ƐSTA

1 Lo nshi ya Ahasuɛrɔ,* mbuta ate Ahasuɛrɔ wakolɛ prɔvɛnsɛ+ 127 oma la Ɛndɛ polo l’Etiyɔpiya;* 2 lo nshi shɔ, lam’akadjasɛ nkumekanga Ahasuɛrɔ lo kiti kande ka lowandji la Shushana*+ dihole di’eshamelo,* 3 l’ɔnɔnyi wa 3 w’ɛlɔmbwɛlɔ kande, nde akasale dambo dikambo dia ewandji ande la ekambi ande tshɛ. Asɔlayi w’ase Mediya+ la Pɛrɛsiya,+ ɛlɔhɛ ndo ewandji wa lo prɔvɛnsɛ waki la ntondo kande, 4 ko nde akawaɛnya ɔngɔnyi wa diolelo diande dia lotombo ndo woke woke, lɔnɛnɛ la lokumu lande l’edja ka nshi efula, nshi 180. 5 Lam’akashile nshi shɔ, nkumekanga akasale dambo l’edja ka nshi 7 dikambo dia anto tshɛ waki la Shushana* dihole di’eshamelo,* oyadi anto woleki lokumu kana anto k’anto lo sɛkɛ dia jardɛ ya luudu la nkumekanga. 6 Ahɔndɔ wa linɛnɛ, wa la nanda y’amɛna ndo ahɔndɔ wa bule wakahanema lo ɛkɔdi wakasalema l’ahɔndɔ w’amɛna, ahɔndɔ w’ebelabela lo ashingo wa mfɛsa, dikundji dia marbrɛ ndo mbeto ya paonyi la ya mfɛsa lo odihe wa pɔrifirɛ, marbrɛ, adidi ndo marbrɛ k’odima.

7 Wakashaka anto wanu lo akɔhɔ* wa paonyi; dikɔhɔ tshɛ diakatshikitana la dikina ndo wanu wa nkumekanga waki efula lo ndjela ekondjelo ka nkumekanga. 8 Wanu wakanɔmaka lo ndjela didjango di’ɔnɛ onto koka nnɔ woho walangande,* nɛ dia nkumekanga akakongɛ nde la ɛlɔhɛ wa lo luudu lande dia onto tshɛ nnɔ woho walangande.

9 Vashiti+ wadi aki nkumekanga nde lawɔ akasale dambo dikambo dia wamato lo luudu la lowandji* laki nkumekanga Ahasuɛrɔ.

10 Lushi la 7, etena kaki nkumekanga l’ɔngɛnɔngɛnɔ l’otema l’ɔtɛ wa wanu, nde akatɛ Mehumana, Bizita, Harabɔna,+ Bingita, Abangita, Zetara ndo Karakasi, ɛnɛnɛ 7 waki ekambi wa nkumekanga Ahasuɛrɔ ndamɛ, 11 dia vɔ ndja la Vashiti wadi aki nkumekanga la ntondo ka nkumekanga, ele la ɔlɔtɔ wa l’ɔtɛ* wa lowandji, dia mɛnya anto ndo ewandji olangala ande, nɛ dia nde aki olangala efula. 12 Koko Vashiti wadi aki nkumekanga akatetemala ntona dia ndja lo ndjela didjango dia nkumekanga diakayowotɛ ɛnɛnɛ. Ko nkumekanga akomala nkɛlɛ k’efula ndo akadunganɛ la nkɛlɛ.

13 Nkumekanga akasawola la apami wa tomba waki la diewo lo kɛnɛ kendana l’awui wakete* (nɛ dia lo yoho shɔ mbakakomaka awui wa nkumekanga le wanɛ tshɛ wakayashaka lo ɛlɛmbɛ ndo l’awui wa dombo, 14 ndo wanɛ wakongaka suke suke la nde vɔ anɛ: Karashɛna, Shetara, Adimata, Tarashishi, Mɛrɛsɛ, Marasɛna ndo Memukana, ewandji+ 7 w’ase Mediya la Pɛrɛsiya wakɔtɔka le nkumekanga ndo waki la ahole woleki la diko lo diolelo). 15 Nkumekanga akambola ate: “Lo ndjela ɛlɛmbɛ, kakɔna kakokaso nsala la Vashiti wadi aki nkumekanga lam’ele nde hakitanyiyisha didjango dia nkumekanga Ahasuɛrɔ diakawote ɛnɛnɛ?”

16 Ko Memukana akate la ntondo ka nkumekanga ndo k’ewandji ate: “Vashiti wadi aki nkumekanga aha nkumekanga oto kamondosalɛ kɔlɔ,+ koko ndo ewandji tshɛ l’anto tshɛ wa lo prɔvɛnsɛ tshɛ ya nkumekanga Ahasuɛrɔ. 17 Nɛ dia kɛnɛ kambosala wadi aki nkumekanga kayeyama le wadi tshɛ ko vɔ wayɔnyɔlaka waomɛwɔ, wata vate: ‘Nkumekanga Ahasuɛrɔ akatome dui dia vɔ toya la Vashiti wadi aki nkumekanga la ntondo kande, koko nde akatone ndja.’ 18 Lushi lɔsɔ, wadi w’ewandji wa Mediya la Pɛrɛsiya weya kɛnɛ kakasale wadi aki nkumekanga wayotɛka ewandji tshɛ wa nkumekanga ndo dui sɔ diayokonya lo diɔnyɔ la lo nkɛlɛ k’efula. 19 Naka nkumekanga mɛnaka dimɛna, nkumekanga adje didjango dimɔtshi ndo diafundame lo ɛlɛmbɛ w’ase Mediya la Pɛrɛsiya wahakoke tshikitanyema,+ diaha Vashiti ndja nto pondjo la ntondo ka nkumekanga Ahasuɛrɔ; ndo nkumekanga asha womoto okina looleki dimɛna dihole diande dia lowandji. 20 Lam’ayoka anto didjango dia nkumekanga lo shaka ya diolelo diande di’otondo, wamato tshɛ wayɔlɛmiyaka waomɛwɔ, oyadi wa lokumu kana wele anto k’anto.”

21 Kanyi shɔ yakangɛnyangɛnya nkumekanga nde la ewandji, ko nkumekanga akasale kɛnɛ kakate Memukana. 22 Ɔnkɔnɛ nde akatome mikanda lo prɔvɛnsɛ+ tshɛ ya diolelo, prɔvɛnsɛ la prɔvɛnsɛ la efundelo* awɔ ndo le anto l’anto lo ndjela ɔtɛkɛta awɔ, dia omi tshɛ monga owandji wa luudu lande ndo dia tɛkɛtaka lo ɔtɛkɛta w’anto ande hita.

