ZƐKARIYA
1 Lo ngɔndɔ ka 8 ka lo ɔnɔnyi wa 2 w’ɛlɔmbwɛlɔ ka Dariyo,+ ɔtɛkɛta wa Jehowa wakaye le omvutshi Zɛkariya*+ ɔna Bɛrɛkiya ɔna Ido ɔnɛ: 2 “Jehowa akoke washɛnyu+ yɛnyi y’efula.
3 “Tɛwɔ wate: ‘Jehowa kanga lolembelembe kata ate: “‘Nyokalole le mi,’ mbata Jehowa kanga lolembelembe, ‘ko dimi layokalola le nyu,’+ mbata Jehowa kanga lolembelembe.”’
4 “‘Tanyongake oko washɛnyu, wanɛ wele amvutshi w’edjedja wakawatɛ ɔnɛ: “Jehowa kanga lolembelembe kata ate: ‘Lam’alanganyu, nyokadimɔ* oma lo mboka yanyu ya kɔlɔ ndo oma lo etsha+ anyu wa kɔlɔ.’”’
“‘Koko vɔ kompokamɛ, ndo vɔ kombidjami yimba,’+ mbata Jehowa.
5 “‘Wonya ɔnɛ, lende ele washɛnyu? Onde amvutshi wakasɛnɛ pondjo? 6 Koko ɛtɛkɛta ami ndo wadjango ami wakamadjangɛ ekambi ami amvutshi, wakakome le washɛnyu, shi mɛtɛ?’+ Ko vɔ wakakalola le mi ndo wakate vate: ‘Jehowa kanga lolembelembe akatosalɛ akambo lo ndjela mboka yaso ndo etsha aso, paka oko wakandashikikɛ dia nsala.’”+
7 Lo ngɔndɔ ka 11 nshi 24, mbuta ate ngɔndɔ ka Shɛbatɛ,* lo ɔnɔnyi wa 2 w’ɛlɔmbwɛlɔ ka Dariyo,+ ɔtɛkɛta wa Jehowa wakaye le omvutshi Zɛkariya ɔna Bɛrɛkiya ɔna Ido ɔnɛ: 8 “Dimi lakɛnyi ɛnɛlɔ l’otsho. Pami kɛmɔtshi akatahemaka mfalasa ka beela, ko nde akemala l’atei w’esongo wa mirtɛ lo lowenga; ndo mfalasa ya beela, y’ebelabela ndo ya wɛma yaki l’ɔkɔngɔ ande.”
9 Ɔnkɔnɛ dimi lakate nte: “Nkumɛmi le, waa na anɛ?”
Ondjelo wakatɛkɛtaka la mi akakadimola ate: “Dimi layokolembetshiya waa na wewɔ.”
10 Oma laasɔ, pami kakemala l’atei w’esongo wa mirtɛ akate ate: “Vɔ wele wanɛ wakatomama oma le Jehowa dia mbeteta lo nkɛtɛ.” 11 Ko vɔ wakatɛ ondjelo wa Jehowa wakemala l’atei w’esongo wa mirtɛ ɔnɛ: “Sho tambeteta lo nkɛtɛ, ndo eenda, nkɛtɛ k’otondo kekɔ lo wɔladi ndo aha la ofukutanu.”+
12 Ko ondjelo wa Jehowa akate ate: “Jehowa kanga lolembelembe le, polo l’etena kakɔna kayoyotshika mboka Jɛrusalɛma kɛtshi ndo esomba wa la Juda+ wamboyoka yɛnyi ɛnɔnyi 70+ ɛnɛ?”
13 Jehowa akakadimola ondjelo wakatɛkɛtaka la mi la ɛtɛkɛta w’amɛna ndo w’esambelo. 14 Oma laasɔ, ondjelo wakatɛkɛtaka la mi akambutɛ ate: “Ta la dui dia wolo wate: ‘Jehowa kanga lolembelembe kata ate: “Dimi lekɔ la ohetoheto dikambo dia Jɛrusalɛma ndo ohetoheto+ w’efula dikambo dia Siɔna. 15 Dimi lekɔ la yɛnyi y’efula otsha le wedja wele lo wɔladi,+ nɛ dia dimi lekɔ la yema+ ya yɛnyi, koko vɔ wakafudia mpokoso.”’+
16 “Ɔnkɔnɛ Jehowa kata ate: ‘“Dimi layokalola otsha la Jɛrusalɛma la kɛtshi,+ ndo luudu lami hita layohikama lɛkɔ,”+ mbata Jehowa kanga lolembelembe, “ndo ɔkɔdi wa yɛdikɔ wayosembɔ laadiko dia Jɛrusalɛma.”’+
17 “Ta nto la dui dia wolo wate: ‘Jehowa kanga lolembelembe kata ate: “Esomba ami wayololanɛ nto la kɛnɛ kele ɔlɔlɔ; ndo Jehowa ayosamba Siɔna+ nto ndo ayɔsɔna Jɛrusalɛma+ nto.”’”
18 Oma laasɔ, dimi lakende ko lakɛnyi nseke+ 4. 19 Ko dimi lakambola ondjelo wakatɛkɛtaka la mi nte: “Diangɔ diakɔna dingo?” Nde akakadimola ate: “Ongo ekɔ nseke yakahandjola Juda,+ Isariyɛlɛ+ ndo Jɛrusalɛma.”+
20 Oma laasɔ, Jehowa akamɛnya etshudi 4. 21 Dimi lakambola nte: “Kakɔna kayawaye ndjosala?”
Nde akate ate: “Ongo ekɔ nseke yakahandjola Juda lo yɛdikɔ yele ndooko onto lakakoke monyiya ɔtɛ ande. Akina wayoya ndjoyiotsha wɔma, ndjɔkɔsha nseke ya wedja wakawedia nseke yawɔ dia ndɔsha wodja wa Juda la oyango wa mbohandjola.”
2 Dimi lakende, ko lakɛnyi pami kɛmɔtshi la ɔkɔdi+ wa yɛdikɔ lo lonya lande. 2 Dimi lakawombola nte: “Otsha lende atayatshu?”
Nde akakadimola ate: “Dia tɛdika Jɛrusalɛma dia menda woke ndo otale+ ayɔ.”
3 Ndo eenda, ondjelo wakatɛkɛtaka la mi akatshu, ko ondjelo okina akaye ndjohomana la nde. 4 Ko nde akawotɛ ate: “Lawɔ otsha lɛnɛ, kele totee ɔlɔngɔ a pami ongo wate: ‘“Anto wayodjasɛ+ la Jɛrusalɛma oko l’osomba wa hwe* l’ɔtɛ w’anto tshɛ ndo dongalonga tshɛ diele lɔkɔ.+ 5 Dimi layonga le yɔ ehele ka dja kodingi,+ ndo layonga lotombo l’atei+ ayɔ,”’ mbata Jehowa.”
6 Jehowa kata ate: “Nyoye! Nyoye! Nyolawɔ oma lo wodja wele lo nɔrdɛ.+
Nɛ dia dimi lakanyohandjola otsha lo mpɛpɛ 4 ya l’olongo,”+ mbata Jehowa.
7 “Siɔna, yaka! Wɛ ɔnɛ ladjasɛ la ɔna womoto la Babilɔna,+ yashimbɛ. 8 Nɛ dia Jehowa kanga lolembelembe, ɔnɛ lele l’ɔkɔngɔ wa vɔ mbotombola,* ambontoma le wedja wakambaka diangɔ dianyu+ ate: ‘Ɔnɛ tshɛ lanyonanda ambonanda ɔna sso+ diami.* 9 Dikambo wonya ɔnɛ, dimi layanga nsutshasutsha lonya lami dia mbalɔsha ndo mfumbe+ yawɔ hita yayomba diangɔ diawɔ.’ Ko nyu mɛtɛ nyayeya dia Jehowa kanga lolembelembe kakantome.
