TSHAPITA 26

Lande Na Ekɔ Wolo Sala Kɛnɛ Kele Ɔlɔlɔ?

ETENA kakasalaka Paulo awui wa kɔlɔ, onto akɔna akangɛnangɛnaka?. . . Satana Diabolo mbakangɛnangɛnaka. Ewandji w’ɛtɛmwɛlɔ w’ase Juda wakangɛnangɛnaka vɔ lawɔ. Oma lâsɔ, lam’akakome Saulo ombeki waki Ombetsha a Woke ndo etena kakandayelamɛka Paulo, ewandji w’ɛtɛmwɛlɔ ɛsɔ wakatatɛ mbôhetsha. Onde wɛ koka mboka lande na kele ekɔ wolo le ombeki waki Yeso dia sala kɛnɛ kele ɔlɔlɔ?. . .

Mbala kɛmɔtshi, ɔlɔmbɛdi wa lâdiko Ananiya akatɛ anto dia vɔ kɔmɔla Paulo l’elungi. Ananiya akone ndo dia mbidja Paulo lo lokanu. Paulo akasowe efula lam’akandakome ombeki waki Yeso. Ɛnyɛlɔ, anto wa kɔlɔ wakakɔmɔla Paulo ndo wakone dia mbôdiaka l’ave wa weke.​—⁠Etsha 23:​1, 2; 2 Koreto 11:​24, 25.

Anto efula wayototshutshuya dia sala awui wahangɛnyangɛnya Nzambi. Lâsɔ yambola ɔnɛ: Polo lo yɛdikɔ yakɔna yalangami kɛnɛ kele ɔlɔlɔ na? Onde wɛ ekɔ la ngandji k’efula k’awui w’ɔlɔlɔ woho ɔnɛ wele wɛ ayowasala oyadi anto akina kokohetshaka l’ɔtɛ w’awui akɔ? Dui sɔ nɔmbaka dia monga la dihonga, shi mɛtɛ?. . .

Wɛ mbeyaka mimbola ɔnɛ: ‘Lande na katohetsha anto l’ɔtɛ wasalaso kɛnɛ kele ɔlɔlɔ? Shi vɔ wotohomba ngɛnangɛna dikambo sɔ?’ Kema kɔlɔ wɛ ndjaoka wombola ɔsɔ. Mbala efula anto wakalangaka Yeso l’ɔtɛ w’awui w’ɔlɔlɔ wakandasalaka. Mbala kɛmɔtshi, anto tshɛ wa l’osomba wakatshumana lo soko dia luudu lɔmɔtshi lakadjasɛka Yeso. Vɔ wakaye le Yeso nɛ dia nde akakɔnɔlaka ase hemɔ.​—⁠Mako 1:⁠33.

Koko tena dimɔtshi anto konangaka kɛnɛ kaketshaka Yeso. Kânga mbele nde aketshaka paka kɛnɛ kele ɔlɔlɔ, anto amɔtshi wakôhetsha efula nɛ dia nde akatɛkɛtaka awui wa mɛtɛ. Dui sɔ diakatombe lushi lɔmɔtshi la Nazarɛta, osomba wakole Yeso. Nde akatshu otsha lo shinangɔnga, lɛnɛ aki dihole diakasanganaka ase Juda dia tɛmɔla Nzambi.

Lɛkɔ, Yeso akasha dako dia dimɛna efula di’oma l’Afundelo. L’etatelo, anto wakalange dako sɔ. Vɔ wakambe lo mboka ɛtɛkɛta w’amɛna wakatombaka oma l’onyɔ waki Yeso. Aki wolo dia vɔ mbetawɔ dia dikɛnda dia pami diakole l’osomba awɔ mbakatondjaka ɛtɛkɛta wa ngasɔ.

