WOHO WA NKONDJA EKIMANYIELO OMA L’EKIYANU ASO

Onto koka monga la lɔsɛnɔ laha l’ekiyanu

Lomba l’oma lo Bible koka tokimanyiya dia mbewɔ ekiyanu efula wele bu ohamba. Le so sho anto, sho bu l’akoka wa minya awui tshɛ watosha ekiyanu. Koko Otungi aso koka. Nde akasɔnɛ onto ɔmɔtshi dia tokimanyiya. Onto akɔ ko Yeso Kristo. Keema edja, l’andja w’otondo nde ayanga nsala awui wa diambo efula oleki wanɛ wakandasale etena kakinde lanɛ la nkɛtɛ oko onto. Ɛnyɛlɔ:

YESO AYƆKƆNƆLA HEMƆ OKO WAKANDASALE.

“Ko wakawelaka wanɛ tshɛ wakadiɛnɛka la hemɔ ya weho la weho . . . , ko nde akaakɔnɔlaka.”—MATEO 4:24.

YESO AYOSALA DI’ONTO TSHƐ MONGA LA MBO YA NDƐ NDO LA DIHOLE DIA MBIDJASƐ.

“Vɔ wayoka mvudu [wanɛ wayolɛ Kristo] ko wayodjasɛka lɔkɔ, ndo vɔ wayokamba dikambɔ dia vinyɔ ko wayɔlɛka elowa w’oma lɔkɔ. Vɔ hawotoka mvudu dia onto okina ndjodjasɛ lɔkɔ, ndo hawotokamba dikambɔ dia anto akina ndjɔlɛ.”—ISAYA 65:21, 22.

LO ƐLƆMBWƐLƆ KA YESO, WƆLADI NDO LOTUI TSHITSHI LAYONGA L’ANDJA W’OTONDO.

“Lo nshi yande kayɔngɔna onto ɔlɔlɔ, ndo wɔladi wayofulanɛ polo ndo ngɔndɔ hayowalɛ nto. Nde ayolɛ anto oma lo ndjale polo lo ndjale ndo oma lo Ɔkɛdi polo lo tokoma ta nkɛtɛ. . . . Atunyi ande wayɔlɔmbɔla ditshu.”—OSAMBO 72:7-9.

YESO AYONYA AWUI WELE KEEMA LOSEMBWE.

“Nde ayoka mbolambola ndo ose wola kandji, ndo nde ayoshimbɛ nsɛnɔ y’ase wola. Nde ayowatsha oma lo dihɛnyɔki ndo oma l’awui wa ngala.”—OSAMBO 72:13, 14.

YESO AYONYA ASUI NDO NYƆI.

“Nde ayokitola asɔyi tshɛ oma lo washo awɔ, nyɔi hatoyala nto, otanda hatoyala nto, delo hatoyala nto, kaanga kandji hatoyala nto.”—ƐNYƐLƆ 21:4.

“TENA DIOLEKI TSHƐ EKIYANU”

“Andja wamboleka ndola l’ekiyanu, awui wa kɔlɔ, washa paa ndo nshi nyɛ paa yamboleka yeso tatɛnaka.”—Mohamed S. Younis, Gallup.

Lande na kamboleka fulanɛ ekiyanu? Bible mbishaka okadimwelo w’ohomba efula. Lo 2 Timɔte 3:1, sho mbadiaka ɔnɛ: “Lu nshi y’ekumelu [tena dioleki ekiyanu tshɛ ndo lofunge] diayuyala.” (Bible k’Ekila) Ɔkɔkɔ wɛnya Bible mbɔtɔnɛka la waonga wa kɔlɔ wakɛnɛmɔla anto. L’atei wa waonga akɔ mbele ndo lokaki, otako, lɔkɛwɔ la dungi pende lele l’ase ɛtɛmwɛlɔ, awui wa ngala, keema la ngandji ka lam’asa ase nkumbo ndo wanɛ wele bu la ndjakimɛ. (2 Timɔte 3:2-5) Nshi y’ekomelo yayokomɛ etena kayotatɛ Yeso Kristo nɔmbɔla nkɛtɛ k’otondo oko owandji wa Diolelo diaki Nzambi, mbuta ate lowandji la l’olongo.—Danyɛlɛ 2:44.