10 “Ɔna womoto la Siɔna+ le, da ekoko w’ɔngɛnɔngɛnɔ; nɛ dia dimi loyaye+ ndo dimi layodjasɛ l’atei+ ayɛ,” mbata Jehowa. 11 “Lushi lɔsɔ,+ wedja efula wayeta lo wedi wa Jehowa, ndo vɔ wayonga anto ami; ko dimi layodjasɛ l’atei ayɛ.” Ndo wɛ ayeya dia Jehowa kanga lolembelembe kakantome. 12 Jehowa ayɔsa Juda oko ɛtshi kande lo nkɛtɛ y’ekila, ndo nde ayɔsɔna Jɛrusalɛma+ nto. 13 Anto tshɛ* nyɔlame la ntondo ka Jehowa, nɛ dia nde ayanga nsala akambo oma lo edjaselo kande k’ekila.
3 Nde akamɛnya Jashua+ ɔlɔmbɛdi a laadiko emadi la ntondo ka ondjelo wa Jehowa, ndo Satana+ emadi lo lonya l’omi la Jashua dia ndɔshana la nde. 2 Ko ondjelo wa Jehowa akatɛ Satana ate: “Jehowa akohangwe, wɛ Satana,+ ɛɛ, Jehowa lakasɔnɛ Jɛrusalɛma+ akohangwe! Onde pami kɛnɛ bu efuki ka dja kakawafumbola oma lo dja?”
3 L’etena kɛsɔ, ko Jashua ɔlɔtshi ahɔndɔ wa mindo ndo emadi la ntondo ka ondjelo. 4 Ondjelo akatɛ wanɛ wakemala la ntondo kande ate: “Nyookolole ahɔndɔ ande wa mindo.” Ko nde akawotɛ ate: “Eenda, dimi lambosala dia munga* kayɛ mimɔ oma le yɛ, ndo wayangakɔlɔtsha ahɔndɔ+ w’amɛna.”*
5 Ɔnkɔnɛ dimi lakate nte: “Wakeleke l’ɔtɛ+ ande dihɔndɔ dia pudipudi diadingawɔ l’ɔtɛ.” Ko vɔ wakakeleka l’ɔtɛ ande dihɔndɔ dia pudipudi diadingawɔ l’ɔtɛ, wakɔɔlɔtsha ahɔndɔ ndo ondjelo wa Jehowa akemala laawɔ. 6 Oma laasɔ, ondjelo wa Jehowa akatɛ Jashua ate: 7 “Jehowa kanga lolembelembe kata ate: ‘Naka wɛ ayɔkɛndakɛnda lo mboka yami ndo ayokotsha ɛkɛndɛ ayɛ la ntondo kami, kete wɛ ayonga shushi lo luudu+ lami ndo ayolama* asɛkɛ ami; ndo dimi layokosha lotshungɔ la monga l’atei wa wanɛ wemadi lanɛ.’
8 “‘Jashua ɔlɔmbɛdi a laadiko le, hokamɛ lam’alangayɛ, wɛ la asekayɛ wodjashi la ntondo kayɛ, nɛ dia anto anɛ wekɔ oko djembetelo; eenda, dimi layanga mbɔtshiya okambi+ ami Lokonɔ!+ 9 Enda dive diakamakitsha la ntondo ka Jashua! Washo 7 wekɔ lo dive 1; dimi layanga mbidja efundelo lɔkɔ la otshimɔ, ndo dimi layonya onongo wa wodja akɔ lo lushi+ 1,’ mbata Jehowa kanga lolembelembe.
10 “Jehowa kanga lolembelembe kata ate: ‘Lushi lɔsɔ, onto tshɛ l’atei anyu ayelɛ osukanyi ande l’ɛse k’ɔkɔdi ande wa vinyɔ ndo l’ɛse k’osongo+ ande wa fingo.’”
4 Ondjelo wakatɛkɛtaka la mi akakalola ko akamemula, oko watowemulaka onto oma lo djɔ. 2 Oma laasɔ, nde akamimbola ate: “Kakɔna kɛnayɛ?”
Ko dimi lakate nte: “Lekɔ lo mɛna ekundji ka tala kakasalema la paonyi,+ ndo dɔnga lo shɔdi yatɔ. Atala 7 wekɔ lɔkɔ,+ ɛɛ, 7 ndo atala wele lo shɔdi yatɔ wekɔ la ɛlɔnda 7. 3 Ndo esongo+ 2 w’ɔlivɛ wekɔ suke la tɔ, ɔmɔtshi lo lonya l’omi la dɔnga ndo okina lo lonya la lɔmɔsɔ.”
4 Oma laasɔ, dimi lakambola ondjelo wakatɛkɛtaka la mi nte: “Nkumɛmi le, kakɔna kalembetshiya diangɔ nɛ? 5 Ko ondjelo wakatɛkɛtaka la mi akamimbola ate: “Onde wɛ heye kɛnɛ kalembetshiya diangɔ nɛ?”
Dimi lakakadimola nte: “Ndooko, nkumɛmi.”
6 Oma laasɔ, nde akambutɛ ate: “Jehowa kata lo dikambo dia Zerubabɛlɛ ate: ‘“Aha la wolo w’asɔlayi kana la nkudu,+ koko la nyuma+ kami,” mbata Jehowa kanga lolembelembe. 7 Dikona dia woke le, eeyɛ? Wɛ ayonga nkɛtɛ y’ebamubamu*+ la ntondo ka Zerubabɛlɛ.+ Ndo nde ayotondja dive dia la diko* l’atei w’ekoko w’ɔnɛ: “Ande diambo! Ande diambo!”’”
8 Ɔtɛkɛta wa Jehowa wakaye nto le mi ɔnɛ: 9 “Anya wa Zerubabɛlɛ mbakake etshina ka luudu+ lɔnɛ, ndo anya ande hita mbayolishidiya.+ Ko nyu nyayeya dia Jehowa kanga lolembelembe kakantome le nyu. 10 Nɛ dia akɔna akɔnyɔla lushi l’akambo wa totshitshɛ?*+ Dikambo vɔ wayɔngɛnangɛna ndo wayɛna ɔkɔdi wa wɛdikelo* lo lonya la Zerubabɛlɛ. Diangɔ 7 sɔ diekɔ washo wa Jehowa wenda nkɛtɛ+ k’otondo.”
11 Oma laasɔ, dimi lakawombola nte: “Kakɔna kalembetshiya esongo ɛnɛ 2 w’ɔlivɛ wele lo lonya l’omi ndo la lɔmɔsɔ l’ekundji ka tala?”+ 12 Dimi lakawombola mbala ka 2 nte: “Kakɔna kalembetshiya totahetahe* ta lo ntahe 2 y’esongo w’ɔlivɛ wakɛdia paonyi k’ɔkɛlɛngɔ oma lo epondo 2 wa paonyi?”
13 Ko nde akamimbola ate: “Onde wɛ heye kɛnɛ kalembetshiya diangɔ nɛ?”
Dimi lakakadimola nte: “Ndooko, nkumɛmi.”
14 Nde akate ate: “Diɔ diele akitami w’esɔ 2 wemala suke la Nkumadiɔndjɔ ka nkɛtɛ+ k’otondo.”
5 Dimi lakende nto, ko lakɛnyi wɔɔmbɔ wayafumbɔ. 2 Nde akamimbola ate: “Kakɔna kɛnayɛ?”
Dimi lakakadimola nte: “Lekɔ lo mɛna wɔɔmbɔ wele la otale wa kubita* 20 ndo woke wa kubita 10 wayafumbɔ.”