2 L’ɔkɔngɔ w’akambo asɔ, lam’akakitakita nkɛlɛ ka nkumekanga Ahasuɛrɔ,+ nde akohɔ kɛnɛ kakasale Vashiti+ ndo yɛdikɔ yakɔsama lo dikambo diande.+ 2 Ko ekambi wa nkumekanga ndamɛ wakate vate: “Wayange osekaseka ɔmɔtshi w’olangala weke emuma dikambo dia nkumekanga. 3 Ndo nkumekanga asɔnɛ anto wahomba nyanga lo prɔvɛnsɛ tshɛ ya lo diolelo+ diande dia nsanganya esekaseka tshɛ w’elangala wa dimuma la Shushana* dihole di’eshamelo,* lo luudu la wamato. Hengai+ ɔlɛnga wa nkumekanga ndo olami wa wamato ayowalamaka, ndo kawaalɔngɔsɔlɛ alemba* dia mbaetɛ elangala. 4 Ko osekaseka wayoleka ngɛnyangɛnya nkumekanga ayonga wadi aki nkumekanga lo dihole dia Vashiti.”+ Kanyi shɔ yakangɛnyangɛnya nkumekanga ndo kɛsɔ mbakandasale.

5 Pami kɛmɔtshi k’ose Juda aki la Shushana*+ dihole di’eshamelo,* lokombo lande Mɔrɔdɛkai+ ɔna Jayira ɔna Shimei ɔna Kisha oseka Bɛnjamina,+ 6 ɔnɛ lakatɔlama lo lɔhɔmbɔ oma la Jɛrusalɛma kaamɛ l’anto wakatɔlama vɔ la Jɛkɔniya*+ nkumekanga ka Juda, ɔnɛ lele Nɛbukadinɛza nkumekanga ka Babilɔna akɔɔtɔlɛ lo lɔhɔmbɔ. 7 Nde aki olami* wa Hadasa, mbuta ate Ɛsta, ɔna aki ɔnango she, nɛ dia Ɛsta komonga la she kana la nyango.+ Osekaseka akɔ aki kɔmba ndo aki la ɛnamelo k’olangala, ndo lam’akavu she la nyango, Mɔrɔdɛkai akawɔshi oko ɔnande. 8 Lam’akawewoya ɛtɛkɛta wa nkumekanga la ɔlɛmbɛ ande ndo lam’akatɔlama esekaseka efula la Shushana* dihole di’eshamelo,* lo elamelo ka Hengai,+ Ɛsta nde lawɔ akatɔlama otsha lo luudu la nkumekanga* lo elamelo ka Hengai, olami wa wamato.

9 Osekaseka akɔ akɔɔngɛnyangɛnya ndo akahomɔ lokolo l’ɔlɔ* le nde; ɔnkɔnɛ aha la ntshimbatshimba, nde akakongɛ dia vɔ mbɔlɔngɔsɔla demba*+ dia nde ndeka monga olangala ndo dikambo dia oleelo ande, ko nde akasɔnɛ esekaseka 7 oma lo luudu la nkumekanga dikambo diande. Ndo nto, nde akɔɔsɛkɔla nde la ekambi ande otsha lo dihole dioleki dimɛna dia lo luudu la wamato. 10 Ɛsta kombuta ndooko dui lo kɛnɛ kendana la wodja+ ande kana la ewotɔ ande, nɛ dia Mɔrɔdɛkai+ akɔɔkɔkɔmiya diaha nde mbutɛ ndooko onto.+ 11 Lushi la lushi, Mɔrɔdɛkai aketetaka la ntondo ka sɛkɛ dia luudu la wamato dia mbeya kana Ɛsta ekɔ ki ndo dia mbeya woho watete awui le nde.

12 Osekaseka tshɛ aki la mbala kande kakandahombe ntshɔ le nkumekanga Ahasuɛrɔ l’ɔkɔngɔ wa ngɔndɔ 12 y’ɔlɔngɔswɛlɔ wa demba yakafundama dikambo dia wamato, nɛ dia ngasɔ mbakawahombe nshidiya ɔlɔngɔswɛlɔ awɔ w’alemba* dia monga elangala, ngɔndɔ 6 la esɔ ka mirɛ+ ndo ngɔndɔ 6 la esɔ ka balasama+ ndo la weho ekina wa bisɔ diakakambaka la wɔ dia nɔngɔsɔla demba* dia monga olangala. 13 Oma laasɔ, osekaseka akɔ aki suke dia ntshɔ le nkumekanga ndo kɛnɛ tshɛ kakandalɔmbɛ, wakawoshatɔ lam’akandamɔ oma lo luudu la wamato otsha lo luudu la nkumekanga. 14 La dikɔlɔ, nde akɔtɔka lɛkɔ ndo la pindju nde akakalolaka lo luudu la 2 la wamato lo elamelo ka Shashingazɛ ɔlɛnga+ wa nkumekanga, olami w’eseka. Takandahombe ntshɔ le nkumekanga nto onyake naka nkumekanga ambɔɔngɛnangɛna lo yoho ya laande ndo ambowelɛ lo lokombo+ lande.

15 Lam’akakoke etena ka Ɛsta ɔna Abihayilɛ ɔnango she Mɔrɔdɛkai, ɔnɛ lakawɔshi oko ɔna+ ntshɔ le nkumekanga, nde kɔnɔmba ndooko ɛngɔ, onyake kɛnɛ kakate Hengai ɔlɛnga wa nkumekanga, olami wa wamato. (L’etena kɛsɔ tshɛ, Ɛsta akahomɔka lokolo l’ɔlɔ le wanɛ tshɛ wakawɛnaka.) 16 Wakatɔlɛ Ɛsta le nkumekanga Ahasuɛrɔ lo luudu lande la lowandji lo ngɔndɔ ka 10, mbuta ate ngɔndɔ ka Tebɛtɛ,* l’ɔnɔnyi+ wa 7 w’ɛlɔmbwɛlɔ kande. 17 Nkumekanga akalange Ɛsta oleki wamato akina tshɛ ndo nde akahomɔ lokolo l’ɔlɔ la ntondo kande ndo aketawɔma* oleki esekaseka ekina tshɛ wa dimuma. Ko nde akahɛ ɔlɔtɔ wa l’ɔtɛ* wa lowandji l’ɔtɛ ande ndo akawetɛ wadi aki nkumekanga+ lo dihole dia Vashiti.+ 18 Ko nkumekanga akasale dambo dia woke dikambo dia ewandji ande tshɛ ndo ekambi ande tshɛ, dambo dia Ɛsta. Oma laasɔ, nde akate dia nkimwɛ anto wa lo prɔvɛnsɛ ndo nde akatetemalaka nkimɔ weshasha lo ndjela ekondjelo ka nkumekanga.