Koko oma lâsɔ, Yeso akate dikambo dikina. Nde akatɛkɛta dikambo dia tena diaketawɔ Nzambi anto waki komonga ase Juda lo yoho ya lânde. Lam’akate Yeso dikambo sɔ, anto waki lo shinangɔnga wakomala. Onde wɛ mbeyaka lande na?. . . Vɔ wakomala nɛ dia vɔ wakafɔnyaka ɔnɛ vɔamɛ ato mbaketawɔmaka le Nzambi lo yoho ya lânde. Vɔ wakafɔnyaka dia vɔ ndeka anto akina. Ɔnkɔnɛ, vɔ wakahetsha Yeso l’ɔtɛ wa kɛnɛ kakandate kɛsɔ. Onde wɛ mbeyaka kɛnɛ kakawayange salɛ Yeso?. . .

Bible mbutaka ɔnɛ: ‘Vɔ wakande Yeso ndo wakôsokola otsha l’andja w’osomba. Vɔ wakɔtɔlɛ lo shɔdi ya dikona dimɔtshi dia mbôka lo lowenga dia mbôdiaka. Koko Yeso akalawɔ.’​—⁠Luka 4:​16-30.

Otondonga wɛ mbakawasalɛ ngasɔ, onde wɛ otokoka kawola lushi lokina nto dia totɛ anto asɔ awui wendana la Nzambi?. . . Dikambo sɔ akalɔmbaka dia monga la dihonga, shi mɛtɛ?. . . Koko oko ɔnɔnyi ɔtɔi l’ɔkɔngɔ wa lâsɔ, Yeso akakawola nto otsha la Nazarɛta. Bible mbutaka ɔnɛ: ‘Nde akatatɛ mbaetsha lo shinangɔnga kawɔ.’ Yeso kotshika dia tɛkɛta akambo wa mɛtɛ l’ɔtɛ wa wɔma w’anto waki komonga la ngandji otsha le Nzambi.​—⁠Mateu 13:⁠54.

Lushi lokina, lushi la sabato, Yeso aki lo dihole diaki pami kɛmɔtshi kaki la lonya lambôma. Yeso aki la wolo w’oma le Nzambi wa kɔnɔla pami kɛsɔ. Koko apami amɔtshi waki lâwɔ wakonaka dia mbisha Yeso onongo. Kakɔna kakahombe sala Ombetsha a Woke na?. . . Ntondo nde akambola ate: ‘Naka ɔkɔkɔ ayɛ ɔmɔtshi ambɔkɔ lo difuku lushi la Sabato, onde wɛ ayowotondja?’

Eelo, vɔ wototondja ɔkɔkɔ ɔsɔ, oyadi lushi la Sabato, lakawɔsaka ɔnɛ lushi la mumuya. Ɔnkɔnɛ Yeso akate ate: ‘Ekɔ dimɛna efula kimanyiya onto lushi la Sabato nɛ dia onto ndeka ɔkɔkɔ nɛmɔ!’ Akokɛma hwe mɛtɛ dia Yeso akahombe kimanyiya pami kɛsɔ lo kɔnɔla hemɔ kande!

Yeso akatɛ pami kɛsɔ dia nde sembola lonya lande. Lonya lakɔ lakakɔnɔ ko wonya akɔ wâmɛ. Pami kɛsɔ akonge mɛtɛ l’ɔngɛnɔngɛnɔ efula! Ko kakɔna kakasale apami akina asɔ na? Onde vɔ wakangɛnangɛna?. . . Kema. Vɔ wakaleke mpetsha Yeso. Vɔ wakatshu ndo wakadje sheke dia mbôdiaka.​—⁠Mateu 12:​9-14.

Ngasɔ mbediɔ ndo ɛlɔ kɛnɛ. Oyadi kakɔna kayotosala, hatokokaki ngɛnyangɛnya oseka onto tshɛ. Lâsɔ sho pombaka menda onto akɔna mɛtɛ alangaso ngɛnyangɛnya. Naka sho nangaka ngɛnyangɛnya Jehowa Nzambi nde l’Ɔnande Yeso Kristo, kete sho pombaka salaka nshi tshɛ kɛnɛ katetshawɔ. Ko naka sho sala ngasɔ, onto akɔna ayotohetsha na? Onto akɔna ayotodjɛka wekamu dia sho sala kɛnɛ kele ɔlɔlɔ na?. . .

