anto wakatatɛ ndelɛ Farawɔ dia nde mbasha mbo ya ndɛ.+ Ko Farawɔ akatɛ ase Edjibito tshɛ ate: “Nyotshu le Yɔsɛfu ndo nyosale kɛnɛ tshɛ kayondonyotɛ.”+ 56 Ndjala kakatetemala monga lo nkɛtɛ k’otondo.+ Ko Yɔsɛfu akatatɛ ndjihola apɛngɛ waki lo dihole la dihole ndo ntatɛ nsondja ase Edjibito+ mbo ya ndɛ, nɛ dia ndjala kakatalekaka monga lo wodja w’Edjibito. 57 Ndo nto, anto wa lo nkɛtɛ k’otondo wakayaka l’Edjibito dia ndjosomba mbo ya ndɛ le Yɔsɛfu, nɛ dia ndjala kakatalekaka monga wolo lo nkɛtɛ k’otondo.+

42 Lam’akeye Jakɔbɔ dia mbo ya ndɛ* yekɔ l’Edjibito,+ nde akatɛ anande w’apami ate: “Lande na kendananyu tsho, ko hanyosale ndooko dui?” 2 Nde akakotsha ate: “Lamboka dia mbo ya ndɛ yekɔ l’Edjibito. Nyotshu lɛkɔ kele nyotosombe yema diaha sho mvɔ la ndjala.”+ 3 Ko anango+ Yɔsɛfu 10 wakatshu otsha l’Edjibito dia tosomba mbo ya ndɛ. 4 Koko Jakɔbɔ kotoma Bɛnjamina+ ɔnango Yɔsɛfu kaamɛ l’anango akina, nɛ dia nde akate ate: “Ondo mpokoso kɛmɔtshi ka wolo mbeyaka tookomɛ.”+

5 Ko ana w’Isariyɛlɛ wakatshu otsha l’Edjibito kaamɛ l’anto akina wakatatshɔka tosomba mbo ya ndɛ, nɛ dia ndjala kakakome polo ndo lo wodja wa Kanana.+ 6 Yɔsɛfu kakalɔmbɔlaka wodja w’Edjibito w’otondo+ ndo nde kakasondjaka anto wa lo nkɛtɛ+ k’otondo mbo ya ndɛ. Ko anango Yɔsɛfu wakakome ndo wakakusama la ntondo kande, dungi polo la nkɛtɛ.+ 7 Lam’akɛnyi Yɔsɛfu anango, mbala kakɔ ɔtɔi nde akawaeye, koko nde kondjaeyanya le wɔ.+ Ɔnkɔnɛ nde akaahangwɛ ate: “Oma lende ayanyaye?” Ko vɔ wakate vate: “Sho oma lo wodja wa Kanana mboyeso ndjosomba mbo ya ndɛ.”+

8 Yɔsɛfu akeye anango, koko vɔ kombeeya. 9 Mbala kakɔ ɔtɔi, Yɔsɛfu akohɔ alɔ wakandɛnyi lo dikambo diawɔ,+ ko akawatɛ ate: “Nyu nyekɔ atɔpi! Nyamboya dia ndjenda ahole wakokanyu mbɔtwɛ wodja aso la ta!” 10 Vɔ wakawotɛ vate: “Keema owandji. Ekambi ayɛ woye tsho dia ndjosomba mbo ya ndɛ. 11 Sho tshɛ lanɛ tekɔ ana wa shɛso 1. Tekɔ anto w’ɛlɔlɔ ndo sho ekambi ayɛ keema atɔpi.” 12 Koko nde akawatɛ ate: “Ndooko. Nyu nyamboya ndjenda ahole wakokanyu mbɔtwɛ wodja aso la ta!” 13 Ko vɔ wakate vate: “Ekambi ayɛ wekɔ ana 12.+ Sho tshɛ tekɔ ana wa shɛso 1+ lo wodja wa Kanana. Ɔna la kose kotshikadi la shɛso+ ndo okina amboshishɔka.”+

14 Koko Yɔsɛfu akawatɛ ate: “Oko wakamanyote, ‘nyu nyekɔ atɔpi!’ 15 Layanga nsala nganɛ dia nyohemba: Lo mɛtɛ oko wele Farawɔ la lɔsɛnɔ, nyu hanyotomɔ lanɛ paka kosɛnyu kɛsɔ amboya lanɛ.+ 16 Nyayotshikala lanɛ lo lokanu. Nyotome ɔmɔtshi l’atei anyu dia nde toya la kosɛnyu kɛsɔ. Kele katende kana kɛnɛ katanyu kekɔ mɛtɛ. Ko naka bu, kete lo mɛtɛ oko wele Farawɔ la lɔsɛnɔ, nyekɔ atɔpi.” 17 Ko nde akawadje lo lokanu l’edja ka nshi 3.

18 Lushi la 3, Yɔsɛfu akawatɛ ate: “Dimi mbokaka Nzambi wɔma. Ɔnkɔnɛ, nyosale kɛnɛ kayangami nyotɛ dia nyu ntshikala la lɔsɛnɔ. 19 Naka nyekɔ anto w’ɛlɔlɔ, kete 1 ɔmɔtshi l’atei anyu atshikale lanɛ lo lokanu, kele akina watɔlɛ ase nkumbo yanyu+ wadiɛnɛ la ndjala yangɔ ya ndɛ. 20 Laasɔ nyombela kosɛnyu kele kɛnɛ katanyu kɛname dia kekɔ mɛtɛ ko hanyotovɔ.” Ko vɔ wakasale ngasɔ.

21 Vɔ wakatanɛ lam’asawɔ vate: “Lo mɛtɛ ɔnɛ ekɔ dilanya mbambotolongola l’ɔtɛ w’ɔnangɛso,+ nɛ dia takɛnyi ɔkɛyi waki la nde etena kakandatɔsɛngasɛngaka dia sho mbooka kɛtshi, koko sho kombooka. Diakɔ diambotokomɛ mpokoso kɛnɛ.” 22 Ko Rubɛna akawatɛ ate: “Dimi konyotɛ nte ‘tatosalɛke ɔna ɔnɛ kɔlɔ?’ Shi nyu kombokɛmi?+ Kakianɛ dikila diande diamboyelana la so.”+ 23 Koko vɔ kombeya dia Yɔsɛfu akokaka kɛnɛ kakawataka, nɛ dia nde akatɛkɛtaka la wɔ lo tshimbo y’okadimudi. 24 Ko nde akamɔ oma lalewɔ, ndo akatatɛ ndela.+ Lam’akandakalola le wɔ dia ndjɔtɛkɛta la wɔ, nde akɔshi Simɛyɔna,+ ko akookeleka lo washo awɔ.+ 25 Oma laasɔ, Yɔsɛfu akasha dikimɔ dia vɔ ndodia mbo ya ndɛ lo mpaya yawɔ. Ndo nto, nde akate dia vɔ mbadjɛ falanga yawɔ, onto l’onto lo mpaya kande ndo mbasha mpamba ya vɔ talɛka lo mboka. Ndo kɛsɔ mbakawaasalɛ.

26 Ɔnkɔnɛ, vɔ wakahɛ etshumu awɔ wa mbo ya ndɛ lo mponda yawɔ, ko wakatshu. 27 Lam’akadihola ɔmɔtshi l’atei awɔ mpaya kande dia mbisha mponda kande yangɔ ya ndɛ lam’akawatohanga, nde akɛnyi falanga yande l’onyɔ wa mpaya. 28 Ko nde akatɛ anango ate: “Enda wakankaloye falanga yami! Yɔ nyɛ yele lo mpaya!” Ko vɔ wakatɛ asolo ndo wakasake lokomba, wakendana ndo wakate vate: “Lande na kambotosalɛ Nzambi nganɛ?”

29 Lam’akawakome le shɛwɔ Jakɔbɔ lo wodja wa Kanana, vɔ wakawotɛ akambo tshɛ wakataakomɛ vate: 30 “Pami kele owandji lo wodja akɔ akatohangwɛ+ ndo akɔshi dia tekɔ atɔpi lo wodja akɔ. 31 Koko takawotɛ shate: ‘Sho tekɔ anto w’ɛlɔlɔ ndo sho bu atɔpi.+ 32 Tekɔ ana 12+ wa shɛso 1. Ɔtɔi akashishɔ+ ndo ɔna la kose akatshikala la shɛso lo wodja wa Kanana.’+ 33 Koko pami kakɔ kele owandji wa wodja akatotɛ ate: ‘Oma lo dikambo nɛ kayomeya dia nyekɔ anto w’ɛlɔlɔ: Ɔmɔtshi l’atei anyu atshikale la mi lanɛ,+ kele nyu akina nyɔtɔlɛ+ ase nkumbo yanyu wele la ndjala yangɔ ya ndɛ. 34 Oma laasɔ, kanyoye la kosɛnyu dia dimi mbeya dia nyu keema atɔpi, koko nyekɔ anto w’ɛlɔlɔ. Laasɔ kayomoyonyosha ɔnangɛnyu ndo nyu mbeyaka ndjosomba diangɔ dialanganyu lo wodja aso.’”