19 Lam’akawasanganya esekaseka akɔ wa dimuma+ kaamɛ mbala ka 2, Mɔrɔdɛkai akadjasɛ la soko dia nkumekanga. 20 Ɛsta kombuta ndooko dui lo kɛnɛ kendana la ewotɔ ande ndo wodja ande+ oko wakɔɔkɔkɔmiya Mɔrɔdɛkai; Ɛsta akatetemala nsala kɛnɛ kakawotɛ Mɔrɔdɛkai, oko wakandasalaka lam’akinde eke lakande.+

21 Lo nshi shɔ, etena kakadjasɛka Mɔrɔdɛkai la soko dia nkumekanga, Bingitana nde la Terɛshɛ, ɛnɛnɛ 2 wa laka nkumekanga, alami w’asoko wakomala, ko wakɔtɔ sheke dia ndjaka* nkumekanga Ahasuɛrɔ. 22 Mɔrɔdɛkai akeye dui sɔ ndo mbala kakɔ ɔtɔi, nde akatɛ Ɛsta wadi aki nkumekanga. Ko Ɛsta akatɛ nkumekanga lo lokombo la Mɔrɔdɛkai.* 23 Ɔnkɔnɛ, wakasale eyangelo lo dikambo diakɔ ndo dui diakɔ diakayoshikikɛma, ko wakahanɛ apami akɔ 2 lo otamba; awui asɔ tshɛ wakafundama lale nkumekanga+ lo dibuku di’ɔkɔndɔ wa tena.

3 L’ɔkɔngɔ w’akambo asɔ, nkumekanga Ahasuɛrɔ akasha Hamana+ ɔna Hamɛdata ose Anganga+ nɛmɔ ndo nde akawodiya lo mbetɛ kiti kande ka lowandji la diko dia ewandji ekina tshɛ waki kaamɛ la nde.+ 2 Ndo ekambi wa nkumekanga tshɛ waki la soko dia nkumekanga wakahombaka nkɔlama ndo kusamɛ Hamana, nɛ dia kɛsɔ mbakadjanga nkumekanga lo dikambo diande. Koko Mɔrɔdɛkai akatone nkɔlama kana nkusama. 3 Ko ekambi wa nkumekanga waki la soko dia nkumekanga wakambola Mɔrɔdɛkai vate: “Lande na kɔnyɔlayɛ didjango dia nkumekanga?” 4 Vɔ wakawombolaka lushi la lushi, koko nde kombaokɛ. Oma laasɔ, vɔ wakatɛ Hamana dia nde menda kana lɔkɛwɔ laki Mɔrɔdɛkai koka mbetawɔma;+ nɛ dia nde akawatɛ dia nde aki ose Juda.+

5 Lam’akɛnyi Hamana dia Mɔrɔdɛkai ekɔ lo ntona mbɔkɔlamɛ ndo mbokusamɛ, Hamana akadunganɛ la nkɛlɛ.+ 6 Koko nde konanga ndjaka* Mɔrɔdɛkai ndamɛ, nɛ dia wakawotɛ awui wendana la wodja waki Mɔrɔdɛkai. Ɔnkɔnɛ, Hamana akatatɛ nyanga dia nshila ase Juda tshɛ waki lo diolelo di’otondo dia Ahasuɛrɔ, aseka Mɔrɔdɛkai tshɛ oshiki.

7 Lo ngɔndɔ ka ntondo, mbuta ate ngɔndɔ ka Nisana,* l’ɔnɔnyi+ wa 12 w’ɛlɔmbwɛlɔ ka nkumekanga Ahasuɛrɔ, vɔ wakoke Puru+ (mbuta ate owale) la ntondo ka Hamana dia nshikikɛ lushi la ngɔndɔ, ko owale akɔ wakakɔ lo ngɔndɔ ka 12, mbuta ate ngɔndɔ ka Adara.*+ 8 Oma laasɔ, Hamana akatɛ nkumekanga Ahasuɛrɔ ate: “Ekɔ anto amɔtshi wohandjɔne ndo wokokane l’atei w’anto+ wa lo prɔvɛnsɛ tshɛ ya lo diolelo diayɛ;+ ɛlɛmbɛ awɔ ntshikitana la ɛlɛmbɛ w’anto akina tshɛ ndo vɔ hawokitanyiya ɛlɛmbɛ wa nkumekanga; laasɔ hatonga dimɛna dia nkumekanga mbatshika. 9 Naka nkumekanga alanga, didjango diafundame dia vɔ ndanyema. Dimi layosha ɛlɔhɛ talata* nunu dikumi (10 000) ya mfɛsa dia vɔ mbidja lo eombelo ka nkumekanga.”*

10 Ko nkumekanga akanya mpɛtɛ k’ematelo+ oma lo lonya lande ndo akakisha Hamana+ ɔna Hamɛdata ose Anganga,+ ɔnɛ laki otunyi w’ase Juda. 11 Nkumekanga akatɛ Hamana ate: “Lambokosha mfɛsa ndo anto akɔ dia wɛ nsala la wɔ kɛnɛ kalangayɛ.” 12 Ko wakelɛ afundji+ wa nkumekanga lo ngɔndɔ ka ntondo nshi 13. Vɔ wakafunde+ kɛnɛ tshɛ kakadjangɛ Hamana waa satrapɛ ya nkumekanga ndo waa nguvɛrnɛrɛ yakolɛka lo prɔvɛnsɛ ndo ewandji wa weho w’anto wotshikitanyi, prɔvɛnsɛ la prɔvɛnsɛ la efundelo* awɔ ndo anto l’anto lo ɔtɛkɛta awɔ hita. Awui akɔ wakafundama lo lokombo la nkumekanga Ahasuɛrɔ ndo wakadjama ohomɔ wa mpɛtɛ k’ematelo+ kaki nkumekanga.

13 Wakasha amɛmbi wa mikanda mikanda akɔ dia mbatɔla lo prɔvɛnsɛ tshɛ ya nkumekanga lo mbisha didjango dia ndanya, ndjaka ndo nshila ase Juda tshɛ oshiki, oyadi akɛnda kana epalanga, ana ndo wamato lushi lakɔ laamɛ, lo ngɔndɔ ka 12, mbuta ate ngɔndɔ ka Adara+ nshi 13, ko vɔ mbɔsa diangɔ diawɔ.+ 14 Waketɛ awui wa lo mukanda akɔ oko ɔlɛmbɛ lo prɔvɛnsɛ tshɛ ndo wakewoya anto tshɛ dia vɔ ndjalɔngɔsɔla dikambo dia lushi lakɔ. 15 Amɛmbi wa mikanda wakatshu esadi+ lo ndjela didjango dia nkumekanga; ɔlɛmbɛ akɔ wakadjama la Shushana*+ dihole di’eshamelo.* Oma laasɔ, nkumekanga nde la Hamana wakadjasɛ dia nnɔ wanu, koko osomba wa Shushana* waki lo lofunge.

