WEKELO 58
Jɛrusalɛma yambolanyema
Mbala la mbala, ase Juda wakokaka Jehowa ɔkɔngɔ ndo wakatɛmɔlaka tozambizambi ta kashi. L’edja k’ɛnɔnyi efula, Jehowa akatetemala nsala la wolo dia mbakimanyiya. Nde akatome amvutshi efula dia towaewola, koko vɔ kompokamɛ. Lo dihole dia mpokamɛ, vɔ wakɔlaka amvutshi. Ngande wakakomiya Jehowa ɔtɛmwɛlɔ awɔ wa dikishi?
Nɛbukadinɛza nkumekanga ka Babilɔna akatalɛndjaka wodja ɔtɔi lo ɔtɔi. Ntondo, nde akalɛndja Jɛrusalɛma akande nkumekanga Jɛhɔyakina, ɛlɔhɛ, andɔshi w’ata ndo etshudi ko akawatɔlɛ vɔ tshɛ la Babilɔna. Ndo nto, nde akɔshi diangɔ dia nɛmɔ tshɛ di’oma lo tɛmpɛlɔ ka Jehowa. Oma laasɔ, Nɛbukadinɛza akadje Zɛdɛkiya nkumekanga ka Juda.
L’etatelo, Zɛdɛkiya akakitanyiyaka Nɛbukadinɛza. Koko wedja waki suke la wɔ ndo amvutshi wa kashi wakatɛ Zɛdɛkiya dia nde tɔmbɔkwɛ Babilɔna. Jɛrɛmiya akɔɔhɛmɔla ate: ‘Naka wɛ ntɔmbɔkɔ kete diakatanelo, ndjala, ndo hemɔ yayonga lo Juda.’
L’ɔkɔngɔ wa Zɛdɛkiya nɔmbɔla l’edja k’ɛnɔnyi enanɛi, nde akɔshi yɛdikɔ ya tɔmbɔkwɛ Babilɔna. Nde akalɔmbɛ asɔlayi w’ase Edjibito dia mbokimanyiya. Oma laasɔ, Nɛbukadinɛza akatome asɔlayi ande dia tɔlɔsha Jɛrusalɛma ndo vɔ wakadinge osomba. Jɛrɛmiya akatɛ Zɛdɛkiya ate: ‘Jehowa ate naka wɛ ndjakimɔ le ase Babilɔna kete wɛ ndo osomba nyayoshimbamɛ. Ko naka bu, kete ase Babilɔna wayotshumba Jɛrusalɛma ndo wayokɔsa dia monga ose lokanu.’ Zɛdɛkiya akate ate: ‘Hantoyakimɔ le wɔ!’
L’ɔkɔngɔ w’ɔnɔnyi ɔtɔi l’etenyi, asɔlayi w’ase Babilɔna wakole mpele dia Jɛrusalɛma ndo wakatshumbe osomba. Vɔ wakatshumbe tɛmpɛlɔ, wakadiake anto efula ndo wakatshu la nunu di’anto oko ase lokanu.
Zɛdɛkiya akalawɔ oma la Jɛrusalɛma, koko ase Babilɔna wakatawotshanyaka. Vɔ wakawonde suke la Jeriko ndo wakɔtɔlɛ le Nɛbukadinɛza. Nkumekanga ka Babilɔna akasale dia Zɛdɛkiya menda woho wakawadiakaka anande hita. Oma laasɔ, Nɛbukadinɛza akole Zɛdɛkiya washo ndo akawodje lo lokanu lɛnɛ akandatovɔka. Koko Jehowa akalake ase Juda ɔnɛ: ‘L’ɔkɔngɔ w’ɛnɔnyi 70, dimi layonyokaloya lakanyu la Jɛrusalɛma.’
Kakɔna kakahombe komɛ ɛlɔngɔlɔngɔ wakatɔlama oko ase lokanu la Babilɔna? Onde vɔ wakakoke ntshikala la kɔlamelo le Jehowa?
“Jehowa Nzambi Kanga-Wolo-Tshɛ, dombo diayɛ diekɔ mɛtɛ ndo losembwe.”—Ɛnyɛlɔ 16:7