Tuminadi Ta Lâdiko Ta La Connecticut Tambokeketsha Lotshungɔ Lele l’Ɔkɔnyi

LO NGƆNDƆ ka Mɔmbi 8, l’ɔnɔnyi wa 1996, Tuminadi ta Lâdiko ta la Connecticut, lo wodja w’États-Unis d’Amérique, takakeketsha lotshungɔ lele l’Ɛmɛnyi wa Jehowa dia ntona wodjelo wa dikila. Yɛdikɔ shɔ yakayotola yɛdikɔ ya ntondo yakɔshi toshushi ta lo tuminadi ta ntondo.

Lo ngɔndɔ ka Loseketanya, 1994, Ɔmɛnyi wa Jehowa welɛwɔ Nelly Vega akamɛ kɛla dikila efula l’ɔkɔngɔ wa diwutshi diande dia ntondo. Wakahekɔ sala tshɛ dia memɛ ɔkɛlɛlɔ ande wa dikila, koko aki paka tshanana. Lam’ele pâ kaki la kadiyɛso Nelly kakatalekaka ndeka tsho, enganga wakayange woho wa kondja dikimɔ oma le toshushi dia vɔ mbodja dikila. Kadiyɛso Nelly akashile mbika lohita lo mukanda w’ɔnɛ: lo nshi yemi lo lopitadi, aha mbidjami dikila kana mbishami ekanga wɔsɔhanyemi la dikila; lo yoho shɔ, nde akɛnya ɔnɛ oyadi kakɔna tshɛ kayoyotomba oma lo yɛdikɔ yamondɔsa, enganga hawotoyala l’onongo. Koyanga mbakidiɔ ɔsɔku, enganga wakataka ɔnɛ naka tekɔ lo mona dia mbodja dikila la wolo, kete tekɔ lo nyanga wahɔ w’ɔn’ashashi lele l’ohomba wa nyango. Toshushi ta lo tuminadi ta ntondo wakakiyanyaka nto ɔnɛ, lâdiko di’oshishelo wa dikila, kadiyɛso Nelly aki osekaseka wa omoto waki la demba dia wolo. Ɔnkɔnɛ, kânga mbakatonaka om’aki kadiyɛso Nelly, nde l’ɔtɛkɛtɛdi wakinde, toshushi takasha enganga dikimɔ ko wakawodje dikila la wolo.

L’ɔkɔngɔ diko, wakayɔtɔlaka onongo ɔsɔ lo Tuminadi ta Lâdiko ta la Connecticut. Lɛkɔ, toshushi tshɛ taketawɔ ɔnɛ enganga wa lo lopitadi lɔsɔ wakɔnyɔla lotshungɔ laki kadiyɛso Nelly. Yɛdikɔ yakɔshi toshushi yakɛnyaka ɔnɛ: “Toshushi ta lo tuminadi ta ntondo wakelɛ anto la wanyandja wa mamba dia vɔ ndjosamba l’atei a deke, ɔnkɔnɛ anto wa lo bɛkɛ diakɔ pende kokoka nembetshiya tokanyi tawɔ dimɛna dimɛna.”

Yɛdikɔ shɔ yakɔshi Tuminadi ta Lâdiko ta la Connecticut yekɔ ohomba efula le anto akina wele bu Ɛmɛnyi wa Jehowa. Yɔnɛ Donald Ridley, ɔtɛkɛtɛdi waki kadiyɛso Nelly, akate ate: “Yɛdikɔ shɔ yekɔ ohomba efula le ɛkɔnyi tshɛ wakoka ntona tɛdikɔ t’adɔkɔtɛlɛ. Yɛdikɔ shɔ yayoshimba enganga di’aha vɔ tshutshuya ɛkɔnyi dia vɔ ntsha kɛnɛ kahɔtɔnɛ la tokanyi tawɔ, oyadi lo kɛnɛ kendana l’ɔtɛmwɛlɔ awɔ kana l’akambo akina.”

Kânga l’andja ɔnɛ wambofukutana, wɛ kokaka monga l’ɔngɛnɔngɛnɔ oma l’ewo k’oshika kasha Bible lo dikambo dia Nzambi, dia Diolelo diande, ndo dia sangwelo diande di’ɔlɔlɔ diendana l’anto. Naka wɛ nangaka mbeya awui akina kana onto ndjokêtsha Bible lakayɛ ofele, mbola Ɛmɛnyi wa Jehowa wa lo ngelo kodjashiyɛ kana tomɛ Association “ Les Témoins de Jéhovah “ mukanda lo B.P. 634 Limete, Kinshasa, Zaïre.

[Caption on page 32]

[Box on page 32]

Wɛ Nangaka Onto Ndjokenda?