Onde wɛ ayosala lolango laki Jehowa?

Losaka lo woho wamboyatshungwɛ etena dia nsɛdingola awui wa lo biukubuku nyɛ l’oyango wa wɛ têya dimɛna, sho Ɛmɛnyi wa Jehowa, mbeya woho wakambema elimu aso ndo woho watakɛndakɛnda okongamelo aso. Tekɔ l’eshikikelo dia yɔ yambokokimanyiya dia wɛ têya oko anto wasala lolango laki Jehowa ɛlɔ kɛnɛ. Ɔnkɔnɛ, sho kokeketshaka dia wɛ ntetemala nkondja ewo kaki Nzambi ndo mbewoya ase nkumbo kayɛ ndo angɛnyi ayɛ awui wekayɛ ndo dia wɛ sanganaka kâmɛ la so mbala la mbala lo nsanganya yaso y’Akristo.​—Heberu 10:23-25.

Wɛ ayɛna dia lo yɛdikɔ yayoyoleka mbeka akambo wendana la Jehowa, mbayoyoleka mɛna ngandji k’efula kakokande. Dui sɔ diayokotshutshuya dia wɛ nsala kɛnɛ tshɛ kakokayɛ nsala dia wɛ lawɔ mbɛnya ngandji kawokayɛ. (1 Joani 4:8-10, 19) Ko ngande wakokayɛ mɛnya nsaki kɛsɔ lo lɔsɛnɔ layɛ la lushi la lushi? Lande na kele nkitanyiya atɔndɔ ande wendana la lɔkɛwɔ ekɔ yoho ya lɔsɛnɔ yoleki dimɛna le yɛ? Ndo kakɔna kayokokimanyiya dia wɛ nkombola dia nsala lolango laki Nzambi kâmɛ la so? Ombetsha ayɛ wa Bible ayɔngɛnangɛna dia nyanga kâmɛ la yɛ ekadimwelo wa ambola asɔ dia wɛ la nkumbo kayɛ ‘ntshikala lo ngandji ka Nzambi la elongamelo ka ndjokondja lɔsɛnɔ.’​—Jude 21.

Tambokɔlɔmba la wangasanu tshɛ dia wɛ ntetemala mpama lo mboka k’akambo wa mɛtɛ lo mbeka dibuku diayela nɛ . . . ‘Nyotshikale lo ngandji ka Nzambi’