35 Lam’akawahongola diangɔ diaki lo mpaya yawɔ, onto l’onto akatane otshumu wa falanga yande lo mpaya kande. Lam’akawɛnyi vɔ la shɛwɔ etshumu awɔ wa falanga, vɔ wakoke wɔma. 36 Ko shɛwɔ Jakɔbɔ akate la diambo tshɛ ate: “Dimi kambonyohondja!+ Yɔsɛfu aya bu+ ndo Simɛyɔna aya bu,+ ko nyolanga ntshɔ ndo la Bɛnjamina? Akambo asɔ tshɛ paka le mi oto?” 37 Koko Rubɛna akatɛ she ate: “Kodiake anami 2 naka dimi hakokaloyende.+ Ombisha ɔkɛndɛ ande, dimɛ layokokaloyɛnde.”+ 38 Ko nde akate ate: “Ɔnami hatotshɔ la nyu, nɛ dia ɔnango akavu ndo nde ambotshikala ndamɛ.+ Naka mpokoso kɛmɔtshi ka wolo tookomɛ lo lɔkɛndɔ latanyatshu, kete ndooko onyake nyayɔtɔla osombe wa shɛnyu l’ɔkɛyi+ lo Diombo.”*+

43 L’etena kɛsɔ, ndjala kakayala wolo efula lo wodja.+ 2 Lam’akawashidiya ndɛ diangɔ diakawatosomba oma l’Edjibito,+ shɛwɔ akawatɛ ate: “Nyokalole kele nyotosombe yema ya mbo ya ndɛ.” 3 Ko Juda akawotɛ ate: “Pami kele lɛkɔ akatotɛ hwe ate: ‘Hanyokoke mɛna elungi kami nto naka hanyoye la kosɛnyu.’+ 4 Naka wɛ mbetawɔ dia sho ntshɔ la kosɛso, kete tayotshɔ tosomba mbo ya ndɛ. 5 Ko naka wɛ hawokimwe, kete hatototshɔ nɛ dia pami kakɔ akatotɛ ate: ‘Hanyokoke mɛna elungi kami nto naka hanyoye la kosɛnyu.’”+ 6 Ko Isariyɛlɛ+ akambola ate: “Lande na kakanyanyangɛ onongo lo mbutɛ pami kakɔ nyate nyekɔ la kosɛnyu kekina?” 7 Vɔ wakakadimola vate: “Pami kakɔ akatombola awui wendana la so ndo l’ewotɔ aso ate: ‘Onde shɛnyu eke la lɔsɛnɔ? Onde nyekɔ l’anangɛnyu akina?’ Ko takawotɛ kɛnɛ kele mɛtɛ.+ Ngande wototeya ɔnɛ nde ayototɛ ate: ‘Nyotoye la kosɛnyu’?”+

8 Ko Juda akatɛ Isariyɛlɛ wa she ate: “Ombishande+ kele totshu la nde diaha sho la yɛ l’anaso+ mvɔ+ la ndjala. 9 Dimi layotawolamaka.+ Ombisha ɔkɛndɛ ande. Naka dimi hakokaloyende ndo hakoshande l’anya, kete dimi layonga la onongo wa pɛkato la ntondo kayɛ pondjo pondjo. 10 Otondonga hatotshimbitshimbi, tshike lanɛ tambotshɔ mbala 2 y’etondo.”

11 Ko Isariyɛlɛ wa shɛwɔ akawatɛ ate: “Naka ngasɔ, kete nyɔshi diangɔ dioleki amɛna dia lo nkɛtɛ yaso, nyodje lo mpaya yanyu kele nyɔtɔlɛ pami kakɔ oko woshasha.+ Nyɔɔtɔlɛ yema ya balasama,+ yema y’osanga, ladanumɛ, mambo y’esongo,+ ndjoko ndo elowa w’amandɛ. 12 Nyɔshi falanga yakatshu la nyu ndodia lo 2, kele nyotokaloya falanga yakawadje lo mpaya+ yanyu. Mbeyaka monga ko munga mbakasalema. 13 Nyɔshi ndo kosɛnyu kele nyotshu, nyokalole le pami kakɔ. 14 Nzambi Kanga-Wolo-Tshɛ kanyohomuya lokolo l’ɔlɔ la ntondo ka pami kakɔ dia nde nyosha ɔnangɛnyu okina ndo Bɛnjamina. Koko le mi, naka ɔnɛ pombe ana, ko dimi mpomba ana!”+

15 Ko vɔ wakɔshi woshasha ndo falanga yakatshu la wɔ ntondo ndodia lo 2 kaamɛ la Bɛnjamina, ko wakonɛɛ, wakatshu otsha l’Edjibito ndo wakatemala la ntondo ka Yɔsɛfu nto.+ 16 Lam’akɛnyi Yɔsɛfu Bɛnjamina ele kaamɛ la wɔ, mbala kakɔ ɔtɔi nde akatɛ pami kaki owandji wa lo luudu lande ate: “Ɔtshiya apami ango lo luudu ndo diaka nyama kele katɛ diangɔ, nɛ dia dimi layɔlɛ kaamɛ la wɔ la midi.” 17 Aha la ntshimbatshimba, pami kakɔ akasale oko wakawotɛ+ Yɔsɛfu ndo akawaɔtshiya lo luudu laki Yɔsɛfu. 18 Koko anango wakoke wɔma lam’akawawaɔtshiya lo luudu laki Yɔsɛfu ndo wakate vate: “Ekɔ paka l’ɔtɛ wa falanga yakawakaloya lo mpaya yaso mbala ketshi mbambowotela lanɛ. Wonya ɔnɛ vɔ wayanga tonda ko tetɛ mfumbe ndo mbɔsa mponda yaso!”+

19 Ko vɔ wakelɛ pami kaki owandji wa lo luudu laki Yɔsɛfu ndo wakasawola la nde la soko dia luudu. 20 Vɔ wakate vate: “Nkumɛso, otokimwe yema! Takaye mbala ka ntondo lanɛ dia ndjosomba mbo ya ndɛ.+ 21 Koko lam’akatatokoma lo mpango ndo lam’akatatodihola mpaya yaso, onto l’onto akatotana falanga yande tshɛ l’onyɔ wa mpaya kande.+ Ɔnkɔnɛ sho nangaka ndjikaloya shoamɛ. 22 Takaye ndo la falanga nkina dia ndjosomba mbo ya ndɛ. Hateye onto akɔna lakadje falanga yakɔ lo mpaya yaso.”+ 23 Ko nde akate ate: “Kawɔ, tanyokake wɔma. Nzambi kanyu ndo Nzambi ka shɛnyu akanyodjɛ falanga lo mpaya yanyu. Dimi lakashile nongola falanga yanyu.” Ko nde akatondja Simɛyɔna oya le wɔ.+

24 Ko pami kakɔ akawaɔtshiya lo luudu laki Yɔsɛfu, akawasha ashi wa vɔ nsola ekolo ndo akasha mponda yawɔ mbo ya ndɛ. 25 Ko vɔ wakalɔngɔsɔla woshasha+ dia ndjosha Yɔsɛfu lam’ayondoya la midi, nɛ dia vɔ wakoke dia nde ayoyɔlɛ kaamɛ la wɔ mbo ya ndɛ.+ 26 Lam’akɔtɔ Yɔsɛfu lo luudu, vɔ wakɔɔtɔlɛ woshasha lo luudu ndo wakakusama la ntondo kande polo lo nkɛtɛ.+ 27 L’ɔkɔngɔ diko, nde akawambola dia mbeya kana wekɔ alemba ki ndo akate ate: “Ko osombe wa shɛnyu wakanyataka ngande? Onde nde eke la lɔsɛnɔ?”+ 28 Ko vɔ wakate vate: “Shɛso k’okambi ayɛ ekɔ ki ndo eke la lɔsɛnɔ.” Vɔ wakakɔlama ndo wakakusama.+

29 Lam’akandedia washo, nde akɛnyi Bɛnjamina, kosɛnde k’otema ɔtɔi+ ko akate ate: “Ɔnɛ kele ɔnangɛnyu la kose lakanyambutɛka?”+ Nde akatɛ Bɛnjamina ate: “Ɔnami, Nzambi akohomuya lokolo l’ɔlɔ!” 30 Oma laasɔ, Yɔsɛfu akatombe esadi esadi lam’ele nde kokoka mbikikɛ nto lo dikambo di’ɔnango, ndo nde akayange dihole dia tolela. Ko nde akɔtɔ lo luudu la l’etei ndo akatolela lɛkɔ.+ 31 L’ɔkɔngɔ wa nde nsola elungi, nde akatombe ndo akayakimɛ ko akatɛ ekambi ande ate: “Nyokitsha mbo ya ndɛ la mɛsa.” 32 Ko vɔ wakookitshɛ diangɔ diande ndamɛ, anango vɔamɛ ndo ase Edjibito waki kaamɛ la nde wakale vɔ lawɔ vɔamɛ, dikambo ase Edjibito takawakokaka ndɛ kaamɛ l’ase Hɛbɛru, nɛ dia ɔsɔ aki dui dia wɔnɔnyi le ase Edjibito.+

33 Anango* wakadjasɛ la ntondo kande nɔngama lo ndjela woho wakawotɔ, oma le ɔna l’enondo+ polo le la kose. Vɔ wakendanaka lam’asawɔ wele la wɔma. 34 Nde akatomaka mbo ya ndɛ otsha lo mɛsa w’anango, koko nde akatomaka otsha le Bɛnjamina mbala 5 ndeka anango akina tshɛ.+ Ko vɔ wakatetemala ndɛ la nnɔ kaamɛ la nde polo lam’akawalote.