3 Ko nde akambutɛ ate: “Ongo ele mananu katatshu lo nkɛtɛ k’otondo, nɛ dia onto tshɛ lava,+ oko wofundamidiɔ lo lɛkɛ lɔmɔtshi la lɔkɔ, halongola dilanya; ndo onto tshɛ latshika dɔkɔlɔkɔ,+ oko wofundamidiɔ lo lɛkɛ lokina la lɔkɔ, halongola dilanya. 4 Jehowa kanga lolembelembe kata ate: ‘Dimi lambokitoma, ko tɔ kayɔtɔ lo luudu la kanga wovi ndo lo luudu la ɔnɛ latshika dɔkɔlɔkɔ dia kashi lo lokombo lami; tɔ kayotshikala l’etei ka luudu lakɔ ndo kayolitshumba lɔ la esongo alɔ ndo ave alɔ.’”
5 Oma laasɔ, ondjelo wakatɛkɛtaka la mi akasukana ko akambutɛ ate: “Lam’alangayɛ, ohenda l’olongo ko wɛ ayɛna kɛnɛ katatshu.”
6 Ko dimi lakawombola nte: “Ɛngɔ kakɔna kengo?”
Nde akakadimola ate: “Ongo ekɔ yɛdikɔ ya efa* katatshu.” Nde akatetemala ate: “Ongo ekɔ ɛnamelo kawɔ lo nkɛtɛ k’otondo.” 7 Ndo dimi lakɛnyi ofidi w’otshimbedi wa lowolo wofɔmi, ndo womoto ɔmɔtshi akadjasɛ l’etei ka yɛdikɔ yakɔ. 8 Nde akate ate: “Kɔlɔ nde ongo.” Oma laasɔ, nde akoosokola l’etei ka yɛdikɔ ya efa, ko nde akafɛ ofidi wa lowolo wa wotsho l’onyɔ ayɔ.
9 Ko dimi lakende ndo lakɛnyi wamato 2 wayaye oma la ntondo, vɔ wakayafumbɔka lo lɔpɛpɛ. Vɔ waki la ahafu oko wa kiombe. Ndo vɔ wakadiya yɛdikɔ yakɔ lam’asa olongo la nkɛtɛ. 10 Dimi lakambola ondjelo wakatɛkɛtaka la mi nte: “Lende atawatshu la yɛdikɔ ya efa?”
11 Nde akakadimola ate: “Otsha lo wodja wa Shinara*+ dia towokɛ luudu; ndo etena kayolɔlɔngɔswama, nde ayotokitshama lɛkɔ lo dihole diahombande monga.”
6 Ko dimi lakende nto ndo lakɛnyi pusupusu 4 yayaye oma lam’asa akona 2, ndo akona akɔ waki wa nkonga. 2 Pusupusu ka ntondo kaki la mfalasa ya beela, ndo pusupusu ka 2 mfalasa y’edima.+ 3 Pusupusu ka 3 kaki la mfalasa ya wɛma, ndo pusupusu ka 4 mfalasa y’awadi awadi ndo y’asango asango.+
4 Dimi lakambola ondjelo wakatɛkɛtaka la mi nte: “Diangɔ diakɔna dingo na, nkumɛmi?”
5 Ondjelo akankadimola ate: “Ongo ekɔ nyuma+ 4 ya l’olongo yatatshu l’ɔkɔngɔ wa yɔ memala la ntondo ka Nkumadiɔndjɔ ka nkɛtɛ+ k’otondo. 6 Pusupusu kele la mfalasa y’edima kekɔ lo tatshu lo wodja wa lo nɔrdɛ;+ ya wɛma yekɔ lo tatshu la wedi wa ndjale; y’awadi awadi yekɔ lo tatshu lo wodja wa lo sidɛ. 7 Ndo y’asango asango yekɔ lo nomɔlomɔ dia teteta lo nkɛtɛ.” Ko nde akate ate: “Nyotshu, nyotetete lo nkɛtɛ.” Ko yɔ yakatatɛ mbeteta lo nkɛtɛ.
8 Oma laasɔ, nde akambelɛ ko akate ate: “Eenda, nyɛ yatatshu otsha lo wodja wa lo nɔrdɛ yambosala dia nyuma ka Jehowa momuya lo wodja wa lo nɔrdɛ.”
9 Ɔtɛkɛta wa Jehowa wakaye nto le mi ɔnɛ: 10 “Ɔsa kɛnɛ kakela Helɛdai, Tobidja ndo Jedaya oma le anto wele lo lɔhɔmbɔ; ndo lushi lɔsɔ, wɛ pombaka ntshɔ lo luudu la Jɔsiya ɔna Zɛfaniya kaamɛ la wanɛ wakaye oma la Babilɔna. 11 Kɔshi mfɛsa la paonyi kele kosale dɛmbɔ dia nkoso,* ko wɛ dilɔtsha Jashua+ ɔlɔmbɛdi a laadiko ɔna Jɛhɔzadaka lo ɔtɛ. 12 Ko wɛ mbotɛ wate:
“‘Jehowa kanga lolembelembe kata ate: “Pami kele lokombo lande Lokonɔ+ nde ɔnɛ. Nde ayotomba oma lo dihole diande hita, ndo nde ayoka tɛmpɛlɔ ka Jehowa.+ 13 Nde kele ɔnɛ layoka tɛmpɛlɔ ka Jehowa ndo nde kele ɔnɛ layonga la lɔnɛnɛ. Nde ayodjasɛ lo kiti kande ka lowandji ndo ayɔlɔmbɔla, nde ayonga nto ɔlɔmbɛdi lo kiti kande ka lowandji+ ndo diɔtɔnganelo dia wɔladi diayonga lam’asa ɛkɛndɛ akɔ 2.* 14 Ndo dɛmbɔ dia nkoso* diayonga oko eohwelo* lo tɛmpɛlɔ ka Jehowa dikambo dia Helɛmɛ, Tobidja, Jedaya+ ndo Hɛnɛ ɔna Zɛfaniya. 15 Ko wanɛ wele etale wayoya ndo wayosha lonya lo wokelo wa tɛmpɛlɔ ka Jehowa.” Ndo nyu nyayeya dia Jehowa kanga lolembelembe kakantome oya le nyu. Dui sɔ diayosalema naka nyayotetemala mpokamɛ dui dia Jehowa Nzambi kanyu.’”
7 Lo ɔnɔnyi wa 4 w’ɛlɔmbwɛlɔ ka nkumekanga Dariyo, ɔtɛkɛta wa Jehowa wakaye le Zɛkariya+ lo ngɔndɔ ka 9 nshi 4, mbuta ate ngɔndɔ ka Kislɛvɛ.* 2 Ase Bɛtɛlɛ wakatome Sharɛzɛrɛ ndo Rɛngɛmɛ-Mɛlɛkɛ nde l’anto ande dia toyanga kɛtshi* ka Jehowa, 3 dia totɛ ɛlɔmbɛdi wa lo luudu* la Jehowa kanga lolembelembe ndo amvutshi ɔnɛ: “Onde dimi pombaka ndela lo ngɔndɔ ka 5+ ndo nkila mbo ya ndɛ oko wakatasale l’edja k’ɛnɔnyi efula?”
4 Ɔtɛkɛta wa Jehowa kanga lolembelembe wakaye nto le mi ɔnɛ: 5 “Tɛ anto tshɛ wa lo wodja ndo ɛlɔmbɛdi wate: ‘Lam’akanyakilaka mbo ya ndɛ ndo lam’akanyalelaka lo ngɔndɔ ka 5 ndo lo ngɔndɔ ka 7+ l’edja k’ɛnɔnyi 70,+ onde mɛtɛ nyu nyakakilaka mbo ya ndɛ lo dikambo diami? 6 Lam’akanyalɛka ndo lam’akanyanɔka, onde aha lo wahɔ anyu hita mbakanyalɛka ndo mbakanyanɔka? 7 Onde hanyohombe nkitanyiya awui wa Jehowa wakandewoya lo tshimbo y’amvutshi+ w’edjedja etena kakadjasɛka anto lo wɔladi la Jɛrusalɛma ndo lo esomba wakayidinge, ndo etena kakadjasɛka anto la Nɛngɛbɛ ndo la Shɛfɛla?’”
