Diwala Di’ɛnɔnyi 403 Diaya Lo Pâ

LO WODJA wa Suède, Ɛkɛlɛsiya la Lɛɛta waki la diokanelo di’efula l’edja k’ɛnɔnyi ndekana 400. Koko kakianɛ, diwala dia l’asa ɔtɛmwɛlɔ la Lɛɛta diɔyɛkayɛka.

L’ɔnɔnyi wa 1593, ɔtɛmwɛlɔ w’Asɔnyi wayela wetshelo waki Luther wakayoyalaka ɔtɛmwɛlɔ wa Lɛɛta, ndo Ase Suède tshɛ wakahombaka batizama l’ɔtɛmwɛlɔ ɔsɔ. L’ɔkɔngɔ w’ɛnɔnyi efula, l’edja k’ɛnɔnyi wa 1850, otshikitanu ɔmɔtshi wakayosalemaka. Komonga nto ohomba dia paka Ase Suède batizama; koyanga mbakidiɔ ɔsɔku, vɔ wakɔsamaka paka oko ase Ɛkɛlɛsiya waki Luther. Ɔnkɔnɛ, vɔ wakalɔmbamaka dia kimɔka % 1 oma l’elambo washawɔ Lɛɛta dia kimanyiya Ɛkɛlɛsiya ndo mbofuta l’ɔtɛ w’elimu ɛmɔtshi wakambɛwɔ ase ngelo. Atete ndoko edja, otshikitanu okina wakasalema. Tatɛ oma l’ɔnɔnyi wa 1952, lo ndjela ɛlɛmbɛ wa Lɛɛta, Ase Suède wakakoke sɔna dia tomba oma l’ɔtɛmwɛlɔ ɔsɔ ko tshungɔ oma l’ɔkɛndɛ wa futaka etenyi ka woke k’elambo walɔmba ɛkɛlɛsiya.

L’ɛnɔnyi wêtshi ɛnɛ, Ɔtɛmwɛlɔ w’Asɔnyi wayela wetshelo waki Luther wakatetemala shisha lowandji lawɔ la Suède. Ɔsɔ aki dikambo diakahombama paka salema nɛ dia % 10 y’anto wodjashi la Suède wekɔ anto wakaye oma lo wedja ekina ndo vɔ kema Ase Ɛkɛlɛsiya waki Luther, l’atei awɔ mbele ndo Ase Juda, Aseka Mupɛ, la wa Mizilima. Ɔnkɔnɛ, l’etatelo k’ɔnɔnyi wa 1996, paka % 86 tsho y’Ase Suède mbaki l’Ɛkɛlɛsiya waki Luther, ndo lofulo l’anto wa lɔkɔ lekɔ lo tatetemala kitakita.

Diatɔnelo diekɔ lo taleke monga l’asa Ɛkɛlɛsiya la Lɛɛta nɛ dia lofulo l’anto wahadje yimba l’akambo w’ɔtɛmwɛlɔ lekɔ lo tadɛ mbudɛ tsho. Wamboshilaka mbuta ɔnɛ nkumekanga ka wodja ɔsɔ halɔmbama dia paka monga ose ɔtɛmwɛlɔ waki Luther, ndo ana wele ambutshi awɔ wekɔ ase ɔtɛmwɛlɔ ɔsɔ hawohombe mbɔsama oko Ase Ɛkɛlɛsiya waki Luther, Ɛkɛlɛsiya wa Lɛɛta. Ndo nto, lo ndjela jurunalɛ yelɛwɔ The Dallas Morning News, oma l’etatelo k’ɔnɔnyi wa 2000, “parwasɛ ya lo wodja vɔ la Lɛɛta wayɛdikola nɛmɔ dia efula ka diangɔ diele l’Ɛkɛlɛsiya ko dikahana. Ɛkɛlɛsiya pombaka kitshakitsha lofulo la falanga yakondjawɔ l’ɔnɔnyi, dɔlara miliyara 1,68; efula ka falanga yakɔ shɔ ndjâka oma l’elambo wakɔngɔla Lɛɛta.” L’ɔkɔngɔ w’ɔnɔnyi wa 2000, ɔtɛmwɛlɔ ɔsɔ vamɛ mbayɔsɔnaka episkɔpɔ awɔ.

L’etena kɛnɛ kele lo Lokristokristo anto efula hawodje yimba l’akambo w’ɔtɛmwɛlɔ ndo lofulo l’anto awɔ lekɔ lo takitakita, Ɛmɛnyi wa Jehowa wa la Suède wekɔ lo tatetemala la fulanɛ. Annuaire des Témoins de Jéhovah 1997 mɛnyaka ɔnɛ lo wodja ɔsɔ apandjudi wa Diolelo diaki Nzambi waya 24487, ndo suke la % 10 l’atei awɔ wekɔ lo sambisha oko ambatshi mboka wa pondjo. Efula l’atei awɔ ngɛnangɛnaka kondja waɛsɛ wa weke l’olimu wa Nzambi. Ɛnyɛlɔ, lo losanganya la distrikɛ l’Ɛmɛnyi wa Jehowa la l’ɔnɔnyi wa 1995, anangɛso 20 kâmɛ ndo wadiɛwɔ wakalɔmbɛ dia ntshɔ lo Kalasa ka Ngiliyadɛ kaki la Société Watchtower, Kalasa ka wa misiyɔnɛrɛ. L’etena kɛsɔ, aki suke l’Ase Suède 75 wakalongola apɔlɔmɛ wa lo kalasa ya Ngiliyadɛ ya l’ɛnɔnyi wakete ndo wakatomama oko wa misiyɔnɛrɛ lo wedja efula wotshikitanyi wa l’andja ɔnɛ. Lo mɛtɛ, ɛnyɛlɔ kawɔ k’ɔlɔlɔ ndo mikanda wakiwɔ w’ekeketshelo la woho watshɔwɔ dia tênda anangɛwɔ wa la Suède keketshaka wanɛ walongamɛ kondja diɛsɛ sɔ dia woke ɛlɔ kɛnɛ.

Ɔnkɔnɛ, etena kɛnɛ kasowa miliyɔ y’anto wa lo Lokristokristo la ndjala ka lo nyuma, Ɛmɛnyi wa Jehowa ‘wekɔ lo mbuda ekoko w’ɔngɛnɔngɛnɔ nɛ dia vɔ wekɔ l’ɔlɔ l’etema awɔ.’​—⁠Isaya 65:​13, 14.

Kânga l’andja ɔnɛ wambofukutana, wɛ kokaka monga l’ɔngɛnɔngɛnɔ oma l’ewo k’oshika kasha Bible lo dikambo dia Nzambi, dia Diolelo diande, ndo dia sangwelo diande di’ɔlɔlɔ diendana l’anto. Naka wɛ nangaka mbeya awui akina kana onto ndjokêtsha Bible lakayɛ ofele, mbola Ɛmɛnyi wa Jehowa wa lo ngelo kodjashiyɛ kana tomɛ Association “ Les Témoins de Jéhovah “ mukanda lo B.P. 634 Limete, Kinshasa, Zaïre.

[Caption on page 31]

[Box on page 31]

Wɛ Nangaka Onto Ndjokenda?