Onde akakoke mbodia ana wele la lɔkɛwɔ l’ɔlɔlɔ?
YƆNƐ Robert Glossop ɔtɔi ɔmɔtshi wa lo tshunda dia l’Ottawa, lo Canada, dielɛwɔ Vanier dienda akambo wa nkumbo akɛnyi ate: “Tekɔ lo nsɛna ɛlɔ kɛnɛ l’atei wa tshunda di’anto wele la dionga dia wolo mana fundo, anto wele l’eshidimikwelo wa weho la weho lɛnɛ ele ndoko ɛlɛmbɛ wafɔna wendana la lɔkɛwɔ l’ɔlɔlɔ.” Dikambo sɔ diekɔ l’etombelo akɔna? Alapɔlɔ ɔmɔtshi wa lo jurunalɛ yelɛwɔ The Toronto Star mbutaka ɔnɛ: “Tɔkɛndakɛnda tamboleka tshɔ waemi, ɛlɔngɔlɔngɔ wamboleka ndjasha l’awui wa ngala ndo woyadiaka heyama.”
Dikambo sɔ diambekɔnɛ l’Amɛrika wa la ngɛl’a kushi. Bill Damon, ɔnɔmbɔdi wa (centre du développement humain) ka lo kalasa k’adidi ka Brown lo wodja wa Rhode Island, lo États-Unis, akeke akambo asɔ la Grande-Bretagne, ndo lo wedja ekina wa l’Erɔpɛ, ndo l’Australie, l’Isariyɛlɛ, la lo Japon. Nde ekɔ lo mbika epole ɔsɛkɛ lo woho ɔnɛ wele ɛtɛmwɛlɔ, kalasa la atshunda akina hawoyosha ɛlɔngɔlɔngɔ ɛlɔmbwɛlɔ ka dimɛna. Nde fɔnyaka ɔnɛ eshidimikwelo kaso “hayokimanyiya ɛlɔngɔlɔngɔ la esekaseka dia vɔ koma anto w’eshika ndo weya akambo.” Lam’akandashilaka bɛnyɛlɔ di’ambutshi weya akambo wa mbodia ana wetsha ɔnɛ, “paka lo diɛsɛ kana mbala mɔtshi ntsho monga ohokwelo la etombelo w’ɔlɔlɔ lo yonge y’ɔna kana mbɔngɛnyangɛnya,” Damon shikikɛka ɔnɛ ɔsɔ mbele “yoho ya mbodia ana w’ɛtɛ wolo ndo waha l’okitanyiya.”
Ko ɛlɔ kɛnɛ ɛlɔngɔlɔngɔ wekɔ l’ohomba w’ɛngɔ kakɔna na? Vɔ wekɔ l’ohomba w’ohokwelo wa la ngandji wa tena tshɛ dia mingola yimba la etema awɔ. Lam’ele ɛlɔngɔlɔngɔ tshikitana, pombaka mbahokola lo weho wotshikitanyi. Naka ohokwelo wambɔsɛngiyama la ngandji, kete vɔ kokaka mbishama l’ekanelo ka yimba. Diɔ diakɔ diatotɛ Tukedi 8:33 dia ‘nonga ohokwelo.’ Koko ana amɔtshi hawoke ‘lohango la l’onyɔ oto.’ Le wɔ, dilanya diasungana mbeyaka monga ohomba lo tena dimɔtshi. (Tukedi 17:10; 23:13, 14; 29:19) Lam’asha Bible dako sɔ, tɔ hatshutshuya ombutshi dia nde mbidja ɔna fimbo la nkɛlɛ kana mbokula lodi la mamba lakoka ndo mbɔkɔla etenyi kɛmɔ ka demba kana mbohumuya mpota. (Tukedi 16:32) Koko, ɔna pombaka mbeya bonde kawongolawɔ ndo mbeya ɔnɛ ekɔ nɛ dia ombutshi ekɔ kâmɛ la nde ndo mbetaka la nde wedi.—Ɛdika la Heberu 12:6, 11.
Woho wa dako di’ohomba efula sɔ ndo diotumbi oma lo Bible mɛnyama hwɛ lo dibuku Sheke y’Ɔngɛnɔngɛnɔ wa lo Nkumbo.