Dikoka dia Tonga: Losha l’Oma le Nzambi
JEHOWA ngɛnangɛnaka l’elimu ande w’etongelo. (Osambu 104:31) Dikuma di’ɔngɛnɔngɛnɔ ande w’etongelo diekɔ lo mɛnyama lo Etatelo 1:31, (NW): “Nzambi akende kɛnɛ tshɛ kakandatonge, ko akɛnyi dia tɔ kaki ɔlɔlɔ efula.”
Jehowa kondjalamɛ ɔngɛnɔngɛnɔ akɔ ɔsɔ ndamɛ oto. Nde akasha Yeso diɛsɛ dia ndjâla okambi, kana ehomɔ kakatongama diangɔ dikina tshɛ oma lo tshimbo yande. (Joani 1:3; Kolosai 1:16, 17) Oko wakinde “ukambi wa komba,” Yeso aki nto ‘l’ɔngɛnɔngɛnɔ la ntondo ka Jehowa wenya tshɛ.’—Tukedi 8:30, 31.
Koko aha paka l’olongo oto mbele ditongami diele l’akoka wa tonga ɛngɔ kɛmɔtshi. Eugene Raudsepp akafunde lo dibuku diande How Creative Are You? ate: “Dikoka dia tonga diekɔ le anto tshɛ.” Dikambo sɔ kotomba lo patshikwi, nɛ dia onto akatongama l’efanelo ka Nzambi. (Etatelo 1:26) Mɛtɛ, Jehowa akasha anto akoka wa tonga wayowangɛnyangɛnyaka.—Jakoba 1:17.
Ɔnkɔnɛ, hatokoke mamba dia Bible mbɔsaka elimu ɛmɔtshi la nɛmɔ oko: wembelo wa nkembo, ɔnwɛlɔ a wɛnyɛ, ɔtɛlɛlɔ kana wɛlɛlɔ, okatelo wa diangɔ, elimu w’anya ndo elimu ekina wa wa lotshula. (Etombelo 35:25, 26; 1 Samuele 8:13; 18:6, 7; 2 Ekondo 2:13, 14) Bɛzalɛlɛ, ombeyi w’olimu ɔmɔtshi w’anya akakambe la yewo yande lo “sangweyu” dia wokelo wa tabɛrnakɛlɛ. (Etombelo 31:3, 4) Ondo Jabala, olami w’ɛkɔkɔ, mbakahɔhɔla wokelo wa luudu la dipɛma, ɛngɔ k’ohomba kosalemi la weolo wa mamba lo dikambo dia lɔsɛnɔ l’anto wahashikikala la ngelo. (Etatelo 4:20) Davidi kondjala paka omembi w’esambu oto l’opomi a mishiki, koko nde aki ndo ɔsɛdi wa dihomahoma di’eyoyo. (2 Ekondo 7:6; Osambu 7:17; Amose 6:5) Ondo Miriyama mbakatondja nɔshi diakanɔka ase Isariyɛlɛ dia ngɛnangɛna woho wakawatshungwama oma lo dihindo diakasalema lam’akawatenyanya Ndjale ka Beela.—Etombelo 15:20.
Mbala efula, dikoka dia tonga diekɔ dikambo di’ohomba diakimanyiya ɔtɛmwɛlɔ wa mɛtɛ woho wa vɔ pama. Yeso otongitongi, akayakimanyiyaka la wɛla ndo la diɛnyɛlɔ diasungana dia nde mbewoya losango lande. Ambeki ande wakatshutshuyama vɔ lawɔ lo “ulimu wa nsambisha ndu wa mbetsha.” (1 Timote 5:17) Eelo, olimu awɔ w’esambishelo kema olimu a lohowɔ. Ekɔ lotumu lahika dia monga la diewo dia ndakanya ana. (Kolosai 4:6) Dikambo sɔ diekɔ ohomba efula lam’etshaso an’aso.—Ehwelo k’Elembe 6:6, 7; Efeso 6:4.
Ɔnkɔnɛ, Jehowa kahanaka l’anto akina ɔngɛnɔngɛnɔ wakondjande lam’atongande. Ande losha la lokaho lee!
Kânga l’atei w’andja ɔnɛ wambofukutana, wɛ kokaka monga l’ɔngɛnɔngɛnɔ oma l’ewo k’oshika ka Bible k’endana la Nzambi, la Diolelo diande, ndo la sangwelo diande di’ɔlɔlɔ diakandasangoya dikambo di’anto. Naka wɛ nangaka mbeya awui akina wa lâdiko kana onto ɔmɔtshi ndja dia ndjokêtsha Bible lakayɛ aha la kɔlɔmba falanga, fundɛ Associationa “Les Témoins de Jéhovah” mukanda lo dihole diɛnayɛ ɔlɔlɔ lo lɛkɛ 2.
[Caption on page 32]
[Box on page 32]
Onde Wɛ Nangaka Onto Ndja dia Ndjokenda Oka?