Onde Onto Lotshukami Kokaka Monga Emuma?

DIA pemba mbokanya kɛnɛ katetemala anto mbuta lo dikambo dia lomuma laki Mariya la diwala diande nde la Yɔsɛfu, asangi w’asango efula sangaka Yɔsɛfu oko onto laki aya osombe. Vɔ fɔnyaka ɔnɛ Yɔsɛfu aki mɛtɛ paka oko olami waki Mariya koko aha oko omɛnde. Koko atete ndoko edja, Papa l’ɔrɔma Jean Paul II akatondja kanyi mɔtshi yotshikitanyi lo dikambo sɔ. Nde mbutaka ɔnɛ: “L’etena kɛsɔ kakawatshukana, Yɔsɛfu komonga osombe w’onto.” Ɔnkɔnɛ, “lonto lande la kokele la l’etei oma lo losha lakawosha Nzambi mbakokimanyia dia nde mbidjasɛ la Mariya kâmɛ aha la vɔ mboka saki ka mbeyana.”

Ko naka Mariya aki la kanyi ya tshikala emuma pondjo pondjo, lande na kakandetawɔ vɔ mambɛ na? Papa l’ɔrɔma kadimolaka ate: “Sho fɔnyaka dia ondo l’etena kakawambanɛ, Yɔsɛfu nde la Mariya wakokana dia mbidjasɛ oko wadi l’omi aha la mbeyana.”

Koko, Bible ekɔ la kanyi yotshikitanyi lo dikambo sɔ. Ɔkɔndɔ waki Mateo mbutaka ɔnɛ Yɔsɛfu “kumbeyana la ndi edja ndu lam’akanduti ona pami.” (Mateu 1:​25, sho mbɛnganyisha alɛta ango.) L’ɔkɔngɔ wa Yeso mbotɔ, Yɔsɛfu nde la Mariya wakeyana. Djembetelo mɔtshi yashikikɛ dikambo sɔ ele l’ɔkɔngɔ diko, ɔkɔndɔ wa lo Evanjiliɔ ɔsɔ mɛnyaka dia Yeso aki la anango ndo akadiyɛnde.​—⁠Mateu 13:​55, 56.

Ɔnkɔnɛ, lam’ata Bible ɔnɛ Mariya aki emuma lam’akandote Yeso, dikambo sɔ hɛnya ɔnɛ nde akatshikala paka emuma keto lo nshi nkina tshɛ yakandadjasɛka la Yɔsɛfu lo diwala.