44 L’ɔkɔngɔ diko, nde akatɛ pami kaki owandji wa lo luudu lande ate: “Lodiɛ anto ango mpaya yawɔ la mbo ya ndɛ yakokawɔ mɛmba ndo dja falanga y’onto l’onto l’onyɔ wa mpaya kande.+ 2 Kodje dikɔhɔ diami dia mfɛsa l’onyɔ wa mpaya k’ɔna la kose kaamɛ la falanga yakandaye la yɔ dia ndjosomba mbo ya ndɛ.” Ko nde akasale oko wakawotɛ Yɔsɛfu.

3 La pindju lam’akahotɔ wonya, vɔ wakakɛndja apami akɔ kaamɛ la mponda yawɔ. 4 La ntondo ka vɔ mangana etale la osomba, Yɔsɛfu akatɛ pami kaki owandji wa lo luudu lande ate: “Emala, yela apami ango! Lam’ayoyotowanda kowate wate: ‘Lande na kambonyokaloya kɔlɔ lo ɔlɔlɔ? 5 Lande na kakanyɔshi dikɔhɔ dianɔ nkumɛmi ndo diakamba la nde dia mbeya akambo woshɛmi? Nyu nyakasadi dui dia kɔlɔ efula.’”

6 Ko nde akatowandaka ndo akawatɛ ɛtɛkɛta ɛsɔ. 7 Koko vɔ wakawotɛ vate: “Lande na kata nkumɛso ngasɔ? Ekambi ayɛ bu la kanyi ya nsala dui dia ngasɔ. 8 Falanga yakatatane lo mpaya yaso takakelayɔ oma lo wodja wa Kanana.+ Laasɔ ngande watotokoka mbiva ɛngɔ ka mfɛsa kana ka paonyi oma lo luudu la nkumɛyɛ? 9 Okambi ayɛ tshɛ l’atei aso layotanema dikɔhɔ diakɔ le nde pombaka mvɔ, ko sho akina tayonga mfumbe ya nkumɛso.” 10 Ko nde akawatɛ ate: “Diasaleme oko wotshinyu. Koko ɔnɛ tshɛ layotanema la diɔ ayonga mfumbe kami, ko nyu akina hanyotonga la onongo.” 11 Ko onto l’onto akakitsha mpaya kande esadi eto la nkɛtɛ ndo akakidihola. 12 Ko nde akasɛngɔla dimɛna dimɛna ntatɛ lo mpaya k’ɔna l’enondo polo lo k’ɔna la kose. L’ekomelo, nde akatotana dikɔhɔ diakɔ lo mpaya kaki Bɛnjamina.+

13 Ko vɔ wakaatshatsha ahɔndɔ awɔ ndo onto l’onto akahɛ mpaya kande lo mponda kande ko wakakalola l’osomba. 14 Lam’akɔtɔ Juda+ la anango lo luudu laki Yɔsɛfu, wakatane nde eke laawɔ. Vɔ wakayakɔsha la nkɛtɛ la ntondo kande.+ 15 Ko Yɔsɛfu akawambola ate: “Lande na kambonyosala nganɛ? Onde nyu kombeyaka dia onto oko dimi lekɔ la akoka wa mbeya akambo woshɛmi?”+ 16 Ko Juda akakadimola ate: “Akokaso mbutɛ nkumɛso? Ayotota mɛtɛ? Ngande wakokaso mɛnya dia tekɔ anto w’ɛlɔlɔ? Nzambi ka mɛtɛ amboshola munga k’ekambi ayɛ.+ Sho taya mfumbe ya nkumɛso, oyadi sho kana ɔnɛ lotanemi dikɔhɔ le nde.” 17 Koko nde akate ate: “Dimi bu la kanyi ya nsala dui dia ngasɔ! Onto lakatanemi dikɔhɔ le nde kayonga mfumbe kami,+ koko nyu akina nyokalole otsha le shɛnyu la ki.”

18 Juda akasukana la Yɔsɛfu ko akate ate: “Nkumɛmi lam’alangayɛ, lambokɔsɛngasɛnga dia wɛ mbetawɔ dia okambi ayɛ kotɛ dui ndo tomalɛke okambi ayɛ, nɛ dia wɛ ekɔ oko Farawɔ ndamɛ.+ 19 Nkumɛmi akambola ekambi ande ate: ‘Onde nyekɔ la shɛnyu kana anangɛnyu akina?’ 20 Ko takakadimola nkumɛmi shate: ‘Tekɔ la osombe wa shɛso ndo la ɔna la kose+ lakandayota lo nshi yande y’osombe, koko enondo ande ambovɔka.+ Laasɔ nde ambotshikala ndamɛ l’otema wa nyango,+ ko shɛso mbolangaka efula.’ 21 Ɔnkɔnɛ wɛ akatɛ ekambi ayɛ wate: ‘Nyotombelande kele ndjowɛnyi.’+ 22 Ko takatɛ nkumɛmi shate: ‘Ɔna ɔsɔ hakoke nkakitɔna la she. Naka nde nkakitɔna la nde, kete aha la taamu she ayovɔ.’+ 23 Ko wɛ akatɛ ekambi ayɛ wate: ‘Naka hanyoye la kosɛnyu, hanyotɛna elungi kami nto.’+

24 “Ko sho takakalola le shɛso lele okambi ayɛ ndo takatowotɛ ɛtɛkɛta waki nkumɛso. 25 L’ɔkɔngɔ diko, shɛso akate ate: ‘Nyokalole nyototosombe yangɔ ya ndɛ.’+ 26 Ko takawotɛ shate: ‘Hatokoke ntshɔ lɛkɔ. Paka kosɛso kotshwe la so ko sho ntshɔ, nɛ dia naka nde hatshwe la so, kete hatokoke mɛna elungi ka pami kakɔ.’+ 27 Ko shɛso lele okambi ayɛ akatotɛ ate: ‘Nyu mbeyaka dimɛna dia lakote la wadɛmi ana 2 ato.+ 28 Koko ɔmɔtshi l’atei awɔ akantshike ko lakate nte: “Weho akɔ tshɛ nyama ka ngala akawatshatsha!”+ ko polo ndo ɛlɔ dimi latawɛnyi. 29 Naka nyu kakitolami ndo la ɔna ɔnɛ ko waale ɔmɔtshi tookomɛ, kete ndooko onyake nyayɔtɔla osombe wa shɛnyu la ɔkɛyi+ lo Diombo.’*+

30 “Laasɔ naka dimi nkalola le osombe wa shɛso lele okambi ayɛ aha la ɔna ɔnɛ, lam’ele nde nangaka ɔna ɔnɛ oko lɔsɛnɔ* lande ndamɛ, 31 kam’ayondɛna dia ɔnande hakalodi, nde ayovɔ ko ekambi ayɛ wayɔtɔla osombe wa shɛwɔ wele okambi ayɛ la ɔkɛyi lo Diombo.* 32 Dimi okambi ayɛ lakɔshi ɔkɛndɛ w’ɔna ɔnɛ oma le papa ndo lakate nte: ‘Naka hankokaloyende, kete layonga la onongo wa pɛkato la ntondo ka papa pondjo.’+ 33 Ɔnkɔnɛ lam’alangayɛ, etawɔ dia dimi okambi ayɛ ntshikala mfumbe kayɛ lo dihole di’ɔna ɔnɛ, kele nde akalole nde la anango. 34 Ngande wayomokalola le papa ko ntshika ɔna ɔnɛ? Dimi hantokikɛ mɛna mpokoso kayokomɛ papa!”

