Wa Na Wayonga Esambisha Wa Lokumu L’ɔlɔlɔ?
LO LOSANGANYA lɔmɔtshi lakɔtɔ Tshunda di’Andja w’Otondo di’Ɛkɛlɛsiya ambeta oko ɛnɔnyi 40, ase ɔtɛmwɛlɔ akɔ wakakeketshama dia “mpɛtahɛta la yimba ya ndjasha lo sambisha lokumu l’ɔlɔlɔ” ndo ndakanya ɛkɔkɔ awɔ dia vɔ “tetetaka dia tasambishaka lokumu l’ɔlɔlɔ.” L’ɔkɔngɔ w’ɛnɔnyi etanu, osasɛrdɔsɛ ɔmɔtshi w’Oseka Mupɛ welɛwɔ John O’Brien akafunde lo dibuku dimɔtshi ɔnɛ ekɔ ohomba kondja ambeki w’eyoyo lo “mbakɛndɛka” koko aha lo “mbidjasɛka tsho lawakaso.” Lo Tshango ya lo 1994, Papa l’Ɔrɔma Jean Paul II akate ate: ɔnɛ “kema etena ka mboka Evanjiliyɔ sɔnyi, ɔnɛ ekɔ etena ka sambisha [Evanjiliyɔ] oma lâdiko di’ɛtɛ a mvudu.”
Mɛnamaka ɔnɛ alako asɔ wakawashaka anto lo tena la tena dia mbakeketsha dia vɔ sambisha lokumu l’ɔlɔlɔ wakɔtɔka l’atoyi w’akanga a mpoke. Sawo dimɔtshi diakatombe lo jurunalɛ ya l’Australie yelɛwɔ Illawarra Mercury diakate ɔnɛ: “Aseka Mupɛ, wanɛ woleki mbeyama efula lo Lɛkɛ la Diko dia Nkushi, bu l’ohetoheto dia mbokoya shambo y’Ɛmɛnyi wa Jehowa lo mbetawɔ kawɔ.” Pami kɛmɔtshi akate ɔnɛ olimu wa sambisha lokumu l’ɔlɔlɔ “bu lo yimba y’Aseka Mupɛ.” Okina akakanaka ate: “Ekɔ ɔlɔlɔ di’ɔtɛmwɛlɔ vamɛ ndjâtɔla otsha la ntondo, koko aha lo takɔkɔlaka lo nkuke y’anto. Ondo ayoleka ɔlɔlɔ ndakanyaka awui a Nzambi lo kalasa ya lânde kana fundanɛka lo mikanda.” Koyanga osasɛrdɔsɛ ɔmɔtshi wele owandji wa cathédrale ka lo ngelo kɛmɔtshi kombeyaka mɛtɛ woho wakandahombe mbɔsa ɛtɛkɛta ɛsɔ waki papa l’Ɔrɔma. Nde akate ate: “Ndeka ɔlɔlɔ sho keketsha anto dia vɔ ndjela Evanjiliyɔ weyawɔ lo nsɛnɔ yawɔ vamɛ. Kana dui sɔ mɛnyaka ɔnɛ pombaka ntshɔka lo soko la soko dia tasambishaka, lɛsɔ dimi haleye.” Ɔtɛ a dui wa lo sawo diakɔ diakafundama lo jurunalɛ yakɔ mbutaka dikambo sɔ ɔlɔlɔ ɔnkɔnɛ lo tshena pe: “Aseka Mupɛ hawolange ndjela dako dia Papa l’Ɔrɔma dia sambisha.”
Kânga mbambokita Lokristokristo tatala lo sambisha lokumu l’ɔlɔlɔ, Ɛmɛnyi wa Jehowa ndekana miliyɔ tshanu wekɔ lo ndjela didjango dia Yeso dia ‘ntshɔ . . . ko mbetɛ anto wa wedja tshɛ ambeki.’ (Mateu 28:19, 20; ɛdika la Etsha 5:42.) Esambishelo kawɔ ka lo soko la soko kekɔ lo salema nshi nyɛ lo wedja ndekana 230. Losango latawɛmbɛ lekɔ losango l’ɔlɔlɔ, lɔ mbikaka epole ɔsɛkɛ lo alaka w’amɛna efula wa lo Bible wêndana la nshi yayaye. Lande na kahayasawola la wɔ mbala kayaye naka vɔ wamboya lakayɛ na?
[Caption on page 32]
[Box on page 32]
Onde Wɛ Nangaka Onto Ndja dia Ndjokenda Oka?
Kânga l’atei w’andja ɔnɛ wambofukutana, wɛ kokaka monga l’ɔngɛnɔngɛnɔ oma l’ewo k’oshika ka Bible k’endana la Nzambi, la Diolelo diande, ndo la sangwelo diande di’ɔlɔlɔ di’endana l’anto. Naka wɛ nangaka mbeya awui akina kana onto ɔmɔtshi ndja dia ndjokêtsha Bible lakayɛ aha la kɔlɔmba falanga, mbola Ɛmɛnyi wa Jehowa wa lo ngelo kodjashiyɛ kana tomɛ Association “ Les Témoins de Jéhovah “ mukanda lo B.P. 634 Limete, Kinshasa, Zaïre.