4 Lam’akoke Mɔrɔdɛkai+ awui tshɛ wakasalema,+ nde akaatshatsha ahɔndɔ ande, akalɔtɛ akoto ndo akayatɛ otoko. Oma laasɔ, nde akatshu l’atei w’osomba atade ekoko la dui dia wolo ndo la lonyangu. 2 Nde akatshu paka polo la soko dia nkumekanga, nɛ dia ndooko onto lakahombe mbɔtɔ lo soko dia nkumekanga ɔlɔtshi akoto. 3 Lo prɔvɛnsɛ+ tshɛ lɛnɛ akakome ɔtɛkɛta wa nkumekanga ndo didjango diande, ase Juda waki la otanda wa woke, wakakilaka mbo ya ndɛ,+ wakalelaka ndo wakadaka ekoko wa wolo. Anto efula waketamaka lo akoto ndo l’otoko.+ 4 Lam’akaye ekambi wa wamato ndo ɛlɛnga waki Ɛsta ndo lam’akawawotɛ, wadi aki nkumekanga akakɔmɔ efula. Ko nde akatomɛ Mɔrɔdɛkai ahɔndɔ wa ndɔta lo dihole dia akoto, koko nde akatone ahɔndɔ akɔ. 5 Ko Ɛsta akelɛ Hataka ɔlɛnga ɔmɔtshi wa nkumekanga wakasɔnama dia mbokambɛka, ko nde akootome le Mɔrɔdɛkai dia teya kitshimudi ya dikambo sɔ ndo kɛnɛ kambotomba.

6 Ɔnkɔnɛ, Hataka akatshu le Mɔrɔdɛkai lo sɛkɛ dia l’osomba mbɛlanɛ la soko dia nkumekanga. 7 Mɔrɔdɛkai akawotɛ kɛnɛ tshɛ kakookomɛ ndo lofulo la falanga+ shikaa lakalake Hamana dia mbidja lo eombelo ka nkumekanga dia ase Juda ndanyema.+ 8 Ndo nto, nde akawosha mukanda wakafundama didjango diakadjangema la Shushana*+ dia mbashila oshiki. Nde akahombe tɛnya Ɛsta mukanda akɔ, mbolembetshiyawɔ ndo mbotɛ+ dia nde ntshɔ le nkumekanga dia tɔɔlɔmba kɛtshi ndo dia tɔɔsɛngasɛnga ndamɛ lo wahɔ wa wodja ande.

9 Hataka akakalola ko akayotɛ Ɛsta kɛnɛ kakawotɛ Mɔrɔdɛkai. 10 Ko Ɛsta akakaloya Hataka dia totɛ Mɔrɔdɛkai+ ɔnɛ: 11 “Ekambi tshɛ wa nkumekanga ndo anto tshɛ wa lo prɔvɛnsɛ ya nkumekanga mbeyaka dia naka pami kana womoto ntshɔ lo sɛkɛ dia l’etei+ dia nkumekanga aha la nde mbelamɛ, ɔlɛmbɛ 1 ɔnɛ mbakamba la wɔ: Nde pombaka ndjakema; onyake naka nkumekanga ambootshuma danga+ diande dia paonyi mbakokande ntshikala la lɔsɛnɔ. Koko aya nshi 30 yele nkumekanga atambelɛ.”

12 Lam’akawatotɛ Mɔrɔdɛkai kɛnɛ kakate Ɛsta, 13 nde akakadimola Ɛsta ate: “Tɔfɔnyake dia lam’ele wɛ ekɔ lo luudu la nkumekanga, kete laasɔ wɛ ayohanda oleki ase Juda akina tshɛ. 14 Dikambo naka wɛ mbɔlama lo etena kɛnɛ, eya dia ekimanyielo ndo etshungwelo kayoya le ase Juda oma lo kiɔkɔ kina;+ koko wɛ l’ase luudu la shɔ nyayoshilama oshiki. Eeya kana l’ɔtɛ w’etena ka nganɛ kakayakome lo dihole diayɛ dia lo diolelo?”+

15 Ko Ɛsta akakadimola Mɔrɔdɛkai ate: 16 “Tshɔka totshumanya ase Juda tshɛ wele la Shushana* ndo nyotokile mbo ya ndɛ+ lo dikambo diami. Tanyɔlɛke ndo tanyɔnɔke l’edja ka nshi 3,+ otsho la yanyi. Sho lawɔ, dimi l’ekambi ami wa wamato tayokila mbo ya ndɛ. Dimi layotshɔ le nkumekanga, mbuta ate layɔnyɔla ɔlɛmbɛ ndo naka dia mvɔ, kete layovɔ.” 17 Ko Mɔrɔdɛkai akatshu ndo akatosala kɛnɛ tshɛ kakawotɛ Ɛsta dia nsala.

5 Lushi la 3,+ Ɛsta akalɔtɛ ekutu ande wa lowandji ko akɔtɔ lo sɛkɛ dia l’etei dia luudu la nkumekanga,* mbɛlanɛ la luudu la nkumekanga etena kakadjasɛ nkumekanga lo kiti kande ka lowandji lo luudu la lowandji mbɛlanɛ la soko. 2 Kam’akɛnyi nkumekanga Ɛsta ka wadi aki nkumekanga emadi lo sɛkɛ, Ɛsta akahomɔ lokolo l’ɔlɔ la ntondo kande, ko nkumekanga akootshume danga dia paonyi+ diaki lo lonya lande. Ko Ɛsta akasukana ndo akakimɛ shɔdi ya danga diakɔ.

3 Nkumekanga akawombola ate: “Ɛsta wadi aki nkumekanga le, ambotomba? Alangayɛ? Oyadi kaanga k’ahende ɔtɔi ka diolelo diami kayoyɔlɔmba, dimi layokoshatɔ!” 4 Ɛsta akakadimola ate: “Naka nkumekanga alanga, nkumekanga aye nde la Hamana+ ɛlɔ lo dambo diamomɔɔlɔngɔsɔlɛ.” 5 Ko nkumekanga akatɛ anto ande ate: “Nyote Hamana aye esadi oko walɔmba Ɛsta.” Ɔnkɔnɛ, nkumekanga nde la Hamana wakatshu lo dambo diakalɔngɔsɔla Ɛsta.

6 Lam’akawanɔka wanu lo dambo, nkumekanga akatɛ Ɛsta ate: “Ta kɛnɛ kayangayɛ, ko wayokoshatɔ! Alangayɛ? Oyadi k’ahende ɔtɔi ka diolelo diami kayoyɔlɔmba, dimi layokoshatɔ!”+ 7 Ɛsta akakadimola ate: “Kɛnɛ kayangami ndo kalɔmbami tɔ kɛnɛ: 8 Naka lambohomɔ lokolo l’ɔlɔ le nkumekanga ndo naka nkumekanga nangaka mbishami kɛnɛ kayangami ndo salɛmi kɛnɛ kalɔmbami, nkumekanga nde la Hamana kawoye lo dambo diayomaalɔngɔsɔlɛ loyi; ndo loyi dimi layosala oko wata nkumekanga.”