8 Ɔtɛkɛta wa Jehowa wakaye nto le Zɛkariya ɔnɛ: 9 “Jehowa kanga lolembelembe kata ate: ‘Nyolombosha la losembwe+ la mɛtɛ, ndo nyosalanɛke akambo la ngandji ka kɔlamelo+ ndo kɛtshi. 10 Tanyokesake wadi aki odo, ɔna etshike,*+ ɔngɛndangɛnda+ kana ose wola;+ ndo tanyokongɛke l’etema+ anyu dia salanɛ kɔlɔ.’ 11 Koko vɔ wakatetemala ntona mbidja yimba,+ wakatshininala lo mbɛdiya ɛkɔngɔ+ awɔ, ndo wakadihe atoyi awɔ diaha mboka.+ 12 Vɔ waketɛ etema awɔ oko diyama*+ ndo vɔ kɔnɛmiyaka ɛlɛmbɛ* la ɛtɛkɛta wa Jehowa kanga lolembelembe wakandatome la nyuma kande lo tshimbo y’amvutshi+ w’edjedja. Diakɔ diele Jehowa kanga lolembelembe+ akoke yɛnyi y’efula.”
13 “Jehowa kanga lolembelembe kata ate: ‘Oko wakiwɔ kompokamɛ etena kakamelɛ,*+ mbakimi kompokamɛ etena kakawelɛ.’+ 14 ‘Ndo dimi lakaahandjola la lɔpɛpɛ la wolo efula lo wedja tshɛ wakiwɔ kombeya,+ ndo wodja awɔ wakatshikala tɔngɔ to aha l’onto leta lɔkɔ kana lakalola;+ nɛ dia vɔ waketɛ nkɛtɛ y’ɔlɔlɔ ɛngɔ ka wɔnɔnyi.’”
8 Ɔtɛkɛta wa Jehowa kanga lolembelembe wakaye nto le mi ɔnɛ: 2 “Jehowa kanga lolembelembe kata ate: ‘Dimi layonga la ohetoheto dikambo dia Siɔna la ohetoheto+ w’efula, ndo la odudu w’efula mbayomonga la ohetoheto dikambo diayɔ.’”
3 “Jehowa kata ate: ‘Dimi layokalola la Siɔna+ ndo layodjasɛ la Jɛrusalɛma;+ Jɛrusalɛma ayelamɛ osomba wa mɛtɛ,*+ ndo dikona dia Jehowa kanga lolembelembe diayelamɛ dikona+ di’ekila.’”
4 “Jehowa kanga lolembelembe kata ate: ‘Esombe w’apami ndo wa wamato wayodjasɛ lo asɛkɛ wa la Jɛrusalɛma nto, onto l’onto la ɔkɔmba ande lo lonya l’ɔtɛ w’efula k’ɛnɔnyi*+ ande. 5 Ndo asɛkɛ wa l’osomba wayololanɛ la ana w’apami ndo wa wamato wayɔkɛnyaka lɔkɔ.’”+
6 “Jehowa kanga lolembelembe kata ate: ‘Kaanga mbakokadiɔ mɛnama wolo efula le atshikadi w’anto anɛ lo nshi shɔ, onde ayɛnama wolo efula ndo le mi?’ mbata Jehowa kanga lolembelembe.”
7 “Jehowa kanga lolembelembe kata ate: ‘Dimi layanga shimbɛ anto ami oma le wedja wa lo ɛstɛ ndo wa lo owɛstɛ.*+ 8 Dimi layowaela, ndo vɔ wayodjasɛka la Jɛrusalɛma;+ vɔ wayonga anto ami, ko dimi layonga Nzambi+ kawɔ lo mɛtɛ* ndo lo losembwe.’”
9 “Jehowa kanga lolembelembe kata ate: ‘Anya anyu wakeketale,*+ nyu wanɛ woka ɛtɛkɛta ɛsɔ oma l’enyɔ w’amvutshi,+ ɛtɛkɛta akɔ waamɛ wakatama lushi lakasalema etshina ka luudu la Jehowa kanga lolembelembe dia mbika tɛmpɛlɔ. 10 Dikambo la ntondo k’etena kɛsɔ, onto kana nyama+ konongolaka difuto; ndo ki kondjalaka dia mbɔtɔ kana dia ntomba l’ɔtɛ w’ɔndɔshi, nɛ dia dimi lakasalaka di’anto tshɛ ndɔshana.’
11 “‘Koko wonya ɔnɛ dimi hantosalɛ atshikadi w’anto anɛ akambo oko lo nshi yakete,’+ mbata Jehowa kanga lolembelembe. 12 ‘Nɛ dia ntɔngɔ ya wɔladi yayonɛma; ɔkɔdi wa vinyɔ wayɔtɔ elowa awɔ, nkɛtɛ yayotondja diangɔ+ diayɔ, ndo olongo wayɔkɔsha loonge lawɔ; dimi layosala dia atshikadi w’anto anɛ nkita diangɔ+ sɔ tshɛ. 13 Luudu la Juda ndo luudu l’Isariyɛlɛ le, oko wakanyonge ɛngɔ ka mananu l’atei wa wedja,+ dimi layonyoshimbɛ, ndo nyu nyayonga ɔtshɔkɔ.+ Tanyokake wɔma!+ Anya anyu wakeketale.’*+
14 “Jehowa kanga lolembelembe kata ate: ‘“Oko wakamayashikikɛ dia nyela mpokoso l’ɔtɛ wakambotsha watshɛnyu nkɛlɛ,” mbata Jehowa kanga lolembelembe, “ko dimi komonga la lonyangu,+ 15 mbamomoyashikikɛ l’etena kɛnɛ dia salɛ Jɛrusalɛma ndo luudu la Juda+ ɔlɔlɔ. Tanyokake wɔma!”’+
16 “‘Akambo anɛ mbahombanyu nsala: Nyotanɛke mɛtɛ onto l’onto,+ ndo dombwelo dia lo asoko anyu pombaka nsukɛ mɛtɛ ndo wɔladi.+ 17 Onto l’onto atokongɛke l’otema+ ande dia mbela wonyande mpokoso, ndo tanyolangake ditshibelo+ dia kashi; nɛ dia dimi petshaka+ akambo asɔ tshɛ,’ mbata Jehowa.”
18 Ɔtɛkɛta wa Jehowa kanga lolembelembe wakaye le mi nto ɔnɛ: 19 “Jehowa kanga lolembelembe kata ate: ‘Ekilelo ka mbo ya ndɛ ka lo ngɔndɔ ka 4,+ ekilelo ka mbo ya ndɛ ka lo ngɔndɔ ka 5,+ ekilelo ka mbo ya ndɛ ka lo ngɔndɔ ka 7+ ndo ekilelo ka mbo ya ndɛ ka lo ngɔndɔ ka 10+ ayonga waaso w’ɔngɛnɔngɛnɔ ndo w’ɔlɔ dikambo dia luudu la Juda, fɛtɛ y’ɔngɛnɔngɛnɔ.+ Ɔnkɔnɛ, nyolange mɛtɛ ndo wɔladi.’
20 “Jehowa kanga lolembelembe kata ate: ‘Anto efula ndo wanɛ wadjasɛ lo esomba efula wayoya nto; 21 ndo anto wa l’osomba ɔmɔtshi wayotshɔ le anto wa l’osomba okina, ko wayota vate: “Nyɛsɔ totshu la otema ɔtɔi dia toyanga kɛtshi* ka Jehowa ndo dia toyanga Jehowa kanga lolembelembe. Ndo dimi mbatatshu.”+ 22 Anto efula ndo wedja wa wolo wayoya la Jɛrusalɛma+ dia ndjoyanga Jehowa kanga lolembelembe ndo ndjoyanga kɛtshi* ka Jehowa.’
