Onde Onto Ntshaka Awui Wa Losembwe
Lo shashimoya kana lɔsɔna?
“KÂNGA mbahamatosalaka awui wa losembwe tena tshɛ, dimi mbâsalaka mbala mɔtshi lo shashimoya.” Ngasɔ mbakate Autolycus, otshi wa kɔlɔ ɔmɔtshi lo dibuku di’ɛkɔndɔ diaki William Shakespeare dielɛwɔ ɔnɛ: The Winter’s Tale. Dui sɔ mɛnyaka lɛnɛ okimame wɛɔdu w’anto—saki kele laso ka ntsha awui wa kɔlɔ watotombaka oma lo ‘otema a lokeso.’ (Jeremiya 17:9; Osambu 51:5; Romo 5:12) Ko onde, dikambo sɔ mɛnyaka ɔnɛ sho ndoko l’ɔsɔnwɛlɔ wahombaso sala lam’eso la ntondo ka dikambo dimɔtshi oka? Onde onto salaka dui dimɔtshi di’ɔlɔlɔ paka lo shashimoya? Atonga na!
La ntondo k’ana w’Ase Isariyɛlɛ mbɔtɔ lo Nkɛtɛ ya Daka, Mɔsɛ akawasha alako amɔtshi lam’akawahange l’oswe wa Mɔaba. Nde akâlɔmbɛ dia vɔ sɔna mboka kɛmɔtshi l’asa mboka hiende yɛnama hwe. Kitanyiya ɛlɛmbɛ wa Nzambi dia kondja ɛtshɔkɔ, kana mbahindola ko muna etombelo wa kɔlɔ w’oma lo pɛkato. (Euhwelu k’Elembe 30:15-20) Vamɛ mbakahombe nsɔna.
Oko weso la lotshungɔ la sɔna kɛnɛ kalangaso, ndo sho lawɔ mbele l’ɔsɔnwɛlɔ ɔmɔtshi. Oyadi Nzambi—kana onto okina—ndoko ɔnɛ latotshutshuya dia sho sala ɔlɔlɔ kana kɔlɔ. Koko anto amɔtshi mbeyaka ndjambola la kanyi y’ɔlɔlɔ ɔnɛ: ‘Naka otema aso mɛngamaka paka otsha l’akambo wa kɔlɔ, ngande ayoteya ntsha akambo w’ɔlɔlɔ na?’ Mɛtɛ, onganga wasaka hemɔ ka lo wanyu tɔsɛdingolaka wanyu la yambalo tshɛ dia nde mɛna wanɛ wambotshima weoko kana wôtalana la ntondo ka hemɔ ndjosambanɛ lo wanyu akina. Woho akɔ wâmɛ mbahombaso sɛdingolaka otema aso wa didjidji dia tayangaka wɛɔdu kana lɔkɛwɔ la kɔlɔ lokuki mbika edo lɔkɔ. Lande na? Nɛ dia oko akate Yeso, “uma l’utema katutumbaka tukanyi ta kolo, diakanelu, luseka, munanyi, uvi, omenyi wa kashi, la dimamanyelu.”—Mateu 15:18-20.
Dia kokɛ nnu, onganga pombaka minya oseka yangɔ tshɛ ya mindo yayondɛna lɔkɔ. Woho akɔ mbele, sho pombaka mbɔsa tɛdikɔ ta wolo dia minya “tukanyi ta kolo” ndo nsaki ya kɔlɔ oma l’otema. Naka tayâlaka Bible, Dui dia Nzambi ndo ndjaɔtɔnganyiyaka la kɛnɛ katatɔ, kete hatoteyaka paka mboka y’Otungi aso tsho, koko, tayêkaka nto dia ntsha awui w’ɔlɔlɔ.—Isaya 48:17.
Davidi, Nkumekanga ka l’Isariyɛlɛ akakondja ndamɛmɛ ekimanyielo k’efula lo ta diakandalɔka dia ntsha kɛnɛ kele ɔlɔlɔ. Nde akalɔmbɛ ate: “We [Nzambi], utungeli utema wa pudipudi, [“dja yimba y’oyoyo le mi, yimba yoshikikadi,” NW].” (Osambu 51:10) Eelo, naka sho ndjaɛkɛ le Jehowa Nzambi l’alɔmbɛlɔ, kete ndo sho lawɔ kokaka mbidja shɛngiya yaso ya ntsha awui wa kɔlɔ otshumba ndo monga la “yimba y’oyoyo” ya ntsha awui w’ɔlɔlɔ. Ɔsɔku mbahatatosalaka awui w’osembwe paka lo shashimoya. Koko tayowasɔnaka lɔsɔna dia mbasalaka.
[Caption on page 19]
[Caption on page 19]
Oko wakadisale Davidi, naka sho nɔmbaka Jehowa, kete nde ayotokimanyiyaka dia sho salaka awui w’ɔlɔlɔ