9 Lushi lɔsɔ, Hamana akatshu l’ɔngɛnɔngɛnɔ ndo la ɔlɔ l’otema. Koko lam’akɛnyi Hamana Mɔrɔdɛkai la soko dia nkumekanga ndo lam’akandɛnyi dia nde hemadi ndo hasaki lokomba la ntondo kande, Hamana akoke Mɔrɔdɛkai+ nkɛlɛ k’efula. 10 Koko Hamana akayakimɛ, ko akatshu lakande. Oma laasɔ, nde akatome dui dia telɛ angɛnyi ande ndo Zerɛshɛ+ ka wadɛnde. 11 Hamana akasɛmɛ ɔngɔnyi wa lotombo lande, efula k’anande,+ woho wakawosha nkumekanga nɛmɔ ndo woho wakandawodiya la diko dia ewandji la ekambi wa nkumekanga.+

12 Hamana akakotsha ate: “Kɛnɛ koleki ele, Ɛsta wadi aki nkumekanga hele onto okina paka dimi oto dia ntshindɛ nkumekanga lo dambo diakandalɔngɔsɔdi.+ Nde akambele nto loyi dia monga kaamɛ la nkumekanga.+ 13 Koko lo akambo asɔ tshɛ, ndooko kɛnɛ kakoka ngɛnyangɛnyami edja tshɛ kaakamɛɛnyi Mɔrɔdɛkai ose Juda odjashi la soko dia nkumekanga.” 14 Ko Zerɛshɛ ka wadɛnde la angɛnyi ande tshɛ wakawotɛ vate: “Wasale otamba wele la otale wa kubita 50.* Ndo la pindju, kote nkumekanga dia Mɔrɔdɛkai pombaka panema lɔkɔ.+ Oma laasɔ, koyotshu wɛ la nkumekanga lo dambo dia nyu tɔngɛnangɛna.” Kanyi shɔ yaki dimɛna le Hamana, ko nde akasale otamba akɔ.

6 L’otsho ɔsɔ, nkumekanga kokoka ndala djɔ.* Ko nde akate dia vɔ mbela dibuku diofundami ɛkɔndɔ wa tena+ ndo wakadiadiɛ nkumekanga. 2 Wakatane fundama lɔkɔ kɛnɛ kakate Mɔrɔdɛkai lo dikambo dia Bingitana nde la Terɛshɛ, ɛnɛnɛ 2 wa laka nkumekanga, alami w’asoko wakɔtɔ sheke dia ndjaka* nkumekanga Ahasuɛrɔ.+ 3 Nkumekanga akambola ate: “Ngande wakawasha Mɔrɔdɛkai nɛmɔ ndo akawoofute lo dikambo sɔ?” Ko ekambi waki nkumekanga ndamɛ wakate vate: “Ndooko kambowoosalɛ.”

4 L’ɔkɔngɔ diko, nkumekanga akate ate: “Akɔna ele lo sɛkɛ?” L’etena kɛsɔ, Hamana akaye lo sɛkɛ dia l’andja+ dia luudu la nkumekanga* dia ndjosawola la nkumekanga dia mpanɛ Mɔrɔdɛkai l’otamba wakandalɔngɔsɔla dikambo diande.+ 5 Ekambi wa nkumekanga wakawotɛ vate: “Hamana+ kemadi lo sɛkɛ.” Ko nkumekanga akate ate: “Nyowɔtshiya.”

6 Lam’akɔtɔ Hamana, nkumekanga akawotɛ ate: “Akokawɔ salɛ onto lele nkumekanga ambolanga mbosha kɛnɛmɔ?” Hamana akate l’otema ande ate: “Onto akɔna akoka nkumekanga nanga dia mbosha kɛnɛmɔ ko ndekami?”+ 7 Ko Hamana akatɛ nkumekanga ate: “Onto lele nkumekanga ambolanga mbosha kɛnɛmɔ, 8 waye la ɔlɔtɔ wa lowandji+ watɔlɔtaka nkumekanga ndo la mfalasa kɛmɔtshi katahemaka nkumekanga kele la ɔlɔtɔ wa l’ɔtɛ wa lowandji lo ɔtɛ atɔ. 9 Oma laasɔ, wɔshi ɔlɔtɔ akɔ la mfalasa kakɔ kele washa ɔlɔhɛ ɔmɔtshi l’atei w’ewandji wa nkumekanga, ndo vɔ pombaka ndɔtsha onto akɔ lele nkumekanga ambolanga mbosha kɛnɛmɔ, ko mbeetshetsha laadiko dia mfalasa kakɔ lo sɛkɛ dia l’osomba. Vɔ pombaka tawelɛka la ntondo kande ɔnɛ: ‘Nganɛ mbasalɛwɔ onto lele nkumekanga ambolanga mbosha kɛnɛmɔ!’”+ 10 Ko nkumekanga akatɛ Hamana ate: “Ɔsa ɔlɔtɔ akɔ la mfalasa esadi kele salɛ Mɔrɔdɛkai ose Juda lodjashi la soko dia nkumekanga kɛnɛ kotshiyɛ. Totshikake ndooko dui lo kɛnɛ kotshiyɛ.”

11 Ɔnkɔnɛ Hamana akɔshi ɔlɔtɔ akɔ la mfalasa, ko akalɔtsha Mɔrɔdɛkai+ ndo akawetshetsha laadiko dia mfalasa lo sɛkɛ dia l’osomba ndo akatawelɛka la ntondo kande ɔnɛ: “Nganɛ mbasalɛwɔ onto lele nkumekanga ambolanga mbosha kɛnɛmɔ!” 12 L’ɔkɔngɔ wa laasɔ, Mɔrɔdɛkai akakalola lo soko dia nkumekanga, koko Hamana akalawɔ otsha lakande, atalele ndo okombi ɔtɛ. 13 Lam’akatɛ Hamana Zerɛshɛ+ ka wadɛnde la angɛnyi ande tshɛ kɛnɛ tshɛ kakookomɛ, apami ande wa lomba la Zerɛshɛ ka wadɛnde wakawotɛ vate: “Naka Mɔrɔdɛkai ɔnɛ lamboyotatɛ nkɔ la ntondo kande ekɔ kanula y’ose Juda,* kete wɛ hatowɔlɛndja; ndooko onyake wɛ ayɔkɔ la ntondo kande.”