23 “Jehowa kanga lolembelembe kata ate: ‘Lo nshi shɔ, anto 10 w’oma l’ɛtɛkɛta tshɛ wa wedja+ wayokimɛ, ɛɛ, vɔ wayokukutɛ okutu* w’ose Juda,* wata vate: “Sho nangaka ntshɔ kaamɛ la nyu,+ nɛ dia takoke dia Nzambi ekɔ kaamɛ la nyu.”’”+
9 Diewoyelo:
“Ɔtɛkɛta wa Jehowa lo dikambo dia wodja wa Hadaraka,
Nɛ dia sso dia Jehowa diekɔ le anto+
Ndo waoho tshɛ w’Isariyɛlɛ,
2 Vɔ wayɔlɔshana ndo la Hamatɛ+ lodji la wɔ* olelo,
Ndo wayɔlɔshana la Tura+ ndo Sidɔna,+ nɛ dia vɔ wekɔ la lomba+ l’efula.
3 Tura amboyakɛ lokombo.*
Nde ambotshumanya mfɛsa oko ditshu
Ndo paonyi oko lɔtɛkɛ lo toshinga.+
4 Eenda, Jehowa ayowɔhɔtɔla diangɔ diande,
Nde ayodiaka asɔlayi ande lo ndjale;+
Ndo nde ayolongola lo dja.+
5 Ashikɛlɔna ayɛna dui sɔ ndo ayoka wɔma;
Ngaza ayonga la lɔkɔnyɔ l’efula,
Ndo Ɛkɛrɔna, nɛ dia elongamelo kande kamboshama nsɔnyi.
Nkumekanga kɛmɔtshi ayovɔ la Ngaza,
Ndo anto hawotodjasɛ+ la Ashikɛlɔna.
6 Ɔna la lo loseka ayodjasɛ la Ashidɔdɛ,
Ndo dimi layonya otako w’ose Filistiya.+
7 Dimi layonya diangɔ diambosana la dikila oma l’onyɔ ande
La diangɔ dia wɔnɔnyi lam’asa wanyu ande,
Ndo nde ayonga otshikadi wa Nzambi kaso;
Nde ayonga oko owandji* la Juda,+
Ndo Ɛkɛrɔna oko ose Jɛbusɛ.+
8 Dimi layohanga oko olami wa luudu+ lami,
Ko ndooko onto layeta ndo ndooko onto layokalola;
Ndo ndooko owandji w’olimu* wayeta nto,+
Wonya ɔnɛ, dimi lambɛna dui sɔ* la washo ami.
9 Ɔna womoto la Siɔna le, ngɛnangɛna efula.
Ɔna womoto la Jɛrusalɛma le, da ekoko wa edjelo k’otshumba.
Eenda, nkumekanga kayɛ oyaye le yɛ.+
10 Dimi layonya pusupusu ka ta oma lo Efrayimɛ
Ndo mfalasa oma la Jɛrusalɛma.
Ota wa ta wayonyɛma.
Ndo nde ayewoya wedja+ wɔladi;
Lowandji lande layonga oma lo ndjale polo lo ndjale
11 Koko womoto le, la dikila dia sheke yayɛ,
Dimi layotondja anto ayɛ wele lo lokanu oma lo difuku+ diele bu l’ashi.
12 Nyu ase lokanu wele la elongamelo,+ nyokalole lo longele.
Dimi lambokotɛ ɛlɔ nte:
‘Womoto le, dimi layokofuta ndodia lo 2.+
13 Nɛ dia dimi layonɛ* Juda oko ota ami.
Dimi layolodia ota kaamɛ la Efrayimɛ,*
Ndo Siɔna le, dimi layemula anayɛ,
Ngirika le, dia ndɔsha anayɛ,
Ndo layoketɛ oko lokuwa la ta laki ɔndɔshi wa ta.’
14 Jehowa ayɛnama laadiko diawɔ,
Ndo lohito lande layotshɔ oko dingadimu.
Nkum’Olongo Nkumadiɔndjɔ Jehowa ayoda wɔɔndjɔ+
Ndo nde ayotshɔ la mpɛpɛ ya wolo ya lo sidɛ.
15 Jehowa kanga lolembelembe ayowaswɛ,
Vɔ wayɔlɛ ko wayɔlɛndja tooka ave.+
Vɔ wayɔnɔ ko wayosala lofunguso oko anto wambɔnɔ wanu;
Ndo vɔ wayolola oko dɔnga dia difuku,
Oko atshuku wa elambwelo.+
16 Lushi lɔsɔ, Jehowa Nzambi ayoshimbɛ anto ande;
Oko dongalonga di’anto+ ande;
Nɛ dia vɔ wayonga oko dɛngalɛnga dia mbɔkɔ dia lo dɛmbɔ dia nkoso* diahɛta lo nkɛtɛ+ yande.
17 Ande woke wele+ ɔlɔlɔ ande lee!
Ndo ande efula kele olangala ande lee!
Ntɔngɔ yayosala dia ɛlɔngɔ w’apami mbola,
Ndo wanu w’eyoyo dia esekaseka wa dimuma+ mbola.”
10 “Nyɔlɔmbɛ Jehowa mvula lo nshi ya mvula ka lɔlɔla djɛsɛ.
Jehowa kele ɔnɛ lasala wange wa mvula,
Lawahongolɛ+ mvula,
Ndo lasha onto tshɛ tombatomba dia lo ekambɔ.
Vɔ mbutaka alɔ w’anyanya,
Ndo lo anyanya mbatowohembaka dia nsamba.
Diakɔ diayowekekɔ oko ɛkɔkɔ.
Vɔ wayosowa, nɛ dia olami keema.
3 Nkɛlɛ kami kekɔ lo nombalomba otsha le alami w’ɛkɔkɔ,
Ndo dimi layokoya la ɛnɔmbɔdi wasoyana;*
Nɛ dia Jehowa kanga lolembelembe ambodja ɛkɔkɔ+ ande yimba, luudu la Juda,
Ndo nde ambowaetɛ oko mfalasa kande ka ta ka diambo.
4 Oma le nde kaya onto la woke,*
Oma le nde kaya omboledi wasukɛ,*
Oma le nde kaya ota wa ta;
Oma le nde katomba omendji* tshɛ, vɔ tshɛ kaamɛ.
5 Ndo vɔ wayonga oko andɔshi wa ta,
Wahɔtshahɔtsha lɔtɛkɛ la lo toshinga lo ta.
6 Dimi layosala dia luudu la Juda ndeka,
Ndo dimi layoshimbɛ+ luudu la Yɔsɛfu.
Dimi layowakaloya,
Nɛ dia dimi layowaoka kɛtshi;+
Ndo vɔ wayonga oko dimi latawakalɛka+ ndooko lushi;
Nɛ dia dimi kele Jehowa Nzambi kawɔ, ndo dimi layowakadimola.
7 Aseka Efrayimɛ wayonga oko ɔndɔshi wa ta wa wolo,
Ndo etema awɔ wayɔngɛnangɛna oko la wanu.+
Anawɔ wayɛna dikambo sɔ ko wayɔngɛnangɛna;
Etema awɔ wayonga la ɔlɔ le Jehowa.+
8 ‘Dimi layowadɛ kioko ndo layowasanganya kaamɛ;
Nɛ dia dimi layowatshungola,+ ko vɔ wayonga efula,
Ndo wayotetemala monga efula.