45 Lam’akoke Yɔsɛfu ngasɔ, nde kokoka ndjakimɛ nto la ntondo k’ekambi ande tshɛ.+ Ko nde akate la dui dia wolo ate: “Anto tshɛ wamɔ lalemi!” Ndooko onto lakatshikala kaamɛ la nde etena kakayaeyanya Yɔsɛfu le anango.+

2 Ko nde akatatɛ ndela la dui dia wolo. Ase Edjibito wakoke ndo ase luudu la Farawɔ wakoke. 3 Yɔsɛfu akatɛ anango ate: “Dimi kele Yɔsɛfu. Onde papa eke la lɔsɛnɔ?” Koko anango kokoka mbokadimola ndooko dui, nɛ dia wakaambe efula lo dikambo diande. 4 Ko Yɔsɛfu akatɛ anango ate: “Lam’alanganyu, nyosukane lalemi.” Ko vɔ wakasukana lalende.

Oma laasɔ, nde akawatɛ ate: “Dimi kele Yɔsɛfu ɔnangɛnyu lakanyasondja l’Edjibito.+ 5 Koko tanyoyakiyanyake ndo tanyotshumwanake lo woho wakanyansondja lanɛ, nɛ dia Nzambi kakantome la ntondo kanyu dia ndjoshimbɛ nsɛnɔ yanyu.+ 6 Ɔnɛ ekɔ ɔnɔnyi wa 2 wambonga ndjala la nkɛtɛ+ ndo ambotshikala ɛnɔnyi 5 wele anto hawotonɛ ndo hawotona. 7 Koko Nzambi akantome la ntondo kanyu dia nyolamɛ atshikadi+ amɔtshi la nkɛtɛ* ndo dia nyu ntshikala la lɔsɛnɔ lo ekimanyielo k’etshungwelo ka woke. 8 Ɔnkɔnɛ, aha nyu mbakantome lanɛ, koko Nzambi ka mɛtɛ kakantome dia nde sɔnami oko owandji w’andaki* wa Farawɔ, oko owandji wa lo luudu lande l’otondo ndo oko omboledi wa wodja w’Edjibito w’otondo.+

9 “Nyokalole esadi esadi le papa, kele nyotowote nyate: ‘Yɔsɛfu y’ɔnayɛ ate: “Nzambi ambɔnsɔna owandji wa wodja w’Edjibito w’otondo.+ Yaka lendo le mi. Totshimbatshimbake.+ 10 Koyodjasɛ lo nkɛtɛ ya Ngɔshɛnɛ.+ Lɛsɔ mbayoyonga suke la mi, wɛ la anayɛ, la ekana ayɛ, la ɛkɔkɔ ayɛ, la ngɔmbɛ yayɛ ndo la diangɔ tshɛ diele la yɛ. 11 Dimi layokotomɛka mbo ya ndɛ lɛkɔ, nɛ dia ɛnɔnyi 5 wa ndjala weke la ntondo.+ Naka aha ngasɔ, kete wɛ la wa lo luudu layɛ la diangɔ tshɛ diele la yɛ nyayonga wola.”’ 12 Nyu la Bɛnjamina ɔnalengo nyekɔ lo mɛna la washo anyu hita dia dimi katɛkɛta la nyu.+ 13 Ɔnkɔnɛ, kanyotote papa awui tshɛ wendana la lotombo lele la mi l’Edjibito ndo awui tshɛ wambonyɛna. Nyosamanya kele nyombela papa lanɛ.”

14 Oma laasɔ, nde akakumbatɛ* Bɛnjamina k’ɔnango ndo akalele, ko Bɛnjamina nde lawɔ akalele, owodingi anya lo nkingo.+ 15 Ko nde akashana la anango tshɛ bizɛ ndo akalele kaamɛ la wɔ, ko l’ɔkɔngɔ wa laasɔ, anango wakasawola la nde.

16 Lokumu lakakome polo lo luudu la Farawɔ ɔnɛ: “Anango Yɔsɛfu wamboya!” Ko Farawɔ la ekambi ande wakangɛnangɛna dui sɔ. 17 Ɔnkɔnɛ Farawɔ akatɛ Yɔsɛfu ate: “Tɛ ananyɔ wate: ‘Nyosale nganɛ: Nyahɛ wetsho anyu laadiko dia nyama yanyu kele nyotshu lo wodja wa Kanana, 18 nyotɔshi shɛnyu l’ase nkumbo yanyu, kele nyoye le mi lanɛ. Dimi layonyosha diangɔ di’amɛna dia lo wodja w’Edjibito ndo nyu nyayɔlɛka* diangɔ di’oma l’ɛtshi ka nkɛtɛ koleki ɛtɛtɔ* ka lo wodja ɔnɛ.’+ 19 Kowate wate: ‘Nyosale nganɛ:+ Nyɔshi pusupusu+ ya lo wodja w’Edjibito dia nyu tɛmba ananyu ndo wadiɛnyu. Kanyɛmbɛ shɛnyu lo pusupusu kɛmɔtshi kele kanyoye la nde lanɛ.+ 20 Tanyoyakiyanyake dia diangɔ dianyu,+ nɛ dia diangɔ dioleki tshɛ amɛna l’Edjibito diekɔ dianyu.’”

21 Ko ana w’Isariyɛlɛ wakasale ngasɔ ndo Yɔsɛfu akawasha pusupusu oko wakate Farawɔ. Nde akawasha ndo mpamba ya vɔ talɛka lo mboka. 22 Nde akasha onto l’onto dihɔndɔ dikina, koko nde akasha Bɛnjamina ekenga 300 wa mfɛsa ndo ahɔndɔ 5.+ 23 Ko nde akatomɛ she diangɔ nɛ: Mponda 10 yakatɛmbaka diangɔ di’amɛna dia l’Edjibito ndo mponda 10 ya wadi yakatɛmbaka eponga, mapa ndo mbo ya ndɛ nkina yayonga she la ohomba lo mboka. 24 Nde akakɛndja anango, ndo lam’akawonɛɛ, nde akawatɛ ate: “Tanyowanake lo mboka.”+

25 Vɔ wakamɔ oma l’Edjibito, ko wakatokoma le shɛwɔ Jakɔbɔ lo wodja wa Kanana. 26 Ko wakatowotɛ vate: “Yɔsɛfu eke la lɔsɛnɔ ndo nde kele owandji lo wodja w’Edjibito w’otondo!”+ Koko otema ande wakayala etshitshitshitshi, nɛ dia nde kombetawɔ kɛnɛ kakawawotɛ.+ 27 Lam’akawawotɛ kɛnɛ tshɛ kakawatɛ Yɔsɛfu dia ndjowotɛ ndo lam’akandɛnyi pusupusu yakatome Yɔsɛfu dia ndjowɛmba, Jakɔbɔ shɛwɔ akatatɛ nsalangana. 28 Isariyɛlɛ akate ate: “Ambokoka! Ɔnami Yɔsɛfu eke la lɔsɛnɔ! Dimi pombaka ntshɔ tawɛnyi la ntondo ka dimi mvɔ!”+

46 Isariyɛlɛ akɔshi kɛnɛ tshɛ kaki la nde* ko akatshu. Lam’akandakome la Bɛrɛ-Shɛba,+ nde akalambola Nzambi k’Isaka wa she+ elambo. 2 Oma laasɔ, Nzambi akatɛkɛta l’Isariyɛlɛ lo ɛnɛlɔ l’otsho ate: “Jakɔbɔ, Jakɔbɔ!” Ko nde akate ate: “Dimi ɔnɛ!” 3 Nde akate ate: “Dimi kele Nzambi ka mɛtɛ, Nzambi ka shɔ.+ Tokake wɔma dia wɛ ntshɔ l’Edjibito, nɛ dia dimi layotoketɛ wodja wa woke lɛkɔ.+ 4 Dimi dimɛ layotshɔ kaamɛ la yɛ l’Edjibito ndo dimɛ layokokaloya oma lɛkɔ.+ Ndo nto, Yɔsɛfu kayokahɛ lonya lande lo washo ayɛ.”*+

5 Oma laasɔ, Jakɔbɔ akamɔ oma la Bɛrɛ-Shɛba, ko ana w’Isariyɛlɛ wakɛmbɛ shɛwɔ Jakɔbɔ, anawɔ ndo wadiɛwɔ lo pusupusu yakatome Farawɔ dia vɔ towɛmba. 6 Vɔ wakɔshi ndo dongalonga diawɔ kaamɛ la diangɔ tshɛ diakawakondja lo wodja wa Kanana. L’ɔkɔngɔ diko, vɔ wakatokomaka l’Edjibito, mbuta ate Jakɔbɔ nde l’anande. 7 Nde akatshu l’anande w’apami, anande wa wamato ndo ekana ande tshɛ l’Edjibito.