14 Etena kakawatɛkɛtaka la nde, ɛnɛnɛ wa laka nkumekanga wakakome, ko wakatshu la Hamana esadi otsha lo dambo diakasale Ɛsta.+

7 Ko nkumekanga nde la Hamana+ wakatshu lo dambo diaki Ɛsta wadi aki nkumekanga. 2 Nkumekanga akatɛ Ɛsta nto lushi la 2 lam’akawanɔka wanu lo dambo ate: “Ɛsta wadi aki nkumekanga le, ayangayɛ ko wayokoshatɔ? Alangayɛ? Oyadi k’ahende ɔtɔi ka diolelo diami kayoyɔlɔmba, dimi layokoshatɔ!”+ 3 Ɛsta wadi aki nkumekanga akakadimola ate: “Naka lambohomɔ lokolo l’ɔlɔ la ntondo kayɛ, wɛ nkumekanga, ndo naka nkumekanga alanga, oshimbee lɔsɛnɔ* lami ndo oshimbee wodja ami.+ 4 Nɛ dia dimi l’ase wodja ami takasondjama+ dia ndanyema, ndjakema ndo shilama oshiki.+ Ototosondjama tsho dia monga mfumbe y’apami la ya wamato tshike lotɔlama. Koko mpokoso kɛnɛ bu dimɛna, nɛ dia tɔ kayosalɛ ndo nkumekanga kɔlɔ.”

5 Ko nkumekanga Ahasuɛrɔ akatɛ Ɛsta wadi aki nkumekanga ate: “Akɔna ɔsɔ ndo onto akɔna ambosombɔ nsala dui dia ngasɔ?” 6 Ɛsta akate ate: “Ɔndɔshi ndo otunyi akɔ ko Hamana, pami ka kɔlɔ.”

Hamana akoke nkumekanga ndo wadi aki nkumekanga wɔma. 7 Nkumekanga akonɛɛ la nkɛlɛ oma lam’akandanɔka wanu lo dambo, ko akatshu otsha lo jardɛ ya luudu l’owandji, koko Hamana akemala dia nsɛngasɛnga Ɛsta wadi aki nkumekanga dikambo dia lɔsɛnɔ* lande, nɛ dia nde akashihodia dia nkumekanga amboyashikikɛ dia mbosha dilanya. 8 Nkumekanga akakalola oma lo jardɛ ya luudu l’owandji oya lo luudu lɛnɛ akawanɔka wanu lo dambo, ko nde akatane Hamana amboyasongotola lo mbeto lɛnɛ aki Ɛsta. Nkumekanga akate la diambo tshɛ ate: “Onde nde olanga ndo mbeyana la wadi aki nkumekanga la wolo lo luudu lami?” Kam’akatombe ɛtɛkɛta ɛsɔ oma l’onyɔ wa nkumekanga, wakakombe elungi ka Hamana. 9 Ko Harabɔna+ ɔnɛnɛ ɔmɔtshi wa laka nkumekanga akate ate: “Ndo nto, Hamana akalɔngɔsɔla otamba dikambo dia Mɔrɔdɛkai+ ɔnɛ lele kɛnɛ kakandate kakashimbɛ nkumekanga.+ Otamba akɔ wele la otale wa kubita 50* vɔ ɔsɔ wemadi laka Hamana.” Ko nkumekanga akate ate: “Nyoohanɛ lɔkɔ.” 10 Ɔnkɔnɛ, vɔ wakahanɛ Hamana l’otamba wakandalɔngɔsɔla dikambo dia Mɔrɔdɛkai, ko nkɛlɛ ka nkumekanga kakakitakita.

8 Lushi lɔsɔ, nkumekanga Ahasuɛrɔ akasha Ɛsta wadi aki nkumekanga luudu la Hamana+ otunyi w’ase Juda;+ ndo Mɔrɔdɛkai akaye la ntondo ka nkumekanga, nɛ dia Ɛsta akashola woho wotɔnde la nde.+ 2 Oma laasɔ, nkumekanga akanya mpɛtɛ kande k’ematelo+ kakandɔshi oma le Hamana, ko akakisha Mɔrɔdɛkai. Ɛsta akasha Mɔrɔdɛkai ɔkɛndɛ wa luudu la Hamana.+

3 Ndo nto, Ɛsta akayosawola la nkumekanga nto. Nde akakusama lo ekolo ande, akalele ndo akɔɔsɛngasɛnga dia nde mbitola sheke ya kɔlɔ yakɔtwɛ Hamana ose Anganga ase Juda.+ 4 Nkumekanga akatshume Ɛsta+ danga dia paonyi, ko Ɛsta akonɛɛ ndo akemala la ntondo ka nkumekanga. 5 Nde akate ate: “Naka nkumekanga alanga ndo naka lambohomɔ lokolo l’ɔlɔ, naka nkumekanga mɛnaka dimɛna ndo dimi mbɔngɛnyangɛnyaka, didjango diafundame dia mbitola kɛnɛ kele lo mikanda wakadje Hamana+ ɔna Hamɛdata+ ose Anganga sheke dia ndanya ase Juda wa lo prɔvɛnsɛ tshɛ ya nkumekanga. 6 Nɛ dia ngande wayomokoka mbikikɛ dia mɛna mpokoso kayokomɛ ase wodja ami ndo ngande wayomokoka mbikikɛ dia mɛna elanyelo k’ewotɔ ami?”

7 Ko nkumekanga Ahasuɛrɔ akatɛ Ɛsta wadi aki nkumekanga nde la Mɔrɔdɛkai ose Juda ate: “Nyende, dimi lambokimɔ luudu la Hamana le Ɛsta+ ndo lambosala dia vɔ mbohanɛ l’otamba+ l’ɔtɛ wa sheke yakandadje dia ndɔsha* ase Juda. 8 Laasɔ nyu mbeyaka mfunda kɛnɛ tshɛ kɛnanyu dimɛna lo wahɔ w’ase Juda lo lokombo la nkumekanga, ko nyu mbidja ohomɔ wa la mpɛtɛ k’ematelo ka nkumekanga, nɛ dia didjango diambofundama lo lokombo la nkumekanga ndo diambodjama ohomɔ wa la pɛtɛ k’ematelo ka nkumekanga hadiokoke mbitɔ.”+

9 Ko wakelɛ afundji wa nkumekanga l’etena kakɔ, lo ngɔndɔ ka 3, mbuta ate ngɔndɔ ka Sivana* nshi 23, ko vɔ wakafunde kɛnɛ tshɛ kakadjangɛ Mɔrɔdɛkai ase Juda, mbidja ndo waa satrapɛ,+ nguvɛrnɛrɛ ndo ewandji wa lo prɔvɛnsɛ,+ ntatɛ oma la Ɛndɛ polo l’Etiyɔpiya, prɔvɛnsɛ 127, prɔvɛnsɛ la prɔvɛnsɛ lo ndjela efundelo* awɔ ndo anto l’anto lo ɔtɛkɛta awɔ hita, ndo le ase Juda lo ndjela efundelo* awɔ hita la ɔtɛkɛta awɔ hita.