9 Oyadi dimi mbahandjola oko ntɔngɔ l’atei wa wedja,
Vɔ wayombohɔ lo ahole w’etale;
Vɔ la anawɔ wayɔsɛna nto ndo wayokalola.
10 Dimi layowakaloya oma lo wodja w’Edjibito
Ndo layowatshumanya oma l’Asuriya;+
Dimi layowatɔla lo wodja wa Ngiliyadɛ+ ndo wa Lɛbanɔna,
Ndo ndooko dihole diayotanema nto dikambo diawɔ.+
Otako w’Asuriya wayɔkɔ,
Ndo danga di’Edjibito diayomɔ.+
11 “Lɛbanɔna le, dihola nkuke yayɛ,
Kele dja yatshumbe esongo ayɛ w’elondo.
2 Wɛ osongo wa dihake, lela nɛ dia osongo w’olondo wambɔkɔ;
Esongo wa diambo wambolanyema!
Nyu esongo wa ɔakɛ wa la Bashana, nyolele,
Nɛ dia okonda wa diambo wambolanyema!
3 Hokamɛ delo di’alami w’ɛkɔkɔ,
Nɛ dia lɔnɛnɛ lawɔ lambolanyema.
Hokamɛ dikita di’ɛsɔngɔ wa ntambwɛ,*
Nɛ dia tohoka ta weke tele l’omamu wa Jɔrdana tambolanyema.
4 “Jehowa Nzambi kami kata ate: ‘Lama ɛkɔkɔ wahomba ndjakema,+ 5 wele asombi awɔ wambadiaka+ ko vɔ bu la onongo. Ndo wanɛ waasondja+ mbutaka ɔnɛ: “Jehowa atombɔme, nɛ dia dimi layonga kanga ɔngɔnyi.” Ndo alami awɔ w’ɛkɔkɔ hawowaoke+ kɛtshi.’
6 “Jehowa kata ate: ‘Dimi hantotetemala mboka wanɛ wadjasɛ lo wodja kɛtshi. Ɔnkɔnɛ, dimi layosala di’onto l’onto nkɔ lo anya w’osukanyi ande ndo wa nkumekanga kande; ko vɔ wayolanya wodja, ndo dimi hantowatsha oma l’anya awɔ.’”
7 Ko dimi lakatatɛ nama ɛkɔkɔ wakahombe ndjakema+ dikambo dianyu, nyu amɛnyi mfɔnu wa l’olui w’ɛkɔkɔ. Ɔnkɔnɛ dimi lakɔshi alanga 2, lakelɛ dimɔtshi Dimɛna ndo dikina Kaamɛ,+ ko lakatatɛ nama ɛkɔkɔ. 8 Ndo dimi lakanya alami 3 w’ɛkɔkɔ lo ngɔndɔ 1, nɛ dia dimi* lakashisha solo dia lotutsha otsha le wɔ, ko vɔ* wakampetsha. 9 Dimi lakate nte: “Dimi hantotetemala nyolama. Wɔnɛ wayanga mvɔ wavu, ndo wɔnɛ watalanyema walanyeme. Koko le wɛnɛ watshikala, ɔkɔkɔ l’ɔkɔkɔ ale emunyi w’osekawɔ.” 10 Ko dimi lakɔshi danga diami dielamɛ Dimɛna+ ndo lakadihembola, lo nanya sheke yakamadje l’anto tshɛ. 11 Yɔ yakalana lushi lɔsɔ, ndo amɛnyi mfɔnu wa l’olui w’ɛkɔkɔ wakamendaka wakeye dia ɔsɔ aki ɔtɛkɛta wa Jehowa.
12 Oma laasɔ, dimi lakawatɛ nte: “Naka nyu nangaka, nyombisha difuto diami; ko naka bu, nyotshikale la diɔ.” Ko vɔ wakamfute* ekenga 30 wa mfɛsa.+
13 Ko Jehowa akambutɛ ate: “Djawɔ lo eombelo, oshinga wa nɛmɔ diakawambɛdika.”+ Ɔnkɔnɛ dimi lakɔshi ekenga akɔ 30 wa mfɛsa, ko lakawadje lo eombelo ka lo luudu la Jehowa.+
14 Oma laasɔ, dimi lakahembola danga diami dia 2 dielamɛ Kaamɛ,+ lo nanya diwotɔ diele lam’asa Juda la Isariyɛlɛ.+
15 Jehowa akambutɛ ate: “Kakianɛ, ɔsa ehomɔ k’olami w’ɛkɔkɔ+ w’anyanya. 16 Nɛ dia dimi layanga ntshika dia olami w’ɛkɔkɔ monga lo wodja. Nde hatokokɛ ɛkɔkɔ watalanyema;+ nde hatoyanga ɔkɔkɔ w’ɔna, hatɔkɔnɔla wɔnɛ wele la hemɔ+ kana ndesha wɛnɛ wele l’akoka wa memala. Koko nde ayɔlɛ emunyi wa wɔnɛ+ wele woke ndo ayatshatshaka nsabɔ y’ɛkɔkɔ.+
17 Mananu le olami ami w’ɛkɔkɔ+ w’anyanya wakalɛ ɛkɔkɔ!+
Lokuwa la ta layohembola lonya lande ndo layotondola sso diande dia l’omi.
Lonya lande layoma tshɛ lo tshɛ,
Ndo sso diande dia l’omi diayolɛ* tshɛ lo tshɛ.”
12 Diewoyelo:
“Ɔtɛkɛta wa Jehowa wendana l’Isariyɛlɛ,” mbata Jehowa,
Ɔnɛ lakananula olongo,+
Ɔnɛ lakasale etshina ka nkɛtɛ,+
Ndo lakasale nyuma* k’onto l’etei kande.
2 “Dimi layanga mbetɛ Jɛrusalɛma dikɔhɔ* diatakanya anto tshɛ wodingi; ndo lɛkɔ mbayowodinga Juda la Jɛrusalɛma+ dia mbalɔsha. 3 Lushi lɔsɔ, dimi layetɛ Jɛrusalɛma dive dia wotsho le anto tshɛ. Wanɛ tshɛ wayodionyiya wayohomɔ+ wolo; ndo wedja tshɛ wa la nkɛtɛ wayotshumanyema dia ndjilɔsha.+ 4 Lushi lɔsɔ,” mbata Jehowa, “dimi layosala dia mfalasa tshɛ mindama la sase dia wɔma ndo ombahemi atɔ mbidjɔ dadi. Dimi layoka washo ami lo luudu la Juda, koko dimi layetɛ mfalasa tshɛ ya wedja totshungu. 5 Ndo ewandji* wa Juda wayota l’etema awɔ vate: ‘Wanɛ wadjasɛ la Jɛrusalɛma mbele wolo ami lo tshimbo ya Jehowa kanga lolembelembe, Nzambi+ kawɔ.’ 6 Lushi lɔsɔ, dimi layetɛ ewandji wa Juda oko lokangɔ la dja l’atei wa nkunyi ndo oko ewa lo ntɔngɔ+ yohembɔmi, ko vɔ wayotshumba anto tshɛ wodingi lo lonya l’omi ndo lo lonya la lɔmɔsɔ;+ ko Jɛrusalɛma yayonga la anto nto lo dihole diayɔ,* la Jɛrusalɛma.+
7 “Ndo Jehowa ayoshimbɛ mvudu y’apɛma ya Juda ntondo, diaha dimɛna* dia luudu la Davidɛ ndo dimɛna* dia wanɛ wadjasɛ la Jɛrusalɛma ndeka dia Juda. 8 Lushi lɔsɔ, Jehowa ayonga ekokelo kodingi wanɛ wadjasɛ la Jɛrusalɛma;+ lushi lɔsɔ, wanɛ watakana* l’atei awɔ wayonga oko Davidɛ, ndo luudu la Davidɛ oko Nzambi, oko ondjelo wa Jehowa watatshu la ntondo kawɔ.+ 9 Ndo lushi lɔsɔ, dimi mɛtɛ layoshila oshiki wedja tshɛ waya ndjɔlɔsha Jɛrusalɛma.+
10 “Dimi layotsholɛ luudu la Davidɛ ndo wanɛ wadjasɛ la Jɛrusalɛma nyuma ka kɛtshi ndo k’ɔsɛngɔsɛngɔ, ko vɔ wayenda ɔnɛ lakawongola dikɔnga,+ ndo vɔ wayowolela oko watowolelaka ɔna ɛtɔi; vɔ wayonga la lonyangu l’efula l’ɔtɛ ande oko watowongaka la lonyangu l’ɔtɛ w’ɔna enondo. 11 Lushi lɔsɔ, delo dia wolo diayonga la Jɛrusalɛma oko delo dia la Hadadirimɔna lo Okidi wa Mengido.+ 12 Ndo wodja wayolela, nkumbo la nkumbo kayolela; nkumbo ka luudu la Davidɛ lo tɔamɛ ndo wamato awɔ lo vɔamɛ; nkumbo ka luudu la Natana+ lo tɔamɛ ndo wamato awɔ lo vɔamɛ; 13 nkumbo ka luudu la Lɛwi+ lo tɔamɛ ndo wamato awɔ lo vɔamɛ; nkumbo k’aseka Shimei+ lo tɔamɛ ndo wamato awɔ lo vɔamɛ; 14 ndo nkumbo tshɛ yatshikala, nkumbo la nkumbo lo tɔamɛ ndo wamato awɔ lo vɔamɛ.
