Toyalake la Tokumbɛkumbɛ
EKƆ wolo efula dia sho mbewɔ dia mombɛ onto tokumbɛkumbɛ lam’atosalɛnde kɔlɔ. Bible toshaka alako w’eshika lo akambo wa ngasɔ. Ɔpɔstɔlɔ Paulo akafunde ate: “Nyuki kele, ku tanyutshaki kolo. Unya tadjelaki kele kanyu.”—Efeso 4:26.
Etena katosalɛ onto ɔmɔtshi kɔlɔ, kema kɔlɔ sho mboka yema ya kɛlɛ. Woho wakate Paulo ate: “Nyuki kele” mɛnyaka ɔnɛ kɛlɛ mbeyaka monga ɔlɔlɔ lo tena dimɔtshi—ondo l’etena katɛngiyawɔ kana katohembolɛwɔ onongo wɛngɛngɛ. (Ɛdika la 2 Koreto 11:29.) Ko naka hatoshidiyisha dikambo diakɔ, kete kânga kɛlɛ ka lo yoho y’ɔlɔlɔ kokaka ndjoyala l’etombelo wa kɔlɔ, tɔ mbeyaka ndjototshutshuya dia sho sala pɛkato ka woke. (Etatelu 34:1-31; 49:5-7; Osambu 106:32, 33) Ko lâsɔ, kakɔna kakokayɛ sala naka wambokôkiya kɛlɛ na?
Lo tena efula, naka ekɔ munga mɔtshi ya totshitshɛ, wɛ kokaka oyadi kandola dikambo diakɔ l’atei w’otema ayɛ ‘ko mbɔlama ki’ kana mɛnana la ɔnɛ lokosale kɔlɔ ko tɛkɛta lande dikambo diakɔ. (Osambu 4:4; Mateu 5:23, 24) Lo weoho akɔ ehende, ndeka ɔlɔlɔ tâkandudi dikambo esadi eto la ntondo ka kumbɛkumbɛ kana kɛlɛ ndjɔtɛkɔya ko ndjotondja akambo wa kɔlɔ efula.—Efeso 4:31.
Jehowa nyimanyiyaka pɛkato yaso l’otema ɔtɔi, kânga pɛkato yasalaso aha la sho mbeya. Ko lâsɔ, onde ndo sho lawɔ hatokoke nyimanyiya munga ka tshitshɛ kambotosalɛ onyaso onto?—Kolosai 3:13; 1 Petero 4:8.
Ekɔ ohomba sho nembetɛ ɔnɛ: Tshɛkɛta ya lo Grɛkɛ yokadimwami ɔnɛ “nyimanyiya” nembetshiyaka lo mɛtɛ mɛtɛ ɔnɛ: “Mbetsha.” Edimanyielo hatɔlɔmbɛ dia sho mbɔsa kɔlɔ oko kiambokambo y’anyanya kana kietawɔ. Lo tena dimɔtshi, wɛ kokaka mɛnya ɔnɛ wɛ ambodimanyiyɛ onto dikambo dimɔtshi lam’ayoyodietsha kana diohɛ, ndo mbeya ɔnɛ naka wɛ mombɛ onto kumbɛkumbɛ kete yɔ yayâhatanya wotsho ayɛ ndo fukutanya kâmɛ ka l’atei w’etshumanelo k’Akristo. Lâdiko dia lâsɔ, naka wɛ ndjâla la kumbɛkumbɛ, kete yɔ mbeyaka salɛ demba diayɛ kɔlɔ!—Osambu 103:9.
Kânga l’atei w’andja ɔnɛ wambofukutana, wɛ kokaka monga l’ɔngɛnɔngɛnɔ oma l’ewo k’oshika ka Bible k’endana la Nzambi, la Diolelo diande, ndo la sangwelo diande di’ɔlɔlɔ diakandasangoya dikambo di’anto. Naka wɛ nangaka mbeya awui akina wa lâdiko kana onto ɔmɔtshi ndja dia ndjokêtsha Bible lakayɛ aha la kɔlɔmba falanga, fundɛ Association “Les Témoins de Jéhovah” mukanda lo dihole diɛnayɛ ɔlɔlɔ lo lɛkɛ 2.
[Caption on page 32]
Onde Wɛ Nangaka Onto Ndja dia Ndjokenda Oka?