8 Nkombo y’ana w’Isariyɛlɛ, mbuta ate Jakɔbɔ l’anande wakatshu la nde l’Edjibito+ yɔ nyɛ: Rubɛna ɔna Jakɔbɔ l’enondo.+

9 Ana w’apami wa Rubɛna vɔ anɛ: Hanɔka, Palu, Hɛzɛrɔna ndo Karami.+

10 Ana w’apami wa Simɛyɔna+ vɔ anɛ: Jemuɛlɛ, Jamina, Ɔhadɛ, Jakina, Zɔhara ndo Shaolo+ ɔnaki womoto ɔmɔtshi l’ose Kanana.

11 Ana w’apami wa Lɛwi+ vɔ anɛ: Ngɛrɛshɔna, Kɔhata ndo Merari.+

12 Ana w’apami wa Juda+ vɔ anɛ: Ɛrɛ, Ɔnana, Shɛla,+ Perɛzɛ+ ndo Zera.+ Koko Ɛrɛ nde la Ɔnana wakavu lo wodja wa Kanana.+

Ana w’apami wa Perɛzɛ vɔ anɛ: Hɛzɛrɔna nde la Hamula.+

13 Ana w’apami wa Isakara vɔ anɛ: Tola, Puva, Iyɔbɛ ndo Shimirɔna.+

14 Ana w’apami wa Zebuluna+ vɔ anɛ: Sɛrɛdɛ, Elɔna ndo Jahalɛlɛ.+

15 Wasɔ mbele ana w’apami wa Lea wakandote la Jakɔbɔ la Padana-Arama kaamɛ ndo Dina+ ɔnawɔ la womoto. Anande w’apami ndo anande wa wamato* waki tshɛ tshɛ 33.

16 Ana w’apami wa Ngada+ vɔ anɛ: Zifiɔna, Hangi, Shuni, Ezebɔna, Eri, Arɔdi ndo Arɛli.+

17 Ana w’apami wa Ashɛrɛ+ vɔ anɛ: Imɛna, Ishiva, Ishivi, Beriya ndo Sɛra aki kadiyɛwɔ.

Ana w’apami wa Beriya vɔ anɛ: Hebɛrɛ nde la Malakiyɛlɛ.+

18 Wasɔ mbele ana w’apami wa Zilipa,+ ɔnɛ lele Labana akawosha Lea ɔnande la womoto. Nde akayota la Jakɔbɔ tshɛ tshɛ anto* 16.

19 Ana w’apami wa Rashɛlɛ wadi aki Jakɔbɔ vɔ anɛ: Yɔsɛfu+ nde la Bɛnjamina.+

20 Ana w’apami wakatota Yɔsɛfu nde la Asɔnatɛ,+ ɔna Pɔtifɛra la womoto, ɔlɔmbɛdi wa Ɔnɛ* lo wodja w’Edjibito vɔ anɛ: Manase+ nde la Efrayimɛ.+

21 Ana w’apami wa Bɛnjamina+ vɔ anɛ: Bɛla, Bɛkɛrɛ, Ashibɛlɛ, Ngɛra,+ Namana, Ehi, Rɔshɛ, Mupima, Hupima+ ndo Arɛda.+

22 Wasɔ mbele ana la ekana wakote Rashɛlɛ nde la Jakɔbɔ. Vɔ waki tshɛ tshɛ anto* 14.

23 Ɔna* aki Danɛ+ ko Hushima.+

24 Ana w’apami wa Nafɛtali+ vɔ anɛ: Jahazɛlɛ, Nguni, Jezɛrɛ ndo Shilɛmɛ.+

25 Wasɔ mbele ana w’apami wa Biliha, ɔnɛ lele Labana akawosha Rashɛlɛ. Nde akayota la Jakɔbɔ tshɛ tshɛ anto* 7.

26 Wanɛ* tshɛ wakotɔ oma le Jakɔbɔ ndo wakatshu l’Edjibito kaamɛ la nde waki 66,+ aha la mbadia wadi w’anande. 27 Yɔsɛfu akote ana* 2 l’Edjibito. Anto* tshɛ wa lo luudu la Jakɔbɔ waki l’Edjibito waki 70.+

28 Ko Jakɔbɔ akatome Juda+ la ntondo kande dia totɛ Yɔsɛfu ɔnɛ nde otatshu otsha la Ngɔshɛnɛ. Lam’akawakome l’ɛtshi ka nkɛtɛ ka Ngɔshɛnɛ,+ 29 Yɔsɛfu akalɔngɔsɔla pusupusu kande ndo akatshu dia tohomana l’Isariyɛlɛ wa she la Ngɔshɛnɛ. Lam’akandayaeyanya le she, nde akookumbatɛ* ndo akalele lo tshanda mɔtshi.* 30 Ko Isariyɛlɛ akatɛ Yɔsɛfu ate: “Wonya ɔnɛ dimi kovɔka ndooko dikambo, lam’ele lambokɛna ndo lambeya dia wɛ eke la lɔsɛnɔ.”

31 Ɔnkɔnɛ, Yɔsɛfu akatɛ anango ndo ase luudu la she ate: “Dimi tokotshɔ le Farawɔ+ kele ntowote nte: ‘Analengo l’ase nkumbo ka papa waki lo wodja wa Kanana wamboya le mi.+ 32 Vɔ wekɔ alami w’ɛkɔkɔ+ ndo vɔ nongaka dongalonga.+ Vɔ wakaye la ɛkɔkɔ awɔ, ngɔmbɛ yawɔ ndo kɛnɛ tshɛ kele la wɔ.’+ 33 Naka Farawɔ ambonyelɛ ko ambonyombola ate: ‘Elimu akɔna watonyokambaka?’ 34 Kanyote nyate: ‘Ekambi ayɛ wookolongaka dongalonga oma ko tɔkɛndakɛnda tawɔ polo ndo kakianɛ, oyadi sho kana watshɛso,’+ dia nyu mbidjasɛ l’ɛtshi ka nkɛtɛ ka Ngɔshɛnɛ,+ nɛ dia alami tshɛ w’ɛkɔkɔ wekɔ wɔnɔnyi le ase Edjibito.”+

47 Ko Yɔsɛfu akatshu, akatotɛ Farawɔ+ ate: “Papa la analengo la dongalonga diawɔ ndo la kɛnɛ tshɛ kele la wɔ wamboya oma lo wodja wa Kanana ndo wekɔ l’ɛtshi ka nkɛtɛ ka Ngɔshɛnɛ.”+ 2 Nde akɔshi anango 5 ko akatowaɛnyanya la Farawɔ.+

3 Farawɔ akambola anango Yɔsɛfu ate: “Elimu akɔna watonyokambaka?” Ko vɔ wakakadimola Farawɔ vate: “Ekambi ayɛ wekɔ alami w’ɛkɔkɔ, oyadi sho kana watshɛso.”+ 4 Oma laasɔ, vɔ wakatɛ Farawɔ vate: “Tamboya ndjodjasɛ oko angɛndangɛnda lo wodja ɔnɛ,+ nɛ dia ndooko adiyo wa dongalonga di’ekambi ayɛ ndɛ, dikambo ndjala kekɔ wolo lo wodja wa Kanana.+ Ɔnkɔnɛ lam’alangayɛ, etawɔ di’ekambi ayɛ mbidjasɛ lo ɛtshi ka nkɛtɛ ka Ngɔshɛnɛ.”+ 5 Ko Farawɔ akatɛ Yɔsɛfu ate: “Shɔ la ananyɔ le yɛ mboyewɔ. 6 Wodja w’Edjibito w’otondo wekɔ l’anya ayɛ. Djashiya shɔ la ananyɔ l’ɛtshi ka nkɛtɛ koleki tshɛ dimɛna.+ Vɔ wadjasɛ l’ɛtshi ka nkɛtɛ ka Ngɔshɛnɛ ndo naka amɔtshi l’atei awɔ wekɔ la akoka, ko wɛ mbasha ɔkɛndɛ wa vɔ namaka dongalonga diami.”

7 Oma laasɔ, Yɔsɛfu akatshu la Jakɔbɔ ya she dia towɛnyanya la Farawɔ, ko Jakɔbɔ akatshɔkɔla Farawɔ. 8 Farawɔ akambola Jakɔbɔ ate: “Ɛnɔnyi engana waya la yɛ?” 9 Jakɔbɔ akatɛ Farawɔ ate: “Ɛnɔnyi 130 kamomekekɔ.* Nshi ya lɔsɛnɔ lami yekɔ tshitshɛ ndo paa efula,+ ndo yɔ hayongi efula oko wakasɛnɛ watshɛmi etena kakawatekekɔka.”*+ 10 Oma laasɔ, Jakɔbɔ akatshɔkɔla Farawɔ ko akamɔ oma lalende.

11 Ko Yɔsɛfu akadjashiya she la anango ndo akawasha ɛtshi ka nkɛtɛ lo wodja w’Edjibito, ɛtshi ka nkɛtɛ kakaleke tshɛ dimɛna ka la Ramɛsɛ+ oko wakadjanga Farawɔ. 12 Yɔsɛfu akatomɛka she la anango l’ase nkumbo ka she tshɛ mbo ya ndɛ* lo ndjela lofulo l’anawɔ.