13 “Lushi lɔsɔ, ɛtɛkɔ kayodihɔ dikambo dia luudu la Davidɛ ndo dia wanɛ wadjasɛ la Jɛrusalɛma dia mbaɛdia oma lo pɛkato ndo mindo.”+
2 Jehowa kanga lolembelembe kata ate: “Lushi lɔsɔ, dimi layonya nkombo ya dikishi oma lo wodja,+ ndo yɔ hayotohɔma nto; dimi layonya amvutshi+ ndo nyuma ka mindo oma lo wodja. 3 Ndo naka onto ayota prɔfɛsiya nto, kete nyango la she wanɛ wakawote wayowotɛ vate: ‘Wɛ hatɔsɛna, nɛ dia wɛ ambota kashi lo lokombo la Jehowa.’ Ndo nyango la she wanɛ wakawote wayowotondola l’ɔtɛ watande prɔfɛsiya.+
4 “Lushi lɔsɔ omvutshi tshɛ ayoshama nsɔnyi l’ɔtɛ wa ɛnɛlɔ kande etena katande prɔfɛsiya; ndo vɔ hawotɔlɔta ahɔndɔ w’amvutshi wa wɛɔsa+ la oyango wa nkesa. 5 Ko nde ayota ate: ‘Dimi bu omvutshi. Dimi lekɔ okambi wa dikambɔ, nɛ dia onto ɔmɔtshi akansombe etena kakimi ɔlɔngɔlɔngɔ.’ 6 Ndo naka onto ɔmɔtshi mbombola ɔnɛ: ‘Mpota yakɔna nyɛ yele l’asa ahɛka ayɛ?’* Nde ayokadimola ate: ‘Mpota yakamahomɔ lo luudu laki angɛnyi ami.’”*
7 “Lokuwa la ta le, emɔ dia ndɔsha olami ami w’ɛkɔkɔ,+
Dia ndɔsha onto lele ɔngɛnyi ami” mbata Jehowa kanga lolembelembe.
“Diaka olami w’ɛkɔkɔ+ kele ɛkɔkɔ wadiangane;+
Ndo dimi layokadimola lonya lami otsha le wanɛ wele anyanya.”
8 Jehowa kata ate: “Lo wodja w’otondo,
Tenyi 2 dia lɔkɔ diayonyɛma ndo diayolanyema;*
Ndo etenyi ka 3 kayotshikala lɔkɔ.
9 Dimi layodja etenyi ka 3 lo dja;
Dimi layowaɛdia oko watowɛdiaka mfɛsa,
Ndo layowaɛdika oko watowɛdikaka+ paonyi.
Vɔ wayeelɛ* lokombo lami,
Ko dimi layowakadimola.
Dimi layota nte: ‘Vɔ wekɔ anto+ ami,’
Ndo vɔ wayota vate: ‘Jehowa ekɔ Nzambi kaso.’”
14 “Eenda, lushi lekɔ lo ndjaye, lushi la Jehowa lele diangɔ dia dimbo di’oma le yɛ* diayokahanyema l’atei ayɛ. 2 Dimi layosanganya wedja tshɛ dia ndɔsha Jɛrusalɛma; ko wayonda osomba, wayomba mvudu ndo wayeyana la wamato la wolo. K’ahende ɔtɔi k’osomba kayotshɔ lo lɔhɔmbɔ, koko anto wayotshikala hawotonyɛma oma l’osomba.
3 “Jehowa ayotomba ndo ayɔlɔsha wedja+ ɛsɔ oko etena kalɔshande lo lushi la ta.+ 4 Lushi lɔsɔ, ekolo ande wayemala lo Dikona di’esongo w’Ɔlivɛ+ diɛlane la Jɛrusalɛma lo ɛstɛ; ndo Dikona di’esongo w’Ɔlivɛ diayatɛ lo 2 oma lo ɛstɛ* polo lo owɛstɛ* ko ntondja lowenga la woke; k’ahende ɔtɔi ka dikona kayotshɔ lo nɔrdɛ ndo k’ahende ɔtɔi kekina kayotshɔ lo sidɛ. 5 Nyu nyayolawɔ otsha lo lowenga la lo akona ami, nɛ dia lowenga la lo akona layokoma polo la Azɛlɛ. Nyu nyayolawɔ oko wakanyalawɔ l’ɔtɛ wa didimu dia nkɛtɛ lo nshi ya Uziya nkumekanga ka Juda.+ Ko Jehowa Nzambi kami ayoya ndo ekilami tshɛ wayonga kaamɛ la nde.+
6 “Lushi lɔsɔ, osase+ wa dimɛna hawotoyala, diangɔ diayokama la tshitshi.* 7 Ɔsɔ ayonga lushi la laande leyama oko lushi la Jehowa.+ Yanyi hayotoyala ndo otsho hawotoyala; ndo osase wayɔhɛta la dikɔlɔ. 8 Lushi lɔsɔ, ashi+ wa lɔsɛnɔ wayɔkɛla oma la Jɛrusalɛma,+ k’ahende ɔtɔi kawɔ otsha lo ndjale+ ka lo ɛstɛ* ndo k’ahende ɔtɔi kekina otsha lo ndjale+ ka lo owɛstɛ.* Dui sɔ diayosalema lo eleko k’ɔwɔ ndo k’avula. 9 Ko Jehowa ayonga Nkumekanga lo nkɛtɛ+ k’otondo. Lushi lɔsɔ, Jehowa ayonga 1+ ndo lokombo lande layonga 1.+
10 “Wodja w’otondo wayonga oko Araba,+ oma la Ngɛba+ polo la Rimɔna+ lo sidɛ ka Jɛrusalɛma; ndo yɔ yayotondjama, ko anto wayodjasɛ lo dihole+ diayɔ, oma lo Soko dia Bɛnjamina+ polo lam’ele Soko dia Ntondo, polo lo Soko dia Tshuku, ndo oma lo Tshoto ya Hananɛlɛ+ polo lo wamula wa vinyɔ wa nkumekanga. 11 Ko anto wayodjasɛ lɔkɔ. Mananu k’elanyelo+ hayalaki nto pondjo lɔkɔ, ndo anto wayodjasɛ la Jɛrusalɛma lo lotui tshitshi.+
12 “La sui nɛ mbayosoya Jehowa anto tshɛ walɔsha Jɛrusalɛma:+ Alemba awɔ wayɔhɔnda etena kaakawemala la ekolo awɔ, washo awɔ wayɔhɔnda lo afuku awɔ, ndo nemi yawɔ yayɔhɔnda lo enyɔ awɔ.
