Ɛkɔndɔ W’apandjudi a Diolelo

Okomelo Aso lo Tongelongelo ta lo Groeland Tanganyi Etale

L’EDJA k’akumi w’ɛnɔnyi efula, Ɛmɛnyi wa Jehowa wekɔ lo kamba la periodikɛ yelɛwɔ ɔnɛ Tshoto y’Etangelo la Réveillez-vous! l’olimu w’esambishelo ka lokumu l’ɔlɔlɔ. Tojurunalɛ tɔsɔ tekɔ lo tombola lomba laki Jehowa oko wɛnyamilɔ l’atei a Bible, Dui diande. Tɔ mendaka woho wasalema akambo wa l’andja ɔnɛ wɔtɔnɛ la pɔlɔfɛsi ya lo Bible, ndo tɔ kambaka l’alako w’amɛna wa lo Bible dia kandola ekakatanu wa lo nshi yaso nyɛ.​—⁠Jakoba 3:⁠17.

L’ɔnɔnyi wa 1994, Ɛmɛnyi wa Jehowa wa lo wodja wa Groeland wakadje weolo wa lânde dia kaha Tshoto y’Etangelo la Réveillez-vous! le efula k’anto wakawakoke mbisha. Lo nshi y’ɔwɔ, vɔ wakɔshi tɛdikɔ tɔmɔtshi dia ntshɔ lo tongelongelo tɔmɔtshi ta lo wodja wa Groeland toleki mangana etale. Olui ɔmɔtshi w’apandjudi wa Diolelo wakɔtɔ lo masuwa, ko wakasale lɔkɛndɔ loleki kilɔmɛtɛlɛ 4 000 oma l’ɔkɛngɛ wa ndjale wa l’edjelo ka wonya polo ndo la Qaanaaq (Thule), wakakome lo tongelongelo tɔmɔtshi tele lo kioma ya kɛtɛ lo lɛkɛ la ngɛl’a kushi. Vɔ wakasale lɔkɛndɔ la mingu esambele. L’ɔkɛngɛ wa ndjale wa l’ehotwelo ka wonya, atshukani amɔtshi waki Ɛmɛnyi wa Jehowa wakakome lo ngielongelo mɔtshi lo Ittoqqortoormiit ko vɔ wakakindjakindja ngielongelo shɔ tshɛ mbala ka ntondo la lokumu l’ɔlɔlɔ.

L’etatelo k’ɔnɔnyi ɔsɔ, lo ngɔndɔ ka Mɔmbi, kɔpi 7 513 ya Tshoto y’Etangelo la Réveillez-vous! yakakahema le anto wa lo wodja wa Groeland. Kɛdikɛdi, lo yɛdikɔ ya l’atei atei, ɔm’ɔmɔ a l’atei w’apandjudi wa Diolelo 127 akakahe periodikɛ 59. Periodikɛ yakalongola anto aki oko yɛdikɔ ya periodikɛ ɔtɔi le anto esambele. Lo ngɔndɔ kɛsɔ, Réveillez-vous! akatondja ɛnɔngɔ w’asawo waki l’ɔtɛ a dui wa lo lohoso ɔnɛ: “Cancer du sein: Hantise de toutes les femmes.” Ɔmɛnyi wa Jehowa ɔmɔtshi, lakakahe periodikɛ 140, akatshikɛ omvutshi ɔmɔtshi wa sango ya lo televiziɔ kɔpi mɔtshi ya Réveillez-vous! ɔsɔ. L’ɔkɔngɔ wa nshi mɔtshi tsho, ekongelo k’oyoyo k’emisiɔ wa lo televiziɔ kakatondja asawo w’endana la kansɛrɛ ka lo diwɛlɛ. Omvutshi wa sango akɛnya periodikɛ kɛsɔ lo televiziɔ, akɛnya akatshi efula lam’akandândolaka ekadimwelo k’ɔlɔlɔ kakasalema l’ɔtɛkɛta w’Ase Groeland. Nde akake epole ɔsɛkɛ nto lo alako wasungana wakashama lo Réveillez-vous! akɔ dia kimanyiya anto woho wa vɔ ndjakokɛ dia mbewɔ hemɔ kɛsɔ.

Wakelɛ Ɔmɛnyi wa Jehowa wakasha omvutshi a sango periodikɛ ntondo ko wakawombola wembola ɛmɔtshi lo emisiɔ akɔ wâmɛ wa lo televiziɔ. Nde akakadimola wembola efula w’endana l’Ɛmɛnyi wa Jehowa ndo nde akatɛkɛta kɛnɛ k’endana l’odianganyelo w’efula wa periodikɛ lo ngɔndɔ kɛsɔ. Nde akalembetshiya akambo amɔtshi lo kɛnɛ k’endana la lomba l’oshika lele lo Bible ndo akashikikɛ ɔnɛ alako wa ngasɔ w’eshika kokaka tokimanyiya dia sho nɛmbia ekakatanu wa nshi nyɛ.

Emisiɔ wakakomɛ lam’akawambola ɔnɔmbɔdi wa omoto wa Tshunda dia lo Wodja wa Groeland di’Endana la Hemɔ ka Kansɛrɛ wembola ɛmɔtshi. Nde akashikikɛ ɔnɛ ndoko lushi lamondɛna awui w’amɛna ndo washa wetshelo w’oshika lo dikambo dia ngasɔ l’ɔtɛkɛta ande. L’ɔkɔngɔ diko, nde akelɛ wanɛ tshɛ wakayashaka lo dikambo dia kansɛrɛ ka lo diwɛlɛ dia vɔ mbala asawo wa lo Réveillez-vous! Nde akate ɔnɛ vɔ waki l’ɔkɔkɔ w’ɔlɔlɔ wa monga la lowando le Ɛmɛnyi wa Jehowa lo menda yɛdikɔ yakawɔshi dia sala dikambo sɔ.

Oko wasalemadiɔ lo wodja wa Groeland, Ɛmɛnyi wa Jehowa wa l’andja w’otondo wekɔ lo tetemala la sambisha lokumu l’ɔlɔlɔ “l’etungelu tshe ka la tshina di’ulungu.” (Kolosai 1:23; Etsha 1:⁠8) Oma l’ekimanyielo k’abuku w’endana la Bible, kâmɛ la Tshoto y’Etangelo la Réveillez-vous!, vɔ wekɔ lo kimanyiya weoho w’anto tshɛ dia vɔ nɛmbia ekakatanu wa nshi nyɛ, vɔ wekɔ lo tawasha ndo elongamelo ka nshi yayaye y’ɔlɔlɔ.

[Caption]

Qaanaaq (Thule), Ittoqqortoormiit, Nuuk (Godthåb)