13 Ko mbo ya ndɛ* yakashile lo wodja w’Edjibito ndo lo wodja wa Kanana, nɛ dia ndjala kaki wolo efula. Anto wa lo wedja ɛsɔ wakadiɛnɛ la ndjala.+ 14 Ɔnkɔnɛ, Yɔsɛfu akɔsaka falanga tshɛ yakasombaka anto mbo ya ndɛ+ lo wodja w’Edjibito ndo lo wodja wa Kanana, ko nde akombaka falanga yakɔ lo luudu laki Farawɔ. 15 Lam’akashile falanga lo wodja w’Edjibito ndo lo wodja wa Kanana, ase Edjibito tshɛ wakatatɛ ndja le Yɔsɛfu ko wakawotɛka vate: “Otosha mbo ya ndɛ! Lande na kɛnayɛ tavɔ la ndjala lo washo ayɛ l’ɔtɛ w’ɔnɛ falanga yaso yamboshila?” 16 Ko Yɔsɛfu akate ate: “Naka falanga yanyu yamboshila, nyombela dongalonga dianyu kele toyengɔnya la mbo ya ndɛ.” 17 Vɔ wakatatɛ mbela Yɔsɛfu dongalonga diawɔ. Yɔsɛfu akengɔnyaka mbo ya ndɛ la mfalasa, la ɛkɔkɔ, la mbudi, la ngɔmbɛ ndo la mponda. Nde akengɔnyaka mbo ya ndɛ la dongalonga diawɔ tshɛ ɔnɔnyi ɔsɔ w’otondo.

18 Lam’akashile ɔnɔnyi akɔ, vɔ wakaye le nde ɔnɔnyi okina ko wakayowotɛ vate: “Nkumɛso le, hatokoshɛ, falanga ndo dongalonga diaso tshɛ tamboshila kosha, wɛ nkumɛso. Taya ndooko l’ɛngɔ ka mbisha nkumɛso laadiko di’alemba aso la bɛtshi diaso dia nkɛtɛ. 19 Lande na kɛnayɛ tavɔ la ndjala sho la wodja aso? Otosombe sho la bɛtshi diaso dia nkɛtɛ dia sho nkondja mbo ya ndɛ, ko sho la bɛtshi diaso dia nkɛtɛ tayonga mfumbe yaki Farawɔ. Otosha yema ya woho kele katotshikale la lɔsɛnɔ aha la mvɔ ndo diaha nkɛtɛ yaso ntshikala tɔngɔ to.” 20 Ko Yɔsɛfu akasombɛ Farawɔ bɛtshi dia nkɛtɛ tshɛ di’ase Edjibito, nɛ dia ose Edjibito tshɛ akasondja ekambɔ kande lam’ele ndjala kaki wolo efula, ndo bɛtshi dia nkɛtɛ tshɛ diakayonga diaki Farawɔ.

21 Oma laasɔ, nde akayotɛ ase Edjibito wa l’ahole tshɛ dia vɔ monɔ otsha l’esomba.+ 22 Onyake paka bɛtshi dia nkɛtɛ di’ɛlɔmbɛdi mbakinde kosomba,+ nɛ dia Farawɔ mbakashaka ɛlɔmbɛdi mbo ya ndɛ, ko vɔ wakasɛnaka la kɛnɛ kakawashaka Farawɔ. Diakɔ diakiwɔ kosondja bɛtshi diawɔ dia nkɛtɛ. 23 Ko Yɔsɛfu akatɛ anto ate: “Dimi lambosombɛ Farawɔ bɛtshi dianyu dia nkɛtɛ ndo etondo anyu. Woho vɔ ɔnɛ kele nyonɛ lo dikambɔ. 24 Lam’ayonyona, kanyoshake Farawɔ+ k’atanu ɔtɔi ka dinela, koko tenyi nɛi diatshikala tshɛ diayonga dianyu dia nyu monɛ ndo dia nyu ndɛ nyu l’ase nkumbo yanyu ndo l’ananyu.” 25 Ko vɔ wakate vate: “Wɛ amboshimbɛ nsɛnɔ yaso.+ Etawɔ dia sho mpomɔ lokolo l’ɔlɔ lo washo ayɛ, wɛ nkumɛso, ko sho tayonga mfumbe yaki Farawɔ.”+ 26 Yɔsɛfu akadje didjango diele la nɛmɔ polo ndo ɛlɔ lo wodja w’Edjibito w’otondo dia Farawɔ nongolaka k’atanu ɔtɔi k’oma lo dinela. Onyake bɛtshi dia nkɛtɛ di’ɛlɔmbɛdi mbaki komonga diaki Farawɔ.+

27 Ase nkumbo k’Isariyɛlɛ wakatetemala mbidjasɛ lo wodja w’Edjibito, l’ɛtshi ka nkɛtɛ ka Ngɔshɛnɛ.+ Vɔ wakadjasɛ lɛkɔ, wakotanɛ lɛkɔ ndo wakayonga efula ka mamba.+ 28 Jakɔbɔ akasɛnɛ ɛnɔnyi 17 lo wodja w’Edjibito. Ɔnkɔnɛ, nshi ya lɔsɛnɔ la Jakɔbɔ tshɛ yaki ɛnɔnyi 147.+

29 Etena k’Isariyɛlɛ mvɔ kakasukana,+ ko nde akelɛ Yɔsɛfu y’ɔnande ndo akawotɛ ate: “Lam’alangayɛ, naka lambohomɔ lokolo l’ɔlɔ lo washo ayɛ, dja lonya layɛ l’ɛse k’ɛhɛlɔhɛlɔ kami kele tshiba dia wɛ ayɔmɛnya ngandji kayɛ ka kɔlamelo ndo kɔlamelo yayɛ. Lam’alangayɛ, tonkundɛke l’Edjibito.+ 30 Lam’ayomovɔ,* kɛmbɛ odo ami oma l’Edjibito kele kotonkundɛ lo waombo wa waa papa.”+ Ko nde akate ate: “Layosala kɛnɛ tshɛ katayɛ.” 31 Nde akate ate: “Ontshibe.” Ko Yɔsɛfu akootshibɛ.+ Oma laasɔ, Isariyɛlɛ akakusama l’ɔtɛ wa mbeto kande.+

48 L’ɔkɔngɔ w’akambo asɔ, wakatɛ Yɔsɛfu vate: “Shɔ ambɔlɛmba efula la hemɔ.” Nde akɔshi anande 2, Manase nde la Efrayimɛ, ko akatshu la wɔ.+ 2 Ko wakatɛ Jakɔbɔ vate: “Yɔsɛfu y’ɔnayɛ amboya ndjokenda.” Ko Isariyɛlɛ akayakeketsha ndo akadjasɛ lo mbeto kande. 3 Jakɔbɔ akatɛ Yɔsɛfu ate:

“Nzambi Kanga-Wolo-Tshɛ akɛnama le mi la Luza, lo wodja wa Kanana ko akantshɔkɔla.+ 4 Ndo nde akambutɛ ate: ‘Dimi layokosha diwutshi, dimi layokofudia ndo wɛ ayoyala olui wa woke w’anto+ ndo dimi layosha tokanula* tayɛ nkɛtɛ nyɛ pondjo pondjo.’+ 5 Ɔnkɔnɛ, anayɛ 2 wakayote lo wodja w’Edjibito la ntondo ka dimi ndja le yɛ l’Edjibito wekɔ anami.+ Efrayimɛ nde la Manase wayonga anami oko wele Rubɛna nde la Simɛyɔna anami.+ 6 Koko ana wayoyota l’ɔkɔngɔ awɔ wayonga anayɛ. Vɔ wayelamɛ lo nkombo y’anangɛwɔ ndo vɔ wayolongola etenyi kawɔ k’okitɔ.+ 7 Lo kɛnɛ kendana la mi, etena kakamayayaka oma la Padana, Rashɛlɛ wa nyɔ akavu+ lalemi lo wodja wa Kanana, l’ɛtshi ka nkɛtɛ kanganyi etale la Efarata.+ Ko dimi lakookundɛ lo mboka k’otsha l’Efarata, mbuta ate Bɛtɛlɛhɛma.”+

8 Lam’akɛnyi Isariyɛlɛ ana waki Yɔsɛfu, nde akawombola ate: “Akanga ana anɛ?” 9 Yɔsɛfu akatɛ she ate: “Toko anami wamboyombisha Nzambi lendo!”+ Ko nde akate ate: “Lam’alangayɛ, ombishawɔ kele mbatshɔkɔlɛ.”+ 10 L’etena kɛsɔ, washo waki Isariyɛlɛ wakayala loonge loto, nɛ dia nde aki osombe ndo nde aki hayɛna. Ɔnkɔnɛ Yɔsɛfu akaasukanya lalende, ko nde akashana la wɔ bizɛ ndo akaakumbatɛ. 11 Isariyɛlɛ akatɛ Yɔsɛfu ate: “Dimi konongamɛka dia layɛna elungi kayɛ nto,+ koko kakianɛ Nzambi ambonkimanyiya dia dimi mɛna ndo anayɛ.”* 12 Ko Yɔsɛfu akanya ana oma lo dihɛlɔ diaki Isariyɛlɛ, ko nde akakɔlama elungi polo la nkɛtɛ.