13 “Lushi lɔsɔ, lofunge l’oma le Jehowa layokokanɛ l’atei awɔ; ko onto l’onto ayokimɛ lonya l’osekande, ndo lonya lande layɔlɔsha lonya l’osekande.*+ 14 Juda lawɔ ayotambɛ lo ta dia la Jɛrusalɛma; ndo ɛngɔnyi wa wedja tshɛ wodingi wayotshumanyema, paonyi, mfɛsa ndo ahɔndɔ lo yɛdikɔ y’efula.+
15 “Sui dia ngasɔ diayoya ndo le mfalasa, mfalo, kamɛlɔ, mponda ndo dongalonga tshɛ diele lo mpango shɔ.
16 “Onto tshɛ lakatshikala oma lo wedja wakaye ndjɔlɔsha Jɛrusalɛma ayotshɔka ɔnɔnyi la ɔnɔnyi+ dia tokusamɛ* Nkumekanga, Jehowa kanga lolembelembe,+ ndo dia tosala Fɛtɛ ka Totombotombo.*+ 17 Koko l’atei wa nkumbo ya la nkɛtɛ, naka onto ɔmɔtshi hatshwe la Jɛrusalɛma dia tokusamɛ Nkumekanga, Jehowa kanga lolembelembe, kete ndooko mvula kayɔlɔ le wɔ.+ 18 Ndo naka nkumbo k’Edjibito hatshwe ndo hɔtwɛ, kete ndooko mvula kayowokondja. Koko vɔ wayolongola sui diele Jehowa ayosoya la diɔ wedja wahatshu tosala Fɛtɛ ka Totombotombo. 19 Ɔsɔ ayonga dilanya dikambo dia pɛkato k’Edjibito ndo pɛkato ka wedja tshɛ wahatshu tosala Fɛtɛ ka Totombotombo.
20 “Lushi lɔsɔ, ɛtɛkɛta w’ɔnɛ: ‘Jehowa+ ekɔ kanga ekila!’ wayofundama lo tongungangunga ta mfalasa. Ndo mpoke*+ ya lo luudu la Jehowa yayonga oko alɔnga+ w’afuku la ntondo ka elambwelo. 21 Mpoke* tshɛ kakatɛwɔ ka la Jɛrusalɛma ndo ka la Juda kayonga ekila ndo kayonga kaki Jehowa kanga lolembelembe, ko wanɛ tshɛ walambola elambo wayɔtɔka ndo wayokambaka la mɔtshi l’atei ayɔ dia katɛka. Lushi lɔsɔ, ose Kanana* hatoyala nto lo luudu la Jehowa kanga lolembelembe.”+
Kitshimudi ate: “Jehowa akohɔ.”
Kana “nyokalole.”
Enda Ap. B15.
Mbuta ate wahadingami la mpele.
Tshɛk., “l’ɔkɔngɔ wa lotombo.”
Kana “ambonanda sso diami di’otondo.”
Kana “alemba tshɛ.”
Kana “onongo.”
Kana “ekutu wa lokumu.”
Kana “ayonga la ɔkɛndɛ wa; ayomba.”
Kana “yokitanedi.”
Kana “dive di’ekomelo.”
Kana “ditatelo dia totshitshɛ?”
Tshɛk., “dive, etinɛ.”
Mbuta ate totahetahe ta l’osongo takɔhama elowa.
Kubita 1 ekɔ la yɛdikɔ ya satimɛtrɛ 44,5. Enda Ap. B14.
Tshɛk., “efa,” lanɛ mendanka la ɛngɔ kana kisaka kakambawɔ la tɔ dia mbɛdika efa. Efa 1 ekɔ yɛdikɔ ya litrɛ 22. Enda Ap. B14.
Mbuta ate Babilɔna.
Kana “dɛmbɔ dia nkoso dia diambo.”
Mbuta ate lam’asa ɔkɛndɛ ande wa ɔnɔmbɔdi ndo wa ɔlɔmbɛdi.
Kana “dɛmbɔ dia nkoso dia diambo.”
Kana “diohwelo.”
Enda Ap. B15.
Kana “totutadia elungi.”
Kana “tɛmpɛlɔ.”
Kana “laha la she.”
Kana ondo “lɔwɔkɔ la wolo,” oko lɔwɔkɔ la emeri.
Kana “wetshelo.”
Tshɛk., “kakandelɛ.”
Kana “kɔlamelo.”
Tshɛk., “l’ɔtɛ w’efula ka nshi.”
Kana “oma lo wodja wa lɛnɛ atomba wonya ndo wodja wa lɛnɛ ɔtɔ wonya.”
Kana “kɔlamelo.”
Kana “Nyonge la dihonga.”
Kana “Nyonge la dihonga.”
Kana “totutadia elungi.”
Kana “totutadia elungi.”
Kana “ohembo wa dihɔndɔ.”
Tshɛk., “ose Juda la pami.”
Tshɛk., “Dihole dia momuya.”
Ondo mendanaka la wodja wa Hadaraka kana Damasɛkɛ.
Kana “dihole di’eshamelo.”
Ɔsɔ aki owandji wa dioho.
Kana “osoyanyi.”
Ondo sui di’anto ande.
Kana “ndo ekɔ lo mbidja otshumba; amboshimbamɛ.”
Kana “mponda k’omi.”
Mbuta ate Efaratɛ.
Tshɛk., “layokamɛ.”
Mbuta ate oko lohito.
Kana “diadɛmɛ.”
Kana “dikishi; nzambi ya lo nkumbo.”
Kana “kɛnɛ kele ehekesa; kɛnɛ kahamanema mfundo.”
Tshɛk., “mbudi ya waomi.”
Tshɛk., “tshoto ya lo tshuku,” didjidji di’onto l’ohomba; owandji.
Tshɛk., “kɔhɔ,” didjidji dia ɔnɛ lele osukɔ; omboledi.
Kana “owandji w’olimu.”
Kana “ɛsɔngɔ wa ntambwɛ wele l’alɛfulɛfu.”
Kana “anima ami.”
Kana “anima awɔ.”
Tshɛk., “wakambɛdikɛ.”
Tshɛk., “diayɔlɛmba.”
Kana “lomu.”
Kana “dɔnga dia difuku.”
Ɔsɔ aki ewandji wa waoho.
Kana “lo dihole diayɔ diahombama.”
Kana “lotombo.”
Kana “lotombo.”
Kana “woleki wɔdu.”
Tshɛk., “lam’asa anya ayɛ?” Mbuta ate lo ntolo kana l’ɔkɔngɔ.
Kana “laki wanɛ wamboka ngandji.”
Kana “diayovɔ.”
Kana “wayɔtɛndɛ.”
Mbuta ate osomba watɛkɛtama lo div. 2.
Kana “lɛnɛ ahotɔ wonya.”
Tshɛk., “ndjale.”
Kana “diayotshikala ki,” oko diambokakatala la tshitshi.
Mbuta ate Ndjale Kambovɔ.
Mbuta ate Ndjale ka Mediteraneya.
Kana “ndo onto ɔmɔtshi ayɔlɔsha onto okina.”
Kana “tɔtɛmɔla.”
Kana “Tohombo ta lo tshanda mɔtshi.”
Kana “mpoke y’enyɔ weke yakatɛwɔ.”
Kana “Mpoke k’onyɔ woke kakatɛwɔ.”
Kana ondo “omundji w’okanda.”