“Sho Tshɛ Tekɔ Ase Nkumbo Ɔtɔi”
LO ƐNƆNYI ɛnɛ wêtshi, dionga dia kanɛka anto akina kɔlɔ lo dikambo di’ɔtɛmwɛlɔ ndo lohetsho l’anto wele la woho okina wa lokoho la demba akadiangana lo nkɛtɛ k’otondo. L’ɔtɛ w’etshikitanu wa dibila, anto wakadiakema woho w’anyanya, anto wakasoyama hakoke, ndo akambo akina wa wɔma ndo wa nsɔnyi efula wakasalema. Lo ndjela alapɔlɔ ɔmɔtshi wakatondja tshunda dimɔtshi dielɛwɔ Amnesty International, lo 1994, ɛɔnywɛlɔ ka lɔkɛlɛngɛ l’onto akasokoya anto ndekana miliyɔ 23 l’andja w’otondo dia vɔ monɔ ngelo yawɔ.
Lo Rwanda oto, anto oko 500000 wakadiakema ndo akina ndekana 2000000 wakalawɔ lo dawo l’ɔkɔngɔ w’akambo a ngala tomba l’asa wa Tutsi la wa Hutu. Jurunalɛ ya la Belgique yelɛwɔ Le Soir mbutaka ɔnɛ: “Ɛmɛnyi wa Jehowa mbakaleke pɛnyahɛnyama nɛ dia vɔ konangaka nkimɛ ekoma.” Ɛmɛnyi wa Jehowa hawɔtɔ lo ata wa l’ekoma. Koko l’atei awɔ, anto nkama wakadiakema lam’akasalemaka akambo a ngala. Dikambo sɔ tôholaka ɛtɛkɛta ɛnɛ wakatɛ Yeso ambeki ande ate: ‘Nɛ dia nyu bu wa l’andja ɔnɛ, . . . andja ɔnɛ nyohetshaka.’—Joani 15:19.
Nkumbo kɛmɔtshi k’Ɛmɛnyi wa Jehowa—Eugène Ntabana nde la wadiɛnde la anande ahende—wakadjasɛka la Kigali, osomba w’owandji. Dia nde nembetshiya asukanyi ande lomangemange l’Akristo, mbala efula Eugène akatɛkɛtaka dikambo dia bougainvillier, ɔkɔdi ɔmɔtshi watomba lɛnɛ ele loowe la djungudungu.—Mateu 22:21.
Eugène akataka ate: “Lanɛ la Kigali, bougainvillier mbidjaka alɛmbɔlɛmbɔ wa beela, w’ɛnɔndɔ kana wa wɛma. Koko, alɛmbɔlɛmbɔ asɔ tshɛ wekɔ ase dioho ɔtɔi. Ngasɔ mbeso ndo sho anto. Kânga mbotshikitanyiso lo waoho, lo dangi dia lokoho la demba, ndo lo dibila, sho tshɛ tekɔ ase nkumbo ɔtɔi, nkumbo k’anto.”
Lonyangu ko, kânga mbakiwɔ akanga wa wɔladi ndo mbakawatshikalaka lomange, nkumbo kaki Ntabana kakadiakema oma le olui w’anto walanga paka ndjakana. Koko vɔ wakavu la kɔlamelo. Sho kokaka monga l’eshikikelo ɔnɛ Jehowa Nzambi ayokotsha daka diande le anto wa ngasɔ; vɔ wayolɔ dia ndjodjasɛ l’andja wele anto hawotokananɛ kɔlɔ nto. (Etsha 24:15) L’etena kɛsɔ, nkumbo kaki Ntabana, ndo anto akina, ‘wayɔngɛnangɛna woho w’anyanya la wɔladi w’efula.’—Osambu 37:11.
Kânga l’andja ɔnɛ wambofukutana, wɛ kokaka monga l’ɔngɛnɔngɛnɔ oma l’ewo k’oshika kasha Bible lo dikambo dia Nzambi, dia Diolelo diande, ndo dia sangwelo diande di’ɔlɔlɔ diendana l’anto. Naka wɛ nangaka mbeya awui akina kana onto ndjokêtsha Bible lakayɛ ofele, mbola Ɛmɛnyi wa Jehowa wa lo ngelo kodjashiyɛ kana tomɛ Association “ Les Témoins de Jéhovah “ mukanda lo B.P. 634 Limete, Kinshasa, Zaïre.
[Caption on page 32]
[Box on page 32]
Wɛ Nangaka Onto Ndjokenda?