13 Oma laasɔ, Yɔsɛfu akawaɔshi vɔ akɔ 2, Efrayimɛ+ lo lonya lande l’omi dia nde monga lo lonya la lɔmɔsɔ laki Isariyɛlɛ ndo Manase+ lo lonya lande la lɔmɔsɔ dia nde monga lo lonya l’omi laki Isariyɛlɛ, ko nde akaasukanya lalende. 14 Koko Isariyɛlɛ akonyiya lonya lande l’omi, ko akaliahɛ l’ɔtɛ wa Efrayimɛ kaanga mbakinde kose ndo nde akahɛ lonya lande la lɔmɔsɔ l’ɔtɛ wa Manase. Nde akawawahɛ anya ngasɔ la oyango ɔmɔtshi, nɛ dia Manase mbaki enondo.+ 15 Oma laasɔ, nde akatshɔkɔla Yɔsɛfu ndo akate ate:+

17 Lam’akɛnyi Yɔsɛfu dia lonya l’omi la she lekɔ paka l’ɔtɛ wa Efrayimɛ, dui sɔ kombɔngɛnyangɛnya. Ɔnkɔnɛ, nde akalange minya lonya la she oma l’ɔtɛ wa Efrayimɛ dia liahɛ l’ɔtɛ wa Manase. 18 Yɔsɛfu akatɛ she ate: “Aha ngango Ipa! Ɔnɛ kele enondo.+ Ahɛ lonya layɛ l’omi l’ɔtɛ ande.” 19 Koko she akatone ndo akate ate: “Dimi mbeyaka, ɔnami, dimi mbeyaka. Nde lawɔ ayonga tshondo ya wodja ndo nde lawɔ ayonga wodja wa woke. Koko ɔna la kose ayowoleka+ ndo anande* wayonga efula oko wedja w’etondo.”+ 20 Ɔnkɔnɛ, nde akatetemala mbatshɔkɔla lushi lɔsɔ,+ ata ate:

Ko nde akatetemala mbetsha Efrayimɛ la ntondo ka Manase.

21 Oma laasɔ, Isariyɛlɛ akatɛ Yɔsɛfu ate: “Dimi layanga mvɔ,+ koko ndooko onyake Nzambi ayotetemala monga kaamɛ la nyu ndo ayonyokaloya lo nkɛtɛ ya watshɛnyu.+ 22 Koko dimi lambokosha ɛtshi ka nkɛtɛ kekina oleki ananyɔ, ɛtshi ka nkɛtɛ kakamahɔtɔla ase Amɔra la lokuwa lami la ta ndo la ota ami.”

49 Oma laasɔ, Jakɔbɔ akelɛ anande ko akawatɛ ate: “Nyotshumane, nyosangane kaamɛ kele nyote kɛnɛ kayonyokomɛ lo etena k’ekomelo ka nshi. 2 Nyu ana wa Jakɔbɔ, nyosangane ndo nyohokame, ɛɛ, nyohokame Isariyɛlɛ wa shɛnyu.

3 “Rubɛna,+ wɛ kele ɔnami l’enondo,+ wolo ami ndo etatelo ka wolo ami wa diwutshi, ɔnɛ loleki kɛnɛmɔ ndo loleki wolo. 4 Lam’ele wɛ ekɔ onto lele bu la ndjakimɛ oko asuku w’ashi, wɛ hatoleka, nɛ dia wɛ akadɛ lo mbeto ka shɔ.+ L’etena kɛsɔ, wɛ akadje mbeto kami mindo.* Nde akadɛ mɛtɛ lɔkɔ!

5 “Simɛyɔna la Lɛwi wekɔ onto la ɔnango.+ Vɔ kambaka la dihomɔ diawɔ dia ta+ dia nsala akambo wa ngala. 6 Anima* ami le, tongake kaamɛ la wɔ. Tetawɔke dia kɛnɛmɔ kami monga kaamɛ la wɔ, nɛ dia l’ɔtɛ wa nkɛlɛ kawɔ, vɔ wakadiake anto+ ndo l’ɔtɛ w’ɔngɛnɔngɛnɔ awɔ, vɔ wakahembola ngɔmbɛ eshisha wa l’ekolo. 7 Nkɛlɛ kawɔ kadjame mananu, nɛ dia tɔ kekɔ wolo efula ndo odudu awɔ wadjame mananu, nɛ dia vɔ wekɔ kɔlɔ ka ditshi.+ Dimi nte mbahandjole lo wodja wa Jakɔbɔ ndo mbadianganya lo Isariyɛlɛ.+

8 “Koko wɛ Juda,+ ananyɔ wayokotombolaka.+ Lonya layɛ layonga lo nkingo y’atunyi ayɛ.+ Ana wa shɔ wayokusamaka la ntondo kayɛ.+ 9 Juda ekɔ ɔsɔngɔ wa ntambwɛ.+ Ɔnami, wɛ ayonɛɛ oma lale nyama kondjiyɛ. Nde ayetama la nkɛtɛ ndo ayoholama oko ntambwɛ. Oko ntambwɛ, ndooko layosombɔ mbonyiya. 10 Danga dia lowandji hadiomɔki le Juda+ ndo danga dia nkumekanga hadiomɔki l’ekolo ande polo lam’ayoya Shilo,*+ ɔnɛ lele anto tshɛ wayowokitanyiya.+ 11 Nde ayokeleka mponda kande l’ɔkɔdi wa vinyɔ ndo mponda kande ka wadi l’ɔkɔdi wa vinyɔ woleki dimɛna, ko nde ayosola dihɔndɔ diande lo wanu ndo lo ashi w’elowa wa beela. 12 Washo ande wekɔ beela l’ɔtɛ wa wanu wanɔnde ndo wanyu ande wekɔ wɛma l’ɔtɛ w’abɛlɛ wanɔnde.

13 “Zebuluna+ ayodjasɛ l’omamu wa ndjale, l’omamu w’ashi lɛnɛ atemalaka masuwa.+ Ndo olelo ande wayonga lo wekeke wa Sidɔna.+

14 “Isakara+ ekɔ mponda kele la weka wa wolo, katetamaka lam’asa etshumu atɔ 2. 15 Nde ayɛna dia dihole dia diomuyelo diekɔ dimɛna ndo ɔnɛ ɛtshi ka nkɛtɛ kakɔ kekɔ dimɛna efula. Nde ayɛngɛ dihɛka diande dia mɛmba wotsho ndo ayotshutshuyama dia nkamba olimu wa wolo.

16 “Danɛ+ ayolombosha anto ande oko ɔtɔi ɔmɔtshi wa lo waoho w’Isariyɛlɛ.+ 17 Danɛ ayoyala oko oloyi wele l’omamu wa mboka, oko tshuha diele la nseke l’omamu wa mboka dialumata nsanga ya mfalasa dia ombahemi atɔ nkɔ ekalekale.+ 18 Jehowa le, dimi layokonga panda oma le yɛ.

