Tshapita 3

Ɔnɔngɔsɔdi wa mboka ambotɔ

ELISABƐTƐ aya suke la mbota. L’edja ka ngɔndɔ shato nyɛ yetshi, Mariya akatshikala kâmɛ la nde. Koko kakianɛ, etena kambokoka dia Mariya ndakana la wɔ ko mbɔsa lɔkɛndɔ dia kalola oya lakawɔ la Nazarɛta. L’ɔkɔngɔ wa ngɔndɔ oko shamalo, ndo nde lawɔ ayoyota ɔna.

Kem’edja l’ɔkɔngɔ wa Mariya kalola, Elisabɛtɛ ambota ɔna. Ande ɔngɛnɔngɛnɔ wele l’anto tshɛ dia mɛna ɔnɛ diwotshi diakayala dimɛna ndo Elisabɛtɛ kâmɛ l’ɔnande wekɔ l’alemba a wolo lee! Elisabɛtɛ ekɔ lo mɛnyanya ɔnande le asukanyi ande la le ewotɔ ande, vɔ tshɛ wekɔ lo ngɛnangɛna kâmɛ la nde.

Lo ndjela ɛlɛmbɛ wa Nzambi, ɔna pami la l’Isariyɛlɛ pombaka mbahema ohekele lushi l’enanɛi l’ɔkɔngɔ w’eotwelo kande. L’etena kɛsɔ, angɛnyi l’ase nkumbo wamboya dia ndjowaenda. Vɔ wekɔ lo mbuta vate ɔna pombaka mbɔlamɛ lokombo la She: Zɛkariya. Koko Elisabɛtɛ halange. Nde ate: “Kema; wawole vati: Joani.” Ohɔ dia, ɔsɔ kaki lokombo lakate ondjelo Ngabiriyɛlɛ dia vɔ mbɔlɛ ɔna.

Koko angɛnyi ande hawetawɔ kɛnɛ katande, vɔ wekɔ lo mbuta vate: “Nduku untu lu khumbu kaye lakawole lukumbu loso.” Dia vɔ pembola dikambo, vɔ wambɛnya she tolembetelo l’anya dia mombola lokombo lalangande vɔ mbɔlɛ ɔna. Zɛkariya ambɔlɔmba dibaya dia funda ko ambofunda ate: “Lukumbu landi Joani.” Ko anto tshɛ wambamba woho w’anyanya.

Ko wonya akɔ, lolemi la Zɛkariya lambokelekɔ lo dihindo. Ohɔ dia nde akayala lumi lam’akinde kombetawɔ dui di’ondjelo di’ɔnɛ Elisabɛtɛ ayota ɔna. Etena kambomɛ Zɛkariya ntɛkɛta, anto tshɛ wele suke lande wambamba woho w’anyanya, wayambola vate: “Ukundi ayuyala ona oso na?”

Kakianɛ, Zɛkariya ambolola la nyuma k’ekila ndo l’ɔngɛnɔngɛnɔ ko ambotatɛ mbuta ate: “Wanduli [Jehowa Nzambi ka, NW] Isariyele, ne dia ndi akakendela antu, akâtshela etshungwelu. Ndi akatutundjiya [loseke la panda, NW] lu khumbu k’ukambi andi Davidi.” “Loseke la panda” lɔsɔ ekɔ mɛtɛ Nkumadiɔndjɔ Yeso, ɔnɛ laya suke la mbotɔ. Zɛkariya ate: oma lo tshimbo yande, Nzambi ‘ayototshungola oma l’anya w’atunyi aso ko ayotosha diɛsɛ dia sho mbokambɛ olimu w’ekila aha la wɔma, la kɔlamelo ndo la losembwe lo nshi yaso tshɛ.’

Oma lâsɔ, Zɛkariya ambota akambo wahataye lo lokombo l’ɔnande Joani ate: “Ee, ndu we ona, wayuketa vati: Umvutshi a Khum’Ulungu, ne dia we ayutsho la ntundu ka [Jehowa] dia nongosola mbuka yandi; dia ndakanya wudja andi dikambu dia panda. Dia mbadimanyia kolo yawo. Ne dia ketshi ka mamba ka [Nzambi kaso, NW], okone sasi dia pindju diayutokendela uma l’ulungu. Dia mpetela wane wudjashi lu udjima la lu didjidji dia nyoi; dia nombola ekulu asu lu mbuka ka ki.”

L’etena kakɔ, Mariya, ɔnɛ lele atatshukama mɛtɛ, amboshila koma lakawɔ la Nazarɛta. Kakɔna kayowokomɛ lam’ayɛnama diemi diande lo sɛkɛ na? Luka 1:56-80; Akambu w’Asi Lewi 12:2, 3.

▪ Joani mbolɛ Yeso ngɔndɔ ngana?

▪ Akambo akɔna wambotomba lam’ambokotsha Joani nshi enanɛi l’ɔkɔngɔ w’eotwelo kande?

▪ Woho akɔna wambokotola Nzambi yambalo yande oya le anto ande na?

▪ Lo ndjela pɔlɔfɛsi, olimu akɔna wahomba Joani sala na?