10 Nde akaafunde lo lokombo la nkumekanga Ahasuɛrɔ ndo akadje ohomɔ wa la mpɛtɛ k’ematelo+ ka nkumekanga, ko akatome mikanda akɔ lo anya w’amɛmbi wa mikanda weteta lo mfalasa; vɔ wakahema lo mfalasa yalawɔ efula yɛmba mikanda yendana l’olimu wa nkumekanga. 11 Lo mikanda ɛsɔ, nkumekanga akasha ase Juda wa lo esomba tshɛ lotshungɔ la vɔ ntshumana dia nkokɛ nsɛnɔ* yawɔ, ndo dia vɔ ndanya, ndjaka ndo nshila oshiki asɔlayi tshɛ wa weho tshɛ w’anto kana wa lo prɔvɛnsɛ wakoka mbalɔsha, mbidja ndo wamato la ana, ndo dia vɔ mbɔsa diangɔ diawɔ.+ 12 Dui sɔ diakahombe salema lushi lakɔ laamɛ lo prɔvɛnsɛ tshɛ ya nkumekanga Ahasuɛrɔ, lo ngɔndɔ ka 12, mbuta ate ngɔndɔ ka Adara* nshi 13.+ 13 Awui wa lo mukanda akɔ wakahombe monga oko ɔlɛmbɛ lo prɔvɛnsɛ tshɛ. Vɔ wakahombe mbewoyama le anto tshɛ dia ase Juda monga suke lushi lakɔ dia nsɔmbɔya atunyi+ awɔ. 14 Amɛmbi wa mikanda wakatetetaka lo mfalasa yɛmba mikanda yakawakambaka la yɔ l’olimu wa nkumekanga wakatshu la shamanya ndo la lowango l’efula lo ndjela didjango dia nkumekanga. Ɔlɛmbɛ akɔ wakadjama ndo la Shushana*+ dihole di’eshamelo.*

15 Oma laasɔ, Mɔrɔdɛkai akamɔ lale nkumekanga, ɔlɔtshi ahɔndɔ wa lowandji wa bule ndo wa wɛma, ɔlɔtshi dɛmbɔ dia nkoso dia paonyi ndo okutu wa dimɛna wakasalema la wɛɔsa w’ebelabela.+ Ko osomba wa Shushana* wakade ekoko w’ɔngɛnɔngɛnɔ. 16 Nɛ dia ase Juda wakakondja ekimanyielo,* waki la ɔngɛnɔngɛnɔ, la ɔlɔ w’efula ndo la kɛnɛmɔ. 17 Lo prɔvɛnsɛ tshɛ ndo l’esomba tshɛ, dihole tshɛ diakakome didjango dia nkumekanga ndo ɔlɛmbɛ ande, ase Juda wakangɛnangɛnaka ndo waki l’ɔlɔ w’efula, wasala alambo ndo fɛtɛ. Anto efula w’ase wodja akɔ wakataka dia waya ase Juda,+ nɛ dia vɔ wakandama la wɔma w’ase Juda.

9 Lo ngɔndɔ ka 12, mbuta ate ngɔndɔ ka Adara*+ nshi 13, etena kakawahombe nkotsha ɔtɛkɛta wa nkumekanga ndo ɔlɛmbɛ ande,+ lushi lɔsɔ, etena kakalongamɛka atunyi w’ase Juda dia mbalɛndja, ngala yakakadimɔ, ko ase Juda wakalɛndja wanɛ wakaahetshaka.+ 2 Ase Juda wakatshumana lo esomba awɔ lo prɔvɛnsɛ tshɛ ya nkumekanga Ahasuɛrɔ+ dia mbahɛ wanɛ wakayangaka dia mbasalɛ kɔlɔ anya, ndo ndooko onto lakakoke nshika ekolo la ntondo kawɔ, nɛ dia anto tshɛ wakandama la wɔma awɔ.+ 3 Ewandji tshɛ wa lo prɔvɛnsɛ, waa satrapɛ,+ waa nguvɛrnɛrɛ ndo wanɛ wakasalaka olimu wa nkumekanga wakasukɛka ase Juda, nɛ dia vɔ wakokaka Mɔrɔdɛkai wɔma. 4 Mɔrɔdɛkai akayala la wolo+ lo luudu la nkumekanga* ndo lokumu lande lakahandjɔnɛ lo prɔvɛnsɛ tshɛ, nɛ dia wolo wa Mɔrɔdɛkai wakatalekaka mpama tsho.

5 Ase Juda wakake atunyi awɔ tshɛ tokuwa ta ta, wakaadiake ndo wakaalanya; vɔ wakasalɛ wanɛ wakaahetshaka+ kɛnɛ tshɛ kakawalange. 6 La Shushana*+ dihole di’eshamelo,* ase Juda wakadiake ndo wakalanya apami 500. 7 Ndo nto, vɔ wakadiake Parashandata, Dalafɔna, Aspata, 8 Pɔrata, Adaliya, Aridata, 9 Paramashita, Arisai, Aridai ndo Vayizata, 10 ana w’apami 10 wa Hamana ɔna Hamɛdata, otunyi w’ase Juda.+ Koko l’ɔkɔngɔ wa vɔ mbadiaka, vɔ kɔmbɔsa ndooko ɛngɔ ka dimbo.+

11 Lushi lɔsɔ, wakayotɛ nkumekanga lofulo l’anto wakadiakema la Shushana* dihole di’eshamelo.*

12 Ko nkumekanga akatɛ Ɛsta wadi aki nkumekanga ate: “La Shushana* dihole di’eshamelo,* ase Juda wambodiaka ndo wambolanya apami 500 ndo ana w’apami 10 wa Hamana. Ko ambowosala lo prɔvɛnsɛ nkina ya nkumekanga?+ Laasɔ wonya ɔnɛ alangayɛ kele wakoshatɔ? Ndo ayoyɔlɔmba nto kele wasale?” 13 Ɛsta akakadimola ate: “Naka nkumekanga alanga,+ loyi ase Juda wele la Shushana* wasale akambo lo ndjela ɔlɛmbɛ wa ɛlɔ;+ ndo ana w’apami 10 wa Hamana wahaneme l’etamba.”+ 14 Ko nkumekanga akadjanga dia dui sɔ salema. Ɔlɛmbɛ wakadjama la Shushana* ndo ana w’apami 10 wa Hamana wakahanema l’etamba.

