Dibuku Di’esambu Dialeka Irina Nanga
ATETE ndoko edja, Irina, yana ya yimato y’ɛnɔnyi divwa ya l’osomba wa Sofia, lo wodja wa Bulgarie, akalongola batismu oko Ɔmɛnyi wa Jehowa. Nde nangaka memba ndo nde nangaka esambu wa lo dibuku Louons Jéhovah par nos chants woho w’anyanya. Diɔ diakɔ diakayadjɛ Irina oyango wa kimɛka esambu ɛmɔtshi l’ɔtɛ ngɔndɔ tshɛ.
Mishiki aki l’atei w’elakanyelo wa la kalasa wakalekaka Irina nanga. Diɔ diakɔ diakatshikala ombetsha wa mishiki l’okandokando lam’akandɛnyi Irina ambotona memba kâmɛ l’olui w’amembi a nkembo wa la kalasa. Lande na kakatone Irina? Nɛ dia nde akeyaka ɔnɛ efula ka nkembo yakawɔ̂lɔmbaka dia nde memba tombolaka ahoka wa wodja ndo nshi y’afɛstɔ wotumbi oma lo ditshelo di’apanganu. Nkembo mɔtshi sukɛka ndo ɔtɔmbɔkwɛlɔ la akambo wa ngala dia keketsha tokanyi ta wodja w’otondo. Ombetsha kokoka mboka kanyi yaki l’Irina lo dikambo sɔ. Irina akɛnyi dimɛna fundɛ ombetsha ande mukanda, lɔkɔ nde akôlembetshiya tokanyi la wetshelo wa l’ɔtɛmwɛlɔ ande—koko ombetsha ɔsɔ kombetawɔ.
She Irina aki la kanyi mɔtshi. Nde akasha ombetsha akɔ dibuku dimɔtshi dia Louons Jéhovah par nos chants, dibuku diele la nkembo yatolangaka Irina memba. L’ɔkɔngɔ wa nshi mɔtshi, ombetsha ɔsɔ akelɛ Irina oya lo dihole diatowembaka nkembo. Nde akalɔmbɛ Irina dia nde memba nkembo mɔtshi yakandalekaka nanga lo dibuku sɔ—la ntondo k’asekande wa lo kalasa—ko ombetsha tahomaka dikembe (piano) wonya watandembe. Vɔ wakasale dikambo sɔ l’edja kolekanyi oshidi a tango w’otondo! Ombetsha ɔsɔ akahombe mbetawɔ ɔnɛ dibuku di’esambu dialeka Irina nanga diaki la mishiki ɛmɔtshi w’amɛna efula.
[Caption on page 32]
[Box on page 32]
Onde Wɛ Nangaka Onto Ndja dia Ndjokenda Oka?
Kânga l’atei w’andja ɔnɛ wambofukutana, wɛ kokaka monga l’ɔngɛnɔngɛnɔ oma l’ewo k’oshika ka Bible k’endana la Nzambi, la Diolelo diande, ndo la sangwelo diande di’ɔlɔlɔ diakandasangoya dikambo di’anto. Naka wɛ nangaka mbeya awui akina wa lâdiko kana onto ɔmɔtshi ndja dia ndjokêtsha Bible lakayɛ aha la kɔlɔmba falanga, fundɛ Association “Les Témoins de Jéhovah” mukanda lo dihole diɛnayɛ ɔlɔlɔ lo lɛkɛ 2.