Tshapita 6

Ɔna la daka

LO DIHOLE dia vɔ kalola la Nazarɛta, Yɔsɛfu nde la Mariya wambotshikala la Bɛtɛlɛhɛma. Lam’akakotsha Yeso nshi enanɛi, vɔ wakawahemia ohekele lo ndjela Ɛlɛmbɛ wa Nzambi wakandasha Mɔsɛ. Aha la tamu, lo ndjela etshelo ka lo nshi shɔ, lushi lakɔ lɔsɔ l’enanɛi mbakawahombaka mbɔlɛ ɔna lokombo. Ɔnkɔnɛ, vɔ wambɔlɛ ɔnawɔ vate: Yeso, lo ndjela dui diakatatshi ondjelo Ngabiriyɛlɛ.

L’ɔkɔngɔ a ngɔndɔ ɔtɔi la nshi mɔtshi, Yeso ambokotsha nshi 40. Otsha lende ambotshɔ ambutshi ande vɔ la nde l’etena kɛnɛ na? Otsha lo tɛmpɛlɔ ka la Jerusalɛma, tɛmpɛlɔ kakɔ mangana la dihole diodjashiwɔ kilɔmɛtɛlɛ mɔtshi. Lo ndjela Ɛlɛmbɛ wa Nzambi wakandasha Mɔsɛ, nshi 40 l’ɔkɔngɔ wa nde mbota ɔna pami, ombutshi wa omoto pombaka ntshɔ otsha lo tɛmpɛlɔ dia tolambola olambo wa ndjaɛdia.

Kɛsɔ kambosala Mariya. Nde ambɔtɔla tofudu tohende ta totshitshɛ oko olambo ande. Dikambo sɔ mɛnyaka ekondjelo kaki Yɔsɛfu nde la Mariya. Ɛlɛmbɛ wa Mɔsɛ mbutaka dia ɔsɔngɔ w’ɔkɔkɔ woleki tofudu oshinga wolo mbahomba nambwama. Ko naka ombutshi wa omoto kema l’akoka wa kondja diangɔ sɔ, kete nde kokaka nambola benga pende kana tokudumba tohende.

Lo tɛmpɛlɔ, ekumanyi kɛmɔtshi amɛmba Yeso l’anya ande. Ekumanyi kakɔ lokombo lande Simɛyɔna. Nzambi akawɛnya ɔnɛ: wɛ hatovɔ tshikima wɛ ambɛna Kristo kakalakema oma le Jehowa, mbuta ate Mɛsiya. Lam’oye Simɛyɔna oya lo tɛmpɛlɔ lushi l’ɛlɔ, nyuma k’ekila kambɔlɔmbɔla otsha le ɔna lɛmbi Yɔsɛfu la Mariya.

Simɛyɔna ambɛmba Yeso l’anya ko osha Nzambi losaka, ata ate: “Khumadiondjo, etawo ukambi aye atshu kakiane la ki, uku diui diaye, ne dia ashu ami wambena panda kaye kakayalongosola lu ashu wa wedja tshe, usasi wa mpetela asi wedja, lu lutumbu la wudja aye Isariyele.”

Yɔsɛfu la Mariya wamamba lam’okiwɔ ɛtɛkɛta ande. Oma lâsɔ, Simɛyɔna ambâtshɔkɔla ndo ambotɛ Mariya ɔnɛ ɔnande “ambutumama ne dia ekwelo la etwelu k’antu efula lu Isariyele” ndo lonyangu lele oko yɔmbɔ ya pɛmɔ layotondola anima wa Mariya.

Ndo omvutshi ɔmɔtshi wa omoto wele l’ɛnɔnyi 84 welɛwɔ Ana mbele lâwɔ l’etena kɛnɛ. Ndoko lushi lakandetsha lo tɛmpɛlɔ. Wonya akɔ, nde ambosukana suke suke ko ambotatɛ mboka Nzambi losaka ndo la nsanya akambo wa Yeso le onto tshɛ lalanga nongamɛ.

Ande ɔngɛnɔngɛnɔ waki la Yɔsɛfu nde la Mariya lo mɛna akambo asɔ wakatombe lo tɛmpɛlɔ lee! Mɛtɛ, akambo asɔ tshɛ shikikɛka ɔnɛ ɔn’ɔsɔ mbele Ɔnɛ Lakalakema oma le Nzambi. Luka 2:21-38; Akambu w’Asi Lewi 12:1-8.

▪ Lo ndjela etshelo k’Ase Isariyɛlɛ, l’etena kakɔna mɛtɛ kakawahombaka mbɔlɛ ɔna pami lokombo?

▪ Kakɔna kakalɔmbamaka le ambutshi wa amato wa l’Isariyɛlɛ l’ɔkɔngɔ w’ɔnande la pami kotsha nshi 40, ndo woho akɔna wakɛnama ekondjelo kaki Mariya lam’akandakotsha didjango sɔ na?

▪ L’etena kɛsɔ, wa na wakeye Yeso ndo woho akɔna wakawaweye na?