15 Ase Juda wa la Shushana* wakatshumana nto lushi la 14 la lo ngɔndɔ ka Adara,+ ko wakadiake apami 300 la Shushana,* koko vɔ kɔmbɔsa ndooko ɛngɔ ka dimbo.

16 Ase Juda akina waki lo prɔvɛnsɛ ya nkumekanga wakatshumana vɔ lawɔ ndo wakashimbɛ nsɛnɔ yawɔ.*+ Vɔ wakalɛndja atunyi awɔ,+ wakadiake wanɛ wakaahetshaka nunu akumi esambele la tanu (75 000); koko vɔ kɔmbɔsa ndooko ɛngɔ ka dimbo. 17 Awui asɔ wakasalema lo ngɔndɔ ka Adara nshi 13, ko vɔ wakomuya lo ngɔndɔ nshi 14 ndo waketɛ lushi lakɔ lushi la fɛtɛ ndo l’ɔngɛnɔngɛnɔ.

18 Ase Juda waki la Shushana* wakatshumana lo ngɔndɔ nshi+ 13 ndo nshi 14,+ ko vɔ wakomuya lo ngɔndɔ nshi 15 ndo waketɛ lushi lakɔ lushi la fɛtɛ ndo l’ɔngɛnɔngɛnɔ. 19 Diakɔ diele ase Juda w’oma lo tosamba wakadjasɛka lo esomba wa lo adistrikɛ w’etale waketɛ ngɔndɔ ka Adara nshi 14 lushi l’ɔngɛnɔngɛnɔ ndo la fɛtɛ, lushi la dambo+ ndo diaaso dia tomanɛ yema ya mbo ya ndɛ.+

20 Mɔrɔdɛkai+ akafunde awui asɔ ndo akatome mikanda w’oma le owandji le ase Juda tshɛ wa lo prɔvɛnsɛ tshɛ ya nkumekanga Ahasuɛrɔ, oyadi wanɛ wele suke kana wanɛ wele etale. 21 Nde akawatɛ dia vɔ mbohɔka ngɔndɔ ka Adara nshi 14 ndo nshi 15 ɔnɔnyi l’ɔnɔnyi, 22 nɛ dia lo nshi shɔ, ase Juda wakomuya oma le atunyi awɔ ndo lo ngɔndɔ kakɔ, lɔkɔnyɔ lawɔ lakakadimɔ ɔngɛnɔngɛnɔ, ndo delo+ diawɔ diakakadimɔ lushi la fɛtɛ. Vɔ waki la dia mbohɔka nshi shɔ oko nshi ya fɛtɛ ndo y’ɔngɛnɔngɛnɔ, ndo oko diaaso dia tomanɛ yema ya mbo ya ndɛ la dia tomɛ ase wola weshasha.

23 Ko ase Juda waketawɔ dia ntetemala nsala fɛtɛ kɛsɔ kakawatatɛ nsala ndo dia kitanyiyaka kɛnɛ kakaafundɛ Mɔrɔdɛkai. 24 Dikambo Hamana+ ɔna Hamɛdata ose Anganga,+ otunyi w’ase Juda tshɛ akɔtwɛ ase Juda sheke dia mbadiaka,+ ndo nde akoke Puru,+ mbuta ate owale dia mbaokiya wɔma ndo mbalanya. 25 Koko lam’akatshu Ɛsta la ntondo ka nkumekanga, nkumekanga akasha wadjango wa lofunda+ anɛ: “Sheke yande ya kɔlɔ yakandɔtwɛ ase Juda+ yakalole l’ɔtɛ ande hita”; ko wakoohanɛ nde l’anande w’apami l’otamba.+ 26 Diakɔ dielɛwɔ nshi yakɔ ɔnɛ Purima, oma lo lokombo Puru.*+ Ɔnkɔnɛ, l’ɔtɛ wa kɛnɛ tshɛ kakafundama lo mukanda ndo kɛnɛ kakawɛnyi lo dikambo diakɔ la kɛnɛ kakaakomɛ, 27 ase Juda wakayadjangɛ vɔ la tokanula tawɔ ndo wanɛ tshɛ wakɔtɔ l’ɔnɔngɔ awɔ+ dia mbohɔka nshi 2 shɔ aha la mbetsha ndo dia kotshaka kɛnɛ kakafundama lo dikambo diawɔ l’etena kakashikikɛma ɔnɔnyi l’ɔnɔnyi. 28 Nshi shɔ yakahombe mbohɔmaka ndo nɛmiyamaka lo lɔlɔnga la lɔlɔnga, lo nkumbo la nkumbo, lo prɔvɛnsɛ la prɔvɛnsɛ ndo lo osomba l’osomba; nshi ya Purima shɔ hayohombe nkomɛ le ase Juda, ndo eohwelo kayɔ hahombe nkomɛ le tokanula tawɔ.

29 Oma laasɔ, Ɛsta wadi aki nkumekanga laki ɔna Abihayilɛ, nde la Mɔrɔdɛkai wakafunde la lowandji tshɛ dia nshikikɛ mukanda wa 2 wendana la Purima. 30 Nde akatome mikanda akɔ le ase Juda tshɛ wa lo prɔvɛnsɛ+ 127 ya lo diolelo dia Ahasuɛrɔ+ lo ɛtɛkɛta wa wɔladi ndo wa mɛtɛ, 31 dia nshikikɛ eohwelo ka nshi ya Purima lo tena diayɔ diakashikikɛma oko wakawatɛ Mɔrɔdɛkai ose Juda nde la Ɛsta wadi aki nkumekanga dia vɔ nsala,+ ndo oko wakawayadjangɛ* vɔ la tokanula tawɔ dia kotshaka,+ mbidja ndo okilelo wa mbo ya ndɛ+ la ɔsɛngɔsɛngɔ.+ 32 Ko didjango dia Ɛsta diakashikikɛ akambo asɔ wendana la Purima+ ndo diakafundama lo dibuku.

10 Nkumekanga Ahasuɛrɔ akadjanga dia kandjaka ase wodja ndo ase asɛnga wa lo ndjale elimu la wolo.

2 Wolo ande tshɛ ndo akambo wa weke wakandasale, mbidja ndo ɔkɔndɔ w’otondo wendana la woke woke wa Mɔrɔdɛkai,+ woho wakawodiya nkumekanga,+ shi awui asɔ fundama lo dibuku di’ɔkɔndɔ wa tena+ dia nkumi ya dikanga ya Mediya la Pɛrɛsiya?+ 3 Nɛ dia Mɔrɔdɛkai ose Juda aki onto la 2 oma lale nkumekanga Ahasuɛrɔ. Nde aki onto la woke* l’atei w’ase Juda ndo akalɛmiyamaka oma le lokema l’anango, akakambaka dikambo dia ɔlɔlɔ wa wodja ande ndo akatɛkɛtaka lo wahɔ wa* tokanula tawɔ tshɛ.