Satana Diabolo mbayosala dikambo sɔ. Ko naa anto akina wayotodjɛ wekamu?. . . Anto akɔ ko wanɛ wambokesama oma le Diabolo dia mbetawɔ awui wa kɔlɔ. Yeso akatɛ ewandji w’ɛtɛmwɛlɔ wa lo nshi yande ate: “Ana wa uhimbanyi shenyu mbenyu. Nyu nangaka ntsha uku shenyu.”​—⁠Joani 8:⁠44.

Ekɔ anto efula wele Diabolo mbalangaka. Yeso mbaetaka ate ‘andja.’ Oko le yɛ, Yeso akatɛkɛta dikambo di’‘andja’ akɔna?. . . Ɛsɔ tofole lo Joani tshapita 15 divɛsa 19 kele tende. Lo divɛsa sɔ sho mbadiaka ɛtɛkɛta waki Yeso wata ɔnɛ: ‘Otondonga nyekɔ anto wa l’andja ɔnɛ, tshike anto wa l’andja ɔnɛ wotonyolanga. Koko lam’ele nyu kema anto wa l’andja ɔnɛ, diakɔ dianyohetsha anto wa l’andja ɔnɛ.’

Ɔnkɔnɛ, andja wahetsha ambeki waki Yeso kɛdikɛdi anto tshɛ wele bu ambeki ande. Lande na kahetsha ase andja ɔnɛ ambeki waki Yeso?. . . Ohokanyiya dikambo sɔ. Ele omboledi w’andja ɔnɛ na?. . . Bible mbutaka ɔnɛ: ‘Andja w’otondo wekɔ lo wolo wa kanga kɔlɔ.’ Satana Diabolo mbele kanga kɔlɔ ɔsɔ.​—⁠1 Joani 5:19.

Shi wɛ ambɛna kakianɛ lande na kele ekɔ wolo efula sala kɛnɛ kele ɔlɔlɔ?. . . Satana nde l’andja ande todjɛka wekamu. Koko ekɔ ɔkɔkɔ okina wetsha wolo sala kɛnɛ kele ɔlɔlɔ. Onde wɛ mbohɔka ɔkɔkɔ akɔ?. . . Lo Tshapita 23 ya dibuku nɛ, takeke dia sho tshɛ takahowɔ pɛkato. Kema ayonga dimɛna efula lam’ayomɔ pɛkato, Diabolo ndo andja ɔnɛ lo pondjo?. . .

Bible ndakaka ɔnɛ: ‘Andja ɔnɛ wekɔ lo teete.’ Kɛsɔ nembetshiyaka di’anto tshɛ wele bu ambeki waki Ombetsha a Woke hawotonga nto pondjo. Vɔ hawotokoka sɛna pondjo pondjo. Onde wɛ mbeyaka anto wayɔsɛna pondjo pondjo?. . . Bible tetemalaka la mbuta ɔnɛ: ‘Ɔnɛ lasala lolango la Nzambi ayotshikala pondjo.’ (1 Joani 2:17) Eelo paka wanɛ wasala kɛnɛ kele ɔlɔlɔ, wasala ‘lolango la Nzambi,’ mbayɔsɛna pondjo pondjo l’andja w’oyoyo waki Nzambi. Ɔnkɔnɛ, oyadi ekɔ wolo sho sala kɛnɛ kele ɔlɔlɔ, sho nangaka sala dikambo sɔ, shi mɛtɛ?. . .

Tadia kâmɛ avɛsa anɛ wɛnya lande na kele bu wɔdu sala kɛnɛ kele ɔlɔlɔ: Mateu 7:​13, 14; Luka 13:​23, 24; ndo Etsha 14:​21, 22.

[Osato wa lo lɛkɛ 137]

Asui akɔna waki la Paulo lam’akandasale kɛnɛ kaki ɔlɔlɔ?

[Osato wa lo lɛkɛ 138]

Lande na kayanga anto anɛ dia ndjaka Yeso?

[Osato wa lo lɛkɛ 141]

Lam’ayeta andja ɔnɛ, kakɔna kayokomɛ wanɛ wasala kɛnɛ kele ɔlɔlɔ?