19 “Lo dikambo dia Ngada,+ olui wa dengalenga wayowɔlɔsha, koko nde ayoyelana la wɔ.+

20 “Ashɛrɛ+ ayonga la mbo ya ndɛ efula* ndo nde ayotondja mbo ya ndɛ yakoka le nkumekanga.+

21 “Nafɛtali+ ekɔ lofumbɔ. Nde tondjaka ɛtɛkɛta w’amɛna.+

22 “Yɔsɛfu+ ekɔ lokonɔ l’osongo watɔ elowa. Nde ekɔ lokonɔ l’osongo wele l’omamu w’ashi ndo wele ntahe yawɔ ndekanaka ehele. 23 Koko amboki w’eta wakatetemala mbɔlɔsha ndo mbooka mpito ndo vɔ wakatetemala mbohetsha+ efula. 24 Koko ota ande wakatshikala lo dihole diawɔ+ ndo anya ande wakatetemala monga wolo ndo l’osalosalo.+ Dui sɔ diakasalema oma l’anya wa kanga wolo laki Jakɔbɔ, oma le olami w’ɛkɔkɔ, dive dia Isariyɛlɛ. 25 Nde* ndja oma le Nzambi ka shɔ, nde ayokokimanyiya, nde ekɔ kaamɛ la Kanga-Wolo-Tshɛ ndo nde ayokɔtshɔkɔla la ɛtshɔkɔ w’oma l’olongo, ɛtshɔkɔ w’oma l’afuku w’ɛhɔngɔ,+ ɛtshɔkɔ wa monga l’ana efula ndo la dongalonga efula.* 26 Ɛtshɔkɔ wa shɔ wayoleka ɛtshɔkɔ w’akona watshikala pondjo, wayoleka diangɔ di’amɛna dia lo tokonakona tatshikala pondjo.+ Ɛtshɔkɔ akɔ wayotetemala monga l’ɔtɛ wa Yɔsɛfu, laadiko dia lowako la ɔnɛ lakawakakitola l’anango.+

27 “Bɛnjamina+ ayotetemala mbatshatsha oko laondo.+ La pindju, nde ayɔlɛka nyama kakandande ndo la dikɔlɔ nde ayokahanya nyama kakɔ.”+

28 Wasɔ tshɛ wele waoho 12 w’Isariyɛlɛ, ndo kɛsɔ mbakawatɛ shɛwɔ etena kakandaatshɔkɔla. Nde akatshɔkɔla onto l’onto la ɔtshɔkɔ wɛdimi la nde.+

29 L’ɔkɔngɔ wa laasɔ, nde akawatɛ ate: “Dimi layanga ndjela watshɛmi.*+ Kanyonkundɛ kaamɛ la waa papa lo wooko wele lo ekambɔ ka Efɛrɔna ose Hiti,+ 30 wooko wele lo ekambɔ ka Makɛpela kɛlane la Mamarɛ lo wodja wa Kanana, lo ekambɔ kakasombe Abrahama oma le Efɛrɔna ose Hiti dia kundɛka anto laawɔ. 31 Lɛkɔ mbakakundɛma Abrahama la Sara+ ka wadɛnde. Lɛkɔ mbakakundɛma Isaka+ la Rɛbɛka wa wadɛnde ndo lɛkɔ mbakamakundɛ Lea. 32 Ekambɔ ndo wooko wele lɔkɔ wakasombama oma le ana wa Hiti.”+

33 Ngasɔ mbakakomiya Jakɔbɔ ndakana la anande. Oma laasɔ nde aketama lo mbeto kande, akakitshiya lomu, ko akayele watshɛnde.*+

50 Yɔsɛfu akayakɔsha laadiko dia she,+ ko nde akoolele ndo akashana la nde bizɛ. 2 L’ɔkɔngɔ wa laasɔ, Yɔsɛfu akatɛ ekambi ande, enganga dia vɔ mbitɛ odo wa she ekanga diaha vɔ mpɔnda.+ Ko enganga wakatɛ odo w’Isariyɛlɛ ekanga diaha vɔ mpɔnda, 3 ndo vɔ wakɔshi nshi 40 y’etondo dia mbotɛ ekanga diaha odo mpɔnda, nɛ dia ɔsɔ mbele nshi yɔsa wotelo w’ekanga. Ase Edjibito wakatetemala mbolela l’edja ka nshi 70.

4 Lam’akashile nshi y’otanda, Yɔsɛfu akatɛ ɛlɔhɛ* waki Farawɔ ate: “Naka lambohomɔ lokolo l’ɔlɔ lo washo anyu, nyotote Farawɔ nyate: 5 ‘Papa akantshibia,+ ata ate: “Dimi layanga mvɔ.+ Kotonkundɛ l’ɛtshi kami ka nkɛtɛ,+ lo wooko wakamatshime lo wodja wa Kanana.”+ Lam’alangayɛ, etawɔ dia dimi ntshɔ tokundɛ papa, ko dimi layokalola.’” 6 Farawɔ akakadimola ate: “Tshɔka tokundɛ shɔ oko wakandakotshibia.”+

7 Ɔnkɔnɛ, Yɔsɛfu akatshu dia tokundɛ she ndo ekambi tshɛ waki Farawɔ wakatshu la nde, kaamɛ ndo ɛlɔhɛ+ wa laka Farawɔ ndo ɛlɔhɛ tshɛ wa lo wodja w’Edjibito, 8 ndo ase luudu laki Yɔsɛfu tshɛ ndo anango ndo ase luudu la she.+ Onyake ana w’akɛnda ato la ɛkɔkɔ awɔ la ngɔmbɛ yawɔ mbakatshikala lo ɛtshi ka nkɛtɛ ka Ngɔshɛnɛ. 9 Nde akatshu ndo la pusupusu+ ndo la ambahemi wa mfalasa, ko vɔ wakayala olui a woke w’anto. 10 Oma laasɔ, vɔ wakakome lo dihole di’esuswelo ka la Atada diele suke la Jɔrdana, ko vɔ wakatosala otanda wa woke wa mamba. Nde akatetemala ndela she l’edja ka nshi 7. 11 Ase Kanana, akanga wa ngelo wakawaɛnyi walela lo dihole di’esuswelo ka la Atada ko wakate vate: “Ɔnɛ ekɔ otanda wa woke le ase Edjibito!” Diakɔ diakawɔlɛ dihole sɔ diele suke la Jɔrdana ɔnɛ Abɛlɛ-Mizirayima.*

12 Ana wa Jakɔbɔ wakasale akambo tshɛ oko wakandawatɛ.+ 13 Anande wakawɛmbɛ otsha lo wodja wa Kanana ndo wakatookundɛ lo wooko wa l’ekambɔ ka Makɛpela, ekambɔ kɛlane la Mamarɛ kakasombe Abrahama oma le Efɛrɔna ose Hiti dia kundɛka anto laawɔ.+ 14 L’ɔkɔngɔ wa nde nkundɛ she, Yɔsɛfu akakalola l’Edjibito nde la anango ndo wanɛ tshɛ wakatshu la nde dia tokundɛ she.

15 Lam’akɛnyi anango Yɔsɛfu dia shɛwɔ ambovɔ, vɔ wakate vate: “Ondo Yɔsɛfu akatombɛ kumbɛkumbɛ ndo nde ayɔsɔmbɔya kɔlɔ tshɛ kakatoosalɛ.”+ 16 Ɔnkɔnɛ vɔ wakatomɛ Yɔsɛfu dui vate: “Shɔ akatatshi la ntondo ka nde mvɔ ate: 17 ‘Kanyoyote Yɔsɛfu nyate: “Lam’alangayɛ, lambokɔsɛngasɛnga dia wɛ dimanyiya ananyɔ lo munga la kɔlɔ kakawakosalɛ.”’ Lam’alangayɛ, dimanyiya ekambi wa Nzambi ka shɔ lo kɔlɔ kakawasale.” Ko Yɔsɛfu akalele lam’akandoke kɛnɛ kakawawotɛ. 18 Oma laasɔ, anango vɔ lawɔ wakaye ko wakakusama la ntondo kande ndo wakate vate: “Lam’alangayɛ otɔshi oko mfumbe yayɛ!”+ 19 Ko Yɔsɛfu akawatɛ ate: “Tanyokake wɔma. Onde dimi Nzambi kemi? 20 Kaanga mbakinyu la kanyi ya salɛmi kɔlɔ,+ Nzambi akakongɛ dia nkadimola dui sɔ lo ɔlɔlɔ dia nshimbɛ nsɛnɔ y’anto efula, oko wasalande ɛlɔ.+ 21 Ɔnkɔnɛ, tanyokake wɔma. Dimi layonyoshaka nyu la ananyu wa totshitshɛ mbo ya ndɛ.”+ Lo mbuta ngasɔ, nde akaasambe ndo akaakitshakitsha asolo.

22 Ko Yɔsɛfu akatetemala mbidjasɛ l’Edjibito nde la ase nkumbo ka she. Yɔsɛfu akasɛnɛ ɛnɔnyi 110. 23 Yɔsɛfu akɛnyi ekana wa Efrayimɛ+ ndo ana wa Makiri+ ɔna Manase. Vɔ wakotɔ lo dihɛlɔ dia Yɔsɛfu.* 24 L’edjedja ka wonya, Yɔsɛfu akayotɛ anango ate: “Dimi layanga mvɔ, koko ndooko onyake Nzambi ayonyodja yimba+ ndo aha la taamu nde ayonyotondja oma lo wodja ɔnɛ dia nyu ntshɔ lo wodja wakandatshibe dia mbisha Abrahama, Isaka ndo Jakɔbɔ.”+ 25 Ko Yɔsɛfu akatshibia ana w’Isariyɛlɛ ate: “Ndooko onyake Nzambi ayonyodja yimba. Kanyɛmbɛ weka ami oma lo dihole nɛ.”+ 26 Yɔsɛfu akavu aya la ɛnɔnyi 110, ko wakatɛ odo ande ekanga diaha vɔ mpɔnda+ ndo wakawodje lo dibaya l’Edjibito.