ETENYI 4

Oma le nkumekanga ka ntondo k’Isariyɛlɛ polo ndo lo lɔhɔmbɔ la Babilɔna

Saulo mbakonge nkumekanga ka ntondo k’Isariyɛlɛ. Koko Jehowa akayowonya, ko nde ndjɔsɔna Davidi oko nkumekanga lo dihole diande. Tayeya akambo efula w’endana la Davidi. Lâsɔ ko eke dikɛnda, nde akalɛmbia dihangamende diakawelɛka ɔnɛ Ngɔliyatɛ. L’ɔkɔngɔ, nde akayolawɔka kandjema ka Nkumekanga Saulo. Lushi lɔmɔtshi, Abingayɛlɛ, ɛmɛnamɛna ka omoto, akôshimbe di’aha nde sala dikambo di’enginya.

Malasɔ, tayeya awui efula w’endana la ɔn’aki Davidi la pami lakawelɛka Sɔlɔmɔna, ɔnɛ lakayonga nkumekanga k’Isariyɛlɛ lo dihole dia Davidi. Nkumekanga shato ya ntondo l’Isariyɛlɛ wakôlɛ onto l’onto ɛnɔnyi 40. L’ɔkɔngɔ a nyɔi ka Sɔlɔmɔna, Isariyɛlɛ akakahanyema lo waolelo ahende; diolelo dia ngɛl’a kushi la diolelo dia diko dia kushi.

Diolelo dia ngɛl’a kushi, diaki la waoho 10, diakayolanyema oma le Ase Asuriya l’ɔkɔngɔ w’ɛnɔnyi 257. L’ɔkɔngɔ w’ɛnɔnyi 133 mbakayolanyemaka ndo diolelo dia diko dia kushi diaki la waoho ahende. L’etena kɛsɔ mbakandama Isariyɛlɛ lo lɔhɔmbɔ otsha la Babilɔna. Ɔnkɔnɛ, akambo tshɛ wɔkɔndwami l’Etenyi ka NƐI kɛnɛ, wakasalema l’edja k’ɛnɔnyi 510.