Ele Yeso Kristo?

1. Ngande wakatatɛ lɔsɛnɔ laki Yeso?

Otshikitanyi l’anto akina, Yeso akasɛnaka l’olongo oko onto la lo nyuma la ntondo ka nde ndjotɔ lanɛ la nkɛtɛ. (Joani 8:23) Nde aki etongami ka ntondo kaki Nzambi ndo nde akasha lonya l’etongelo ka diangɔ dikina tshɛ. Nde ekɔ onto lâmɛ lakatongama oma le Jehowa ndamɛ. Diɔ diakɔ dielamɛnde ɔnɛ ‘Ɔna ɛtɔi’ laki Nzambi. (Joani 1:14) Yeso aki yɛmb’awui yaki Nzambi. Diɔ diakɔ dielamɛnde nto ɔnɛ ‘Dui.’​—Adia Tukedi 8:22, 23, 30; Kolosai 1:15, 16.

2. Lande na kakaye Yeso lanɛ la nkɛtɛ?

Nzambi akatome Ɔnande la nkɛtɛ lo nsangola lɔsɛnɔ lande oma l’olongo lo dikundju di’ɔna womoto l’emuma l’ose Juda lakawelɛka ɔnɛ Mariya. Ɔnkɔnɛ, Yeso komonga l’ombutshi wa pami w’onto. (Luka 1:​30-35) Yeso akaye la nkɛtɛ 1) dia ndjetsha anto akambo wa mɛtɛ wendana la Nzambi, 2) dia ndjototshikɛ ɛnyɛlɔ ka woho wa nsala lolango laki Nzambi kânga la ntondo k’ekakatanu, ndo 3) dia ndjokimɔ lɔsɛnɔ lande la kokele oko “oshinga w’etshungwelo.”​—Adia Mateu 20:28, NW.

3. Lande na keso l’ohomba w’oshinga w’etshungwelo?

Oshinga w’etshungwelo ekɔ kɛnɛ kakimɔma dia ntshungola onto oma lo nyɔi. (Etumbelu 21:29, 30) Nyɔi ndo lotshundu l’osombe komonga lo sangwelo diaki Nzambi dia l’etatelo diendana l’anto. Ngande weyaso dui sɔ? Nzambi akatɛ Adama, pami ka ntondo dia naka nde nsala kɛnɛ kelɛ Bible ɔnɛ “pɛkato,” kete nde ayovɔ. Oma lɔkɔ, otondonga Adama kosala pɛkato, tshike nde komvɔ. (Etatelu 2:16, 17; 5:5) Lo ndjela Bible, nyɔi ‘kakadiangana’ le anto tshɛ oma lo tshimbo yaki Adama. Ɔnkɔnɛ, Adama akasambiyɛ tokanula tande pɛkato la nyɔi. Diakɔ dieso l’ohomba w’oshinga w’etshungwelo dia sho ntshungɔ oma lo dilanya dia nyɔi kakatosambiyɛ Adama.​—Adia Romo 5:12; 6:23.

Onto akɔna akakoke mfuta oshinga w’etshungwelo dia totshungola oma lo nyɔi? Etena kavɔso, sho futaka paka oshinga wa pɛkato yaso hita. Onto tshɛ lele bu kokele hakoke ntshungola anto akina oma lo pɛkato yawɔ.​—Adia Osambu 49:7-9.

4. Lande na kakavu Yeso?

Otshikitanyi la so, Yeso aki onto la kokele. Ɔnkɔnɛ, Yeso kovɔ l’ɔtɛ wa pɛkato yande nɛ dia nde kosala pɛkato kânga ɔtɔi. Koko Yeso akavu dikambo dia pɛkato y’anto akina. Nzambi akɛnya ngandji k’otamanya kokande anto lo ntoma Ɔnande dia nde ndjotovwɛ. Ndo nto, Yeso akɛnya ngandji katokande lo nkitanyiya She ndo lo nkimɔ lɔsɛnɔ lande dikambo dia pɛkato yaso.​—Adia Joani 3:16; Romo 5:18, 19.

5. Kakɔna kasala Yeso etena kɛnɛ?

Etena kaki Yeso la nkɛtɛ, nde akakɔnɔla ase hemɔ, akolola edo, ndo akakimanyiya anto waki lo wâle. Lo nsala ngasɔ, nde akɛnya kɛnɛ kayondoyosalɛ anto wele l’okitanyiya. (Mateu 15:30, 31; Joani 5:28) L’ɔkɔngɔ wa Yeso mvɔ, Nzambi akawolola oko onto la lo nyuma. (1 Petero 3:18) Oma lâsɔ, Yeso akadjasɛ lo lonya l’omi laki Nzambi akongɛ etena kakahombe Jehowa mbosha wolo wa nde nɔmbɔla nkɛtɛ k’otondo oko Nkumekanga. (Heberu 10:12, 13) Kakianɛ, Yeso ekɔ lo nɔmbɔla oko Nkumekanga l’olongo ndo ambeki ande wekɔ lo mbewoya lokumu l’ɔlɔlɔ l’andja w’otondo.​—Adia Danyele 7:13, 14; Mateu 24:14.

Kem’edja, Yeso ayokamba la lowandji lande oko Nkumekanga dia minya asui tshɛ ndo wanɛ wasala di’asui asɔ monga. Wanɛ tshɛ wɛnya mbetawɔ kawɔ le Yeso lo mbôkitanyiya wayokondja lɔsɛnɔ lo paradiso ka la nkɛtɛ.​—Adia Osambu 37:9-11.