Toshimu Ta Mvula K’elola Shikikɛka Mɛtɛ K’ɔkɔndɔ Wa Lo Bible

MVULA k’Elola kakalɔ lo nkɛtɛ k’otondo lo nshi ya Nɔa ekɔ dikambo diakasalema mɛtɛ. Weoho w’ɔkɔndɔ akɔ tanemaka lo toshimu ta lo wedja wotshikitanyi wa l’andja w’otondo. Lo Tchad, wodja wa l’Afrika, ase kabila kelɛwɔ Moussaye mbutaka ɔnɛ Mvula k’Elola kakalɔ nganɛ:

‘Aki nkumbo kɛmɔtshi kakadjasɛka lo dihole dimɔtshi di’etale efula. Lushi lɔmɔtshi, mama ka nkumbo kakɔ akalange mbahɛ wakinde wa ngandji shaka ya dambo. He nde ɔnɛ ɔ̂sa etole kande la okanda dia ntɔ asami. Nshi shɔ olongo aki suke suke, aha woho wayawɔ etale nshi nyɛ. Kɛdikɛdi, ndjâka wɛ mbedia lonya otsha l’olongo ko wɛ munanda olongo. Mama kakɔ akakundjola asami la wolo ande tshɛ ko asami akakadimɔ nshima keto lo tshenyi ya wonya. Koko lam’akandatɔka, nde akedia okanda etale efula l’olongo aha la mbidja yimba ko akatondola wosho l’olongo! Wonya akɔ wâmɛ, ashi wakamɛ mpongomɔ oya la nkɛtɛ. Ɔsɔ komonga mvula ka mvula. Tɔ kakalɔ tânyi esambele la etsho esambele, edja ndo lam’akadimana nkɛtɛ k’otondo l’ashi. Lam’akalɔka mvula kakɔ, olongo akamɛ mbudɛ, mbudɛ, mbudɛ, polo ndo lɛnɛ ayawɔ nshi nyɛ​—⁠lɛnɛ ahakoke onto nkoma. Ande mpokoso kakahomɔ anto lee! Tatɛ oma l’etena kɛsɔ, takashisha diɛsɛ dia munanda olongo l’anya aso.’

Dikambo dia diambo ko, toshimu ta lo nshi y’edjedja tatɛkɛta dikambo dia mvula k’elola kakalɔ lo nkɛtɛ k’otondo kokaka tanema l’andja w’otondo. Wedja w’akanga a nkɛtɛ y’Amɛrika ndo dibila diakamɛ mbidjasɛ l’Australie tshɛ diekɔ la toshimu ta mvula kakɔ k’elola. Awui wa lo toshimu takɔ mbeyaka tshikitana, koko efula ka toshimu takɔ tekɔ la kanyi y’ɔnɛ nkɛtɛ kakadimana l’ashi ndo paka anto yema tshitshɛ tsho mbakake lo wâto a woke wakasɛlɛ onto. Woho wodianganyi dui sɔ l’ahole tshɛ shikikɛka nto ɔnɛ Mvula k’Elola kakalɔ mɛtɛ l’andja w’otondo, oko wakɔndɔla Bible.​—⁠Etatelu 7:​11-20.